Romacü̃ãꞌ 4:1-25
4 ¿Rü nhu̱xma rü nhuxũ nhagüxü̃ tá i nachiga ga nuxcümaü̃cü ga tórü o̱xi ga Abrã́ũ? ¿Rü nhuxãcü nixĩ ga nüxü̃ naxüpetüxü̃ ga Tupanape̱xewa? ¿Rü tü̱xcüü̃ jiĩxü̃ ga Tupana nüxü̃ ixuxü̃ ga Abrã́ũ rü mecü na jiĩxü̃?
2 4:2-3 Rü dücax, jexguma chi wüxi ga norü puracü ga mexü̃ca̱x Tupanape̱xewa namexgu ga Abrã́ũ, rü jexguma chi waxi nixĩ ga nüxü̃́ najexmaxü̃ ga ṯacüca̱x nügü na jacua̱xüü̃xü̃. Notürü taxuü̃ca̱xma Tupanape̱xewa nügü nicua̱xüü̃ ga Abrã́ũ, erü Tupanaãrü ore i ümatüxü̃wa rü nhanagürü:“Abrã́ũ rü Tupanaãxü̃́ najaxõ, rü jemaca̱x Tupana nanajaxu rü nüxü̃ nixu na namexü̃”,nhanagürü i ngẽma ore.
3 Nüü̃ nadau 4:2
4 Rü ngẽxguma texé wüxi i puracü ü̱xgu rü tüxü̃́ naxütanügu rü woetama tümaãrü natanü nixĩ rü tama ãmare nixĩ i ngẽma.
5 Notürü tama ngẽmaãcü nixĩ i ngẽxguma Tupanaãxü̃́ jaxõ̱xgu. Erü ngẽxguma jaxõ̱xgu, rü tama ṯacü rü puracü i mexü̃ca̱x nixĩ i Tupanape̱xewa imexü̃, notürü Tupanape̱xewa time erü tajaxõ. Rü ngẽmaãcü Tupana tüxü̃ najaxu ja jíxema jaxṍxẽ woo taxuü̃ma i ṯacü rü puracü i mexü̃ taxü̱xgu na ngẽmaca̱x Tupana tüxü̃ rüngü̃xẽẽxü̃.
6 Rü nuxcümaü̃cü ga ãẽ̱xgacü ga Dawí rü ta tümachiga nidexa ga guxema duü̃xẽ ga jaxṍxẽ. Rü nüxü̃ nixu ga na tataãẽxü̃ ga guxema duü̃xẽ jerü Tupanape̱xewa tame, woo tama ṯacü rü mexü̃ taxü̱xgu na jemaãcü Tupanape̱xewa tamexü̃ca̱x.
7 Rü nüma ga Dawí rü nhanagürü:“Rü tataãẽgü ja jíxema duü̃xẽgü ja Tupana tümaãrü chixexü̃güxü̃ ngechaü̃xẽ rü tümaãrü pecadugüxü̃ ijanangümaxẽ.
8 Rü tataãẽ ja jíxema duü̃xẽ ja Tupana tama tüxü̃́ nagu rüxĩnüxẽ i tümaãrü pecadu”,
nhanagürü ga Dawí.
9 Rü dücax, ¿pexca̱x rü ngẽma taãẽ rü ngẽma duü̃xü̃gü i Judéugü ixĩgüxü̃ca̱xicatama jiĩxü̃, rü e̱xna ngẽma togü i duü̃xü̃güca̱x ta jiĩxü̃? Dücax, rü marü pemaã nüxü̃ tixu rü Tupanape̱xewa name ga Abrã́ũ jerü najaxõ. Rü jemaca̱x Tupana nanajaxu.
10 ¿Notürü nhuxgu nixĩ ga najauxãxü̃? ¿E̱xna marü ínawiecha̱xmüpe̱xechiraü̃guwena, rü e̱xna naxü̃pa ga na ínawiecha̱xmüpe̱xechiraü̃xü̃? Rü pemaã nüxü̃ chixu rü naxü̃pa nixĩ ga na Tupana najaxuxü̃ ga Abrã́ũ.
