Puracügü 24:1-27
24 Rü wüxime̱ẽ̱xpü̱x ga ngunexü̃ ngupetügu, rü Jerucharéü̃wa ne naxũ ga paigüeru ga Ananíã, namaã ga nhuxre ga ãẽ̱xgacügü ga jaguã̱xgü rü wüxi ga jatü ga meãma dexaxü̃ cuáxü̃ ga Téturu ga naẽ́ga. Rü nümagü rü ãẽ̱xgacü ga Ferixü̃tawa naxĩ na namaã nüxü̃ janaxugüxü̃ca̱x ga tü̱xcüü̃ Pauruxü̃ na ínaxuaxü̃güxü̃.
2 Rü jexguma Pauruxü̃ jéma nagagügu, rü inanaxügü ga Téturu ga nüxü̃ na jaxuxü̃, rü nhanagürü:
—Moxẽxü̃chima i cuma Pa Ãẽ̱xgacü Pa Ferix, erü cugagu nixĩ i meãma toxü̃ naxüpetüxü̃ i nuã. Rü cugagu nixĩ i nuã i nhama i nachiü̃ãnewa na toxü̃́ nangẽxmaxü̃ i muxü̃ma i mexü̃gü.
3 Rü moxẽ cuxna taxã erü guxü̃wama rü guxü̃guma cuxü̃tawa tanajauxgü i guxü̃ma i ngẽma mexü̃gü Pa Ãẽ̱xgacüxü̃chima, Pa Ferix.
4 Notürü tama jexeraãcü cuxü̃ chachixewechaü̃. Rü ngẽmaca̱x cuxna chaca na paxaãchi meã toxü̃́ icurüxĩnüxü̃.
5 Rü nhu̱xma rü wüxi i orexü̃ cumaã chixuxchaü̃. Rü marü nüxü̃ tadau i nhaã jatü rü wüxi i ḏaaweanerüü̃ na jiĩxü̃, erü chixexü̃maã najaxucu̱xẽgü i Judéugü i guxü̃ i naãnewa na nügü jatojexü̃ca̱x. Rü nüma nixĩ i norü ãẽ̱xgacü i ngẽma duü̃xü̃gü i nüxü̃́ jaxõgüxü̃ i Ngechuchu i Nacharétucü̱̃ã̱x.
6 Rü toma tajajauxgü i nhaã jatü ga jexguma tupauca ga taxü̃ne naxüxaxẽẽchaü̃gu. Rü torü mugü tomaã nüxü̃ ixuxü̃ãcüma nüxna tacagüchaü̃.
7 Notürü ínangu ga churaragüarü ãẽ̱xgacü ga Ríchiu, rü muxü̃ma ga norü churaragümaã toxna nanapu. Rü toma i ínaxuaxü̃güxe, rü toxü̃ namu na cuxü̃tawa taxĩxü̃ca̱x.
8 Rü nhu̱xma rü marü name i cumatama nüxna cuca i ngẽma Pauru na nüxü̃ cucuáxü̃ca̱x na aixcuma jiĩxü̃ i guxü̃ma i ngẽma naxca̱x ítanaxuaxü̃güxü̃ i tomax —nhanagürü.
9 Rü jema togü ga Judéugü rü ta, rü nhanagürügü: —Rü aixcuma nixĩ i ngẽma ore —nhanagürügü.
10 Rü jexguma ga guma ãẽ̱xgacü ga Feri rü naxme̱xmaã Pauruxü̃ naxuneta na jadexaxü̃ca̱x. Rü jexguma ga Pauru, rü nhanagürü: —Chorü taãẽmaã cupe̱xewa chaugüca̱x chidexa, erü nüxü̃ chacua̱x na mucüma ga taunecü nhama i nachiü̃ãneãrü ãẽ̱xgacü cuiĩxü̃.
11 Marü name i cumatama naxca̱x ícuca, erü 12 i ngunexü̃xĩcatama nangupetü ga na Jerucharéü̃wa changuxü̃ na Tupanaxü̃ chajarücua̱xüü̃xü̃ca̱x.
12 Rü bai ga tupauca ga taxü̃newa, rü bai ga ngutaque̱xepataü̃güwa, rü bai ga ngürüanewamare ga ĩãnewa choxü̃ nadaugü ga Judéugü ga na texémaã íchiporagacüüxü̃, rü na chananuẽxẽẽxü̃ ga duü̃xü̃gü.
13 Rü nhu̱xma i nhaã duü̃xü̃gü i choxü̃ íxuaxü̃güxü̃, rü bai i wüxiwaxüra cuxca̱x nanango̱xẽẽgü na aixcuma jiĩxü̃ i ngẽma naxca̱x choxü̃ ínaxuaxü̃güxü̃.
14 Notürü cumaã nüxü̃ chixu, rü nuxcümaxü̃güxü̃ ga chorü o̱xigüarü Tupanaãxü̃́ nixĩ i chapuracüxü̃ ngẽxgumarüü̃ i choxü̃́ na nanaxwa̱xexü̃ ja Ngechuchu ja Cristu ja nüxü̃́ chajaxõcü. Rü ngẽma nixĩ i nümagü i Judéugü naxugüãgu rü na:
“Tomare i ore”, nhagüxü̃. Rü aixcuma nüxü̃́ chajaxõ i guxü̃ma i Tupanaãrü mugü ga Muĩsé ümatüxü̃ rü guxü̃ma i Tupanaãrü ore ga nuxcümaxü̃güxü̃ ga norü orearü uruü̃gü ümatügüxü̃.
