Puracügü 7:1-60
7 Rü nüma ga paigüeru, rü Estéwãũna naca rü nhanagürü: —¿Aixcuma jiĩxü̃ i nhaã ore i nüxü̃ jaxugüexü̃? —nhanagürü.
2 Rü Estéwãũ nanangãxü̃, rü nhanagürü: —Pa Chautanüxü̃ Pa Ãẽ̱xgacügüx, ¡Choxü̃́ iperüxĩnüẽ! Guma Tupana ja mexẽchicü, rü nuxcümaxü̃cü ga tórü o̱xi ga Abrã́ũca̱x nango̱x ga jexguma Mechopotámiããrü naãnegu naxãchiü̃gu ga jexguma taũta Aráü̃ãrü naãnewa naxũxgu na jexma jaxãchiü̃xü̃ca̱x.
3 —Rü Tupana rü nhanagürü nüxü̃:“¡Nüxna ixũ i cuchiü̃ãne rü cutanüxü̃, rü ngẽma chama tá cuxü̃ nüxü̃ chadauxẽẽxü̃ i naãnewa naxũ!”
nhanagürü.
4 —Rü jexguma ínaxũxũ ga Abrã́ũ nawa ga jema Caudéucü̱̃ã̱xãrü naãne ga ngextá noxri ínaxãchiü̃xü̃wa, rü Aráü̃ãrü naãnegu najaxãchiü̃. Rü jexguma nanatü ju̱xguwena, rü nhama ga naãne i nhu̱xma nagu pexãchiü̃xü̃wa naxũ, jerü jemaãcü Tupana núma nanaga.
5 —Notürü jexguma rü ta taxuü̃ma ga noxrüxü̃chi ga naãne nüxna naxã ga Tupana i nhama i naãnewa, rü bai ga íraxü̃ ga noxrüxü̃chi ga naãne. Notürü Abrã́ũmaã inaxuneta ga jixcaama tá nüxna na naxããxü̃ ga nhama i naãne na noxrüxü̃chi jiĩxü̃ca̱x, rü jixcaama marü naju̱xguwena rü nanegüarü na jiĩxü̃ca̱x. Rü jemaãcü Abrã́ũmaã inaxuneta ga woo na nangexacüxü̃ ga jexguma.
6 —Rü nhanagürü Abrã́ũxü̃ ga Tupana:“Rü jixcama i cutaagü rü tá to i nachiü̃ãne i tama noxrü ixĩxü̃wa nangẽxmagü. Rü ngẽma nachiü̃ãnecü̱̃ã̱x i duü̃xü̃gü rü norü duü̃xü̃güxü̃ tá najaxĩgüxẽẽ. Rü 400 ja taunecü rü ngẽma duü̃xü̃gü rü tá chixri namaã nachopetü i cutaagü.
7 Notürü chama tá chanapocue i ngẽma nachiü̃ãnecü̱̃ã̱x i norü duü̃xü̃güxü̃ jaxĩgüxẽẽxü̃. Rü ngẽmawena i cutaagü rü tá ínachoxü̃ nawa i ngẽma naãne, rü nuã nhaã i naãnewa tá choxü̃ nicua̱xüü̃gü”,
nhanagürü ga Tupana.
8 —Rü jexguma Tupana rü Abrã́ũ rü nügümaã nanamexẽẽ, rü nhanagürü ga Tupana:“Chama rü tá cuxü̃ charüngü̃xẽẽ ega cuma rü guxü̃ma i cutanüxü̃gü ípewiü̃cha̱xmüpe̱xechiraü̃gu. Rü ngẽma tá nixĩ i cua̱xruü̃ i jigümaã imexẽẽxü̃”,
nhanagürü ga Tupana. Rü nabu ga wüxi ga nane ga Abrã́ũ, rü Isaquigu nanaxüéga. Rü jexguma 8 ga norü ngunexü̃wa nanguxgu ga Isaqui, rü nümatama ga Abrã́ũ rü ínanawiecha̱xmüpe̱xechiraü̃. Rü jexguma marü naja̱xgu ga Isaqui rü nabu ga nane ga Jacú, rü nümatama ga Isaqui rü ínanawiecha̱xmüpe̱xechiraü̃. Rü jixcama marü naja̱xgu ga Jacú rü nüxü̃́ najexma ga 12 ga nanegü. Rü nümatama ga Jacú rü ínanawiecha̱xmüpe̱xechiraü̃ ga guxü̃ma ga jema 12 ga nanegü. Rü jema 12 ga nanegü nixĩ ga jema 12 ga nuxcümaxü̃güxü̃ ga tórü o̱xigü.
