Puracügü 27:1-44
27 Rü jema ãẽ̱xgacügü rü düxwa nagu narüxĩnüẽ na norü ãẽ̱xgacü ga Chécharu ga Itáriaanewa jexmacüxü̃tawa na toxü̃ namugüxü̃. Rü norü churaragüarü capitã́ũna nanamu ga Pauru namaã ga nhuxre ga togü ga pocuexü̃ na Chécharuxü̃tawa nagagüãxü̃ca̱x. Rü guma capitã́ũ rü Júriu nixĩ ga naẽ́ga, rü norü churaragütücumü rü Chécharuarü Daruü̃gü nixĩ ga naẽ́ga.
2 Rü nagu tichoü̃ ga wüxi ga wapuru ga buanecümaã ixũxü̃ne ga Adramíchiuwa ne ũxü̃ne ga Áchiaarü ĩãnegüwa ũxchaxü̃ne. Rü towe ta nixüe ga Aristácu ga Machedóniããnecü̱̃ã̱x ga Techarónicawa ne ũxü̃.
3 Rü moxü̃ãcü rü Sidã́ũãrü türewa tangugü. Rü Paurumaã namecüma ga capitã́ũ ga Júriu. Rü ínanaxüexẽẽ na jémacü̱̃ã̱x ga namücügüxü̃tagu naxũãneãxü̃ca̱x ga Pauru, na nümagü nüxü̃ nangü̃xẽẽgüxü̃ca̱x.
4 Rü jéma itaxĩãchi. Rü Chiprearü capaxũãrü tocüwaguama taxĩ, naxchaxwa ga buanecü, jerü towaama nabu.
5 Rü jéma Chiprewa tixãü̃ ga taxtü rü Chiríchiaanecutüwa tarüjicu. Rü jemacutügu taxĩ, rü Pãfíriaanewa tachopetü rü nhu̱xmata Ríchiaanewa jexmane ga ĩãne ga Mirawa tangugü.
6 Rü jema capitã́ũ jexma nüxü̃ najangau ga wüxi ga wapuru ga Arejã́driawa ne ũxü̃ne ga Itáriaanewa ũxü̃ne. Rü gumagu toxü̃ nichoü̃xẽẽ, rü tomaã inaxũãchi.
7 Notürü íraruwatama itinhaxwetaxü̃ ga muxü̃ma ga ngunexü̃gu, rü guxchaãcüma Guíduarü to̱xma̱xtawa tangugü. Notürü towaama nabuema ga buanecü, rü jemaca̱x capaxũ ga Chamonaãrü to̱xma̱xtawa tachopetü rü capaxũ ga Cretaxü̃ ítachoeguãchi.
8 Rü guxchaãcüma nacutügu taxĩ ga jema capaxũ, rü wüxi ga nachica ga Mexü̃ ga Türegu ãẽ́gaxü̃wa tangugü. Rü ĩãne ga Rácheaarü ngaicamana najexma.
9 Notürü marü poraãcü namagu tanuxcü ga na itaxĩxü̃, rü marü naxãũcüma ga na itaxĩãmaxü̃ jerü marü nawa nangu ga guma tawemacügü ga nagu nagáuanecü. Rü jemaca̱x ga Pauru rü najaxucu̱xẽ ga duü̃xü̃gü, rü nhanagürü:
10 —Pa Chamücügüx, nüxü̃ chacua̱x i ngẽxguma chi ixĩãmagu, rü tá naxãũcüma. Rü daa wapuru rü tá inajarütaxu namaã i guxü̃ma i naãcu. Rü ngürüãchi i jixema rü tá ta tajue —nhanagürü.
11 Notürü jema churaragüarü capitã́ũ rü jexeraãcü guma wapuruarü joragaama naxĩnü, rü maniẽrugüarü capitã́ũgaama naxĩnü, rü tama aixcuma Pauruga naxĩnü.
12 Notürü jema türe rü tama name ga jéma na tanangupetüxẽẽxü̃ ga gáuanexü̃. Rü jemaca̱x wixguxü̃chi guxü̃ma ga duü̃xü̃gü nagu narüxĩnüẽ rü narümemaẽ nixĩ ga na itaxĩãchixü̃ ga jéma. Rü nanaxwa̱xegü ga chi Peníchewa na tangugüxü̃ na jéma tanangupetüxẽẽxü̃ ga gáuanexü̃, jerü jema nixĩ ga wüxi ga Cretaarü türe ga mexü̃ ga tama poraãcü buanecü ga taxü̃ nawa nguxü̃.
Buanecü ga tacü ga taxtüarü ngãxü̃tüwa
13 Rü inanaxügü ga na meãma tope̱xewaama nabuxü̃ ga buanecü, rü jemaca̱x ga nümagü ga maniẽrugü rü nüxü̃ nacua̱xgügu rü chi meã ítangugü ga jema ítaxĩxü̃wa. Rü jemaca̱x itaxĩãchi, rü nacutüarü ngaicamagu taxĩ ga jema Cretaarü capaxũ.
