Romacü̃ãꞌ 5:1-21
5 Rü nhu̱xma rü Tupanape̱xewa time erü tajaxõgü. Rü ngẽmaca̱x marü tama Tupanamaã taxuwanüã̱xgü i nhu̱xmax, erü tórü Cori ja Ngechuchu ja Cristu rü marü tamaã nanangüxmüxẽẽ ja Tupana.
2 Rü Cristugagu nixĩ na tamaã namecümaxü̃ ja Tupana i nhu̱xmax erü tajaxõgü. Rü nüxü̃ tacua̱x rü guxü̃gutáma tamaã namecüma. Rü tataãẽgü erü nüxü̃ tacua̱x na tüxü̃́ tá nangẽxmaxü̃ i tachica i mexü̃ i Tupanaxü̃tawa.
3 Rü ngẽxgumarüü̃ ta tataãẽgü i woo ngúxü̃ ingegügu. Erü nüxü̃ tacua̱x rü ngẽma ngúxü̃ rü tüxü̃ narüngü̃xẽẽ na jexeraãcü iporaexü̃ rü jaxna namaã ixĩnüẽxü̃ca̱x.
4 Rü ngẽxguma jaxna namaã ixĩnüẽgu rü Tupana rü tamaã nataãẽ. Rü ngẽma na tamaã nataãẽxü̃ rü ngẽmaca̱x meã ítanaṉg̱uxẽẽ na tüxü̃́ tá nangẽxmaxü̃ i tachica i mexü̃ i Tupanaxü̃tawa.
5 Rü nhu̱xma na ínaṉg̱uxẽẽxü̃ na tüxü̃́ tá nangẽxmaxü̃ i tachica i Tupanaxü̃tawa, rü ngẽmaca̱x taxuü̃ca̱xma tangechaü̃gü. Erü Tupana rü poraãcü tüxü̃ nangechaü̃. Rü ngẽma Naãẽ i Üünexü̃ i tüxna namuxü̃ nixĩ i tüxü̃ nüxü̃ cua̱xẽẽxü̃ i ngẽma.
6 Rü jexguma taxucürüwama jigütama imaxẽxẽẽgu, rü nawa nangu na Tupana janguxẽẽxü̃ ga jema norü uneta. Rü jexguma nixĩ ga nhama ga naãnewa namuãxü̃ ga Cristu na pecaduã̱xgüxü̃ca̱x najuxü̃ca̱x.
7 Rü tama natauxcha na wüxie rü to i duü̃xü̃ca̱x tajuxü̃, woo wüxi i duü̃xü̃ i mexü̃ca̱x jixĩgu. Rü woo tangẽxmagu ja texé ja naxca̱x juchaü̃chiréxe i wüxi i duü̃xü̃ i aixcuma mexẽchixü̃, notürü tama tüxü̃́ natauxcha i ngẽma.
8 Notürü Tupana tüxü̃ nüxü̃ nadauxẽẽ na nhuxãcü tüxü̃ nangechaü̃xü̃ jerü jexguma ipecaduã̱xgügu nixĩ ga taxca̱x najuxü̃ ga Cristu.
9 Rü nhu̱xma rü Tupanape̱xewa time jerü taxca̱x naju ga Cristu. Rü ngẽmaca̱x meãma nüxü̃ tacua̱x rü nüma rü aixcuma tá tüxü̃ ínanguxü̃xẽẽ na tama tüxü̃ napocuexü̃ca̱x ja Tupana.
10 Rü jexguma norü uwanügü ixĩgügu, rü nümatama ga Tupana rü nügümaã tüxü̃ narüngüxmüẽxẽẽ ga jexguma naju̱xgu ga Nane. Rü nhu̱xma na marü namaã irüngüxmüẽxü̃, rü jexeraãcü nüxü̃ tacua̱x na tüxü̃́ nangẽxmaxü̃ i maxü̃ i taguma gúxü̃ nagagu na namaxü̃xü̃ i nümax.
11 Rü tama ngẽxĩcatama nixĩ. Notürü i nhu̱xma rü tórü Cori ja Ngechuchu ja Cristugagu rü Tupanamaã tataãẽgü, jerü Cristugagu nixĩ ga Tupana ga tamaã nangüxmüxü̃.
Adã́ũchiga rü Cristuchiga
12 Rü wüxitama ga jatü ga Adã́ũgagu nixĩ ga nhama ga naãnewa nangóxü̃ ga pecadu. Rü pecadugagu nixĩ ga inaxügüxü̃ na najuexü̃ ga duü̃xü̃gü. Rü jemaãcü guxü̃ma ga duü̃xü̃güwa naxüe na najuexü̃, jerü guxü̃ma nipecaduã̱x.
