Puracügü 25:1-27
25 Rü Checharéawa nangu ga Festu na jéma ãẽ̱xgacüxü̃ jaxücuxü̃ca̱x. Rü marü tamaẽ̱xpü̱x ga ngunexü̃ jéma najexmagu, rü wenaxãrü inaxũãchi, rü Jerucharéü̃wa naxũ.
2 Rü jéma Jerucharéü̃wa rü jema paigüarü ãẽ̱xgacügü rü Judéugüarü ãẽ̱xgacügü rü Pauruxü̃ ínaxuaxü̃gü Festupe̱xewa.
3 Rü naxca̱x ínacagü ga Jerucharéü̃wa Pauruxü̃ na namuxü̃ca̱x. Jerü nümagü rü nagu narüxĩnüẽ na namagu jacu̱xéü̃güãxü̃ na jexma jama̱xgüãxü̃ca̱x.
4 Notürü ga Festu rü nanangãxü̃, rü nhanagürü: —Checharéagu napocu i Pauru, rü chama rü tá paxa ngẽ́ma Checharéawa chaxũ.
5 Rü ngẽmaca̱x name nixĩ i perü ãẽ̱xgacügü rü chawe narüxĩ i Checharéawa, rü ngẽxguma ṯacü rü chixexü̃ naxü̱xgu i ngẽma jatü, rü ngẽ́ma tá nixĩ i chamaã nüxü̃ peixugüxü̃ —nhanagürü.
6 Rü maneca 8 rü e̱xna 10 ga ngunexü̃ Jerucharéü̃wa najexma ga Festu, rü nhu̱xmachi Checharéaca̱x nataegu. Rü jexguma ínanguxguarü moxü̃ãcü rü jema nachica ga ngextá duü̃xü̃güna ínac̱axü̃wa naxũ, rü jéma najarüto norü tochicaxü̃wa. Rü Pauruca̱x nangema na jéma nape̱xewa nagagüãxü̃ca̱x.
7 Rü jexguma jexma jaxücuxgu ga Pauru, rü jema Judéugü ga Jerucharéü̃wa ne ĩxü̃, rü naxca̱x naxĩ. Rü muxü̃ma ga chixexü̃gümaã ínanaxuaxü̃gü. Notürü taxuwama nüxü̃ nüxü̃ nadauxẽẽ na aixcuma jiĩxü̃ ga jema naxca̱x ínaxuaxü̃güãxü̃.
8 Rü jexguma ga Pauru rü nanangãxü̃, rü nhanagürü: —Pa Ãẽ̱xgacüx, taxuü̃ma ga chixexü̃ namaã chixugü ga jema mugü ga Muĩsé ümatüxü̃, rü bai ga tupauca ja taxü̃nemaã, rü bai ga ãẽ̱xgacü ja Chécharumaã —nhanagürü.
9 Notürü nüma ga Festu rü Judéugümaã nügü namecümaxẽẽchaü̃, rü jemaca̱x Pauruna naca, rü nhanagürü nüxü̃: —¿Cunaxwa̱xexü̃ na Jerucharéü̃wa cuxũxü̃ na ngẽ́ma cuxna chac̱axü̃ca̱x naxca̱x i guxü̃ma i ngẽma naxca̱x cuxü̃ ínaxuaxü̃güxü̃? —nhanagürü.
10 Rü jexguma ga Pauru rü nanangãxü̃, rü nhanagürü: —Chama rü cupe̱xewa changẽxma na choxna cuc̱axü̃ca̱x, erü cuma nixĩ i cuxü̃ naxunetaxü̃ i ãẽ̱xgacü ja tacü ja Chécharu na ãẽ̱xgacü cuiĩxü̃ i núma. Rü ngẽmaca̱x chanaxwa̱xe i nuã choxna cuca. Erü taxuü̃ma i chixexü̃ chaxü i Judéugümaã, ngẽxgumarüü̃ i cuma meãma nüxü̃ cucua̱x.
11 Ngẽxguma chi ṯacü i chixexü̃ chaxü̱xgu rü marü name na naxca̱x choxü̃ jama̱xgüxü̃, rü marü name i na chajuxü̃. Notürü ngẽxguma nataxu̱xguma i ṯacü i aixcuma ixĩxü̃ i ngẽma naxca̱x choxü̃ ínaxuaxü̃güxü̃, rü taxuacüma texé Judéugüna choxü̃ tamu. Rü naxca̱x íchaca na nümatama ja ãẽ̱xgacü ja tacü ja Chécharu choxna nac̱axü̃ca̱x —nhanagürü ga Pauru.
12 Rü jexguma ga Festu rü norü ucu̱xẽruü̃gü ga ãẽ̱xgacügümaã nidexa, rü nhu̱xmachi nhanagürü Pauruxü̃: —Marü naxca̱x ícuca na ãẽ̱xgacü ja tacü ja Chécharu cuxna c̱axü̃ca̱x. Ẽcü, nhu̱xma rü naxü̃tawa tá cuxü̃ chamu —nhanagürü.
Ãẽ̱xgacü ga Agripape̱xewa najexma ga Pauru
13 Rü nhuxre ga ngunexü̃ ngupetügu, rü Checharéawa nangugü ga Judéugüarü ãẽ̱xgacü ga Agripa rü naẽja̱x ga Bereníche, na Festuxü̃ janamoxẽgüxü̃ca̱x.
