Puracügü 6:1-15
6 Rü jexgumaü̃cüü rü jexeraãcü nimuchigü ga jema duü̃xü̃gü ga jaxõgüxü̃. Rü natanüwa najexmagü ga Judéugüchire̱x ga Greguanewa ne ĩxü̃ rü Gregugawa idexagüxü̃. Rü najexma ta ga jaxõgüxü̃ ga Judéugü ga Jerucharéü̃cü̱̃ã̱x ga woetama nagawa idexagüxü̃. Rü jema jaxõgüxü̃ ga Gregugawa idexagüxü̃ rü nidexagüecha nachigagu ga jema jaxõgüxü̃ ga Jerucharéü̃cü̱̃ã̱xgü ixĩgüxü̃, rü nhanagürügü: —Totanüwa jutegüxe rü tama meã õna tüxna naxãgüxü̃ i ngẽxguma õna inaxãgüü̱̃xgu i wüxichigü i ngunexü̃gu —nhanagürügü.
2 Rü jexguma ga jema 12 ga ngúexü̃gü ga Ngechuchu imugüxü̃ rü guxü̃ma ga jema jaxõgüxü̃xü̃ nangutaque̱xexẽẽgü, rü nhanagürügü nüxü̃: —Tama name na ítanangéxü̃ i Tupanaãrü orearü uchiga i tomax na õnamaã itacuáxü̃ca̱x.
3 —Rü ngẽmaca̱x, Pa Tomücügüx, rü ¡Naxca̱x peda̱x i petanüwa ja 7 ja jatügü ja guxãma nüxü̃ ngechaü̃cü, rü meã naãẽxü̃ cuácü, rü aixcuma Tupanaãẽ i Üünexü̃ nawa ngẽxmacü! Rü toma tá nüxna tanaxã i ngẽma puracü na nümagü õnamaã inacua̱xgüxü̃ca̱x.
4 —Rü ngẽxguma i toma rü jumuxẽwa rü Tupanaãrü orearü uchigawaxicatama tá tapuracüe —nhanagürügü.
5 Rü jexguma ga guxü̃ma ga jema duü̃xü̃gü rü: —Ngü̃ —nhanagürügü naxca̱x ga jema ore. Rü nüxü̃ naxunetagü ga Estéwãũ ga meã jaxõcü rü aixcuma Tupanaãẽ i Üünexü̃ nawa jexmacü, rü Piripi, rü Pócuru, rü Nicanúru, rü Timáũ rü Paruménu, rü Nicuráu ga Ãtioquíacü̱̃ã̱x ga taũta Ngechuchuaxü̃́ jaxõõgu Judéugücüma jaxucü.
6 Rü jema ngúexü̃gü ga Ngechuchu imugüxü̃xü̃tawa nanagagü. Rü nümagü naxme̱xmaã nüxü̃ jangõgüãcüma naxca̱x najumuxẽgü.
7 Rü jema Tupanaãrü ore rü jexeraãcü nixũchigü. Rü poraãcü nimuẽtanü ga jema jaxõgüxü̃ ga Jerucharéü̃wa. Rü woo muxũchixü̃ma ga Judéugüarü paigü rü ta Ngechuchuaxü̃́ najaxõgü.
Estéwãũxü̃ nijauxgü
8 Rü Estéwãũ nixĩ ga wüxi ga jatü ga Tupana poraãcü nüxü̃ rüngü̃xẽẽcü rü naporaxẽẽcü na duü̃xü̃gütanüwa naxüãxü̃ca̱x ga mexü̃gü ga taxü̃gü rü cua̱xruü̃gü ga Tupanaãrü poramaã naxüxü̃.
9 Rü najexma ga wüxi ga ngutaque̱xepataü̃ ga Judéugüarü ga Ínguxü̃xü̃ãrü Ngutaque̱xepataü̃gu ãẽ́gane. Rü gumawa nangutaque̱xegü ga duü̃xü̃gü ga ü̃paacü corigüme̱xẽwa jexmagüxü̃. Rü nhuxre ga guma ngutaque̱xepataü̃cü̱̃ã̱x rü wüxigu namaã ga nhuxre ga Chireneãnecü̱̃ã̱x, rü Arejã́driaanecü̱̃ã̱x, rü Chiríchiaanecü̱̃ã̱x, rü Áchiaarü naãnecü̱̃ã̱x, rü inanaxügüe ga Estéwãũmaã na ijaporagatanücüüxü̃.
10 Notürü taxuacüma Estéwãũxü̃ narüjexeragü, jerü nüma ga Estéwãũ rü nidexa namaã ga jema cua̱x ga Tupanaãẽ i Üünexü̃ nüxna ãxü̃.
11 Rü jexguma ga jema duü̃xü̃gü rü togüaxü̃́ nanaxütanügü na Estéwãũchiga doraxü̃ jaxugüxü̃ca̱x. Rü nhanagürügü ga jema idoraegüxü̃: —Toma nüxü̃ taxĩnüẽgu, rü Muĩséchiga rü Tupanachigamaã chixexü̃ ga ore nixugü ga Estéwãũ —nhanagürügü.
12 Rü jemaãcü nananuẽxẽẽ ga duü̃xü̃gü, rü ãẽ̱xgacügü ga jaguã̱xgü, rü ngúexẽẽruü̃gü ga ore ga mugüwa ngu̱xẽẽtaegüxü̃. Rü jemaca̱x Estéwãũca̱x nibuxmü, rü najajauxgü, rü ãẽ̱xgacügü ga tacügü íngutaque̱xegüxü̃wa nanagagü.
13 Rü naxca̱x nadaugü ta ga jatügü ga doraxü̃ ixugüemarexü̃ rü jema rü nhanagürügü: —Nhaã jatü rü guxü̃guma chixexü̃maã nidexa i nachigagu ja daa tupauca ja taxü̃ne, rü nachigagu i Tupanaãrü mugü.
14 —Rü toma rü nüxü̃ taxĩnüẽ rü:
“Jima Ngechuchu ja Nacharétucü̱̃ã̱x rü tá nanangutaü̃xẽẽ ja daa tupauca, rü tá inajanaxoxẽẽ i nacümagü ga Muĩsé tüxü̃ ngúexẽẽxü̃”, —nhanagürügü.
15 Rü jexguma Estéwãũxü̃ nadaunügu ga guxü̃ma ga jema ãẽ̱xgacügü ga jéma rütogüxü̃, rü nüxü̃ nadaugü ga nachametü rü wüxi ga dauxü̃cü̱̃ã̱x ga orearü ngeruü̃chametürüü̃ na jiĩxü̃.
