Puracügü 28:1-31
28 Rü jexguma meãma naxãnacüwa tangugügu ga guxãma rü jexguma nüxü̃ tacua̱xgü na Máuta na jiĩxü̃ ga naẽ́ga ga jema capaxũ.
2 Rü jema jémacü̱̃ã̱xgü ga duü̃xü̃gü rü meãma toxü̃ najauxgü ga guxãma. Rü nanangixtagü ga wüxi ga üxü ga taxü̃ne. Rü toxca̱x nacagü ga guxãma na jéma togü tanaĩxü̃güxü̃ca̱x, jerü napu rü nagáuane.
3 Rü Pauru nanadetaque̱xe ga nhuxre ga naĩchacüügü, rü üxüxetüwa najawocu. Notürü jexguma jéma jawocuãgu, rü üxüarü naĩẽmaxü̃chaxwa inajago ga wüxi ga ãxtape. Rü Paurume̱xẽwa najuxu, rü jéma najarütuãchi.
4 Rü jexguma jema jémacü̱̃ã̱xgü nüxü̃ daugügu ga jema ãxtape ga Paurume̱xẽwa na natuxü̃, rü nügümaã nhanagürügü: —Nhaã jatü rü maneca wüxi i máẽtaxü̃ nixĩ. Rü woo taxtüwa juwa na janhaxü̃, notürü Tupana tama nanamaxẽẽchaü̃ —nhanagürügü.
5 Notürü guma üxüxetügu nanamaxü̃ ga jema ãxtape, rü taxuü̃ma nüxü̃ naxüpetü ga Pauru.
6 Notürü guxü̃ma ga jema duü̃xü̃gü rü ínanaṉg̱uxẽẽgü rü ngoxi tá nachamé rü e̱xna naju̱x. Rü marü nuxcüxürama ga jema nüxü̃ na nadaunüxü̃ rü taxuü̃ma nüxü̃ na üpetüxü̃, rü düxwa togu narüxĩnüẽ rü inanaxügüe ga na nhagüxü̃: —Maneca wüxi ja tupana nixĩ —nhagüxü̃.
7 Rü jema nachicaarü ngaicamana najexma ga norü naãne ga jema capaxũãrü ãẽ̱xgacü ga Púbriu ga naẽ́ga. Rü nüma meãma toxü̃ najaxu, rü jexma toxü̃ napegüxẽẽ ga tamaẽ̱xpü̱x ga ngunexü̃. Rü tomaã namecümaxü̃chi.
8 Rü guxema Púbriu nanatü rü ngürücarewa tajexma, jerü tixaxüne rü taduü̃. Rü jéma tümaxü̃tawa nangu ga Pauru, rü tümamaã najumuxẽ, rü tümaẽ́tügu naxüxme̱x, rü tüxü̃ narümexẽẽ.
9 Rü jexguma jemaxü̃ nadaugügu, rü Pauruca̱x jéma naxĩ ta ga guxü̃ma ga togü ga iḏaaweexü̃ ga jema capaxũcü̱̃ã̱x, rü narümeẽ.
10 Rü nümagü rü muxü̃ma toxna naxãmaregü. Rü jexguma itaxĩãchigu, rü toxna nananagü ga guxü̃ma ga tanaxwa̱xexü̃ ga torü namawaü̃ ga õna.
Romawa nangu ga Pauru
11 Rü tamaẽ̱xpü̱x ga tawemacü jéma capaxũwa tajexmagü. Rü nhu̱xmachi nagu tichoü̃ ga wüxi ga wapuru ga jema capaxũwa gáuanexü̃ ngupetüxẽxẽ́ne. Rü Arejã́driacü̱̃ã̱x nixĩ ga guma wapuru. Rü nape̱xeraü̃wa najexmagü ga taxre ga norü tupanachicüna̱xãgü ga Catu rü Porugu ãẽ́gagüxü̃.
12 Rü Chiracúchaarü türewa tangugü, rü tamaẽ̱xpü̱x ga ngunexü̃ jéma tajexmagü.
13 Rü jéma itaxĩãchi, rü nacutüarü ngaicamagu taxĩ nhu̱xmata Requíuwa tangugü. Rü moxü̃ãcü ínangu ga wüxi ga buanecü ga ítaxĩxü̃waama bucü rü toxü̃ inicuetaü̃. Rü jemaãrü moxü̃ãcüama rü Putériuwa tangugü.
