Daniel 3:1-30
3 Rü nüma ga ãẽ̱xgacü ga Nabucudonochó rü norü duü̃xü̃güxü̃ namu nax naxügüãxü̃ca̱x ga wüxi ga naxchicüna̱xã ga úirunaxca̱x. Rü yema naxchicüna̱xã rü nüxü̃́ nayexma ga 30 métru ga norü máchane, rü norü taxüne rü 3 métru nixĩ. Rü nhu̱xũchi nüma ga ãẽ̱xgacü rü norü duü̃xü̃güxü̃ namu nax metachinüxü̃ ga Dúragu ãégaxü̃gu nachixẽẽgüãxü̃ca̱x ĩane ga Babiróniaanewa.
2 Rü yemawena rü naxca̱x nangema ga guxü̃ma ga ãẽ̱xgacügü ga wüxichigü ga naaneétüwa yexmagüxü̃. Rü naxca̱x nangema ta ga norü churaragüerugü, rü wüxichigü ga ĩanearü ãẽ̱xgacügü, rü ãẽ̱xgacügü ga ucu̱xẽruü̃gü, rü ãẽ̱xgacügü ga diẽrumaxã icua̱xgüxü̃, rü ãẽ̱xgacügü ga nachiü̃anearü mugümaxã icua̱xgüxü̃, rü togü ga ãẽ̱xgacü ga wüxichigü ga ĩanewa yexmagüxü̃. Rü yema ãẽ̱xgacügü nixĩ ga naxca̱x nangemaxü̃ nawa ga norü ãxü̃chi ga yema naxchicüna̱xã ga ãẽ̱xgacü norü duü̃xü̃güxü̃ üxẽẽxü̃.
3 Rü guxü̃ma ga yema ãẽ̱xgacügü ga yema nachiü̃anecüã̱x rü nangutaque̱xegü nape̱xegu ga yema naxchicüna̱xã nax naxüchigagüaxü̃ca̱x ga norü ãxü̃chi.
4 Rü yema namaxã icuáxü̃ ga yema ãxü̃chichigaarü ügü rü tagaxãcü duü̃xü̃güxü̃ nhanagürü: —¡Iperüxĩnüe Pa Duü̃xü̃gü i Guxü̃ i Ĩanecüã̱xgü, rü Guxü̃ i Nachixü̃anecüã̱xgü, rü Guxãma i Pemax i To i Nagawa Idexagüchigüxex!
5 Rü ngẽxguma tá nüxü̃ pexĩnüegu nax yacuegüãxü̃ rü napaxgüãxü̃ i ngẽma paxetaruü̃gü rü pemax, Pa Duü̃xü̃güx, rü tá nape̱xegu pecaxã́pü̱xügü i ngẽma naxchicüna̱xã i ãẽ̱xgacü ya Nabucudonochó duü̃xü̃güxü̃ üxẽẽxü̃.
6 Rü guxãma ya texé ya tama nape̱xegu caxã́pü̱xügüxe, rü nüxü̃ icua̱xüü̃güxe, rü noxtacüma tá ngẽma poxcuchicaxü̃ i íya̱u̱xraxü̃gu tawocu —nhanagürü.
7 Rü yemaacü ga yexguma nüxü̃ naxĩnüegu ga yema paxetaruü̃gü ga nax yacuegüãxü̃ rü guxü̃ma ga yema muxü̃ma ga duü̃xü̃gü ga yexma ngutaque̱xexü̃ rü nape̱xegu nacaxgüã́pü̱xü, rü nüxü̃ nicua̱xüxü̃gü ga yema naxchicüna̱xã ga úirunaxca̱x.
8 Notürü nhuxre ga Caudéuanecüã̱xgü rü nayoxniegü nax Nabucudonochópe̱xewa Yudéugüxü̃ ínaxuaxü̃güxü̃ rü nhanagürügü:
9 --
10 --
11 --
12 —Dücax, Pa Ãẽ̱xgacüx, rü nangexma i nhuxre i Yudéugü i cumax ãẽ̱xgacüxü̃ cumucuxü̃ nawa ya daa ĩane ya Babirónia. Rü ngẽmagü rü tama cuga naxĩnüechaü̃, Pa Ãẽ̱xgacüx, rü ngẽmaca̱x tama nüxü̃ nicua̱xüxü̃gü i ngẽma tórü tupanagü rü woo i ngẽma naxchicüna̱xã i úirunaxca̱x i cumax duü̃xü̃güxü̃ cuxüxẽẽxü̃. Rü ngẽma yatügü rü Chadráqui, rü Mecháqui rü Abenidégu nixĩ —nhanagürügü.
13 Rü nüma ga Nabucudonochó rü poraãcü nanu. Rü yemaca̱x norü duü̃xü̃güxü̃ namu nax naxü̃tawa nagagüaxü̃ca̱x ga Chadráqui, rü Mecháqui, rü Abnégu. Rü yexguma marü naxü̃tawa nangugügu rü nüxna naca rü nhanagürü:
14 —¿Aixcuma yixĩxü̃ i pemax i tama nüxü̃ pecua̱xüü̃güxü̃ i ngẽma chorü tupanachicüna̱xãgü rü woo i ngẽma naxchicüna̱xã i máchanexü̃ i chama duü̃xü̃güxü̃ chaxüxẽẽxü̃?
