Puracügü 9:1-43
9 9:1-2 Rü joxni ga Chauru rü daimaã najaxãxũnechigüama ga jema duü̃xü̃gü ga Cori ga Ngechuchuaxü̃́ jaxõgüxü̃. Rü jemaca̱x paigüeruxü̃tawa naxũ, rü naxca̱x nüxna naca ga popera ga nüxna ãgaxü̃ na Judéugüarü ngutaque̱xepataü̃gü ga Damacuwa jexmagünegu jaxücuchigüxü̃ca̱x rü jexma tümaca̱x nadauxü̃ca̱x ga guxema jaxõgüxe ga jatüxe rü ngexegü na Jerucharéü̃wa tüxü̃ nagagüxü̃ca̱x rü jexma tüxü̃ japocuexü̃ca̱x.
2 Nüü̃ nadau 9:1
3 Notürü jexguma marü Damacuxü̃ jangaicagu, rü ngürüãchi meãma nüxü̃ nabáxi ga wüxi ga omü ga poraxü̃ ga dauxü̃wa ibáxixü̃.
4 Rü nhaxtüanegu najangu ga Chauru, rü nüxü̃ naxĩnü ga wüxi ga naga ga nüxna c̱agüxü̃ ga nhaxü̃: —Pa Chauru Pa Chaurux, ¿tü̱xcüü̃ i nawe cuingẽchigüxü̃ i ngẽma duü̃xü̃gü i choxü̃́ jaxõgüxü̃? —nhaxü̃.
5 Rü Chauru nanangãxü̃, rü nhanagürü: —¿Rü texé cuixĩ, Pa Corix? —nhanagürü. Rü nüma ga Cori rü nanangãxü̃ rü nhanagürü: —Chama nixĩ i Ngechuchu, rü chorü duü̃xü̃gü nixĩ i ngẽma nawe cuingẽchigüxü̃.
6 ¡Rü inachi, rü ngẽ́ma Damacuarü ĩãnewa naxũ! Rü ngẽ́ma rü wüxi ja jatü tá cumaã nüxü̃ nixu na ṯacü tá cuxüxü̃ —nhanagürü.
7 Rü jema jatügü ga Chauruxü̃ íixümücügüxü̃, rü inajanguãẽgü, jerü nüxü̃ naxĩnüẽ ga jema ore notürü taxúexü̃ma nadaugü.
8 Rü nhu̱xmachi inachi ga Chauru ga nhaxtüanewa ga íjanguxü̃wa, rü nidauchixetü, notürü taxuü̃ma nadau jerü nixoxetü. Rü jemaca̱x ga namücügü, rü nachacüügu najajauxãchi, rü jemaãcü Damacuwa nanagagü.
9 Rü tamaẽ̱xpü̱x ga ngunexü̃gu, rü nangexetü, rü tama nachibü, rü tama naxaxe.
10 Rü Damacuwa najexma ga wüxi ga jatü ga Ngechuchuaxü̃́ jaxõxü̃ ga Ananíã ga naẽ́ga. Rü nango̱xetü, rü Corixü̃ nadau, rü nhanagürü: —Pa Ananíãx —nhanagürü. Rü nüma ga Ananíã nanangãxü̃, rü nhanagürü: —¿Ṯacü? Pa Corix —nhanagürü.
11 9:11-12 Rü nüma ga Cori nanangãxü̃, rü nhanagürü: —¡Dücax, ngẽma ĩanemaü̃ i Meã i Wéxü̃gu ãẽ́gaxü̃wa naxũ! ¡Rü ngẽ́ma Judapatawa naxca̱x ínaca i wüxi i jatü i Tarsucü̱̃ã̱x i Chaurugu ãẽ́gaxü̃! Rü nüma rü ngẽ́ma ínajumuxẽ rü nango̱xetü rü marü cuxü̃ nadau, Pa Ananíãx, na ngẽxma cuxücuxü̃ rü naxẽtügu cuingõgüxü̃ na wena jadauchixü̃ca̱x —nhanagürü ga Cori ga Tupana.
