Ageu 1:1-15
1 Rü yexguma taxre ga taunecü ãẽ̱xgacü yixĩxgu ga Daríu, rü norü 6 ga tauemacüarü ügügu, rü nüma ga Cori ya Tupana rü norü orearü uruxü̃ ga Ayéuwa nidexa. Rü nüxna nanaxã ga ore ga Yudáanecüã̱xarü ãẽ̱xgacü ga Chorobabé ga Charatié naneca̱x ixĩxü̃ rü chacherdótegüarü ãẽ̱xgacü ga Yuchué ga Yochadáchi naneca̱x ixĩxü̃.
2 1:2-3 Rü nhaa nixĩ ga yema ore ga Ayéuwa nüxü̃ yaxuxü̃ ga nüma ga Cori ya Tupana ya guxü̃étüwa ngẽxmacü, rü nhanagürü: “Nhaa duü̃xü̃gü rü nüxü̃ nixugüe nax taxũta nawa nanguxü̃ nax wena naxügüãxü̃ca̱x ya chapata.
3 Nüü̃ nadau 1:2
4 ¿Ẽ̱xna pexicatama penaxwa̱xexü̃ nax mexü̃ne ya ĩpatawa pemaxẽxü̃, rü yoxni ya yima chapata rü naxtapü̱x nügüétügu yixü̃ nax nachixexü̃?
5 Rü chamax ya Cori ya Tupana ya guxãétüwa ngẽxmaxe rü pemaxã nüxü̃ chixu: ¡Mea penangugü i pecümagü!
6 Rü pema rü muxü̃ma i penetü petogü notürü noxretama i norü o pibuxgü, pechibüe notürü tama pexü̃́ ningu, rü pexaxegü notürü peta̱xawaeama, rü pegü pedüxgü notürü taguma penaiwe. Rü yíxema puracüxe rü tanayauxtanü i tümaarü puracü notürü paxama tüxü̃́ nagu erü nhama chacu irügáuxü̃gu tananucuxü̃rüxü̃ nixĩ.
7 Rü chama ya Cori ya Tupana ya guxãétüwa ngẽxmaxe, rü pemaxã nüxü̃ chixu: ¡Mea penangugü i pecümagü!
8 ¡Rü dauxchitawa pexĩ rü ngẽ́ma mürapewa peyaxü̱x! ¡Rü nua penana rü ngẽmamaxã wena penaxü̱x ya yima chapata! Rü chama rü tá taãxẽãcü ngẽ́ma changexma rü ngẽ́ma tá ichanawe̱x i chorü üüne.
9 Rü pemax rü poraãcü pepuracüe nax pexü̃́ nangexmaxü̃ca̱x i muxü̃ i perü nanetüarü o, notürü noxretama nixĩ i ngẽma pibuxgüxü̃. Rü ngẽma penetüarü o i pechiü̃gu namaxã penguxü̃xü̃ rü wüxi i cue nhaxü̃maxã ichayanatauxẽxẽ. ¿Rü tü̱xcüü̃ ngẽmaãcü nixĩ? Erü yima chapata rü naxtapü̱xica nügüétü nayi nax nachixexü̃ rü pemax rü pepataca̱xica pexoégaãxẽ. Rü chama ya Cori ya Tupana nixĩ i nüxü̃ chixuxü̃ i ngẽma.
10 Rü ngẽmaca̱x nixĩ i tama pexca̱x chanapuxẽẽxü̃ rü ngẽma waixümü rü tama mea pexü̃́ nayaxẽẽãxü̃ i penetügü.
11 Rü chama nixĩ ga íchananguxẽẽxü̃ ga nax yapagüanexü̃ ga peanewa rü ma̱xpǘnegüwa, rü trígunecü, rü úwanecü, rü oríwanecü rü guxü̃ma ga ta̱xacü ga petogüxü̃necüwa. Rü yema nax yapagüanexü̃gagu rü pexca̱x ínangu ga taiya rü perü wocagüca̱x rü ta”, nhanagürü ga Tupana.
12 Rü nüma ga Chorobabé rü Yuchué rü guxü̃ma ga togü ga duü̃xü̃gü rü aixcuma Tupanaga naxĩnüe yerü namuü̃e ga yexguma nüxü̃ naxĩnüegu ga yema ore ga Cori ya Tupana Ayéuwa nüxü̃ ixuxü̃.
13 Rü yexguma ga nüma ga Ayéu ga Cori ya Tupanaarü orearü uruxü̃, rü Cori ya Tupanaégagu duü̃xü̃gümaxã nidexa rü nhanagürü: “Nüma ya Cori ya Tupana rü nhanagürü pexü̃: ‘Chama ya Cori ya Tupana rü pexü̃tawa changexma’ ”, nhanagürü.
14 Rü yemaacü nüma ga Cori ya Tupana rü nanataãxẽxẽxẽ ga Chorobabé ga Yudáanecüã̱xarü ãẽ̱xgacü, rü Yuchué ga chacherdótegüarü ãẽ̱xgacü rü guxü̃ma ga yema togü ga duü̃xü̃gü. Rü yexguma ga nümagü rü yéma naxĩ rü inanaxügüe nax naxügüãxü̃ ga guma napata ga Cori ya Tupana ya guxãétüwa ngẽxmacü.
15 Rü yexguma taxre ga taunecü Pérchiaanearü ãẽ̱xgacü yixĩxgu ga Daríu, rü meama norü 6 ga tauemacüarü (setẽ́bru) 24 ga ngunexü̃ nixĩ ga inaxügüãxü̃ ga nax wena namexẽẽgüaxü̃ ga guma Tupanapata.