14 27:14-15 Rü notürü ngürüãchi jixcamaxü̃ra rü wüxi ga buanecü ga taxüchicü ga capaxũãrü tocüwawa ne ũxcü ngãxü̃tüwaama nanacue ga guma wapuru. Rü taxuacüma itixũtaü̃ nawaama ga buanecü. Rü jemaca̱x düxwa ítajachaxãchi ga na tanatochinüxü̃, rü toxü̃ ínicuetaü̃.
15 Nüü̃ nadau 27:14
16 Rü wüxi ga capaxũxãcü ga Cráudagu ãẽ́gaxü̃ãrü tocüwawaama tachopetü ga ngextá tama poraãcü íjabuaxü̃wa. Rü jéma poraãcü tapuracüe na guma wapurugu tanatúnagüxü̃ ga norü ngue ga jatúchigüne.
17 Rü jexguma marü natúnagügüãgu ga guma ngue, rü nap̱anaxãgü ga tanütaxü̃maã najana̱ĩ̱xgütüwe ga guma wapuru. Rü nhu̱xmachi najawẽgü ga jema naxchirutachinügü ga namaã jacuetaü̃xü̃ ga noxrix, jerü namuü̃ẽ ga na Chírtearü naxnücüwa janangaixtaü̃güxü̃. Rü jema buanecü toxü̃ nicuetaü̃mare.
18 Rü moxü̃ãcü ga buanecü rü tama nangupetüéga, rü jemaca̱x inanaxügü ga na ínawoü̃ãcuãxü̃.
19 Rü norü tamaẽ̱xpü̱x ga ngunexü̃gu, rü naxme̱xmaãtama ínanawoü̃ ga jema natü̱xügü ga guma wapuru, rü guxü̃ma ga to ga norü jemaxü̃gü.
20 Rü muxü̃ma ga ngunexü̃gu, rü tama nango̱x ga üa̱xcü rü ẽxtagü, rü tama nangupetüéga ga guma buanecü ga taxüchicü. Rü düxwa nagu tarüxĩnüẽ ga marü tãũxü̃táma na tamaxẽxü̃.
21 Rü jexguma marü muxü̃ma ga ngunexü̃ tingegügu ga tama na tachibüexü̃, rü jexguma guxü̃ma ga jema duü̃xü̃gütanüwa inachi ga Pauru, rü nhanagürü: —Narümemaẽ chi nixĩ, Pa Chamücügüx, ga chauga na pexĩnüẽxü̃, rü tau chima na ixĩãchixü̃ ga Cretawa, rü tau chima nhu̱xmarüü̃ tüxü̃ naxüpetü i nhaã ãũcümaxü̃ rü taxuxü̃ chima i chixexü̃ tüxü̃ nangupetü.
22 —Notürü ¡petaãẽgü! erü wapuruxica tá inajarütaxu, notürü i jixema rü taxúetáma tajue.
23 —Erü ngewa̱xarü chütaxü̃gu ja Tupana ja nüxü̃́ chapuracücü ja chorü cori ixĩcü rü núma nanamu i wüxi i norü orearü uruü̃ i dauxü̃cü̱̃ã̱x i chauxca̱x ngóxü̃.
24 —Rü nhanagürü choxü̃:
“¡Tãṹ i cumuü̃xü̃, Pa Paurux! Erü ãẽ̱xgacü ja Chécharupe̱xewa tá cungu, rü cugagu tá Tupana nanamaxẽxẽẽ i guxü̃ma i ngẽma cumücügü i cumaã ngẽxma wapurugu ĩxü̃”, nhanagürü choxü̃.
25 —Rü ngẽmaca̱x, Pa Chamücügüx, ¡rü petaãẽgü! erü chama rü aixcuma Tupanaãxü̃́ chajaxõ, rü aixcuma tá nixĩ i ngẽmaãcü tá nangupetüxü̃ ngẽxgumarüü̃ i ngẽma chamaã nüxü̃ jaxuxü̃.
26 —Notürü wüxi i capaxũwa tá tajarücüxcuchitaü̃gü —nhanagürü ga Pauru.
27 Rü jexguma taxre ga jüxü tingexgu ga na itaxĩxü̃, rü taxü̃ ga taxtü ga Adriáticuwa tajexmagü, jerü ga buanecü rü núxĩca toxü̃ nacuetaü̃. Rü ngãxü̃cüügu nüxü̃ nicua̱xãchitanü ga jema maniẽrugü ga na dauxchitacutüwa tangugüchaü̃xü̃.
28 Rü ínanataegü ga norü ngugütamaxü̃ rü 36 ga metru nixĩ ga norü mátama. Rü jexguma marü íraruwa jaxü̃guxüra itaxĩxgu rü wenaxãrü nanangugütamagü, rü 27 ga metru nixĩ ga norü mátama ga jexgumax.