12 Nüü̃ nadau 9:11
13 Rü jexguma jemaxü̃ naxĩnügu ga Ananíã, rü nhanagürü: —Pa Corix, muxü̃ma i duü̃xü̃gü chamaã nüxü̃ nixu i ngẽma jatüchiga na nhuxre i chixexü̃ naxüxü̃ namaã i curü duü̃xü̃gü i Jerucharéü̃wa.
14 Rü nhu̱xma rü paigüarü ãẽ̱xgacügüarü mumaã núma naxũ na ínajauxü̃ãxü̃ca̱x i guxü̃ma i duü̃xü̃gü i cuégagu jumuxẽgüxü̃ —nhanagürü.
15 Notürü nüma ga Cori rü nhanagürü nüxü̃: —¡Ngẽ́ma naxũ erü chama chanajaxu i ngẽma jatü na choxü̃ jaxuchigaxü̃ca̱x namaã i togü i nachiü̃ãnecü̱̃ã̱xgü, rü norü ãẽ̱xgacügü, rü Judéugü ta!
16 Rü chama tá nüxü̃ nüxü̃ chadauxẽẽ i nhuxre i ngúxü̃ i tá jangexü̃ i chauxca̱x —nhanagürü ga Cori.
17 Rü guma ĩpata ga Chauru nawa jexmanewa naxũ ga Ananíã. Rü nagu naxücu, rü nüxü̃ ningõgü, rü nhanagürü nüxü̃: —Pa Chaueneẽ Pa Chaurux, nüma ja Cori ja Ngechuchu ga guma namawa cuxca̱x ngócü ga jexguma núma cuxũxgu, rü núma choxü̃ namu na wenaxãrü cuidauchixü̃ca̱x, rü cuxna nanguxü̃ca̱x i Naãẽ i Üünexü̃ —nhanagürü.
18 Rü jexgumatama rü nhama ṯacüchicute̱xerüü̃ naxẽtüwa ínaji, rü jexguma wenaxãrü meã nidauchixetü. Rü jexguma inachi ga Chauru, rü Ananíã ínanabaiexẽẽ.
19 Rü jemawena nachibü, rü wenaxãrü napora. Rü nhuxre ga ngunexü̃gu jexma Damacugu narüxã̱ũ̱x namaã ga jema jaxõgüxü̃ ga jexma ãchiü̃güxü̃.
Chauru rü Damacuwa nüxü̃ nixu ga Ngechuchuchiga
20 Rü jexguma inanaxügü ga Chauru ga ngutaque̱xepataü̃güwa nüxü̃ na jaxuchigaxü̃ na Ngechuchu jiĩxü̃ ja Tupana Nane.
21 Rü guxü̃ma ga jema nüxü̃ ĩnüẽxü̃ rü poraãcü naḇaixãchiãẽgü, rü nhanagürügü: —¿Tama e̱xna nhaã jatü jiĩxü̃ ga Jerucharéü̃wa íjajauxü̃güxü̃ ga guxü̃ma ga duü̃xü̃gü ga Ngechuchuaxü̃́ jaxõgüxü̃? ¿Rü tama e̱xna nhaãtama jiĩxü̃ ga jema núma ũxü̃ na ínajauxü̃ãxü̃ca̱x rü nhu̱xmachi paigüarü ãẽ̱xgacüxü̃tawa nagagüãxü̃ca̱x i duü̃xü̃gü i jaxõgüxü̃? —nhanagürügü.
22 Notürü ga Chauru rü guxü̃ ga ngunexü̃gu jexeraãcü tama namuü̃ãcüma nüxü̃ nixuchigaama ga ore ga Ngechuchuchiga. Rü inajanangea̱xgüxẽẽ ga Judéugü ga Damacuwa jexmagüxü̃, jerü meãma nanango̱xẽẽ na Cristu jiĩxü̃ ga Ngechuchu.
