Zacarias 1:1-21
1 Rü yexguma marü taxre ga taunecü ãẽ̱xgacü yixĩxgu ga Daríu rü meama norü 8 ga tauemacügu (nowẽ́bru) rü nüma ga Cori ya Tupana rü Yacaríamaxã nidexa. Rü nüma ga Yacaría rü Berequía nane nixĩ rü Ídu nixĩ ga norü o̱xi. Rü Tupana rü nhanagürü nüxü̃:
2 “Chama ya Cori ya Tupana ya guxãétüwa ngẽxmaxe, rü poraãcü namaxã chanu ga yema perü o̱xigü.
3 Rü ngẽmaca̱x i nhu̱xmax rü chanaxwa̱xe i cutanüxü̃gümaxã nüxü̃ quixu i nhaa chauga i nhaxü̃: ‘¡Cha̱u̱xca̱x pewoegü! Rü chama rü tá pexca̱x chatáegu.’ Rü chamax i Cori ya Tupana ya guxãétüwa ngẽxmaxe nixĩ i ngẽma nhachaxü̃.
4 Rü tama name nax yema perü o̱xigürüxü̃ pexĩgüxü̃. Yerü yexguma nüxna chaxãgagu ga chorü orearü uruü̃gü nax namaxã nüxü̃ yaxuxü̃ca̱x ga chauga nax nüxü̃ naxoexü̃ca̱x ga chixexü̃ ga nacümagü rü chixri nax namaxẽxü̃, notürü ga nümagü rü tama chauga naxĩnüechaü̃ rü tama choxü̃ nacua̱xgüchaü̃. Rü chama i Cori ya Tupana ya guxãétüwa ngẽxmaxe nixĩ i nüxü̃ chixuxü̃ i ngẽma.
5 ¿Notürü i nhu̱xmax rü ngexü̃gü yixĩxü̃ ga yema perü o̱xigü? Rü chorü orearü uruü̃gü rü ta rü marü nayue.
6 Notürü yema chorü ore rü yema chorü mugü ga chorü orearü uruü̃güme̱xẽgu chaxüxü̃, rü perü o̱xigüwa nangu. Rü nhuxre ga nümagü rü cha̱u̱xca̱x nawoegu, rü naxca̱x ínicua̱xgü ga chixexü̃ nax naxügüxü̃, rü nhanagürügü: ‘Aixcuma nüma ya Cori ya Tupana ya guxãétüwa ngẽxmacü rü ngẽma tórü chixexü̃ãcütama tamaxã nanangupetüxẽxẽ’, nhanagürügü”, nhanagürü ga Tupana.
Tupana rü Yacaríaxü̃ nanawe̱x i wüxi i dauxü̃cüã̱x i cowaruétüwa rütogüxü̃
7 Rü yexguma marü taxre ga taunecü ãẽ̱xgacü yixĩxgu ga Daríu rü meama norü 11 ga tauemacügu (feweréru) rü nüma ga Cori ya Tupana rü chamaxã nidexa i chamax i orearü uruxü̃ i Yacaría i Berequía nane ya Ídutaxa nax chixĩxü̃.
8 Rü wüxi ga chütaxü̃gu rü Tupana choxü̃ nüxü̃ nadauxẽxẽ ga wüxi ga norü orearü ngeruxü̃ ga dauxü̃cüã̱x ga cowaru ga dauxü̃étügu aunagüxü̃. Rü wüxi ga ngatewa yexmaxü̃ ga naixtanüpechitagu norü cowarumaxã nachi. Rü yemaweama nayexmagü ga wüxitücumü ga cowaru ga idauxü̃, rü to ga idáuxraxü̃ rü to ga icómüxü̃.
9 Rü chama rü yema dauxü̃cüã̱x ga cowaruétügu aunagüxü̃na chaca rü nhachagürü: “Pa Corix ¿ta̱xacügü nixĩ i ngẽma cowaruétügu augüxü̃?” nhachagürü. Rü nüma ga yema dauxü̃cüã̱x ga chamaxã idexaxü̃, rü choxü̃ nangãxü̃ga rü nhanagürü: “Chama rü tá cuxü̃ chanawe̱x i ta̱xacü nax yixĩgüxü̃”, nhanagürü.