9 7:9-10 —Rü jema 12 ga Jacú nanegü ga tórü o̱xigü ixĩgüxü̃tanüwa rü wüxi rü Juche nixĩ ga naẽ́ga. Notürü naẽneẽgü ga guma Juche rü nixãũxãchie, rü jemaca̱x Ejituarü naãnewa ĩxü̃ ga taxetanüxü̃xü̃ Juchemaã nataxegü na Ejituarü naãnewa nagagüãxü̃ca̱x. Notürü Tupana rü Juchemaã najexma, rü nüxü̃ narüngü̃xẽẽ na tama pecadu naxüxü̃ca̱x ga jexguma guxchaxü̃wa najexmagu. Rü nüxna nanaxã ga cua̱x, rü Juchexü̃ narüngü̃xẽẽ ga meã na najauxãxü̃ca̱x ga Ejituaneãrü ãẽ̱xgacü ga Faraó. Rü jemaca̱x ga Faraó rü ãẽ̱xgacüxü̃ najangucuchixẽẽ. Rü nüma ga Juche nixĩ ga ãẽ̱xgacü ga Faraópatawa rü guxü̃ma ga jema nachiü̃ãnewa. Rü Faraóxicatama nixĩ ga Juchearü jexera na ãẽ̱xgacü jiĩxü̃ ga jema naãnewa.
10 Nüü̃ nadau 7:9
11 —Rü jexgumaü̃cüü najexma ga taija ga guxü̃ ga Ejituarü naãnewa rü Canaã́ãrü naãnewa. Rü poraãcü taija nüxü̃́ nangu̱x ga duü̃xü̃gü. Rü jemaca̱x ga jema nuxcümaxü̃güxü̃ ga tórü o̱xigü rü düxwa taxuacüma nüxü̃ inajangaugü ga nabü ga Canaã́ãrü naãnewa.
12 —Notürü jexguma nüxü̃ nacuáchigaxgu ga Jacú ga na najexmaxü̃ ga nabü ga Ejituanewa, rü jéma nanamugü ga nanegü ga guma tórü o̱xigü ixĩgücü. Rü jema nixĩ ga nawa inaxügüxü̃ ga noxrima nabüca̱x Ejituanewa na naxĩxü̃.
13 —Rü jixcaama marü nagu̱xgu ga jema nabü rü wenaxãrü Ejituanewa naxĩ nawa ga nabü. Rü jexguma wenaxãrü jéma naxĩxgu ga naẽneẽgü, rü nügü nixu ga Juche namaã. Rü jexguma nüxü̃ nacua̱x ga Faraó ga ngextácü̱̃ã̱x na jiĩxü̃ ga Juche.
14 —Rü jixcamaxü̃ra ga Juche rü tümaca̱x nangema ga nanatü rü guxü̃ma ga natanüxü̃. Rü maneca 75wa nangu ga jema duü̃xü̃gü ga Juchetanüxü̃.
15 —Rü jemaãcü Ejituanewa naxũ ga Jacú na jexma jaxãchiü̃xü̃ca̱x. Rü jexma naju ga nümax. Rü jexma najue ta ga nanegü ga tórü o̱xigü.
16 —Rü jexguma naju̱xgu ga Jacú, rü Chiquéü̃wa nanangegü ga naxü̃ne na jexma jata̱xgüãxü̃ca̱x nagu ga jema naxmaxü̃ ga Abrã́ũ dĩẽrumaã naxca̱x taxexü̃ ga Emú nanegüxü̃tawa ga Chiquéü̃wa.
17 —Rü düxwa nawa nangu na Ejituanewa ínanguxü̃xü̃ca̱x ga tatanüxü̃ ga jexgumarüü̃ ga Tupana Abrã́ũmaã ixunetaxü̃. Rü jexguma rü marü poraãcü nimu ga tatanüxü̃ ga Ejituanewa.