Chauru rü Judéugücha̱xwa ninha
23 Rü marü muxü̃ma ga ngunexü̃gü ngupetüguwena rü jema Judéugü rü wüxigu nügümaã nagu narüxĩnüẽ na Chauruxü̃ jama̱xgüxü̃ca̱x.
24 Notürü nüma ga Chauru rü nüxü̃ nacuáchiga ga na jama̱xgüchaü̃ãxü̃. Rü jema Judéugü rü ngunecü rü chütacü rü guma ĩãneãrü poxeguxü̃ãrü ĩã̱xgügu Chauruxü̃ nana̱ĩ̱xgüxü̃ na jama̱xgüãxü̃ca̱x.
25 Notürü ga Chauruarü ngúexü̃gü rü chütacü rü wüxi ga pexchi ga tacügu guma ĩãneãrü poxeguxü̃tapü̱xétüwa ínanac̱ẖüxüetaü̃güama, rü jemaãcü ninha ga Chauru.
Jerucharéü̃wa najexma ga Chauru
26 Rü jexguma Jerucharéü̃wa nanguxgu ga Chauru, rü jema jaxõgüxü̃maã nangutaque̱xechaü̃. Notürü jema jaxõgüxü̃ rü nüxü̃ namuü̃ẽ, jerü nüma nüxü̃ nacua̱xgügu rü tama aixcuma Ngechuchuaxü̃́ najaxõ.
27 Notürü Barnabé rü jema ngúexü̃gü ga Ngechuchu imugüxü̃tanüwa nanagaama. Rü jema ngúexü̃gümaã nüxü̃ nixu ga nhuxãcü Cori ja Ngechuchuxü̃ na nadauxü̃ ga Chauru ga namawa, rü nhuxãcü Cori namaã na idexaxü̃. Rü nüxü̃ nixu ta ga nhuxãcü Damacuwa rü tama namuü̃ãcüma nüxü̃ na jaxuxü̃ ga Ngechuchuchiga.
28 Rü jemaãcü ga Chauru rü Jerucharéü̃gu narüxã̱ũ̱x. Rü jema ngúexü̃gü ga Tupana imugüxü̃tanügu naxã. Rü tama namuü̃ãcüma Cori ja Ngechuchuchigaxü̃ nixuchigü.
29 Rü jema Judéugü ga Gregugawa idexagüxü̃maã nidexaxü̃ ga Chauru, rü Ngechuchuchigagu nügümaã najaporagaexü̃. Notürü ga nümagü rü naxca̱x nadaugüama ga nhuxãcü tá na jama̱xgüãxü̃.
30 Rü jexguma nüxü̃ jacua̱xãchitanügu ga jema togü ga jaxõgüxü̃, rü Checharéawa Chauruxü̃ nagagü. Rü jexguma jéma nangugügu rü wüxi ga wapurugu najamuẽgü rü Tarsuwa naxũ.
31 Rü jexguma rü meãma nüxü̃ naxüpetü ga jema jaxõgüxü̃ ga guxü̃ma ga Judéaanewa, rü Gariréaanewa rü Chamáriaanewa. Rü jexeraãcü meã najaxõgüetanü rü aixcuma Tupana naxwa̱xexü̃ãcüma meã namaxẽ. Rü Tupanaãẽ i Üünexü̃ãrü ngü̃xẽẽmaã nimuẽtanüãma ga jema jaxõgüxü̃.