15 Rü chama rü ta jema nuxcümaxü̃güxü̃rüü̃ Tupanaãxü̃́ chajaxõ. Rü naxrüü̃ chajaxõ rü tá wena na namaxẽxü̃ i ngẽma juexü̃ i mexü̃gü rü chixexü̃gü.
16 Rü ngẽmaca̱x nixĩ i guxü̃guma meã chaugüna chadauxü̃ na chauãẽwatama nüxü̃ chacuáxü̃ca̱x na chamexü̃ i Tupanape̱xewa rü duü̃xü̃güpe̱xewa.
17 Rü dücax, Pa Ãẽ̱xgacüx, rü nhuxre ga taunecü togü ga nachiü̃ãnegu chixũgü, rü düxwaxarü chauchiü̃ãneca̱x wena chataegu na nuã chanangexü̃ca̱x ga dĩẽru ga namaã nüxü̃ charüngü̃xẽẽchaü̃xü̃ i chautanüxü̃gü i Judéugü i nüxü̃́ nataxuxü̃, rü nuã Tupanana chanaxãxü̃ca̱x i chorü ãmaregü.
18 24:18-19 Rü jema ngunexü̃gu rü tupauca ja taxü̃newa Tupanana íchanaxã ga chorü ãmaregü, nawena na chaugü chamexẽẽxü̃ ga Tupanape̱xewa. Rü tama muxü̃ ga duü̃xü̃gümaã chajexma, rü tama chananuẽxẽẽ ga duü̃xü̃gü ga jexguma nhuxre ga Judéugü ga Áchiaanecü̱̃ã̱x choxü̃ daugügu ga jéma tupauca ja taxü̃newa. Rü ngẽmagü chi nixĩ i nhu̱xma nuã ĩxü̃ na choxü̃ ínaxuaxü̃güxü̃ca̱x ega ṯacü nüxü̃́ ngẽxmagu i chauchiga.
19 Nüü̃ nadau 24:18
20 Rü ngẽxguma tama ṯacü nüxü̃́ ngẽxmagu ga jema tupauca ja taxü̃newa choxü̃ daugüxü̃, ¡rü ẽcü nhaã nhu̱xma nuxmagüxü̃ cumaã nüxü̃ ixugü na ṯacü ga chixexü̃xü̃ chawa nadaugüxü̃ ga jexguma Judéugüarü ãẽ̱xgacügütücumüpe̱xewa chajexmagu!
21 Rü nhaxü̃xĩcatama nixĩ ga chorü ore ga tagaãcü namaã chachonagüxü̃ ga jexguma jema ãẽ̱xgacügüpe̱xewa chajexmagu:
“Rü nhu̱xma rü choxna pecagü erü chama chajaxõ i wena tá na namaxẽxü̃ i juexü̃”, nhacharügü ga jexguma —nhanagürü ga Pauru.
22 Notürü ga Feri rü meã nüxü̃ nacua̱x ga jema Cristuaxü̃́ jaxõchiga. Rü jemaca̱x ga jexguma Pauruaru orexü̃ naxĩnügu, rü ínajachaxãchi ga na nüxna nac̱axü̃, rü nhanagürü Judéugüxü̃: —Ngẽxguma churaragüarü ãẽ̱xgacü ja Ríchiu núma ũxgu, rü tá meãma nüxü̃ chacua̱x i ngẽma naxca̱x ípenaxuaxü̃xü̃ —nhanagürü.
23 Rü jexguma ga Feri rü norü capitã́ũxü̃ namu ga na Pauruna nadauxü̃ca̱x. Notürü tama nanapocuxü̃chi, rü tama nanachu̱xu ga na naxü̃tagu naxĩãneãxü̃ ga namücügü, rü nüxü̃ na nangü̃xẽẽgüxü̃.
24 Rü nhuxre ga ngunexü̃ marü ngupetügu rü wena jéma naxũ ga Feri ngĩmaã ga naxma̱x ga Drusíria ga Judéu ixĩcü. Rü Pauruca̱x najacaxẽẽ, rü nüxü̃ naxĩnü ga jema ore ga Pauru namaã nüxü̃ ixuxü̃ ga Cristuaxü̃́ na jaxõxü̃chiga.
25 Notürü jexguma Pauru meãma namaã nüxü̃ ixuxgu na nhuxãcü Tupana naxwa̱xexü̃ na meã imaxü̃xü̃ rü nhuxãcü nanaxwa̱xexü̃ na tórü maxü̃maã meã icuáxü̃ rü nhuxãcü tá tüxna nac̱axü̃ i tórü maxü̃chiga, rü poraãcü naḇaixãchiãẽ ga Feri. Rü düxwa nhanagürü nüxü̃: —¡Ẽcü íixũ i nhu̱xmax! Rü ngẽxguma nhuxguacü icharüxã̱xmaregu, rü wena táxarü cuxca̱x changema —nhanagürü.
26 Jerü Feri ínanaṉg̱uxẽẽ na Pauru chi dĩẽru nüxna ixãxü̃ na jangéãxü̃ca̱x, rü jemaca̱x muẽ̱xpü̱xcüna naxca̱x nangemaxü̃, rü namaã nidexaxü̃.
27 Rü taxre ga taunecü jemaãcü nixĩgü. Rü ínanguxuchi ga Feri ga na ãẽ̱xgacü jiĩxü̃, rü nachicüü ningucuchi ga Pórchiu ga Festu. Notürü nüma ga Feri, rü Judéugümaã nügü namecümaxẽẽchaü̃, rü jemaca̱x tama ínananguxuchixẽẽ ga Pauru.
