Puracügü 4:1-37
4 Rü jexguma duü̃xü̃gümaã íjadexagügu ga Pedru rü Juã́ũ, rü jexgumajane jéma nangugü ga guma tupauca ga taxü̃neãrü purichíaarü ãẽ̱xgacü, rü paigü, rü Chaduchéugü.
2 Rü Pedru rü Juã́ũmaã nanuẽ ga paigü jerü duü̃xü̃güxü̃ nangúexẽẽ ga na marü wena namaxü̃xü̃ ga Ngechuchu, rü naxrüü̃ tá ta wena namaxẽxü̃ i guxü̃ma i duü̃xü̃gü i marü juexü̃.
3 Rü ínanajauxü̃, rü pocupataü̃gu nanawocu nhu̱xmata moxü̃ãcü, jerü marü najáuane.
4 Notürü muxü̃ma ga jema duü̃xü̃gü ga nüxü̃ ĩnüẽxü̃ ga jema Tupanaãrü ore rü najaxõgü. Rü maneca 5000 wa nangu ega jatügüxicatama ixugügu.
5 Rü moxü̃ãcü Jerucharéü̃wa nangutaque̱xegü ga Judéugüarü ãẽ̱xgacügü, rü ãẽ̱xgacügü ga jaguã̱xgü, rü ngúexẽẽruü̃gü ga ore ga mugüwa ngu̱xẽẽtaegüxü̃.
6 Rü jéma najexma ta ga Aná ga paigüeru ixĩcü, rü Caipá, rü Juã́ũ, rü Arejã́dre, rü guxü̃ma ga jema togü ga paigü ga paigüerutanüxü̃ ixĩgüxü̃.
7 Rü nanamu na naxü̃tawa nagagüãxü̃ca̱x ga Pedru rü Juã́ũ. Rü jexma norü ngãxü̃tanügu nanachigüxẽẽ rü nüxna nacagü, rü nhanagürügü: —¿Texé pexü̃ tamu, rü texé pexna tanaxã i pora na penamexẽẽxü̃ca̱x i nhaã jatü? —nhanagürügü.
8 4:8-9 Rü Pedruwa najexma ga Tupanaãẽ ga Üünexü̃ rü nanaporaxẽẽ. Rü jemaca̱x ga Pedru rü nanangãxü̃, rü nhanagürü: —Pa Ĩãneãrü Ãẽ̱xgacügüx, rü Pa Ãẽ̱xgacügü i Jaguã̱xgüx, rü nhu̱xma toxna naxca̱x peca naxca̱x ga norü mexẽẽ i nhaã chixeparachiréxü̃ erü nüxü̃ pecuáxchaü̃ ga nhuxãcü na namexü̃.
9 Nüü̃ nadau 4:8
10 —Rü nhu̱xma tá pemaã nüxü̃ tixu na nüxü̃ pecuáxü̃ca̱x i guxãma i pema rü nüxü̃ nacua̱xgüxü̃ca̱x i guxü̃ma i tatanüxü̃gü i Judéugu. Rü nhaã jatü i nhu̱xma pepe̱xewa ngẽxmaxü̃ rü Ngechuchu ja Cristu ja Nacharétucü̱̃ã̱x nixĩ ga namexẽẽcü. Rü guma nixĩ ga pema curuchawa pejapotacü rü pejuxẽẽcü. Notürü ga Tupana rü wena nanamaxẽẽ.
11 —Rü gumatama Ngechuchu nixĩ ga pema nüxü̃ pexoecü. Notürü ga Tupana rü najamucuchi na guxü̃ãrü ãẽ̱xgacü jiĩxü̃ca̱x.
12 —Rü jima Ngechuchuxicatama nixĩ ja tórü maxẽxẽẽruü̃, erü nhama i naãnewa i tatanüwa rü jixicatama nixĩ ga Tupana tüxna namucü na tüxü̃ namaxẽxẽẽxü̃ca̱x —nhanagürü ga Pedru.
13 Rü jexguma jema ãẽ̱xgacügü nüxü̃ daugügu ga nhuxãcü tama muü̃ẽãcüma na jadexagüxü̃ ga Pedru rü Juã́ũ, rü naḇaixãchiãẽgü, jerü nüxü̃ nicua̱xãchitanü ga tama meã poperaxü̃ na jacuáxü̃ rü puracütanüxü̃mare jixĩgüxü̃. Rü aixcuma nüxü̃ nicua̱xãchitanü ga Ngechuchuarü ngúexü̃gü na jixĩgüxü̃.
