Puracügü 5:1-42
5 Rü najexma ga wüxi ga jatü ga Ananíãgu ãẽ́gaxü̃ rü Safira ga nama̱x. Rü nümagü rü namaã nataxegü ga wüxi ga norü naãne.
2 Notürü ga jema jatü rü nama̱xmaã nanamexẽẽ na nügüxü̃́ ngĩxne najauxgüxü̃ ga nhuxre ga jema naãnetanü. Rü nhu̱xmachi jema ngúexü̃gü ga Ngechuchu imugüxü̃xü̃tawa ngĩxü̃ nangegü ga jema nüxü̃́ íjaxücü.
3 Rü jexguma ga Pedru rü nhanagürü nüxü̃: —Pa Ananíãx, ¿tü̱xcüü̃ ṉg̱oxo i Chatanága cuxĩnü rü Tupanaãẽ i Üünexü̃maã cuidora, rü cugüxü̃́ ngĩxne cujaxu i nhuxre i ngẽma curü naãnetanü?
4 —¿E̱xna jexguma taũta namaã cutaxegu, rü tama e̱xna cuxrü jiĩxü̃ ga jema naãne? ¿Rü jexguma namaã cutaxegu, tama e̱xna cuxrü jiĩxü̃ ga jema dĩẽru na ngĩxü̃ cugu̱xẽẽxü̃ca̱x i ngẽma cuma cunaxwa̱xexü̃ãcüma? ¿Tü̱xcüü̃ i cunaxüxü̃ i nhaã? Tama jatügümaãxĩca cuidora, notürü Tupanamaã rü ta nixĩ i cuidoraxü̃ —nhanagürü ga Pedru.
5 Rü jexguma jema orexü̃ naxĩnügu ga Ananíã, rü juxü̃ma inajangu. Rü poraãcüxü̃chima namuü̃ẽ ga guxü̃ma ga jema duü̃xü̃gü ga jexguma jemaxü̃ nacuáchigagügu.
6 Rü nhuxre ga jéma jexmagüxü̃ ga ngextü̱xüxü̃gü rü nanajauxgü ga naxü̃ne, rü nananuquegü, rü inajata̱xgü.
7 Rü tamaẽ̱xpü̱x ga ngora ngupetüxgu rü íingu ga nama̱x. Rü jexma ixücu notürü tama nüxü̃ icua̱x ga ṯacü na ngupetüxü̃.
8 Rü Pedru ngĩxna naca, rü nhanagürü: —¿Jema natanü ga ipexunetaxü̃gu jiĩxü̃ ga namaã petaxegüxü̃ ga perü naãne? —nhanagürü. Rü ngĩma rü: —Ngü̃, ngẽxgumaẽ̱xpü̱xgu nixĩ —ngĩgürügü.
9 Rü Pedru rü nhanagürü ngĩxü̃: —¿Tü̱xcüü̃ pegümaã ngẽmaãcü wüxigu perüxĩnüẽ na namaã peidoraexü̃ca̱x i Tupanaãẽ i Üünexü̃? ¡Dücax, ngẽma cutexü̃ ijata̱xgüxü̃ rü marü ínangugü, rü nhu̱xma rü cuxü̃ rü tá ta ngẽ́ma nangegü! —nhanagürü.
10 Rü jexgumatama ju̱xcüma Pedrupe̱xegu ijangu. Rü jexguma nachocu̱xgu ga jema ngextü̱xüxü̃gü, rü ju̱xcüma ngĩxü̃ inajangaugü. Rü ngĩxü̃ najauxgü, rü ngĩtexü̃tagutama ngĩxü̃ najata̱xgü.
11 Rü jexguma nüxü̃ nacua̱xgügu ga jema ngupetüxü̃, rü guxü̃ma ga jema jaxõgüxü̃ rü jema togü ga duü̃xü̃gü rü ta poraãcüxü̃chima namuü̃ẽ.
