Romacü̃ãꞌ 7:1-25
7 Pa Chaueneẽgüx, rü pema na nagu pexĩxü̃ i ngẽma mugü, rü nüxü̃ pecua̱x rü ngẽxguma tamaxü̃guxicatama nixĩ na ngẽma mugütüü̃wa tangẽxmaxü̃ ja wüxichigü ja duü̃xẽ.
2 Rü dücax, rü wüxi i ngecü i ãtecü rü ngĩteme̱xẽwa ingẽxma ega namaxjane ja ngĩte, erü ngẽma nhanagürü i ore i mugü. Notürü ngẽxguma naju̱xgu ja ngĩte, rü marü tama ngĩteme̱xẽwa ingẽxma. Rü jema mugü ga ngĩteme̱xẽwa ngĩxü̃ jexmaxẽẽxü̃ ga noxri rü marü tama ngĩmaã inacua̱x.
3 Rü ngẽmaãcü i ngẽxguma namaxjane ja ngĩte rü to i jatümaã inapexgu, rü pecadu ixü. Notürü ngẽxguma marü naju̱xgu ja ngĩte, rü marü nüxna íinguxuchi i ngẽma mugü ga ngĩteme̱xẽwa ngĩxü̃ jexmaxẽẽxü̃ ga noxrix. Rü ngẽxguma wenaxãrü naxãtegu rü taxuü̃ma i chixexü̃ ixü.
4 Rü ngẽxgumarüü̃ ta i pemax, Pa Chaueneẽgüx, rü marü tama jema Muĩsé ümatüxü̃ ga mugütüü̃wa pengẽxmagü jerü nüma ga Cristu rü pexca̱x naju. Rü ngẽmaca̱x i nhu̱xma rü Cristu ga juwa írüdacüarü peixĩgü. Rü ngẽmaãcü nanaxü ja Tupana na naxca̱x imaxẽxü̃ca̱x, rü norü ngúchaü̃ ixügüxü̃ca̱x.
5 Rü jexguma nuxcümaü̃xü̃ ga tacümawe rüxĩxgu rü poraãcü tanaxü ga taxüneãrü ngúchaü̃gü woo jema mugü tüxna na nachu̱xuxü̃ ga jema. Notürü jexguma nüxü̃ icua̱xgu na nachu̱xuxü̃ ga jema pecadu ga ixüxü̃, rü jexeraãcü tanaxüxchaü̃. Rü jemaãcü ga jema tórü pecadugü rü juwa tüxü̃ nagagü.
6 Notürü i nhu̱xma rü marü tama ngẽma mugütüü̃wa tangẽxmagü, erü Tupana rü marü nüxna tüxü̃ ínanguxü̃xẽẽ. Rü ngẽmaca̱x i nhu̱xma rü nhama duü̃xü̃gü i ijuexü̃rüü̃ tixĩgü i nape̱xewa i ngẽma mugü, erü marü tama tamaã inacua̱x. Rü ngẽmaca̱x tama nagu taxĩ i ngẽma nuxcüma ümatüxü̃ ga mugü, erü marü nüxna ítanguxü̃ na Tupanaãrü ngúchaü̃ ixügüxü̃ca̱x rü naxca̱x na imaxẽxü̃ca̱x namaã i tórü maxü̃ i ngexwacaxü̃xü̃ i Naãẽ i Üünexü̃ tüxna ãxü̃.
Ngẽma pecadu i chawa ngẽxmaxü̃ rü chamaã inacua̱x
7 ¿Rü nhuxũ nhagüxü̃ tá i nhu̱xmax? ¿Rü pexca̱x rü jema mugü jiĩxü̃ ga tüxü̃ pecaduã̱xẽẽxü̃? ¡Rü dücax, tama name i ngẽmaãcü nagu tarüxĩnüẽ! Notürü jexguma chi jema mugü rü tama choxü̃ nüxü̃ nacua̱xẽẽgu, rü tau chima nüxü̃ chacua̱x na pecadutüü̃wa chajexmaxü̃. Rü dücax, rü jexguma chi jema mugü rü tau chima choxü̃ nüxü̃ cua̱xẽẽgu na wüxi i pecadu jiĩxü̃ na ṯoguã̱xãrü ngẽmaxü̃ca̱x chixauxãchixü̃, rü tau chima nüxü̃ chacua̱x na pecadu jiĩxü̃ i ngẽma.
8 Notürü jexguma jema mugü choxü̃ ngu̱xẽẽgu na nachixexü̃ na ṯoguã̱xãrü ngẽmaxü̃ choxü̃́ ngúchaü̃xü̃, rü jexguma ga pecadu rü najoxniẽ na jexeraãcü choxü̃́ na nangúchaü̃xẽẽãxü̃. Rü ngẽmaãcü nüxü̃ tadau rü ngẽxguma chi natau̱xgu i ngẽma mugü, rü tau chima nüxü̃ tacua̱xgü na nhuxãcü wüxi i chixexü̃chixü̃ na jiĩxü̃ i ngẽma pecadu.
9 7:9-10 Rü noxri taũta jema mugüxü̃ chacua̱xgu, rü chama nagu charüxĩnügu rü chame. Notürü jexguma jema mugüxü̃ chacua̱xgu, rü nüxü̃ chicua̱xãchi na chixexü̃ chaxüxü̃ rü ngẽma chixexü̃ca̱x rü tá na chajuxü̃. Rü jemaãcü ga jema mugü ga Tupana Muĩséna ãxü̃ na duü̃xü̃güxü̃ namaxẽxẽẽxü̃ca̱x, rü choxü̃ najuxẽẽãma.