11 Rü Tupana najaxuxguwena nixĩ ga ínawiecha̱xmüpe̱xechiraü̃xü̃ ga Abrã́ũ. Rü jema nixĩ ga norü cua̱xruü̃ ga nawa nüxü̃ nacuáxü̃ na aixcuma Tupana marü najaxuxü̃ rü nüxü̃ nadauxü̃ na namexü̃ jerü nüxü̃́ najaxõ. Rü ngẽmaca̱x i nhu̱xma ja Abrã́ũ rü tümanatü jiĩxü̃ ja guxãma ja jíxema jaxõgüxe woo tama ítawiecha̱xmüpe̱xechiraü̃gügu. Rü ngẽmaãcü ja Tupana rü tüxü̃ najaxu ja guxãma ja jíxema jaxõgüxe, rü tüxü̃ nadau na timexü̃ erü tajaxõgü.
12 Rü ngẽxgumarüü̃ ta ja Abrã́ũ rü tümanatü nixĩ ja guxãma ja jíxema íwiecha̱xmüpe̱xechiraü̃güxe rü Abrã́ũrüü̃ jaxõgüxe. Notürü tama ngẽma na tügü ítawiecha̱xmüpe̱xechiraü̃güxü̃ca̱x nixĩ i tümanatü jiĩxü̃. Notürü tümanatü nixĩ erü tajaxõgü jexgumarüü̃ ga na jaxõõxü̃ ga nüma ga tanatü ga Abrã́ũ naxü̃pa ga na ínawiecha̱xmüpe̱xechiraü̃xü̃.
Abrã́ũ rü Tupanaãxü̃́ najaxõ rü jemaca̱x Tupana najanguxẽẽ ga norü uneta ga Abrã́ũmaã nüxü̃ jaxuxü̃
13 Rü Tupana rü Abrã́ũmaã inaxuneta na nüma ja Abrã́ũ rü guxü̃ma i naxrüü̃ jaxõgüxü̃ rü tá na najauxgüãxü̃ i nhama i naãne na noxrü jiĩxü̃ca̱x. Notürü tama jema na mugü naxaurexü̃ca̱x nixĩ ga Tupana jemaãcü Abrã́ũmaã ixunetaxü̃. Notürü jemaãcü namaã inaxuneta jerü Abrã́ũ najaxõ, rü jemaca̱x Tupanape̱xewa name.
14 Notürü ngẽxguma chi ngẽma duü̃xü̃gü i mugü auregüxü̃ca̱xicatama jixĩgu i ngẽma Tupanaãrü uneta, rü notüca̱xmamare chi nixĩ i ngẽma na jaxõgüxü̃, rü chi ngẽma Tupanaãrü uneta rü taxuwama name.
15 Nüxü̃ tacua̱x rü ngẽma mugü ga Muĩsé ümatüxü̃ rü pocuwa tüxü̃ naga erü taxúema aixcuma meã tajanguxẽẽ. Notürü jexguma chi natau̱xguma ga jema mugü rü tataxu chima na texé chixri janguxẽẽxü̃.
16 Rü jexguma Tupana Abrã́ũmaã ixunetagu na nüxü̃ tá nangü̃xẽẽxü̃, rü Abrã́ũãrü õgagu nixĩ ga namaã inaxunetaxü̃. Rü ngẽmaca̱x i guxãma i jixema na Abrã́ũrüü̃ jaxõgüxü̃ rü taxca̱x ta nixĩ ga jema Tupanaãrü uneta ga Abrã́ũmaã nüxü̃ jaxuxü̃. Rü ngẽmawa nüxü̃ tacua̱x rü tama jíxema mugü auregüxeca̱xicatama nixĩ i ngẽma Tupanaãrü uneta, notürü guxãma ja jíxema Abrã́ũrüü̃ Tupanaãxü̃́ jaxõgüxeca̱x ta nixĩ. Rü nhu̱xma rü guxãma i jixema na Abrã́ũrüü̃ meã jaxõgüxü̃ rü Abrã́ũxãcügü tixĩgü rü nüma rü tanatü nixĩ i Tupanape̱xewa jerü nüxĩra najaxõ.