14 Rü nhu̱xmachi nüxü̃ nadaugü ta ga guma jatü ga rümecü ga Pedru rü Juã́ũxü̃tagu na nachixü̃. Rü jemaca̱x ga jema ãẽ̱xgacügü rü taxuacüma nhuxũ nhanagürügüéga nachiga ga jema ngupetüxü̃.
15 Rü jexguma ga jema ãẽ̱xgacügü rü ínanamuxü̃ ga jema ínangutaque̱xegüxü̃wa, rü nüxĩcatama nügümaã nidexagü.
16 Rü nhanagürügü: —¿Ṯacü tá namaã ixüexü̃ i nhaã jatügü? Erü guxü̃ma i Jerucharéü̃cü̱̃ã̱x i duü̃xü̃gü rü nüxü̃ nacua̱xgü i ngẽma mexü̃ i taxü̃ i naxügüxü̃, rü taxuacüma itajacu̱x.
17 —Notürü ngẽma na tama jexeraãcü duü̃xü̃gütanüwa nanguchigaxü̃ca̱x i ngẽma ngupetüxü̃, ¡rü ngĩxã tanamuü̃ẽxẽẽ na nhu̱xmawena rü taxúemaãma ngẽma Ngechuchuchigagu jadexagüxü̃ca̱x! —nhanagürügü.
18 Rü wenaxãrü Pedru rü Juã́ũca̱x nacagü, rü nüxna naxãga na tama Ngechuchuchigamaã jadexagüxü̃ca̱x, rü bai i texéxü̃ na nangúexẽẽxü̃ca̱x i nachiga.
19 Notürü ga Pedru rü Juã́ũ rü nanangãxü̃gü, rü nhanagürügü: —¡Nagu perüxĩnüẽ i pematama! ¿Rü namexü̃ i Tupanape̱xewa na pega taxĩnüẽxü̃ rü e̱xna Tupanaga taxĩnüẽxü̃?
20 —Erü toma rü taxuacüma nüxü̃ tarüxoe na nüxü̃ tixuxü̃ ga jema nüxü̃ tadaugüxü̃ rü nüxü̃ taxĩnüẽxü̃ —nhanagürügü.
21 Rü jexguma ga jema ãẽ̱xgacügü rü najaxãxũnegü rü jemaãcü ínajamugü, jerü nataxuma ga ṯacüca̱x na napocueãxü̃ rü duü̃xü̃güxü̃ namuü̃ẽ, jerü guxü̃ma ga duü̃xü̃gü rü Tupanaxü̃ nicua̱xüü̃gü naxca̱x ga jema nüxü̃ ngupetüxü̃ ga guma jatü ga chixeparawa rümecü.
22 Rü guma jatü ga jemaãcü Tupanaãrü poramaã naxca̱x itaanecü, rü maneca 40 arü jexera nixĩ ga norü taunecü.
Jaxõgüxü̃ rü naxca̱x ínacagü na Tupana norü puracüca̱x naporaexẽẽxü̃ na tama naxãneẽãcüma naxügüãxü̃ca̱x
23 Rü jexguma marü ínamuxü̃ã̱xgu, rü Pedru rü Juã́ũ rü namücügü íjexmagüxü̃wa naxĩ. Rü namaã nüxü̃ nixugüe ga guxü̃ma ga jema ore ga ãẽ̱xgacügü ga jaguã̱xgü rü paigüarü ãẽ̱xgacügü namaã nüxü̃ ixuxü̃.
24 Rü jexguma Pedru rü Juã́ũxü̃ naxĩnüẽgu ga namücügü, rü guxü̃ma wüxigu najumuxẽgü rü Tupanamaã nidexagü rü nhanagürügü: —Pa Corix, cuma cunaxü ga dauxü̃guxü̃ ga naãne rü nhama ga naãne, rü taxü̃ i taxtü, rü guxü̃ma i ṯacü i nawa ngẽxmaxü̃.
25 —Rü cumatama nixĩ ga nuxcüma Cuãẽ i Üünexü̃xü̃ cumuxü̃ na curü ngü̃xẽẽruü̃ ga Dawíwa janadexaxü̃ca̱x rü nhaxü̃ca̱x:“¿Tü̱xcüü̃ ínipurae i nhama i naãnecü̱̃ã̱x i duü̃xü̃gü i tama jaxõgüxü̃? ¿Rü tü̱xcüü̃ ngẽma notüca̱xmamare ixĩgüxü̃gu narüxĩnüẽ i guxü̃ i nachiü̃ãnecü̱̃ã̱x?