18 —Rü jexguma ningucuchi ga to ga Ejituaneãrü ãẽ̱xgacü ga tama Juchechigaxü̃ cuáxü̃.
19 —Rü jema ãẽ̱xgacü rü tatanüxü̃xü̃ nawomüxẽẽ rü chixri tümamaã naxüpetü ga guxema nuxcümaxü̃güxe ga tórü o̱xigü. Rü tüxü̃ namu na jexwaca buexe ga tümaxãcügüxü̃ ítawogüxü̃ na tajuexü̃ca̱x.
20 —Rü jexgumaü̃cüü nabu ga Muĩsé, rü Tupanaãxü̃́ nangúchaü̃. Rü tamaẽ̱xpü̱x ga tawemacü nüxna tadaugü ga tümapatawa ga naẽ rü nanatü.
21 —Rü jexguma düxwa ítanata̱xgügu, rü Faraóxacü inajaxu, rü ngĩnexü̃ inajaxẽẽ.
22 —Rü jemaãcü Muĩséxü̃ nangu̱xẽẽgü ga guxü̃ma ga Ejituanecü̱̃ã̱xãrü cua̱x. Rü nüma ga Muĩsé rü wüxi ga ãẽ̱xgacü ga poracü nixĩ, rü norü dexawa rü ta napora.
23 —Rü jexguma 40 ga norü taunecüwa nanguxgu ga Muĩsé rü nagu narüxĩnü ga natanüxü̃gü ga Judéugütanügu na naxũãneãxü̃.
24 —Rü nüxü̃ nadau ga wüxi ga Ejituanecü̱̃ã̱x ga wüxi ga Judéuxü̃ na nac̱uaxixü̃. Rü jemaca̱x ga Muĩsé rü jema Judéuétüwa ínajuxu, rü jema Ejituanecü̱̃ã̱xü̃ nima̱x rü nanajuxẽẽ.
25 —Rü nüma ga Muĩsé nagu rüxĩnügu rü chi natanüxü̃gü ga Judéugü rü chi nüxü̃ nacua̱xgü na Tupana jéma namuxü̃ na ínanguxü̃xẽẽãxü̃ca̱x. Notürü tama nüxü̃ nacua̱xgüéga ga jema natanüxü̃gü.
26 —Rü moxü̃ãcü ga Muĩsé rü nüxü̃ nadau ga to ga taxre ga Judéugü ga nügü jexma ḏaixü̃, rü nüxna nachogüchaü̃. Rü nhanagürü nüxü̃:
“Pema rü pegütanüxü̃gü peixĩgü. ¿Rü tü̱xcüü̃ pegü pedai i pemax?” nhanagürü.
27 —Rü jexguma ga jema namücüxü̃ ic̱uaxixü̃ rü Muĩséxü̃ nata̱xneta, rü nhanagürü nüxü̃:
“¿Texé cuxü̃ tamu na toeru cuiĩxü̃ca̱x rü tomaã icucuáxü̃ca̱x?
28 —¿E̱xna choxü̃ cuimáxchaü̃ ta, ga ĩne cuimáxü̃ ga Ejituanecü̱̃ã̱xrüü̃?” nhanagürü.
29 —Rü jexguma jemaxü̃ naxĩnügu ga Muĩsé, rü ninha ga jema naãnewa. Rü Midiã́ãnewa naxũ. Rü jema nachiü̃ãne ga tama noxrü ixĩxü̃gu najaxãchiü̃. Rü jexma naxãma̱x rü nabu ga taxre ga nanegü.
30 —Rü 40 ga taunecüguwena ga dauxchitawa ga Chinaĩ ga ma̱xpǘneãrü ngaicamana, rü wüxi ga naĩxẽtaxacü ga jéma ij̱auraxü̃wa Muĩséca̱x nango̱x ga wüxi ga Tupanaãrü orearü ngeruü̃ ga dauxü̃cü̱̃ã̱x.