17 Rü Tupanaãrü ore i ümatüxü̃wa rü Abrã́ũchigaxü̃ nixu rü nhanagürü:“Rü muxü̃ma i duü̃xü̃günatü tá cuxü̃ chixĩxẽẽ”,
nhanagürü. Rü Abrã́ũ rü Tupanaãxü̃́ najaxõ, rü jemaca̱x Tupana najanguxẽẽ ga norü uneta ga namaã nüxü̃ jaxuxü̃. Rü jima Tupana nixĩ ja wena namaxẽxẽẽcü i juexü̃. Rü jimatama nixĩ ja naxücü i ngẽma woo nhu̱xma taxuxü̃.
18 Rü nüma ga Abrã́ũ rü aixcuma najaxõ ga jexguma Tupana nüxü̃ nhaxgu:“Rü tá namuxũchi i cutaagü”,
nhaxgu. Rü woo ga Abrã́ũ ga marü jaguã̱xü̃chichire̱x na jiĩxü̃ rü na nangexacüxü̃, notürü najaxõõma ga jema Tupanaãrü uneta rü meã ínanaṉg̱uxẽẽ na wüxi ga nane tá nüxü̃́ jexmaxü̃. Rü jemaãcü ningu na muxü̃ma i duü̃xü̃günatü jiĩxü̃, jema Tupana namaã nüxü̃ ixuxü̃rüü̃.
19 Rü Abrã́ũ rü wixguxuchi 100 ga taunecü nüxü̃́ najexma ga jexguma. Notürü tama inajarümaãchi ga na jaxõõxü̃ woo nüxü̃ na nacuáxü̃ ga paxa tá na najuexü̃ ga nüma rü nama̱x ga Chara rü marü poraãcü nangupetüarü taunecüã̱xgüxü̃ ga na naxãxãcügüxü̃ca̱x.
20 Rü jemaãcü ga Abrã́ũ rü najaxõõma na nüxü̃́ tá najexmaxü̃ ga wüxi ga nane jema Tupana namaã ixunetaxü̃rüü̃. Rü tama nagu narüxĩnü na Tupana ngürüãchi nawomüxẽẽxü̃. Notürü jexeraãcü Tupanaãxü̃́ najaxõõma, rü nüxü̃ nicua̱xüü̃.
21 Rü aixcumaxü̃chi najaxõ na naporaxü̃ ja Tupana na janguxẽẽãxü̃ca̱x i guxü̃ma i ngẽma norü uneta.
22 Rü jemaca̱x ga Tupana rü nüxü̃ nixu na nape̱xewa namexü̃ ga Abrã́ũ. Jerü Tupana nüxü̃ nadau ga nhuxãcü aixcuma nüxü̃́ na jaxõõxü̃.
23 Rü tama Abrã́ũchigaxicatama nixĩ ga naxümatüxü̃ ga Tupanaãrü ore ga nhaxü̃:“Rü Tupana rü nüxü̃ nixu na nape̱xewa namexü̃ ga Abrã́ũ, jerü nüxü̃ nadau ga nhuxãcü aixcuma nüxü̃́ na jaxõõxü̃”,
nhaxü̃.
24 Notürü guxãma i jixema na jaxõgüxü̃chiga ta nixĩ i ngẽma ore. Erü Tupana rü tórü õgagu tüxü̃ nade na nape̱xewa imexü̃ i jixema i nüxü̃́ na jaxõgüxü̃ ja jima juwa tórü Cori ja Ngechuchuxü̃ írüdaxẽẽcü.
25 Rü Ngechuchuxü̃ nixĩ ga namuxü̃ ga Tupana na tórü pecaduca̱x najuxü̃ca̱x. Rü nhu̱xmachi nüma ga Tupana rü wenaxãrü Ngechuchuxü̃ ínarüdaxẽẽ na nagagu imexü̃ca̱x i Tupanape̱xewa.