26 —Nümagü i nachiü̃ãnegüarü ãẽ̱xgacügü rü Tupanamaã nanuẽ, rü nügümaã nangutaque̱xegü na wüxigu nügümaã nagu naxĩnüẽxü̃ca̱x na nhuxãcü tá nüxü̃ na najexeragüxü̃ca̱x ja Cori ja Tupana rü Nane ja nüxü̃ naxunetacü ja Cristu”,
nhanagürü.
27 —Rü aixcuma nixĩ ga nhama ga ĩãnewa ga ãẽ̱xgacügü ga Erudi rü Piratu ga nangutaque̱xegüxü̃ namaã ga to ga nachiü̃ãnegücü̱̃ã̱x rü totanüxü̃ ga Judéugü, na chixexü̃ naxügüxü̃ca̱x namaã ja curü ngü̃xẽẽruü̃ ja üünecü ja Ngechuchu ja Cristuxü̃ nüxü̃ cuxunetacü.
28 —Rü jemaãcü ga nümagü rü najanguxẽẽ ga guxü̃ma ga jema cuma nuxcümama nagu curüxĩnüxü̃ rü nüxü̃ cuxunetaxü̃ rü tá na janguxü̃.
29 —¡Rü dücax, Pa Corix, cuma nüxü̃ cucua̱x na nhuxãcü toxü̃ naxãxũnegüxü̃! Toma nixĩ i curü ngü̃xẽẽruü̃gü rü tanaxwa̱xe na toxü̃ cuporaexẽẽxü̃ na tama tamuü̃ẽãcüma nüxü̃ tixuxü̃ca̱x i curü ore.
30 —¡Rü curü poramaã nameẽxẽẽ i duü̃xü̃gü i iḏaaweexü̃! ¡Rü duü̃xü̃güxü̃ nawe̱x i cua̱xruü̃gü i curü poramaã cuxüxü̃ i naẽ́gagu ja curü ngü̃xẽẽruü̃ ja üünecü ja Ngechuchu! —nhanagürügü.
31 Rü jexguma jumuxẽwa nüxü̃ nachauegu, rü guma ĩpata ga nawa nangutaque̱xegüne rü naxĩã̱xãchi. Rü Tupanaãẽ i Üünexü̃ rü nüxna nangu ga guxü̃ma. Rü tama namuü̃ẽãcüma nüxü̃ nixugüe ga Tupanaãrü ore.
Jema jaxõgüxü̃ãrü jemaxü̃gü rü guxü̃ãrü nixĩ
32 Rü namu ga jema jaxõgüxü̃. Rü guxü̃ma rü wüxigu narüxĩnüẽ. Rü taxuü̃ma nagu narüxĩnü ga noxrüxicatama na jiĩxü̃ ga norü jemaxü̃gü, notürü guxü̃ma ga namücügümaã nangau.
33 Rü jema ngúexü̃gü ga Ngechuchu imugüxü̃ na Tupanaãrü puracü naxügüxü̃ca̱x, rü Tupanaãrü poramaã nüxü̃ nixugüe ga nhuxãcü wena na namaxü̃xü̃ ga Cori ga Ngechuchu. Rü Tupana rü poraãcü nüxü̃ narüngü̃xẽẽ ga guxü̃ma ga jema jaxõgüxü̃.
34 4:34-35 Rü natanüwa rü nataxuma ga wüxi ga nüxü̃́ nataxuxü̃, jerü guxü̃ma ga jema nüxü̃́ jexmaxü̃ ga naãnegü rü e̱xna ĩpatagü, rü namaã nataxegü. Rü jema dĩẽru ga ngĩxü̃ najauxgücü rü jéma ngĩxü̃ nangegü, rü jema ngúexü̃gü ga Ngechuchu imugüxü̃na ngĩxü̃ najaxãgü. Rü nhu̱xmachi nügü ngĩxü̃ ninuü̃xü̃ ga nhuxrechigü nüxü̃́ nataxuxü̃ ga wüxichigü.
35 Nüü̃ nadau 4:34
36 Rü najexma ga wüxi ga jatü ga Lewítanüxü̃ ga Chiprecü̱̃ã̱x ga Juchegu ãẽ́gacü. Rü jema ngúexü̃gü ga Ngechuchu imugüxü̃ na Tupanaãrü puracü naxügüxü̃ca̱x rü Barnabémaã nanaxugü. Rü ngẽma naẽ́ga, rü: “Taãẽxẽẽruü̃”, nhaxü̃chiga nixĩ.
37 Rü nüma ga Barnabé rü nüxü̃́ najexma ga wüxi ga naãne, rü namaã nataxe. Rü jema ngúexü̃gü ga Ngechuchu imugüxü̃xü̃tawa ngĩxü̃ nana ga jema dĩẽru.