Enéã rü naxca̱x nitaane
32 Rü jexguma Pedru jema jaxõgüxü̃tanügu ixũãgüchigüxgu, rü jema Ridagu ãchiü̃güxü̃ ga jaxõgüxü̃tanüwa rü ta nangu.
33 Rü jexma nüxü̃ najangau ga wüxi ga jatü ga Enéã ga naẽ́ga ga 8 ga taunecü norü pechicagu cacü, jerü nanaw̱ãĩxãchi.
34 Rü Pedru nhanagürü nüxü̃: —Pa Enéãx, Ngechuchu ja Cristu cuxü̃ narümexẽẽ. ¡Inachi rü namexẽẽ i cuxchapenüxü̃! —nhanagürü. Rü jexgumatama inachi.
35 Rü guxü̃ma ga jema Ridacü̱̃ã̱xgü rü Charunacü̱̃ã̱xgü rü nüxü̃ nadaugü ga na inachixü̃ ga guma jatü, rü nüxü̃ narüxoe ga nacümagü ga chixexü̃, rü Cori ja Ngechuchuwe narüxĩ.
Wena imaxü̃ ga Dorca
36 Rü jexgumaü̃cüü ga ĩãne ga Jopewa rü ijexma ga wüxi ga Tupanaãxü̃́ jaxõ̱xcü ga ngecü ga Tabita ga ngĩẽ́ga. Rü ngẽma naẽ́ga i Gregugawa rü Dorca nhaxü̃chiga nixĩ. Rü ngĩma rü wüxi ga mecü ijixĩ ga ngĩrü üwa, rü guxü̃guma nüxü̃ irüngü̃xẽẽ ga jema duü̃xü̃gü ga ṯacü nüxü̃́ taxuxü̃.
37 Rü jexgumaü̃cüü ijaḏaawe ga Dorca, rü iju, rü ngĩmücügü nanamexẽẽ ga ngĩxĩne. Rü ĩpataarü dauxü̃chiü̃wa jexmaxü̃ ga ucapugu nanaxügü ga ngĩxĩne.
38 Rü Jopearü ngaicamana najexma ga guma ĩãne ga Rida ga Pedru nawa jexmane. Rü jema jaxõgüxü̃ ga Jopecü̱̃ã̱x rü nüxü̃ nacua̱xgü ga Ridawa na najexmaxü̃ ga Pedru. Rü naxca̱x jéma nanamugü ga taxre ga jatü nhaxü̃maã: —¡Rü paxa toxca̱x nuã naxũ! —nhaxü̃maã.
39 Rü jexguma ga Pedru rü nawe narüxũ. Rü jexguma ínanguxgu, rü jema ucapu ga jema jueta nawa jexmaxü̃wa nanagagü. Rü guxü̃ma ga jutegüxü̃ rü Pedruxü̃ ínachomaẽguãchi, rü naxauxe, rü nüxü̃ najawégü ga jema naxchirugü ga Tabita nüxü̃́ íxüxü̃xü̃ ga jexguma namaxü̃gu.
40 Rü Pedru rü düxétüwa nanamugü ga guxü̃ma. Rü inacaxã́pü̱xü, rü najumuxẽ. Rü nhu̱xmachi ngĩxca̱x nadauegu ga jema ju̱xcü, rü nhanagürü: —Pa Tabitax, ¡Írüda! —nhanagürü. Rü jexguma rü ijadauchixetü, rü Pedruxü̃ idau, rü íirüto.
41 Rü jexguma ngĩxme̱xgu najajauxãchi, rü ngĩxü̃ inachixẽẽ. Rü nhu̱xmachi naxca̱x naca ga jema jaxõgüxü̃ rü jema jutegüxü̃, rü maxü̃xcü nüxü̃ ngĩxü̃ nawe̱x.
42 Rü guxü̃ma ga jema duü̃xü̃gü ga Jopewa jexmagüxü̃ rü nüxü̃ nacuáchigagü ga jema. Rü Cori ga Ngechuchuaxü̃́ najaxõgü ga muxü̃ma.
43 Rü muxü̃ma ga ngunexü̃ Jopegu narüxã̱ũ̱x ga Pedru napatagu ga Chimáũ ga naxcha̱xmüãrü paxẽẽwa puracüxü̃.
