Puracügü 8:1-40
8 Rü Chauru rü norü me nixĩ ga Estéwãũxü̃ na jama̱xgüxü̃. Rü jematama ngunexü̃gu rü norü uwanügü rü inanaxügüe ga na poraãcü nawe jangẽxü̃tanüxü̃ ga jema jaxõgüxü̃ ga Jerucharéü̃wa jexmagüxü̃. Rü düxwa ga guxü̃ma rü Judéaanegu rü Chamáriaanegu nügü nawoone. Rü jema ngúexü̃gü ga Ngechuchu imugüxü̃xicatama ínajaxügü ga Jerucharéü̃wa.
2 Rü nhuxre ga jatügü ga meãma Tupanaãxü̃́ jaxõgüxü̃ rü nanajauxgü ga Estéwãũxü̃ne, rü inanata̱xgü rü poraãcü naxca̱x naxauxe.
3 Notürü ga Chauru rü chixri tümamaã naxüpetü ga guxema jaxõgüxe. Rü tümapatagu nixücuchigü na tüxü̃ ínajauxü̃xü̃ca̱x. Rü jéma tüxü̃ ínatúxü̃ ga jatügü rü ngexegü, rü nhu̱xmachi pocupataü̃gu tüxü̃ nawocu.
Chamáriawa nüxü̃ nixuchiga ga Tupanaãrü ore i mexü̃
4 Rü jema jaxõgüxü̃ ga Chauruchaxwa ibuxmüxü̃ ga Jerucharéü̃wa, rü guxü̃wama ga ngextá ínaxĩxü̃wa rü nüxü̃ nixuchigagü ga nhuxãcü Ngechuchu tüxü̃ na maxẽxẽẽxü̃.
5 Rü Piripi nixĩ ga wüxi ga jema orexü̃ ixuchigacü. Rü nüma rü ĩãne ga Chamáriawa naxũ, rü jéma inanaxügü ga Cristuchigaxü̃ na jaxuxü̃.
6 Rü jema duü̃xü̃gü ga Chamáriacü̱̃ã̱x, rü Piripica̱x nangutaque̱xegü. Rü guxü̃ma meãma inarüxĩnüẽ ga jema ore ga namaã nüxü̃ jaxuxü̃, jerü nüxü̃ nadaugü ga jema mexü̃gü ga taxü̃gü ga Tupanaãrü poramaã naxüxü̃ ga Piripi.
7 Rü muxẽma ga duü̃xẽgü ga ṉg̱oxogü tümawa jexmaxẽ rü tümaca̱x nitaanegü. Rü jema ṉg̱oxogü rü tagaãcü aita naxüeãcüma tümawa ínachoxü̃. Rü jexgumarüü̃ ta rü muxẽma ga naw̱ãĩxãchigüxe rü chixeparagüxe rü tümaca̱x nitaanegü.
8 Rü jemaca̱x poraãcü nataãẽgü ga guxü̃ma ga duü̃xü̃gü ga guma ĩãne ga Chamáriawa.
9 Notürü guma ĩãnewa najexma ga wüxi ga jatü ga Chimáũgu ãẽ́gaxü̃ ga nhuxre ga taunecü norü juümaã duü̃xü̃güxü̃ womüxẽẽxü̃ ga guma ĩãnewa. Rü nügü nixu ga na wüxi ga ṯacüxü̃ cuáxü̃ na jiĩxü̃.
10 Rü guxü̃ma meãma nüxü̃́ inarüxĩnüẽ woo ga buxü̃gü rü jaxü̃gü. Rü nhanagürügü: —Nhaã jatü rü aixcuma nüxü̃́ nangẽxma i Tupanaãrü pora i taxü̃ —nhanagürügü.
11 Rü naga naxĩnüẽ ga duü̃xü̃gü, jerü mucüma ga taunecü rü norü juümaã nanawomüxẽẽ.
12 Rü Piripi rü jema duü̃xü̃gümaã nüxü̃ nixu ga ore ga mexü̃ ga Ngechuchu ja Cristuchiga, rü nhuxãcü na ãẽ̱xgacü jiĩxü̃ ja Tupana. Rü jexguma jema ore jaxõgügu ga duü̃xü̃gü, rü Piripi ínanabaiü̃xẽẽ ga jatüxü̃ rü ngexü̃gü.
13 Rü nümatama ga Chimáũ rü ta najaxõ, rü ínabaie. Rü inanaxügü ga Piripixü̃ na naxümücüxü̃. Rü jexguma nüxü̃ nada̱xgu ga jema cua̱xruü̃gü rü mexü̃gü ga taxü̃ ga Tupanaãrü poramaã naxüxü̃ ga Piripi, rü poraãcü naḇaixãchiãẽ ga Chimáũ.