14 28:14-15 Rü jexma nüxü̃ tajangau ga nhuxre ga duü̃xü̃gü ga jaxõgüxü̃. Rü toxna naxu na wüxi ga jüxü jexma naxü̃tagu tarüchoxü̃ca̱x. Rü marü wüxi ga jüxü ngupetügu rü itaxĩãchi na namagu Romawa taxĩxü̃ca̱x. Rü marü toxü̃ nacuáchigagü ga jema jaxõgüxü̃ ga Romagugüxü̃. Rü jema nama ga Ápiugu ãẽ́gaxü̃gu naxĩ na jexma toxü̃ jangaugüxü̃ca̱x. Rü nhuxre rü jema nachica ga Tamaẽ̱xpü̱x ga Taxepataü̃gu ãẽ́gaxü̃wa toxü̃ najarüṉg̱uxẽẽgü Rü togü rü nachopetü nhu̱xmata jema nachica ga Ápiuarü Ngü̃ẽchicagu ãẽ́gaxü̃wa nangugü. Rü jexguma Pauru nüxü̃ da̱xgu ga jema jaxõgüxü̃, rü Tupanana moxẽ naxã rü poraãcü nataãẽ. Rü jemaãcü Romawa tangugü.
15 Nüü̃ nadau 28:14
16 Rü jexguma Romawa tangugügu rü wüxi ga ĩpatawa nananguxẽẽgü ga Pauru nüxĩca namaã ga wüxi ga churara ga nüxna dauxü̃.
Romawa najexma ga Pauru
17 Rü tamaẽ̱xpü̱x ga ngunexü̃ marü jéma najexmagu, rü Pauru naxca̱x nangema ga jema Judéugüarü ãẽ̱xgacügü ga Romawa jexmagüxü̃. Rü jexguma nangutaque̱xegügu, rü nhanagürü ga Pauru nüxü̃: —Chama, Pa Chaueneẽgüx, rü taxuü̃ma i chixexü̃ chaxü namaã i tatanüxü̃gü, rü bai i nuxcümaxü̃güxü̃ i tórü o̱xigücümagümaã. Notürü Jerucharéü̃gu choxü̃ nijauxgü ga tatanüxü̃gü, rü Romacü̱̃ã̱x ga churaragüna choxü̃ namugü.
18 Rü jexguma marü choxna nacagüegu ga Romacü̱̃ã̱xgü, rü choxü̃ ninge̱xgüchaü̃, jerü taxuü̃ma ga ṯacü ga chixexü̃ chawa nadaugü na choxü̃ jama̱xgüxü̃ca̱x.
19 Notürü jema tatanüxü̃gü ga Judéugü rü najamuẽtanü na tama choxü̃ jange̱xgüxü̃ca̱x, rü jemaca̱x düxwa naxca̱x íchaca na nümatama ja ãẽ̱xgacü ja Chécharu choxna c̱axü̃ca̱x. Notürü tama tatanüxü̃güxü̃ na íchaxuaxü̃xü̃ca̱x nixĩ ga jemaca̱x íchac̱axü̃.
20 Rü ngẽmaca̱x nixĩ i pexca̱x nuã changemaxü̃ na pexü̃ chadauxü̃ca̱x rü pemaã chidexaxü̃ca̱x. Pema nüxü̃ pecua̱x rü jixema i Judéugü rü ítanaṉg̱uxẽẽ i na ínanguxü̃ ja Cristu. Rü jima Cristuca̱x nixĩ i chama i nhu̱xma i daa curẽtimaã chináĩxü̃ —nhanagürü.
21 Rü nümagü nanangãxü̃gü, rü nhanagürügü: —Toma rü taxuü̃ma i popera i Judéawa ne muxü̃ i cuchigagu ümatüxü̃ tajauxgü. Rü ngẽma taeneẽgü i ngẽ́ma ne ĩxü̃ rü núma ngugüxü̃ rü bai i wüxi i nüxü̃ ixuxü̃ i ṯacü rü ore i chixexü̃ i cuchiga.