13 Rü naxü̃pa na Tupana Muĩséna naxãxü̃ ga jema mugü ga naxümatüxü̃, rü duü̃xü̃gü rü chixexü̃ naxügüecha, rü jemaca̱x najue. Notürü jema mugü rü taũta najexma ga jexguma, rü jemaca̱x taxucürüwa texé nüxü̃ tixu ga jema duü̃xü̃gü ga na chixri naga naxĩnüẽxü̃ ga jema mugü.
14 Rü jema duü̃xü̃gü ga Adã́ũwena buexü̃ rü tama Adã́ũrüü̃ nanangõ̱x ga jema ori ga Tupana nüxna chu̱xuxü̃. Notürü chixexü̃ naxügü, rü jemaca̱x najue. Rü jemaãcü nixĩ nhu̱xmata Tupana Muĩséna naxã ga jema mugü ga naxümatüxü̃. Rü Adã́ũwa inaxügü na najuexü̃ ga duü̃xü̃gü, notürü Cristuwa inaxügü na najaxuxü̃ i maxü̃ i taguma gúxü̃.
15 Notürü jema chixexü̃ ga Adã́ũ üxü̃ rü taxuacü nagu tanangu i ngẽma ãmare ga Tupana tüxna ãxü̃, erü tama namaã nawüxigu. Rü aixcuma nixĩ ga wüxi ga jatüarü chixexü̃gagu na najuexü̃ i guxü̃ma i duü̃xü̃gü. Notürü tama jemaãcü tamaã nanaxü ga Tupana. Jerü nüma rü tüxü̃́ nangetanüãcüma núma nanamu ga Nane ja Ngechuchu ja Cristu na tórü pecaduca̱x najuxü̃ca̱x. Rü jemaãcü guma Cristugagu Tupana nanamaxẽxẽẽ i muxü̃ma i duü̃xü̃gü.
16 Rü jema pecadu ga Adã́ũ üxü̃ rü taxuacüma nagu tanangu ga jema ãmare ga Tupana tüxna ãxü̃. Jerü wüxitama ga Adã́ũãrü pecadugagu, rü Tupana nüxü̃ nixu rü tá naju naxca̱x ga jema. Notürü Ngechuchu ja Cristugagu rü Tupana nüxü̃ nixu na nape̱xewa imexü̃ rü nüxna íinguxü̃xü̃ i guxü̃ma i tórü pecadugü.
17 Rü guxü̃ma i duü̃xü̃gü najue jerü wüxitama ga jatü ga Adã́ũ rü pecadu naxü. Notürü tama jemaãcü tamaã nanaxü ga Tupana, jerü ga nüma rü poraãcü tamaã namecüma rü tüxü̃́ nangetanüãcüma tüxü̃ narüngü̃xẽẽ. Rü ngẽmaca̱x i nhu̱xma rü guxü̃ma i ngẽma duü̃xü̃gü i Tupana nüxü̃ ixuxü̃ na nape̱xewa jamexü̃, rü nümatama ja Tupana rü Nane ja Ngechuchu ja Cristugagu nanamaxẽxẽẽ na namaã wüxigu ãẽ̱xgacügü jixĩgüxü̃ca̱x.
18 Rü jema Adã́ũãrü chixexü̃ rü pocuwa nanagagü ga guxü̃ma ga duü̃xü̃gü. Notürü jema mexü̃ ga Ngechuchu ja Cristu üxü̃ rü pecaduwa ínananguxü̃xẽẽ i guxü̃ma i duü̃xü̃gü i jaxõgüxü̃, rü nüxna nanaxã i maxü̃ i taguma gúxü̃.
19 Rü guma nüxĩraü̃cü ga jatü ga Adã́ũ rü tama Tupanaga naxĩnü. Rü jemaãcü wüxitama ga jatügagu rü muxü̃ma ga duü̃xü̃gü rü nipecaduã̱x. Notürü ínangu ga guma jatü ga Ngechuchu, rü meã Tupanaga naxĩnü. Rü gumagagu rü muxü̃ma i duü̃xü̃gü rü tá nime i Tupanape̱xewa.
20 Rü Tupana rü Muĩséna nanaxã ga norü mugü na duü̃xü̃güxü̃ nüxü̃ nacua̱xẽẽxü̃ca̱x na nhuxãcü poraãcü pecadu naxügüxü̃. Notürü jexguma jexeraãcü pecadu naxügügu ga duü̃xü̃gü, rü jexeraãcü Tupanaãxü̃́ nangechaü̃tümüü̃gü.
21 Rü nhu̱xma woo pecadugagu na ijuexü̃, notürü Tupanaãxü̃́ tangechaü̃tümüü̃gü i guxü̃guma. Rü ngẽmaãcü pecaduwa tüxü̃ ínanguxü̃xẽẽ na nape̱xewa imexü̃ca̱x rü tórü Cori ja Ngechuchu ja Cristugagu tüxü̃́ nangẽxmaxü̃ca̱x i maxü̃ i taguma gúxü̃.