10 Rü yexguma ga yema dauxü̃cüã̱x ga naixtanüpechitagu chixü̃ rü nhanagürü choxü̃: “Nhaagü nixĩ i Cori ya Tupana nua mugüxü̃ nax nhama i naanegu íyachoeguxü̃ca̱x”, nhanagürü.
11 Rü yexguma ga yema togü ga cowaruétügu augüxü̃, rü Cori ya Tupanaarü orearü ngeruxü̃ ga naixtanüpechitagu chixü̃maxã nidexagü rü nhanagürügü: “Guxü̃wama i nhama i naanegu ítayachoegu, rü guxü̃ma i duü̃xü̃gü rü nügümaxã ínataãxẽgü, rü taxuxü̃ma i ta̱xacü i guxchaxü̃xü̃ itayangaugü”, nhanagürügü.
12 Rü nüma ga yema Cori ya Tupanaarü orearü ngeruxü̃ ga dauxü̃cüã̱x rü nhanagürü: “Pa Corix, Pa Tupana ya Guxãétüwa Ngẽxmacüx, rü marü 70 ya taunecüwa nangu nax Yerucharéü̃cüã̱xgümaxã rü ngẽma togü i Yudáanearü ĩanecüã̱xgümaxã cunuxü̃. ¿Rü nhuxre ya taunecü taxuxü̃ nax wenaxarü cuxü̃́ nangechaü̃tümüxü̃güxü̃?” nhanagürü.
13 Rü nüma ga Cori ya Tupana rü nüxü̃ nangechaü̃ãcüma mea yema dauxü̃cüã̱x ga chamaxã idexaxü̃xü̃ nangãxü̃ga.
14 Rü yexguma ga nüma ga dauxü̃cüã̱x rü choxü̃ namu nax chaxunagüxü̃. “Rü nhaa nixĩ ya Cori ya Tupana ya guxãétüwa ngẽxmacü nüxü̃ ixuxü̃: ‘Chamax rü nüxü̃ changechaü̃xü̃chi ya Yerucharéü̃ rü yima ma̱xpǘne ya Chiã́ũ.
15 Rü yexguma íxrarüwatama chanapoxcuchaü̃gu ga yema Yerucharéü̃cüã̱xgü, notürü yema togü ga nachixü̃anegücüã̱x ga yéma chamugüxü̃ rü nanangupetüxẽxẽ ga yema poxcu ga Yerucharéü̃cüã̱xgümaxã chaxueguxü̃. Rü ngẽmaca̱x namaxã chanu i ngẽma nachixü̃anegü i nügü írüporaexü̃ rü taxúguma rüxĩnüexü̃.
16 Notürü ngẽma nax choxü̃́ nangechaü̃tümüxü̃gagu ya Yerucharéü̃cüã̱xgü, rü naxca̱x chatáegu. Rü tá nüxü̃́ chanangúchaü̃xẽxẽ i duü̃xü̃gü nax wena namexẽẽgüaxü̃ca̱x ya chapata, rü guxü̃nema ya yima ĩane’, nhanagürü ga Tupana.”
17 Rü yema dauxü̃cüã̱x rü nhanagürü ta choxü̃: “Nhaa tá nixĩ i to i ore i tá nüxü̃ quixuxü̃ rü nüma ya Cori ya Tupana ya guxãétüwa ngẽxmacü rü nhanagürü: ‘Rü chama rü tá wena nüxü̃ charüngü̃xẽẽ ya yima chorü ĩanegü nax yamexü̃ca̱x rü mea iyaxĩxü̃ca̱x. Rü wena tá chanataãxẽxẽxẽ ya yima ma̱xpǘne ya Chiã́ũ. Rü wena tá chanaxunagü nax chorü ĩane yixĩxü̃ ya Yerucharéü̃’, nhanagürü ya Tupana.”
18 --
19 --
20 --
21 --