31 —Rü naḇaixãchiãẽ ga Muĩsé ga jexguma nüxü̃ nada̱xgu. Rü naxca̱x nixũ rü nüxna nangaicama na meã nüxü̃ nadauxü̃ca̱x. Rü jexguma Muĩsémaã nidexa ga Cori ga Tupana, rü nhanagürü nüxü̃:
32 “Chama nixĩ i curü o̱xigüarü Tupana chiĩxü̃ rü Abrã́ũ rü Isaqui rü Jacúarü Tupana chiĩxü̃”,
nhanagürü. Rü jexguma ga Muĩsé rü inanaxügü ga norü muü̃maã na jadu̱ru̱xü̃. Rü namuü̃ ga jexma na nadawenüxü̃.
33 —Rü jexguma ga Cori ga Tupana rü nhanagürü nüxü̃:“¡Ínacuaixü̃ i curü chapatu erü nhaã naãne i nagu cuchixü̃ rü naxüüne, erü chanuxma!
34 Chama rü ngóxü̃wama nüxü̃ chadau i nhuxãcü poraãcü ngúxü̃ na jangegüxü̃ i chorü duü̃xü̃gü i Ejituanewa. Rü nüxü̃ chaxĩnü i na naxauxexü̃. Rü ngẽmaca̱x núma chaxũ na íchananguxü̃xẽẽxü̃ca̱x. ¡Nuã naxũ na Ejituanewa cuxü̃ chamuxü̃ca̱x!”,
nhanagürü.
35 —Rü woo ga noxri ga nümagü ga natanüxü̃gü rü guma Muĩséxü̃ naxoe ga jexguma nhagügu:
“¿Rü texé cuxü̃ tamu na toeru cuiĩxü̃ca̱x rü tomaã icucuáxü̃ca̱x?” nhagügu, notürü ga Tupana rü jéma nanamuãma na jema duü̃xü̃güxü̃ ínanguxü̃xẽẽxü̃ca̱x rü norü ãẽ̱xgacü na jiĩxü̃ca̱x. Rü jemaãcü Muĩséxü̃ namu ga Tupana ga jexguma naxü̃tawa namuãxgu ga jema norü orearü ngeruü̃ ga jema naĩxẽtaxacü ga ij̱auraxü̃wa naxca̱x ngóxü̃.
36 —Rü Muĩsé nixĩ ga Ejituarü naãnewa ínagaxü̃xü̃ ga nuxcümaxü̃güxü̃ ga tórü o̱xigü. Rü Ejituanewa, rü Dauchiüxü̃ ga Taxtüwa, rü dauxchitawa ga ngextá taxúema íxãpataxü̃wa inanawe̱x ga cua̱xruü̃gü, rü nanaxü ga mexü̃ ga taxü̃gü ga Tupanaãrü poramaã naxüxü̃. Rü jemaãcü 40 ga taunecü nüxü̃ narüngü̃xẽẽ ga jema duü̃xü̃gü.
37 —Rü nümatama ga Muĩsé nixĩ ga tatanüxü̃gü ga Judéugümaã nhaxü̃:“Tupana rü jixcüra tá pexca̱x nüxü̃ naxuneta i petanüwa i wüxi i norü orearü uruü̃ ga jexgumarüü̃ ga choxü̃ na naxunetaxü̃rüü̃”,
nhanagürü.
38 —Rü nümatama ga Muĩsé nixĩ ga nuxcümaxü̃güxü̃ ga tórü o̱xigümaã nangutaque̱xexü̃ ga jema naãne ga ngextá taxúema ixãpataxü̃wa. Rü tórü o̱xigümaã najexma ga Chinaĩ ga ma̱xpǘnewa ga jexguma namaã jadexagu ga Tupanaãrü orearü ngeruü̃ ga dauxü̃cü̱̃ã̱x. Rü nümatama ga Muĩsé nixĩ ga najauxãxü̃ ga Tupanaãrü ore i maxẽxẽẽruü̃ na nüxĩ tüxna naxããxü̃ca̱x.
39 —Notürü ga tórü o̱xigü rü tama naga naxĩnüẽchaü̃ ga guma Muĩsé. Rü ínanata̱xüchigüama, rü Ejituaneguama narüxĩnüãẽgü.
40 —Rü tórü o̱xigü rü Muĩséeneẽ ga Arã́ũxü̃ nhanagürügü: “¡Rü toxca̱x naxü i tupanachicüna̱xãgü na nawe tarüxĩxü̃ca̱x! Erü tama nüxü̃ tacua̱xgü i ṯacü nüxü̃ na üpetüxü̃ i ngẽma Muĩsé ga Ejituanewa tüxü̃ jagagüxü̃”, nhanagürügü.
