Puracügü 26:1-32
26 Rü jexguma ga Agripa rü nhanagürü Pauruxü̃: —Marü name i nhu̱xma i cugüétüwa cuidexa —nhanagürü. Rü jexguma naxunagüme̱xẽ ga Pauru, rü inanaxügü ga nügüétüwa na jadexaxü̃, rü nhanagürü:
2 —Chataãẽ, Pa Ãẽ̱xgacü Pa Agripax, erü cupe̱xewa chidexa i nhu̱xma na chaugüétüwa chachogüxü̃ca̱x i guxü̃ma i ngẽma choxü̃ na ínaxuaxü̃güxü̃ i ngẽma chautanüxü̃ i Judéugü.
3 —Rü jexeraãcü chataãẽ erü cuma nüxü̃ cucua̱x i guxü̃ma i tocüma i toma i Judéugü, rü guxü̃ma i Muĩsé ümatüxü̃ i mugü i naxca̱x jadexagüxü̃ i chautanüxü̃gü. Rü ngẽmaca̱x cuxna chaca na meã choxü̃́ icurüxĩnüxü̃ca̱x.
Pauruarü maxü̃ naxü̃pa ga Ngechuchuaxü̃́ na jaxõõxü̃
4 —Rü guxü̃ma i ngẽma chautanüxü̃gü i Judéugü rü nüxü̃ nacua̱xgü ga nhuxãcü na chamaxü̃xü̃ ga natanüwa ga chauchiü̃ãnewa rü Jerucharéü̃wa ga jexguma changextü̱xüüragu.
5 —Rü ngẽxguma chauchigaxü̃ jaxugüechaü̃gu, rü nüma nüxü̃ nacua̱xgü ga chama rü woetama Parichéu na chiĩxü̃. Rü toma i Judéugü i Parichéugü na tixĩgüxü̃, rü toma nixĩ i guxü̃ma i totanüxü̃ i Judéugüarü jexera na poraãcü tanaxaurexü̃ i ngẽma tocüma.
6 —Rü nhu̱xma i ngẽma chautanüxü̃gü i Judéugü rü nuã pepe̱xewa choxü̃ nagagü erü chajaxõ na Cristugagu nangẽxmaxü̃ i maxü̃ i taguma gúxü̃, jema Tupana nuxcümaxü̃güxü̃ ga torü o̱xigümaã inaxunetaxü̃rüü̃.
7 —Rü guxü̃ma i totanüxü̃gü i Judéugü rü ínanaṉg̱uxẽẽgü na nüxü̃ nadaugüxü̃ rü tá na janguxü̃ i ngẽma uneta. Rü ngẽmaca̱x Tupanaxü̃ nicua̱xüü̃gü rü guxü̃guma i ngunecü rü chütacü rü Tupanaãxü̃́ napuracüe. Rü chama rü ta íchanaṉg̱uxẽẽ na nüxü̃ chadauxü̃ rü tá na janguxü̃ i ngẽma uneta, rü ngẽmaca̱x nixĩ, Pa Ãẽ̱xgacüx, i nhu̱xma i choxü̃ ínaxuaxü̃güxü̃ i ngẽma chautanüxü̃gü i Judéugü.
8 —¿Rü tü̱xcüü̃ tama pejaxõgü na Tupana wena namaxẽxẽẽxü̃ i ngẽma juexü̃?
Pauru rü nüxü̃ nixu ga nhuxãcü jema jaxõgüxü̃we na jangẽchigüxü̃
9 —Rü chama nagu charüxĩnügu ga noxri rü name ga muxü̃ma ga chixexü̃ namaã na chaxüxü̃ ga jema Ngechuchu ja Nacharétucü̱̃ã̱xãxü̃́ jaxõgüxü̃.
10 —Rü jemaca̱x nawe chingẽchigü ga Jerucharéü̃wa. Rü paigüarü ãẽ̱xgacügüxü̃tawa naxca̱x íchaca ga popera na chanapocuexü̃ca̱x ga jema jaxõgüxü̃. Rü jexma chanapocue ga muxü̃ma. Rü jexguma chautanüxü̃ ga Judéugü nadaixgu ga jema jaxõgüxü̃, rü chama rü chorü me nixĩ.
11 —Rü muẽ̱xpü̱xcüna rü chanapocuexü̃ na nüxü̃ naxoexü̃ca̱x ga jema na jaxõgüãxü̃. Rü jemaãcü chanaxü ga guxü̃nema ga ngutaque̱xepataü̃güwa. Rü poraãcü nachi chaxaxichi ga jema jaxõgüxü̃, rü jemaca̱x nawe chingẽchigü nhu̱xmata to ga nachiü̃ãnegune ga ĩãnegüwa.