22 Rü cuxü̃tawa nüxü̃ taxĩnüẽchaü̃ rü ¿nhuxũ nhacuxü̃ i cumax? Erü nüxü̃ tacua̱xgü rü guxü̃wama i Judéugü rü chixri nachiga nidexagü i ngẽma ore i ngexwacaxü̃xü̃ i Ngechuchuchiga —nhanagürügü.
23 Rü jexguma Paurumaã inaxunetagü ga wüxi ga ngunexü̃, rü napatawa naxĩ ga muxü̃ma ga duü̃xü̃gü. Rü Pauru namaã nüxü̃ nixu ga Tupanaãrü ore ga nhuxãcü ãẽ̱xgacü na jiĩxü̃ ja Tupana. Rü pa̱xmama inanaxügü, rü nhu̱xmata nachütaxü̃ rü nüxü̃́ nanangúchaü̃xẽẽ ga jema duü̃xü̃gü na Ngechuchuaxü̃́ jaxõgüãxü̃ca̱x. Rü jemaca̱x Muĩsé ümatüxü̃ ga mugüwa rü nuxcümaxü̃güxü̃ ga Tupanaãrü orearü uruü̃gü ümatüxü̃ ga orewa namaã nüxü̃ nixu ga Ngechuchuchiga.
24 Rü nümaxü̃ rü najaxõgü ga jema Pauru namaã nüxü̃ ixuxü̃ notürü ga togü rü tama najaxõgü.
25 Rü jexguma tama wüxigu naxĩnüẽgu ga jema duü̃xü̃gü, rü inanaxügü ga na íjaxĩxü̃. Rü jemaca̱x ga Pauru rü nhanagürü nüxü̃: —Meã perü o̱xigümaã nidexa ga Tupanaãẽ i Üünexü̃ ga jexguma Ichaíaxü̃ jadexaxẽẽgu rü nhaxgu:
26 “¡Rü ngẽ́ma naxũ, rü ngẽma duü̃xü̃gümaã nüxü̃ jarüxu rü nhacurügü tá nüxü̃: ‘Rü woo nüxü̃ pexĩnüẽgu rü tãũxü̃táma aixcuma nüxü̃ pecua̱xgü. Rü woo nüxü̃ perüdaunügu rü tãũxü̃táma aixcuma pejaxõgü.
27 Rü ngẽmaãcü peixĩgü i nhu̱xmax, erü tama choxü̃ pecuáxchaü̃ i pemax. Rü tama nüxü̃ pexĩnüẽ i chorü ore erü tama nüxü̃ pexĩnüẽchaü̃. Rü tama nüxü̃́ pejaxõgü i ngẽma chama pexü̃ nüxü̃ chadauxẽẽxü̃ erü tama nüxü̃́ pejaxõgüchaü̃. Rü tama peãẽwa chagu perüxĩnüẽ erü tama nüxü̃ perüxoechaü̃ i pecüma i chixexü̃gü rü tama chauxca̱x pedaugüchaü̃ na chama pexü̃ chamaxẽxẽẽxü̃ca̱x!’ ”
nhanagürü ga Tupanaãẽ i Üünexü̃.
28 Rü nhanagürü ta ga Pauru: —Rü name nixĩ i pema rü ta nüxü̃ pecua̱x rü nhu̱xma rü marü inaxügü na ngẽma tama Judéugü ixĩgüxü̃tanüwa naxunagüxü̃ i nhaã Tupanaãrü ore i tüxü̃ maxẽxẽẽxü̃. Rü nümagü tá nixĩ i aixcuma inaxĩnüẽxü̃ —nhanagürü.
29 Rü jexguma Pauru jema nhaxgu, rü ínixĩ ga jema Judéugü, rü poraãcü nügümaã íniporagatanücüü.
30 Rü taxre ga taunecü ga mecü jéma najexma ga Pauru nawa ga guma ĩ ga naxütanüne ga nagu na napexü̃ca̱x. Rü jéma meãma nanajaxuxü̃ ga guxü̃ma ga duü̃xü̃gü ga naxü̃tawa íjadaugüxü̃xü̃.
31 Rü nüxü̃ nixuchiga ga nhuxãcü ãẽ̱xgacü na jiĩxü̃ ga Tupana. Rü taxúema nüxna tanachu̱xu na nangúexẽẽãxü̃ ga Cori ja Ngechuchu ja Cristuchiga. Rü taxúema naxca̱x tanachixewe.