41 —Rü jexguma nanaxügü ga wüxi ga wocaxacüchicüna̱xã norü tupanaxü̃. Rü nhu̱xmachi naxca̱x nanadai ga nhuxre ga carnerugü na jemamaã nüxü̃ jacua̱xüü̃güxü̃ca̱x. Rü wüxi ga peta naxca̱x naxügü ga jema wocaxacüchicüna̱xã ga nümatama naxügüxü̃.
42 —Rü jemaca̱x ga Tupana rü nüxna nixũgachi ga jema duü̃xü̃gü. Rü ínanawogü na woramacuri rü üa̱xcü rü tawemacümaã natupanaã̱xẽẽãxü̃ca̱x. Jerü jemaãcü Tupanaãrü orearü uruü̃güarü poperagu naxümatü, rü nhanagürü:“Pema, Pa Judéugüx, ¿Chauxca̱x jiĩxü̃ ga penaḏaixü̃ ga carnerugü ga jexguma 40 ga taunecü dauxchitawa ga ngextá taxúema íxãpataxü̃wa pejexmagügu?
43 Tama aixcuma chauxca̱x nixĩ jerü ga pema rü ngextá ípexĩxü̃wa rü ípenangeexü̃ ga napata ga perü tupananeta ga Moróqui rü ípenangeexü̃ ga perü tupananeta ga Refã́ãrü woramacurichicüna̱xã. Rü jemaãcü pegümaã ípenangeexü̃ ga jema tupananetachicüna̱xãgü ga pematama pexügüxü̃ na nüxü̃ peicua̱xüü̃güxü̃ca̱x. Rü ngẽmaca̱x i nhu̱xma rü perü naãnewa tá pexü̃ íchawoxü̃ rü jaxü̃wa i Babiróniaarü jexerawa tá pexü̃ chamugü”,
nhanagürü ga Tupana ga jema orewa.
44 —Rü jema naãne ga ngextá taxúema íxãpataxü̃wa rü tórü o̱xigü nüxü̃́ najexma ga wüxi ga ĩpata ga naxchirunaxca̱x ga nagu namaã nanguxü̃güne ga Tupanaãrü mugü ga nutagu ümatüxü̃. Rü guma ĩpata ga naxchirunaxca̱x nixĩ ga nüxü̃ nawéãcüma Tupana Muĩséxü̃ naxüxẽxẽ́ne.
45 —Rü jexguma naju̱xguwena ga Muĩsé, rü Jochué ningucuchi ga ãẽ̱xgacü na jiĩxü̃. Rü tórü o̱xigü rü nuã tórü naãnewa nanangegü ga guma ĩpata ga naxchirunaxca̱x ga jexguma Jochuémaã napugüãgu ga nhaã naãne nüxna ga jema duü̃xü̃gü ga Tupana íwoxü̃xü̃ nape̱xewa ga tórü o̱xigü. Rü núma najexma ga guma ĩpata rü nhu̱xmata Dawí ingucuchigu ga ãẽ̱xgacü na jiĩxü̃.
46 —Rü guma ãẽ̱xgacü ga Dawí rü Tupana rü poraãcü namaã nataãẽ, rü nüxü̃ narüngü̃xẽẽ. Rü nüma ga Dawí rü Tupanana naxca̱x naca na naxüãxü̃ca̱x ga wüxi ga tupauca ga taxü̃ne ga nawa Tupanaxü̃ na jacua̱xüü̃güxü̃ca̱x ga tatanüxü̃gü ga Jacútaagü.
47 —Notürü Dawí nane ga Charumáũ nixĩ ga naxücü ga guma tupauca ga Tupanaca̱x ixĩxü̃ne.