29 Rü namuü̃ẽ ga na nutamaã jananhataü̃güxü̃ ga naxãnacüwa, rü jemaca̱x guma wapuruchinüwa ínanawoü̃ ga ãgümücü ga ãcurugü ga nap̱anaxãmaã ixãcunüxü̃ na jemaãcü íjachaxãchigüxẽẽãxü̃ca̱x ga guma wapuru. Rü najumuxẽgü ga paxa na jangunexü̃ca̱x.
30 Notürü ga jema maniẽrugü rü nibuxmüchaü̃ ga guma wapuruwa, rü jemaca̱x nanaw̱ãĩxẽgü ga guma wapuruarü ngue, rü nhanagürügü: —Ngẽma wapurupe̱xearü ãcurugü tá ítawoü̃ na nataixü̃ca̱x ja wapuru —nhanagürügüneta.
31 Notürü ga Pauru rü churaragüarü capitã́ũmaã rü norü churaragümaã nüxü̃ nixu rü nhanagürü: —Ngẽxguma nhaã maniẽrugü rü tãũxü̃táma nuxã wapurugu nachoxgu, rü guxãma i pema rü tá pejue —nhanagürü.
32 Rü jexguma ga jema churaragü rü najadaecunügü ga guma ngue, rü inananguxẽẽgü.
33 Rü jexguma marü jangunechaü̃gu, rü Pauru najaxucu̱xẽgü ga guxü̃ma na nachibüexü̃ca̱x, rü nhanagürü: —Taxre i jüxü nixĩ i nhu̱xma na taguma aixrügumarüü̃ pechibüexü̃, rü bai i ṯacü na pengṍxü̃ jerü poraãcü pexoegaãẽgü.
34 Rü nhu̱xma rü pemaã nüxü̃ chixu na pechibüexü̃ na peporaexü̃ca̱x, rü taxuü̃ma pexü̃ üpetüxü̃ca̱x. Erü taxúetáma itajarütaxu rü bai i wüxi i pejaexüra inajarütaxu —nhanagürü.
35 Rü jexguma marü jema nhaxgu, rü nanajaxu ga wüxi ga põũ, rü Tupanana moxẽ naxã nape̱xewa ga guxü̃ma. Rü inanabücu ga jema põũ, rü inanaxügü ga na nangṍõxü̃.
36 Rü jexguma nataãẽgü ga guxü̃ma, rü nümagü rü ta nachibüe.
37 Rü 276 tixĩgü ga guxãma ga toma ga guma wapurugu ĩxẽ.
38 Rü jexguma marü nangãxẽgu, rü ínanawoü̃ ga jema trigu ga wapuru namaã ããcuxü̃ na nangünagüãchixüraxü̃ca̱x ga guma wapuru.
Inangu ga guma wapuru
39 Rü jexguma jangunegu, rü jema maniẽrugü tama nüxü̃ nacuáane ga jéma. Notürü nüxü̃ nadaugü ga wüxi ga axcuchixü̃ ga naxnücüpechinüã́xü̃, rü nagu narüxĩnüẽ ga jéma na janangaixẽẽgüãxü̃ ga wapuru.
40 Rü jexguma nanadaü̃ ga norü ngaxü̃xü̃ ga ãcurugü, rü jéma nanawogü. Rü najawẽgü ga norü toxchinüxü̃ãrü na̱ĩ̱xruü̃gü, rü inananga ga jema nape̱xewa üxü̃ ga naxchirutachinü ga namaã iticuetaü̃xü̃. Rü itanaxügü ga nüxü̃ na tingaicaxü̃ ga jema naxnücüpechinü.
41 Notürü wüxi ga naxnücüarü nuxtamaxü̃wa tajarüngaixtaü̃. Rü jéma naxnücüwa najarüwápe̱xe ga guma wapuru rü marü tama jéma itaxĩãchi. Rü joxni ga nachinüwa, rü juãpe najapuxẽẽ.
42 Rü jema churaragü rü nagu narüxĩnüẽ ga na nadaiãxü̃ ga jema pocuexü̃ na taxuü̃ma inhaxü̃ca̱x ga jexguma naxãnacüwa nangugügu.
43 27:43-44 Notürü jema norü capitã́ũ ga churaragü, rü Pauruxü̃ namaxẽẽchaü̃, rü jemaca̱x tama nanaxwa̱xe ga na nadaiãxü̃ ga jema pocuexü̃. Notürü nanamu na jema ixãnüxü̃ rü nüxĩra ínajuxgüxü̃ na naxãnacüwa nawẽxgüxü̃ca̱x, rü jema togü rü mürapewagügu rü e̱xna jema wapurutüchigügu meã na ínachoü̃xü̃ca̱x. Rü jemaãcü guxãma meãma naxãnacüwa tangugü.
44 Nüü̃ nadau 27:43
