Puracügü 3:1-26
3 Rü wüxi ga ngunexü̃gu ga Pedru rü Juã́ũ rü tamaẽ̱xpü̱xarü ngoragu ga jáuanecü rü tupauca ga taxü̃newa naxĩ, jerü jema nixĩ ga jumuxẽãrü ngora.
2 Rü jéma guma tupauca ga taxü̃newa najexma ga wüxi ga jatü ga norü bucümatama chixeparacü. Rü guxü̃ ga ngunexü̃gu rü natanüxü̃gü rü guma tupauca ga taxü̃neãrü ĩã̱x ga Mexẽchixü̃gu ãẽ́gaxü̃gu najamugüxü̃, na dĩẽruca̱x ínacaüüxü̃ca̱x nüxna ga duü̃xü̃gü ga guma tupauca ga taxü̃negu chocuxü̃xü̃.
3 Rü jexguma Pedru rü Juã́ũxü̃ nada̱xgux ga tupauca ga taxü̃negu na nachocuxü̃, rü guma chixeparacü rü nüxü̃ nawéme̱x rü dĩẽruca̱x nüxna naca.
4 Rü Pedru rü Juã́ũ meãma nüxü̃ narüdaunü, rü Pedru rü nhanagürü nüxü̃: —¡Toxü̃ nadawenü! —nhanagürü.
5 Rü nüma ga jatü rü nüxü̃ nadawenü, jerü nüma nüxü̃ nacua̱xgu rü chi ṯacü nüxna naxãgü.
6 Notürü ga Pedru rü nhanagürü nüxü̃: —Choxü̃́ nataxuma i dĩẽru. Notürü ngẽma choxü̃́ ngẽxmaxü̃ tá cuxna chaxã. Rü naẽ́gagu ja Ngechuchu ja Cristu ja Nacharétucü̱̃ã̱x cuxü̃ chamu, rü ¡inachi rü íixũ! —nhanagürü.
7 Rü jema nhaxguwena ga Pedru, rü norü tügüneme̱xẽgu najajauxãchi, rü inanachixẽẽ, rü jexgumatama napora ga name̱xtü̱xügüwa rü nacutügüwa.
8 Rü najuxnagü rü inachi, rü inanaxügü na ijaxũxü̃. Rü nümatama ijaxũãcüma Pedru rü Juã́ũwe tupauca ga taxü̃negu naxücu. Rü nanajuxnagüane rü Tupanaxü̃ nicua̱xüü̃.
9 Rü guxü̃ma ga duü̃xü̃gü nüxü̃ nadaugü ga na íjaxũxü̃, rü Tupanaxü̃ na jacua̱xüü̃xü̃.
10 Rü poraãcü naḇaixãchiãẽgü ga duü̃xü̃gü naxca̱x ga jema nüxü̃ ngupetüxü̃ ga guma jatü. Jerü nüxü̃ nacua̱xgü ga na guma jiĩxü̃ ga tupauca ga taxü̃neãrü ĩã̱x ga Mexẽchixü̃gu ãẽ́gaxü̃wa rütooxü̃chirécü rü jéma dĩẽruca̱x ícacü.
Charumáũãrü Chopetüchicawa nidexa ga Pedru
11 Rü guma chixeparachirécü ga marü naxca̱x jataanecü, rü tama Pedru rü Juã́ũna nixũgachichaü̃. Rü guma tupauca ga taxü̃necüwawa najexma ga wüxi ga chopetüchica ga Charumáũãrü Chopetüchicagu ãẽ́gaxü̃. Rü jema chopetüchicawa rü Pedru rü Juã́ũca̱x naxĩtaque̱xe ga guxü̃ma ga duü̃xü̃gü jerü poraãcü naḇaixãchiãẽgü.
12 Rü jexguma Pedru nüxü̃ da̱xgu ga jema duü̃xü̃gü ga jéma naxca̱x ĩtaque̱xegüxü̃, rü nhanagürü nüxü̃: —Pa Chautanüxü̃gü i Judéugüx, ¿Tü̱xcüü̃ peḇaixãchie namaã i ngẽma nhaã jatümaã ngupetüxü̃? ¿Rü tü̱xcüü̃ toxü̃ perüdaunü nhama torü poramaã rü torü mexü̃maã tanamexẽẽxü̃rüü̃?
13 —Nuxcümaxü̃gücü ga tórü o̱xigü ga Abrã́ũ rü Isaqui rü Jacú rü togü ga tórü o̱xigü rü nüxü̃́ najaxõgü ga Tupana. Rü jimatama Tupana nixĩ ja nhu̱xma Ngechuchuxü̃ taxẽẽcü, na guxü̃ãrü jexera jiĩxü̃ca̱x. Rü gumatama Ngechuchu ja Tupanaãrü ngü̃xẽẽruü̃ ixĩcü nixĩ ga pema ãẽ̱xgacü ga Piratuxü̃tawa penagagücü. Rü jexguma nüxü̃ jangéxchaü̃gu ga Piratu, rü pema rü tama penaxwa̱xegü ga na jangéãxü̃.