14 Rü jema ngúexü̃gü ga Ngechuchu imugüxü̃ ga Jerucharéü̃wa jexmagüxü̃ rü nüxü̃ naxĩnüẽchiga ga meã na najauxgüãxü̃ ga Tupanaãrü ore ga Chamáriawa. Rü jemaca̱x jéma nanamugü ga Pedru rü Juã́ũ.
15 Rü jexguma Chamáriawa nangugügu ga Pedru rü Juã́ũ, rü naxca̱x najumuxẽgü ga jema jexwaca jaxõgüxü̃ ga duü̃xü̃gü, na najauxgüãxü̃ca̱x ga Tupanaãẽ i Üünexü̃.
16 Jerü jexguma noxri jaxõgüãgu ga jema duü̃xü̃gü rü Piripi marü ínanabaiü̃xẽẽmare naẽ́gagu ga Cori ga Ngechuchu, notürü taxuxü̃nata nangu ga Tupanaãẽ i Üünexü̃.
17 Rü jemaca̱x ga Pedru rü Juã́ũ naxme̱xmaã nüxü̃ ningõgügü ga jema jaxõgüxü̃, rü jexguma nanajauxgü ga Tupanaãẽ i Üünexü̃.
18 8:18-19 Rü nüxü̃ nadau ga Chimáũ ga na duü̃xü̃güna nanguxü̃ ga Tupanaãẽ i Üünexü̃ ga jexguma Pedru rü Juã́ũ naxme̱xmaã jema duü̃xü̃güxü̃ jangõgügügu. Rü jemaca̱x dĩẽru Pedru rü Juã́ũna ngĩxü̃ naxãxchaü̃ ga Chimáũ rü nhanagürü nüxü̃: —¡Choxna rü ta penaxã i ngẽma pora, na jíxema tüxü̃ chingõgüxe rü ta tüxna nanguxü̃ca̱x i Tupanaãẽ i Üünexü̃! —nhanagürü.
19 Nüü̃ nadau 8:18
20 Rü jexguma ga Pedru rü nhanagürü nüxü̃: —¡Cuxrüü̃tama ijanataxu̱x i curü dĩẽru, erü ngĩmaã naxca̱x cutaxechaü̃ i Naãẽ i Üünexü̃ i Tupana tüxna mumarexü̃!
21 Cuma rü taxucürüwama cunajaxu i ngẽma pora, erü curü maxü̃ rü tama name i Tupanape̱xewa.
22 ¡Nüxü̃ rüxo i ngẽma curü chixexü̃, rü Tupanana naxca̱x naca na cuxü̃́ nüxü̃ nangechaü̃xü̃ca̱x! Rü bexmana tá cuxü̃́ nüxü̃ nangechaü̃ i ngẽma chixexü̃ i cuãẽwa nagu curüxĩnüxü̃.
23 Erü nüxü̃ chacua̱x rü poraãcü cunuãẽwa̱xe, rü ngẽma curü chixexü̃ rü cumaã inacua̱x rü nhama cupocuxü̃rüü̃ cuxü̃ nixĩxẽẽ —nhanagürü.
24 Rü Chimáũ nanangãxü̃, rü nhanagürü: —¡Pema Tupanana chauxca̱x pec̱a na tama choxü̃ nangupetüxü̃ca̱x i ngẽma nüxü̃ peixuxü̃! —nhanagürü.
25 Rü Pedru rü Juã́ũ rü jema Chamáriaanecü̱̃ã̱x ga duü̃xü̃gümaã nüxü̃ nixugüe ga Cori ga Ngechuchuchiga, rü namaã nüxü̃ nixugüe ga Tupanaãrü ore. Rü jemawena rü Jerucharéü̃ca̱x nawoegu. Rü namawa rü muxü̃ne ga Chamáriaanewa jexmane ga ĩãnexãcügüwa rü nüxü̃ nixuetanü ga Tupanaãrü ore i mexü̃.
Piripi rü namagu nüxü̃ nangau ga wüxi ga ãẽ̱xgacü ga Etiópiaanecü̱̃ã̱x
26 Rü jemawena, rü Tupanaãrü orearü ngeruü̃ ga dauxü̃cü̱̃ã̱x rü Piripimaã nüxü̃ nixu, rü nhanagürü: —¡Rü paxa inaxũãchi rü ĩãne ja Gachawaama naxũ nawa i ngẽma nama i Jerucharéü̃wa ne daxü̃ rü Gachawa ijarügoxü̃! —nhanagürü. Rü ngẽma nixĩ i nama i dauxchitawa i ngextá taxúema íxãpataxü̃wa dapetüxü̃.
27 Rü inaxũãchi ga Piripi rü jema namawa naxũ. Rü jexma nügü nangau namaã ga wüxi ga jatü ga Etiópiaanecü̱̃ã̱x. Rü nüma nixĩ ga wüxi ga ãẽ̱xgacü ga tacü ga Etiópiaanecü̱̃ã̱xgüarü ãẽ̱xgacüarü ngü̃xẽẽruü̃ jiĩxü̃. Rü ngĩmaã nanguxü̃ ga gu̱xcüma ga jema ãẽ̱xgacüarü dĩẽru. Rü ĩneãcü Jerucharéü̃wa naxũ na Tupanaxü̃ janacua̱xüü̃xü̃ca̱x.