48 —Notürü ja Tupana ja tacüxü̃chima rü tama duü̃xü̃gü üxü̃ne ja tupaucagümaã naxãpata. Rü jemaca̱x ga Tupana rü nuxcümaxü̃cü ga norü orearü uruü̃wa rü nhanagürü:
49 7:49-50 “Chama nixĩ ja ãẽ̱xgacü ja tacüxü̃chima, rü dauxü̃guxü̃ i naãne nixĩ i chorü toxmaxwa̱xeruü̃ ixĩxü̃ rü nhama i naãne nixĩ i chorü chicutüruü̃ ixĩxü̃. ¿Rü nhuxũcürüwa i nagu perüxĩnüẽxü̃ tá na penaxüxü̃ ja wüxi ja tupauca ja chagu mexü̃ne?”nhanagürü ga Cori ja Tupana. Rü nhanagürü ta ga Tupana:“¿Tama e̱xna chama jiĩxü̃ ichanaxüxü̃ ga guxü̃ma i ṯacü i ngẽxmaxü̃? ¿Rü nhuxãcü chi penaxüxü̃ i wüxi i nachica i nagu charüngü̃xü̃?”nhanagürü ga norü orewa.
50 Nüü̃ nadau 7:49
51 Rü nhanagürü ga Estéwãũ: —Dücax Pa Ãẽ̱xgacügüx, pema rü guxü̃guma nüxü̃ pexoe i Tupanaãrü ore, rü tama iperüxĩnüẽchaü̃. Rü peãẽwa rü tama pejaxõgüchaü̃. Rü pema rü guxü̃guma Tupanaãẽ i Üünexü̃maã penuẽẽcha. Jema nuxcümaxü̃güxü̃ ga perü o̱xigürüü̃tama peixĩgü i pemax.
52 —Rü perü o̱xigü rü chixeãcüma namaã nachopetü ga guxü̃ma ga Tupanaãrü orearü uruü̃gü. Rü nanadai ga jema orearü uruü̃gü ga nüxü̃ ixuchigagüxü̃ ga na núma naxũxü̃ tá ga guma mecü ja Ngechuchu. Rü jexguma ínanguxgu ga guma Ngechuchu rü pema Piratuna penamu rü penajuxẽẽ.
53 —Rü woo pema rü Tupanaãrü orearü ngeruü̃gü ga dauxü̃cü̱̃ã̱xü̃tawa penajaxu ga Tupanaãrü ore, notürü tama naga pexĩnüẽ —nhanagürü ga Estéwãũ.
Naju ga Estéwãũ
54 Rü jexguma nüxü̃ naxĩnüẽgu ga jema ore, rü nanuẽxü̃chiama ga jema duü̃xü̃gü. Rü norü numaã Estéwãũca̱x nixü̃́xchapütagü.
55 Notürü ga Estéwãũ rü aixcuma Tupanaãẽ i Üünexü̃ nawa najexma. Rü dauxü̃ nadawenü, rü nüxü̃ nadau na nhuxãcü namexẽchixü̃ ga Tupana. Rü nüxü̃ nadau ga Ngechuchu ga Tupanaãrü tügüneguama chicü.
56 Rü jexguma rü nhanagürü: —Nüxü̃ chadau i na jango̱xnaãchixü̃ i naãnetüwe, rü nüxü̃ chadau ja Cristu ja Tupana Nane ja duü̃xü̃xü̃ ixĩcü ja Tupanaãrü tügüneguama chicü —nhanagürü ga Estéwãũ.
57 Notürü nümagü rü nügü narütütamachi̱xẽgü, rü tagaãcü aixta naxüeãcüma nüxna najuxgü.
58 Rü ínanagaxüchigü ga ĩãnewa, rü nutagümaã ínanamuxũchigü. Rü jéma najexma ga wüxi ga ngextü̱xüxü̃ ga Chaurugu ãẽ́gaxü̃. Rü jemaxü̃ nanawotanü ga norü dejuxü̃chirugü ga ínacu̱xuchigüxü̃ ga jema duü̃xü̃gü ga Estéwãũxü̃ ima̱xgüxü̃.
59 Rü jexguma nutamaã ínamuxũchigüãgujane, rü najumuxẽ ga Estéwãũ rü nhanagürü: —Pa Cori Pa Ngechuchux, ¡Najaxu i chauãẽ! —nhanagürü.
60 Rü jemawena rü inacaxã́pü̱xü, rü tagaãcü aixta naxü, rü nhanagürü: —Pa Cori Pa Tupanax, ¡Tãṹ i nhaã pecaduca̱x cunapocuexü̃ i nhaã duü̃xü̃gü! —nhanagürü. Rü jexguma jema nhaxguwena rü naju.