10 Nüü̃ nadau 7:9
11 Rü nüma ga pecadu rü najoxniẽ namaã ga jema mugü. Jerü jexguma jema mugü choxü̃ ngu̱xẽẽgu na nhuxãcü nachixexü̃ ga jema pecadu, rü jexeraãcü choxü̃́ nangúchaü̃ ga jema pecadu. Rü jemaãcü ga jema pecadu rü choxü̃ nawomüxẽẽ rü najoxniẽ namaã ga jema mugü rü juwa choxü̃ naga.
12 Notürü jema mugü rü aixcuma naxüüne i Tupanape̱xewa. Rü guxü̃ma i ngẽma Tupana tamaã nüxü̃ ixuxü̃ rü naxüüne rü aixcuma name rü tüxü̃ narüngü̃xẽẽ.
13 ¿Notürü nhuxãcü nixĩ i ngẽma i nhu̱xmax? ¿E̱xna pexca̱x rü jema mugü jiĩxü̃ ga juwa choxü̃ gaxü̃? Rü dücax, rü tama ngẽmaãcü nixĩ. Erü ngẽma pecadu nixĩ i Tupanaãrü mugümaã joxniẽxü̃ na juwa choxü̃ nagaxü̃ca̱x. Rü ngẽmaãcü nüxü̃ tacua̱x na nhuxãcü poraãcü nachixexü̃ i pecadu. Rü jexguma jema mugü choxü̃ ngu̱xẽẽgu na nhuxãcü poraãcü nachixexü̃ ga jema pecadu, rü jexeraãcü choxü̃́ nangúchaü̃ ga jema chixexü̃ rü jexeraãcü chanaxüama ga pecadu.
14 Nüxü̃ tacua̱x i ngẽma mugü rü Tupanaãẽ i Üünexü̃wa ne naxũ. Notürü chama rü duü̃xü̃mare chixĩ, rü ngẽmaca̱x nixĩ i chamaã inacuáxü̃ i ngẽma pecadu i chaxüxü̃.
15 Rü tama nüxü̃ chacua̱x na ṯacü choxü̃ üpetüxü̃ erü tama chanaxü i ngẽma mexü̃ i chanaxwa̱xexü̃ na chaxüxü̃, notürü ngẽma chixexü̃ i tama chanaxwa̱xexü̃ na chaxüxü̃ rü ngẽmaãma nixĩ i chaxüxü̃.
16 Notürü i nhu̱xma na chanaxüxü̃ i ngẽma tama chanaxwa̱xechiréxü̃ na chaxüxü̃, rü ngẽmawa nüxü̃ chicua̱xãchi na namexü̃ i ngẽma mugü.
17 Rü ngẽmaca̱x i nhu̱xma rü tama chauechama nixĩ i chanaxüxü̃ i ngẽma chixexü̃. Notürü ngẽma pecadu i chawa ngẽxmaxü̃ nixĩ i chamaã icuáxü̃, rü ngẽma nixĩ i chixexü̃ choxü̃ üxẽẽxü̃.
18 Rü chama nüxü̃ chacua̱x rü wüxi i pecaduã́xü̃ i duü̃xü̃mare chixĩ, rü ngẽmaca̱x chawa rü nataxuma i ṯacü i mexü̃. Erü woo chanaxwa̱xe na mexü̃ chaxüxü̃, notürü tama chamaã nanguxü̃ na chanaxüxü̃.
19 Erü ngẽma mexü̃ i chanaxwa̱xexü̃ na chaxüxü̃, rü tama chanaxü. Notürü chanaxüama i ngẽma chixexü̃ i tama chanaxwa̱xexü̃ na chanaxüxü̃.
20 Rü ngẽxguma chi chanaxüamagu i ngẽma chixexü̃ i tama chanaxwa̱xexü̃ na chaxüxü̃, rü meãma nango̱x na tama chauechama chanaxüxü̃. Notürü ngẽma pecadu i chawa ngẽxmaxü̃ nixĩ i chamaã icuáxü̃ rü chixexü̃ choxü̃ üxẽẽxü̃.
21 Rü ngẽmaãcü nüxü̃ chadau i nhuxãcü na chiĩxü̃. Rü ngẽxguma mexü̃ chaxüxchaü̃gu rü choxü̃́ natauxcha na chixexü̃ãma chaxüxü̃.
22 Chama rü chauãẽwa rü chorü me nixĩ i Tupanaãrü mugü, rü naga chaxĩnüchaü̃.
23 Notürü nhaã chaxune i nhama i naãnecü̱̃ã̱x ixĩxü̃wa, rü nangẽxma i ṯacü i tama naxüxchaü̃xü̃ i ngẽma chauãẽ naxwa̱xexü̃. Rü ngẽma pecadu i chawa ngẽxmaxü̃ nixĩ i chamaã icuáxü̃ rü chixexü̃ choxü̃ üxẽẽxü̃.
24 7:24-25 Rü ngẽmaãcü i chama rü chauãẽwa chajanguxẽẽchaü̃ i Tupanaãrü mugü, notürü nhama i naãnecü̱̃ã̱x i chaxune rü nanaxüxchaü̃ i ngẽma nanaxwa̱xexü̃ i pecadu. Rü taxuü̃ca̱xma chataãẽ i chamax. ¿Rü texé tá nüxna choxü̃ ítanguxuchixẽẽ i nhaã pecadu i chawa ngẽxmaxü̃ rü juwa choxü̃ gaxchaü̃xü̃? Rü Tupanana moxẽ chaxã erü tórü Cori ja Ngechuchu ja Cristu rü tá choxü̃ nüxna ínanguxuchixẽẽ.
25 Nüü̃ nadau 7:24