Pauru rü wenaxãrü nüxü̃ nixu ga nhuxãcü na jaxõõxü̃ ga noxrix
12 Rü nhanagürü ga Pauru: —Rü jema jaxõgüxü̃xü̃ na chapocuexü̃ca̱x nixĩ ga Damacuwa chaxũxü̃. Rü jemaca̱x ga paigüarü ãẽ̱xgacügü rü choxü̃ namugü rü choxna nanaxãgü ga popera ga nawa choxna naxãgagüxü̃ na chanapocuexü̃ca̱x ga jema jaxõgüxü̃.
13 —Rü jexguma namagu taxĩjane, Pa Ãẽ̱xgacüx, rü jexguma meãma tocuchiwa nanguxgu, rü nüxü̃ chadau ga wüxi ga omü ga dauxü̃wa ne ũxü̃ ga üa̱xcüarü jexera ixĩxü̃ ga choxü̃ baxixü̃ rü jema chamücügüxü̃ rü ta baxixü̃.
14 —Rü guxãma ga toma rü nhaxtüanegu tajaji. Rü chama rü nüxü̃ chaxĩnü ga wüxi ga naga ga Judéugawa choxü̃ nhaxü̃:
“Pa Chauru Pa Chaurux, ¿tü̱xcüü̃ nawe cuingẽchigü i ngẽma duü̃xü̃gü i choxü̃́ jaxõgüxü̃? Poraãcü cugütama cuchixexẽẽ nhama wüxi i ṯacü i ãmaguxü̃gu cucuxgüxü̃rüü̃”, nhanagürü choxü̃.
15 —Rü chama chanangãxü̃, rü nhacharügü:
“¿Texé cuixĩ, Pa Corix?” nhacharügü. Rü nüma ga Cori rü nhanagürü choxü̃:
“Chama nixĩ i Ngechuchu rü chorü duü̃xü̃gü nixĩ i ngẽma nawe cuingẽchigüxü̃.
16 —¡Notürü írüda rü inachi! Rü marü cuxca̱x chango̱x i nhu̱xmax, erü cuxü̃ chamuxchaü̃ na choxü̃́ cupuracüxü̃ca̱x rü nüxü̃ cuixuchigaxü̃ca̱x i ngẽma nhu̱xma na choxü̃ cudauxü̃ rü ngẽma jixcüra tá chauxü̃tawa nüxü̃ cudauxü̃.
17 —Rü cuxna tá chadau i natanüwa i cutanüxü̃gü i Judéugü rü ngẽma tama Judéugü ixĩgüxü̃ i nhu̱xma tá natanüwa cuxü̃ chamuxü̃.
18 —Rü ngẽ́ma cuxü̃ chamu na ngẽma duü̃xü̃güxü̃ choxü̃ cucua̱xẽẽxü̃ca̱x rü nüxü̃ naxoexü̃ca̱x i nacüma i chixexü̃gü rü chauga naxĩnüẽxü̃ca̱x. Rü ngẽ́ma tá cuxũ na Chatanáme̱xẽwa ícunanguxü̃xẽẽxü̃ca̱x i ngẽma duü̃xü̃gü na chawe naxĩxü̃ca̱x rü choxü̃́ jaxõgüãxü̃ca̱x na chama rü nüxü̃́ nüxü̃ changechaü̃xü̃ca̱x i norü pecadugü, rü nüxü̃́ nangẽxmaxü̃ca̱x i nachica namaã i guxü̃ma i chorü duü̃xü̃gü i üünegüxü̃”, nhanagürü choxü̃ ga Cori.
Pauru rü naga naxĩnü ga jema Ngechuchu namaã nüxü̃ ixuxü̃
19 —Rü jemaca̱x ga chamax, Pa Ãẽ̱xgacü Pa Agripax, rü naga chaxĩnü ga jema ore ga Ngechuchu chamaã nüxü̃ ixuxü̃ ga jexguma choxü̃ nabaxixgu ga jema omü ga dauxü̃wa ne ũxü̃.
20 —Notürü noxri rü Damacucü̱̃ã̱xgümaã nüxü̃ chixuchiga ga Tupanaãrü ore. Rü jixcama ga Jerucharéü̃cü̱̃ã̱xgümaã, rü jemawena rü guxü̃ ga Judéaanewa, rü nhu̱xmachi jema tama Judéugü ixĩgüxü̃maã nüxü̃ chixu. Rü nhacharügü:
“¡Nüxü̃ perüxoe i pecüma i chixexü̃gü, rü Tupanaca̱x pedaugü, rü meã pemaxẽ na duü̃xü̃gü nüxü̃ daugüxü̃ca̱x na aixcuma pejaxõgüxü̃!” nhacharügü.