Tupanaãrü poramaã nanaxügü ga muxü̃ma ga mexü̃gü
12 Rü jema ngúexü̃gü ga Ngechuchu imugüxü̃, rü duü̃xü̃güpe̱xewa nanaxügü ga muxü̃ma ga mexü̃gü ga Tupanaãrü poramaã naxügüxü̃. Rü inanawe̱xgü ga muxü̃ma ga cua̱xruü̃gü. Rü guxü̃ma ga jema jaxõgüxü̃ rü guxü̃guma naxĩtaque̱xegüxü̃ nawa ga jema tupauca ga taxü̃neãrü chopetüchica ga Charumáũãrü Chopetüchicagu ãẽ́gaxü̃.
13 Rü jema togü ga duü̃xü̃gü ga tama jaxõgüxü̃ rü namuü̃ẽ na jema jaxõgüxü̃tanügu naxãgüxü̃, notürü poraãcü jema jaxõgüxü̃xü̃ nangechaü̃gü.
14 Rü nimuẽtanüãma ga jema jaxõgüxü̃ jerü muxü̃ma ga duü̃xü̃gü ga jatüxü̃gü rü ngexü̃gü rü Coriaxü̃́ najaxõgüetanü.
15 Rü jema duü̃xü̃gü rü ĩãnemaü̃güwa nanagagüxü̃ ga duü̃xü̃gü ga iḏaaweexü̃, rü jexma najamugüxü̃ naxchápenüü̃maã rü norü caruü̃gümaã na jexguma Pedru jéma üpetüxgu, rü naxchipetamare nüxü̃ na jachixü̃ca̱x.
16 Rü jexgumarüü̃ ta rü jéma naxĩtaque̱xegüxü̃ ga muxü̃ma ga duü̃xü̃gü ga Jerucharéü̃ãrü ngaicamana imugüne ga ĩãnewa ne ĩxü̃. Rü jéma naxca̱x nanagagüxü̃ ga jema iḏaaweexü̃ rü jema ng̱oxoã̱xgüxü̃. Rü guxü̃ma naxca̱x nitaanegü.
Pedru rü Juã́ũwe ningẽxü̃tanü ga paigü
17 Rü jexguma ga guma paigüeru rü guxü̃ma ga jema natanüxü̃gü ga Chaduchéugü rü poraãcü nixãũxãchigü naxca̱x ga jema mexü̃gü ga naxügüxü̃ ga jema ngúexü̃gü ga Ngechuchu imugüxü̃.
18 Rü jemaca̱x norü purichíagüxü̃ namu na ínajauxü̃ãxü̃ca̱x ga jema ngúexü̃gü. Rü ĩãneãrü pocupataü̃gu nanapocue.
19 Notürü Coriarü orearü ngeruü̃ ga dauxü̃cü̱̃ã̱x naxca̱x najawãxna ga jema pocupataü̃ãrü ĩã̱xgü ga chütacü. Rü ínanamuxü̃, rü nhanagürü nüxü̃:
20 —¡Ngẽ́ma tupauca ja taxü̃newa pexĩ, rü guxü̃ i duü̃xü̃gümaã nüxü̃ pejarüxu na nhuxãcü Tupana inaxãxü̃ i ngexwacaxü̃xü̃ i maxü̃! —nhanagürü.
21 Rü jexguma ga jema ngúexü̃gü ga Ngechuchu imugüxü̃ rü naga naxĩnüẽ ga jema ore. Rü moxü̃ãcü ga pa̱xmamaxü̃chi rü tupauca ga taxü̃newa naxĩ, rü duü̃xü̃güxü̃ nangúexẽẽ. Rü joxni ga guma paigüeru rü natanüxü̃gü, rü nanangutaque̱xexẽẽ ga guxü̃ma ga jema togü ga ãẽ̱xgacügü ga ãẽ̱xgacügütücumüwa ügüxü̃. Rü pocupataü̃wa nanamugü ga purichíagü na jagagüãxü̃ca̱x ga jema ngúexü̃gü ga Ngechuchu imugüxü̃.