14 —Pema rü tama penaxwa̱xe ga na ínanguxuchixü̃ ga guma üünecü ga aixcuma mecü ga Ngechuchu, notürü naxca̱x ípeca na pexca̱x ínanguxuchixẽẽãxü̃ca̱x ga wüxi ga máẽtaxü̃.
15 —Rü jemaãcü pematama pejama̱xgü ga guma Ngechuchu ja tüxü̃ maxẽxẽẽcü. Notürü ga Tupana rü wena nanamaxẽẽ. Rü toma nixĩ ga nüxü̃ tadaugüxü̃ ga wena na namaxü̃xü̃.
16 —Rü nhaã jatü ga chixeparachiréxü̃ i pema nüxü̃ pedauxü̃ rü nüxü̃ pecuáxü̃ rü marü naxca̱x nitaane erü Ngechuchuaxü̃́ najaxõ. Rü ngẽma Ngechuchuaxü̃́ na jaxõõxü̃ca̱x nixĩ i naxca̱x jataanexü̃ ngẽma nhu̱xma guxãma i pema nüxü̃ pedauxü̃rüü̃.
17 —Rü dücax i nhu̱xma Pa Chaueneẽgüx, rü jexguma pema rü wüxigu perü ãẽ̱xgacügümaã pejama̱xgügu ga Ngechuchu, rü tama nüxü̃ pecua̱xgü ga ṯacü na pexüexü̃.
18 —Notürü ga Tupana rü jemaãcü najanguxẽẽ ga jema uneta ga nuxcüma nümatama nüxü̃ jaxuxü̃ nawa ga guxü̃ma ga norü orearü uruü̃gü. Jerü jema norü ore ga ümatüxü̃wa rü nhanagürü:“Cristu rü tá ngúxü̃ ninge”,
nhanagürü.
19 3:19-20 —Rü ngẽmaca̱x, Pa Chaueneẽgüx, rü name nixĩ i nüxü̃ perüxoe i pecüma i chixexü̃, rü Tupanaca̱x pedaugü, rü nüxü̃́ pejaxõgü na nüma pexü̃́ ínapiãxü̃ca̱x i perü pecadugü. Rü ngẽxguma i nüma rü tá pexü̃ nataãẽgüxẽẽ, rü tá núma nanamu ja Ngechuchu ga noxritama naãne ixügügu pexca̱x nüxü̃ naxunetacü na perü ãẽ̱xgacü ja Cristu na jiĩxü̃ca̱x.
20 Nüü̃ nadau 3:19
21 —Notürü i nhu̱xma rü Tupana nanaxwa̱xe i dauxü̃guxü̃ i naãnegu na naxã́ũxü̃ ja Ngechuchu nhu̱xmatáta nüma ja Tupana wena namexẽẽãgu i guxü̃ma i nhama i naãnewa ngẽxmaxü̃. Jerü jemaãcü nixĩ ga nüxü̃ jaxuxü̃ ga Tupana nawa ga nuxcümaxü̃güxü̃ ga norü orearü uruü̃gü ga ixüünexü̃.
22 —Rü Muĩsé rü tórü o̱xigümaã nüxü̃ nixu rü nhanagürü:“Rü perü Cori ja Tupana rü petanüwa tá nüxü̃ naxuneta i wüxi i norü orearü uruü̃ i chauxrüü̃ ixĩxü̃. Rü name nixĩ na naga pexĩnüẽxü̃ i guxü̃ma i ngẽma pemaã nüxü̃ jaxuxü̃.
23 Rü texé ja tatanüwa tama naga ĩnüxẽ i ngẽma orearü uruü̃, rü tá tüxü̃ ínata̱xüchi i tatanüwa”,
nhanagürü ga Muĩsé.
24 —Rü Chamuẽ́ũ rü guxü̃ma ga togü ga Tupanaãrü orearü uruü̃gü ga naweama ügüxü̃ rü ta nüxü̃ nixugüe ga ṯacü tá na üpetüxü̃ i nhamaü̃cüü.
25 —Rü nuxcümaxü̃chima ga Tupana rü tórü o̱xi ga Abrã́ũmaã nüxü̃ nixu rü nhanagürü:“Rü wüxi i cutaa tá nixĩ i nüxü̃ rüngü̃xẽẽxü̃ i guxü̃ma i duü̃xü̃gü i nhama i naãnecü̱̃ã̱x”,
nhanagürü. Rü jemaãcü ta Tupana inaxuneta nawa ga nuxcümaxü̃güxü̃ ga norü orearü uruü̃gü. Rü pemaã nüxü̃ chixu i nhu̱xma, rü pexca̱x nixĩ ga jema unetagü ga nuxcümaxü̃güxü̃ ga orearü uruü̃güwa tórü o̱xigümaã nüxü̃ jaxuxü̃ ga Tupana.
26 —Rü pemaã nüxü̃ chixu Pa Chautanüxü̃gü i Judéugüx, rü jexguma Tupana wena namaxẽẽgu ga Nane ga Ngechuchu rü petanüwaxira nanamu na pexü̃ nangü̃xẽẽxü̃ca̱x, erü nanaxwa̱xe i wüxichigü i pema na nüxü̃ perüxoexü̃ i pecümagü i chixexü̃ —nhanagürü ga Pedru.