28 Rü nachiü̃ãneca̱x nataegu, rü norü carru ga cowaru itúchigünewa narüto. Rü nawa ningúchigü ga jema ore ga Tupanaãrü orearü uruü̃ ga Ichaía ümatüxü̃.
29 Rü Tupanaãẽ i Üünexü̃ rü Piripixü̃ nhanagürü: —¡Paxa naxca̱x ixũ i ngẽma carru! —nhanagürü.
30 Rü paxa jema carruca̱x ninha ga Piripi. Rü jexguma naxü̃tawa nanguxgu rü nüxü̃ naxĩnü ga na Tupanaãrü orearü uruü̃ ga Ichaía ümatüxü̃ ga orewa nangúxü̃ ga jema ãẽ̱xgacü. Rü jexguma ga Piripi rü nüxna naca rü nhanagürü nüxü̃: —¿Nüxü̃ cucuáxü̃ i ṯacüchiga na jiĩxü̃ i ngẽma nawa cungúxü̃? —nhanagürü.
31 Rü nüma ga ãẽ̱xgacü ga Etiópiaanecü̱̃ã̱x rü nanangãxü̃, rü nhanagürü: —¿Nhuxũcürüwa i nüxü̃ chacuáxü̃ ega taxúema chamaã inanguxü̃xẽẽgux? —nhanagürü. Rü Piripica̱x naca na naxĩnagüxü̃ca̱x, rü naxü̃tawa na natoxü̃ca̱x.
32 Rü jema nawa jangúchigüxü̃ ga Tupanaãrü ore ga ümatüxü̃, rü nhanagürü:“Rü nhama wüxi i carneru i norü ma̱xwa nagagüxü̃rüü̃ãcü najagagü. Rü wüxi i carneruxacü i ngẽma jajo̱xta̱xagüxü̃pe̱xewa tama aita üxü̃rüü̃ nachianemare, rü taxu nhanagürü.
33 Rü jexguma duü̃xü̃gü poraãcü chixri namaã chopetügu rü taxúema naẽ́tüwa tachogü. ¿Rü texé tá meã nachiga tidexa ga jema duü̃xü̃gü ga jemaãcü poraãcüxü̃chima chixexü̃ ügüxü̃? Jerü najama̱xgü na nataxuxü̃ca̱x i norü maxü̃ i nhama i naãnewa”,
nhanagürü ga jema ore ga nawa nangúxü̃.
34 Rü Piripina naca ga jema ãẽ̱xgacü ga Etiópiaanecü̱̃ã̱x, rü nhanagürü: —¡Chamaã nüxü̃ ixu! ¿Rü texéchigagu nixĩ ga jadexaxü̃ ga jema Tupanaãrü orearü uruü̃? ¿Nügüchigagutama rü e̱xna toguechigagu? —nhanagürü.
35 Rü jexguma nanangãxü̃ ga Piripi. Rü jematama ore ga ümatüxü̃maã inanaxügü na namaã nüxü̃ jaxuxü̃ ga ore i mexü̃ ga Ngechuchuchiga.
36 Rü jixcamaxü̃ra ga jexguma inaxĩjane, rü dexá íjexmaxü̃wa nangugü. Rü nhanagürü ga jema ãẽ̱xgacü: —Nuã nangẽxma i dexá. ¿Rü tama e̱xna inamexü̃ na nuã choxü̃ ícubaiexẽẽxü̃? —nhanagürü.
37 Rü nhanagürü ga Piripi: —Ngẽxguma aixcuma meãma cujaxõ̱xgux, rü marü name i na cuxü̃ íchabaiexẽẽxü̃ —nhanagürü. Rü nanangãxü̃ ga jema ãẽ̱xgacü, rü nhanagürü: —Ngẽmáãcü chajaxõ na Ngechuchu ja Cristu jiĩxü̃ ja Tupana Nane —nhanagürü.
38 Rü jexguma ínajachaxãchixẽẽ ga norü carru, rü wüxigu dexáchiüwa nachoü̃. Rü Piripi ínanabaiexẽẽ ga jema ãẽ̱xgacü.
39 Rü jexguma dexáwa ínachoõchigu, rü Tupanaãẽ i Üünexü̃ rü Piripixü̃ niga. Rü jema ãẽ̱xgacü rü marü tama wena Piripixü̃ nadau. Notürü taãẽãcü namagu nixũ.
40 Notürü Achotowa najango̱x ga Piripi. Rü jema ĩãnewa inaxũãchi, rü nüxü̃ nixuchigü ga ore i mexü̃ ga guxü̃ma ga ĩãnewa nhu̱xmata Checharéaarü naãnewa nangu.