22 5:22-23 Rü jexguma pocupataü̃wa nangugügu ga jema purichíagü, rü taxuxü̃xü̃ma inajangaugü. Rü najawoegu, rü nüxü̃ najarüxugüe, rü nhanagürügü: —Jima pocupataü̃ rü narüwãxta, rü meãma nataichire̱x, rü purichíagü nüxna nadaugü i naã̱xwa. Notürü ngẽxguma tajawãxnagu, rü taxuxü̃xü̃ma itajangaugü i aixepewa —nhanagürügü.
23 Nüü̃ nadau 5:22
24 Rü jexguma jema orexü̃ naxĩnüẽgu ga jema paigüeru rü jema togü ga paigü ga ãẽ̱xgacügü ixĩgüxü̃ rü jema tupauca ga taxü̃neãrü purichíagüarü ãẽ̱xgacü rü guxü̃ma naḇaixãchiãẽgü jerü tama nüxü̃ nacua̱xgü ga ngextá tá na nanguxü̃ ga guxü̃ma ga jema rü nhuxãcü tá na ijanaxoxẽẽgüãxü̃.
25 Rü jexguma jemagu ínaxĩnüẽjane rü jéma nangu ga wüxi ga jatü, rü namaã nüxü̃ nixu, rü nhanagürü: —Ngẽma jatügü i pepocuechiréxü̃, rü tupauca ja taxü̃newa nangẽxmagü, rü ínanangúexẽẽ i duü̃xü̃gü —nhanagürü.
26 Rü jéma naxĩ ga tupauca ga taxü̃neãrü purichíagüarü ãẽ̱xgacü wüxigu namaã ga norü purichíagü na jagagüãxü̃ca̱x. Notürü namuü̃ẽ na duü̃xü̃gü nutamaã jamuxü̃tanüxü̃, rü jemaca̱x meãmare jema ngúexü̃güxü̃ nigagü.
27 Rü jexguma namaã ínangugügu, rü jema ãẽ̱xgacügüpe̱xewa nanagagü. Rü jema paigüeru rü namaã nidexa rü nhanagürü nüxü̃:
28 —Marü poraãcü pexna tanachu̱xu na tama ngẽma Ngechuchuégamaã penangúexẽẽxü̃ca̱x. Notürü i pema rü guxü̃ne ja Jerucharéü̃wa penangúexẽẽ i duü̃xü̃gü, rü nhu̱xmachi toxna penaxuxchaü̃ ga na togagu najuxü̃ ga jema Ngechuchu —nhanagürü.
29 Rü Pedru rü namücügümaã nanangãxü̃gü, rü nhanagürügü: —Narümemaẽ nixĩ na Tupanaga taxĩnüẽxü̃ rü tama i jatügüga.
30 —Guma Tupana ga nuxcümaxü̃güxü̃ ga tórü o̱xigü nüxü̃́ jaxõgücü, rü guma nixĩ ga wena namaxẽẽcü ga Ngechuchu ga pema pejamácü ga jexguma curuchawa pejapotagügu.
31 —Notürü Tupana rü nanataxẽẽãma, rü nügüarü tügünecüwawa nanatoxẽẽ. Rü tórü cua̱xruü̃ rü maxẽxẽẽruü̃ najangucuchixẽẽ na tatanüxü̃gü i Judéugüxü̃ nangü̃xẽẽxü̃ca̱x na nüxü̃ naxoexü̃ca̱x i norü chixexü̃gü, rü Tupana nüxü̃́ nüxü̃ nangechaü̃xü̃ca̱x i norü pecadugü.
32 —Rü toma nüxü̃ tacua̱x na aixcuma jiĩxü̃ i guxü̃ma i ngẽma pemaã nüxü̃ tixuxü̃ erü tomatama nüxü̃ tadaugü. Rü ngẽxgumarüü̃ ta i Tupanaãẽ i Üünexü̃ i Tupana tüxna ãxü̃ ja jíxema naga ĩnüẽxẽ, rü nüxü̃ nacua̱x na aixcuma jiĩxü̃ —nhanagürügü.