14 Rü marü nhuxre ga ngunexü̃ jéma najexmagügu, rü Agripamaã nüxü̃ nixu ga Festu ga Pauruchiga, rü nhanagürü: —Nuã nangẽxma i wüxi i jatü i pocuxü̃ ga Feri tama ínguxuchixẽẽxü̃.
15 —Rü jexguma chama Jerucharéü̃wa chajexmagu, rü paigüarü ãẽ̱xgacügü rü Judéugüarü ãẽ̱xgacügü ga jaguã̱xgü rü ínanaxuaxü̃gü, rü naxca̱x ínacagü na namaã chanaxueguxü̃ca̱x rü na jama̱xgüãxü̃ca̱x.
16 —Rü chama chanangãxü̃, rü tama tocüma nixĩ i toma i Romacü̱̃ã̱xgü i na tajamáxü̃ i wüxi i duü̃xü̃ ega tama nügüétüwa jadexaxíragu nape̱xewa i ngẽma ínaxuaxü̃güxü̃.
17 —Rü jemaca̱x ga jexguma núma nangugügu ga jema Judéugü, rü jexgumaãrü moxü̃ãcü rü chorü tochicaxü̃wa chitocuchi na nüxna chac̱axü̃ca̱x nachiga ga jema, rü jéma naxca̱x changema ga jema jatü.
18 —Notürü ga jema Judéugü ga ínaxuaxü̃güxü̃, rü taxuü̃ma ga ṯacü ga chixexü̃ ga chama íchanaṉg̱uxẽẽxü̃xü̃ nixugü.
19 —Notürü norü Tupanachiga rü wüxi ga jatü ga Ngechuchuchiga nixĩ ga jema nagu jadexagüxü̃. Rü nüma ga Judéugü nüxü̃ nixugü ga na najuxü̃ ga jema Ngechuchu, notürü Pauru nüxü̃ ixuxgu rü marü wena namaxü̃.
20 —Rü jexguma ga chama ga tama na nüxü̃ chacuáxü̃ ga nhuxãcü tá chanamexẽẽxü̃ ga jema guxchaxü̃, rü jemaca̱x nüxna chaca ga Pauru ngoxi nanaxwa̱xe ga Jerucharéü̃wa na naxũxü̃, na jéma nüxna chac̱axü̃ca̱x.
21 —Notürü nüma ga Pauru naxca̱x ínaca ga na ãẽ̱xgacü ja tacü ja Chécharupe̱xewa naxũxü̃ na nümatama ja Chécharu nüxna c̱axü̃ca̱x. Rü jemaca̱x chanamu na meã nüxna nadaugüxü̃ca̱x nhu̱xmata chama ãẽ̱xgacü ja Chécharuxü̃tawa chanamux —nhanagürü.
22 Rü jexguma ga Agripa rü nhanagürü Festuxü̃: —Chama rü ta nüxü̃ chaxĩnüchaü̃ i norü ore i ngẽma jatü —nhanagürü. Rü Festu nanangãxü̃ rü nhanagürü: —Moxü̃ tátama nüxü̃ cuxĩnü —nhanagürü.
23 Rü moxü̃ãcü jema ucapu ga ãẽ̱xgacügü íngutaque̱xegüxü̃wa nangugü ga Agripa rü Bereníche rü poraãcü nanga̱xãẽgü. Rü namaã ínangugü ta ga churaragüarü ãẽ̱xgacügü rü jema ĩãnecü̱̃ã̱xgü ga corigüxü̃chi ixĩgüxü̃. Rü nhu̱xmachi Pauruca̱x nangema ga Festu na jema ãẽ̱xgacügüpe̱xewa nagagüãxü̃ca̱x.
24 Rü nhanagürü ga Festu: —Pa Ãẽ̱xgacü Pa Agripax, rü Pa Guxãma i Pema ja Nuxmagüxe, nhaã nixĩ i ngẽma jatü i nachigamaã jadexagüxü̃ i guxü̃ma i Judéugü. Rü chape̱xewa ínanaxuaxü̃gü ga Jerucharéü̃wa rü núma rü ta. Rü guxü̃guma tagaãcüma choxna naxca̱x nacagü na najuxü̃.
25 —Notürü i chama rü taxuü̃ma i ṯacü i chixexü̃ i naxüxü̃ nawa chadau na naxca̱x jamáxü̃. Notürü nüma ga Pauru rü naxca̱x ínaca na ãẽ̱xgacü ja tacü ja Chécharu nüxna c̱axü̃, rü ngẽmaca̱x nagu charüxĩnü na ngẽ́ma chanamuxü̃.
26 —Notürü taxuü̃ma i ore i aixcuma ixĩxü̃ i nachiga choxü̃́ nangẽxma na chorü ãẽ̱xgacü ja Chécharuca̱x chanaxümatüxü̃ca̱x. Rü ngẽmaca̱x chanamu na nuã pepe̱xewa nagagüãxü̃ca̱x, rü cuxca̱x türü nixĩ, Pa Ãẽ̱xgacü Pa Agripax, na nüxna cuc̱axü̃ca̱x, na nüxü̃ chacuáxü̃ca̱x i ṯacü tá na chaxümatüxü̃ naxca̱x ja ãẽ̱xgacü ja Chécharu.
27 —Erü chauxca̱x rü tama name na ngextá namuxü̃ i wüxi i pocuxü̃ ega tama naxümatüxíragu nachiga na ṯacüca̱x ínaxuaxü̃güãxü̃.