21 —Rü jemaca̱xtama nixĩ ga tupauca ja taxü̃negu choxü̃ jajauxgüxü̃ rü choxü̃ jama̱xgüchaü̃xü̃ ga chautanüxü̃gü i Judéugü.
22 26:22-23 —Notürü Tupana choxü̃ narüngü̃xẽẽ rü ngẽmaca̱x taguma íchajachaxãchi na guxü̃ma i duü̃xü̃gümaã nüxü̃ chixuxü̃ rü woo buxü̃ rü jaxü̃. Rü namaã nüxü̃ chixu ga jema ore ga nuxcümaxü̃güxü̃ ga Tupanaãrü orearü uruü̃gü rü Muĩsé nüxü̃ ixugüxü̃ na nhuxãcü tá nüxü̃ nangupetüxü̃ ga Cristu rü nhuxãcü tá na najuxü̃, notürü jemawena rü nüma tá jiĩxü̃ ga nüxĩra juwa ínadaxü̃. Rü namaã nüxü̃ chixu ta ga jema nuxcümaxü̃güxü̃ãrü ore ga nhaxü̃:“Rü Cristu rü tatanüxü̃ i Judéugümaã rü ngẽma to i duü̃xü̃gü i tama Judéugü ixĩgüxü̃maã tá naxunagüãxü̃ i ore i tüxü̃ maxẽxẽẽxü̃”,nhaxü̃. Rü jemachigaxü̃xĩcatama nixĩ ga namaã chixuxü̃ —nhanagürü ga Pauru.
23 Nüü̃ nadau 26:22
Pauru rü Agripaaxü̃́ nanangúchaü̃xẽẽ na jaxõõxü̃ca̱x
24 Rü jexguma jemaãcü nügüétüwa jadexagu ga Pauru, rü nhanagürü ga Festu tagaãcüma: —Cungẽãẽmare Pa Paurux. Rü ngẽma na jeü̃cürü cungúechaü̃, rü düxwa nawa cungẽãẽ —nhanagürü.
25 Notürü ga Pauru rü nanangãxü̃, rü nhanagürü: —Tama changẽãẽ Pa Ãẽ̱xgacüxü̃chi, Pa Festux. Erü nhaã ore i nüxü̃ chixuxü̃, rü aixcumaxü̃chima nixĩ.
26 —Rü daa ãẽ̱xgacü ja Agripa rü meãma nüxü̃ nacua̱x i guxü̃ma i ngẽma pemaã nüxü̃ chixuxü̃. Rü ngẽmaca̱x tama chamuü̃ãcüma chorü taãẽmaã nape̱xewa nüxü̃ chixu, erü nüxü̃ chacua̱x na nüma rü ta nüxü̃ nacuáxü̃ i ṯacüchiga na jiĩxü̃ i guxü̃ma i nhaã ore. Erü tama ngextámare cúãcü naxüpetü i ngẽma.
27 —¿Cujaxõxü̃, Pa Agripax, i ngẽma Tupanaãrü orearü uruü̃gü nüxü̃ ixuxü̃? Chama nüxü̃ chacua̱x rü cujaxõ —nhanagürü ga Pauru.
28 Rü Pauruxü̃ nangãxü̃ ga Agripa, rü nhanagürü: —¿E̱xna cuma nagu curüxĩnügu rü ngẽmaãcü noxre i curü oremaã na choxü̃ cujaxõxẽẽxü̃? —nhanagürü.
29 Rü nhanagürü ga Pauru: —Woo noxre i oremaã rü woo muxü̃ i oremaã rü Tupana nanaxwa̱xe na cujaxõxü̃. Rü tama i cuxicatama, notürü guxü̃ma i nhaã nuã choxü̃ ĩnüẽxü̃ rü ta, rü Tupana nanaxwa̱xe na chauxrüü̃ jixĩgüxü̃, notürü tama chauxrüü̃ daa curẽtigümaã na jana̱ĩ̱xgüxü̃ —nhanagürü ga Pauru.
30 Rü jexguma inachigü ga Agripa, rü Festu, rü Bereníche, rü guxü̃ma ga jema namaã jéma rütogüxü̃.
31 Rü jexguma ga nümagü rü noxrüwama naxĩ na jéma nügümaã Pauruchiga jadexagüxü̃ca̱x. Rü nhanagürügü: —Rü ngẽma jatü, rü taxuü̃ma i chixexü̃ naxü na naxca̱x jamáxü̃ rü e̱xna naxca̱x napocuxü̃ —nhanagürügü.
32 Rü Festuxü̃ nhanagürü ga Agripa: —Ngẽxguma chi tama nümatama naxca̱x ínacaxgu na Chécharu nüxna c̱axü̃ca̱x, rü chi ítananguxuchixẽẽ —nhanagürü.