33 Rü jexguma jemaxü̃ naxĩnüẽgu ga jema ãẽ̱xgacügü, rü poraãcüxü̃chima nanuẽ, rü nanadaixchaü̃.
34 Notürü jema ãẽ̱xgacügütanüwa najexma ga wüxi ga Parichéu ga Gamariéu ga naẽ́ga. Rü nüma rü meãma nanangúexẽẽ ga Tupanaãrü mugü. Rü guxü̃ma ga duü̃xü̃gü rü nüxü̃ nangechaü̃gü. Rü nüma ga Gamariéu inachi rü nanamu na paxaãchi ínamuxü̃ãxü̃ca̱x ga jema ngúexü̃gü ga Ngechuchu imugüxü̃.
35 Rü nhu̱xmachi namücügü ga ãẽ̱xgacügümaã nüxü̃ nixu rü nhanagürü: —Pa Chautanüxü̃x, ¡pexuãẽgü na ṯacü tá namaã pexüexü̃ i nhaã jatügü!
36 —Rü nüxna pecua̱xãchie ga ü̃pa ga nhuxãcü ãẽ̱xgacüxü̃ nügü ningucuchixẽẽchaü̃ ga Teudá. Rü nügütama nixu na wüxi ga ṯacü na jiĩxü̃. Rü maneca 400 naguxü̃ ga jatügü nawe narüxĩ. Notürü churaragü najama̱xgü, rü naju. Rü guxü̃ma ga jema nawe rüxĩxü̃ rü nangĩãchi, rü jexma najarüxo ga guxü̃ma.
37 —Rü jixcüra ínangu ga to ga jexguma tachiü̃ãneãrü ãẽ̱xgacü duü̃xü̃güxü̃ ixugügu, rü jema nixĩ ga Juda ga Gariréaanecü̱̃ã̱x ga ãẽ̱xgacüxü̃ nügü ingucuchixẽẽchaü̃xü̃. Rü najaxucu̱xẽgü ga duü̃xü̃gü rü nawe narüxĩ ga nhuxre. Notürü jemaxü̃ rü ta nima̱xgü rü naju. Rü guxü̃ma ga jema nawe rüxĩxü̃ rü nangĩãchi.
38 —Rü ngẽmaca̱x i nhu̱xma rü pexü̃ chaxucu̱xẽ na pejange̱xgüxü̃ i nhaã jatügü, rü tama penapocuexü̃. Erü ngẽxguma nagagutama jixĩgu i ngẽma nüma naxügüxü̃, rü tá inajarüxo.
39 —Notürü ngẽxguma Tupanaãrü jixĩgu i nhaã naxügüxü̃, rü taxuacüma ipejanaxoxẽẽ. ¡Rü pexuãẽgü na tama ngürüãchi Tupanamaã jiĩxü̃ i penuẽxü̃! —nhanagürü. Rü guxü̃ma ga jema ãẽ̱xgacügü rü naga naxĩnüẽ ga jema norü ucu̱xẽ.
40 Rü nhu̱xmachi nanachocuxẽẽ ga jema ngúexü̃gü ga Ngechuchu imugüxü̃. Rü najac̱uaixgü. Rü nüxna naxãga na tama Ngechuchuchiga jadexagüxü̃ca̱x. Rü jemawena rü najange̱xgü.
41 Rü jema ãẽ̱xgacügüna ínixĩ ga jema ngúexü̃gü. Rü nataãẽgü jerü woetama Tupana nanaxwa̱xe ga jemaãcü Ngechuchuca̱x ngúxü̃ na jangegüxü̃.
42 Rü guxü̃ ga ngunexü̃gu tupauca ga taxü̃newa rü ĩpatagüwa, rü nanangúexẽẽãma, rü nüxü̃ nixugüetanü ga ore ga mexü̃ ga Ngechuchu ja Cristuchiga.
