Zacarias 3:1-10
3 Rü yexguma nüma ga Cori ya Tupana rü choxü̃ nanawe̱x ga Yuchué ga chacherdótegüarü ãẽ̱xgacü. Rü nüma ga Yuchué rü Cori ya Tupanaarü duü̃xü̃pe̱xegu nachi. Rü Yuchuéarü tügünecüwawa nayexma ga Chataná ga nüxü̃ ixugüchaü̃xü̃.
2 Rü nüma ga yema Tupanaarü orearü ngeruxü̃ i dauxü̃cüã̱x rü Chatanáxü̃ nhanagürü: “¡Nüma ya Cori ya Tupana cuxü̃ nangax! ¡Rü yimátama Cori ya Tupana ya Yerucharéü̃xü̃ ngechaü̃cü rü cuxü̃ nangax! Erü nhaa yatü rü nhama wüxi ya ã́xwe ya üxüétüwa yaxucürüxü̃ Babiróniaanewa táeguxü̃ nixĩ”, nhanagürü.
3 Rü nüma ga Yuchué rü poraãcü naxãũãchichiru rü yemaacü Cori ya Tupanaarü duü̃xü̃pe̱xegu nachi.
4 Rü yexguma ga yema dauxü̃cüã̱x ga orearü ngeruxü̃ rü norü ngü̃xẽẽruü̃güxü̃ namu rü nhanagürü: “Ngẽma ãũãchixü̃ i Yuchuéchiru ¡rü ípenacuxuchix!” Rü nhu̱xũchi Yuchuéxü̃ nhanagürü: “Dücax, rü marü cuxna chanayaxu i ngẽma curü pecádu rü nga̱xãẽchirugu cuxü̃ chicu̱xẽxẽ”, nhanagürü.
5 Rü yexgumatama norü ngü̃xẽẽruü̃güxü̃ namu ga Yuchuéxü̃ yana̱i̱xerugüxü̃ca̱x namaxã ga wüxi ga ngẽmataxü̃ ga naxchirutachinü. Rü yemawena rü petachirugu nayacu̱xẽẽgü. Rü nüma ga yema dauxü̃cüã̱x rü yexmatama nachiecha.
6 Rü nhu̱xũchi ga nüma ga Cori ya Tupanaarü orearü ngeruxü̃ ga dauxü̃cüã̱x rü Yuchuéxü̃ nhanagürü:
7 “Cori ya Tupana ya guxãétüwa ngẽxmacü rü nhanagürü cuxü̃: ‘¡Chaucümagu ixũ rü yanguxẽxẽ i guxü̃ma i ngẽma cumaxã nüxü̃ chixuxü̃! Rü ngẽxguma ngẽmaãcü cunaxü̱xgux, rü cuxme̱xgu tá chanaxǘ ya chapata rü naa̱xtü nax nüxna cudauxü̃ca̱x, rü tá cuxna chanaxã i cuchica i natanüwa i nhaa chorü orearü ngeruxü̃ i dauxü̃cüã̱x i choxü̃́ puracüexü̃.
8 ¡Rü dücax, Pa Yuchuéx, rü mea iperüxĩnüe i guxãma i pemax nax chacherdótegüwa pexügüxü̃! Rü pema rü wüxi i cua̱xruxü̃ pexĩgü naxca̱x i ngẽma mexü̃ i tá ínguxü̃. Erü paxa tá nua petanüwa chanango̱xẽxẽ i wüxi i Dawítaxa i chorü duü̃xü̃ ya perü ãẽ̱xgacü tá ixĩcü (Cristu).
9 Rü chamax rü Yuchuépe̱xegu chanaxǘ ya wüxi ya nuta ya 7 wa ãcüwacü nüxü̃́ ngẽxmacü. Rü chama tátama yimá nutagu chanaxümatü. Rü nhu̱xũchi i chama rü wüxitátama i ngunexü̃gu nüxna chanayaxu i norü pecádu i nhaa nachixü̃ane.
10 Rü ngẽxguma ngẽma ngunexü̃wa nanguxgu rü tá pegüna pexugü nax perü úwagüpechitawa, rü perü fígugüpechitawa pegümaxã petaãxẽgüxü̃ca̱x. Rü chama ya Cori ya Tupana ya guxãétüwa ngẽxmaxe nixĩ i nüxü̃ chixuxü̃ i ngẽma’, nhanagürü.”