15 Rü ngẽxguma yacuegüã̱xgu i ngẽma paxetaruü̃gü ¿rü pemax rü ípememarexü̃ nax nape̱xegu pecaxã́pü̱xügüxü̃ rü nüxü̃ pecua̱xüü̃güxü̃ i ngẽma naxchicüna̱xã i chama duü̃xü̃güxü̃ chaxüxẽẽxü̃? Erü ngẽxguma taxũtáma nhu̱xmatama nüxü̃ pecua̱xüü̃gügu, rü ngẽma poxcuchicaxü̃ i íya̱u̱xraxü̃gu tá pexü̃ chawocu. ¿Rü ta̱xacürü tupana tá pexü̃ nawa ínanguxü̃xẽxẽ i ngẽma? —nhanagürü.
16 Rü yexguma ga yema tamaepü̱x ga ngextü̱xüxü̃gü rü nanangãxü̃gagü rü nhanagürügü: —Pa Ãẽ̱xgacüx, rü taxuca̱xma tü̱xcüü̃ yigü naxca̱x tachoxü̃gagü i ngẽma.
17 Rü yimá torü Tupana ya nüxü̃ ticua̱xüü̃gücü rü nüxü̃́ natauxcha nax toxü̃ ínanguxü̃xẽẽ̱xü̃ nawa ya yima üxü rü nawa i guxü̃ma i ngẽma poxcu i tomaxã cuxueguxü̃, Pa Ãẽ̱xgacüx.
18 Notürü ngẽxguma chi woo taxũchima toxü̃ nangü̃xẽẽgu rü cumaxã nüxü̃ tixu, Pa Ãẽ̱xgacüx, rü toma rü taxũtáma nüxü̃ ticua̱xüxü̃gü i ngẽma curü tupanagü, rü taxũtáma nape̱xegu tacaxã́pü̱xügü i ngẽma naxchicüna̱xã i úirunaxca̱x —nhanagürügü.
Yema tamaepü̱x ga ngextü̱xüxü̃gü rü tama nixae nawa ga guma üxü ga nawa yawocune
19 Rü yema orexü̃ naxĩnügu ga Nabucudonochó, rü nanadeãchichiwe yerü yema tamaepü̱x ga ngextü̱xüxü̃gümaxã poraãcü nanu. Rü norü duü̃xü̃güxü̃ namu nax 7 e̱xpü̱xcüna naxüxǘxü̃güaxü̃ca̱x ga yema poxcuchicaxü̃ ga íya̱u̱xraxü̃ nax yemaacü nanaixichixü̃ca̱x.
20 Rü nhu̱xũchi norü churaragü ga rüporamaegüxü̃xü̃ namu nax Chadráqui rü Mecháqui rü Abenidéguxü̃ yana̱i̱xgüxü̃ca̱x, rü yemaacü yema poxcuchicaxü̃ ga iya̱u̱xraxü̃wa yawocuãxü̃ca̱x.
21 Rü yema tamaepü̱x ga ngextü̱xüxü̃gü rü yamexchiruãcütama rü nayana̱i̱xgü rü yema poxcuchicaxü̃ ga iya̱u̱xraxü̃gu nanawocu.
22 Rü yema poxcuchicaxü̃ rü poraãcü nanaixichi yerü yemaacü norü duü̃xü̃güxü̃ namu ga ãẽ̱xgacü. Rü yemaca̱x ga yema churaragü ga yema tamaepü̱x ga ngextü̱xügüxü̃xü̃ yéma iwocuxü̃ rü nixae rü nayue.
23 Rü nümagü ga Chadráqui rü Mecháqui rü Abenidégu rü ina̱i̱xgüxü̃ yexma nawocu nagu ga yema poxcuchicaxü̃ ga íya̱u̱xraxü̃.
24 Rü yexguma nüxü̃ nada̱xgux ga nüma ga Nabucudonochó, rü paxa inachi rü poraãcü naba̱i̱xãchiãxẽ. Rü yema norü ucu̱xẽruü̃güna naca rü nhanagürü: —¿Tama ẽ̱xna yima üxüetüwa yawocuxü̃ i tamaepü̱x i yatü i na̱i̱xgüxü̃? —nhanagürü. Rü yema norü ucu̱xẽruü̃gü nanangãxü̃gü rü: —Ngemáacüx, tamaepü̱x nixĩ —nhanagürügü.
25 Rü nhu̱xũchi ga nüma ga ãẽ̱xgacü rü nhanagürü: —Notürü ngẽ́ma nüxü̃ chadau i ãgümücü i yatü ĩwegǘxü̃ i üxüxetügu íxĩĩĩxü̃ rü taxuxü̃ma nüxü̃ ngupetüxü̃. Rü ngẽma norü ãgümücü i yatü rü nanadaxũcüã̱xraxü̃ —nhanagürü.
26 Rü yema nhaxguwena rü nüma ga Nabucudonochó rü yema poxcuchicaxü̃ ga iya̱u̱xraxü̃ca̱x nixũ rü yéma tagaxãcü nhanagürü: —Pa Chadráqui, rü Mecháqui, rü Abenidégu ya Tupana ya Guxãétüwa Ücüarü Duü̃xü̃gü Ixĩgüxü̃x, rü ¡ípechoxü̃ rü nua pexĩ! —nhanagürü. Rü yema tamaepü̱x rü ínachoxü̃ nawa ga guma üxü.
27 Rü guxü̃ma ga yema ãẽ̱xgacügü ga yéma yexmagüxü̃ rü naxca̱x naxĩ ga yema tamaepü̱x ga yatügü. Rü nüxü̃ nadaugü ga taxuwama nax yaxaexü̃ ga naxü̃newa, rü woo ga nayáe rü naxchiru rü tama nax yaxaxü̃ rü bai ga nax nata̱u̱xacaemagüxü̃.
28 Rü yexgumatama ga nüma ga Nabucudonochó rü nhanagürü: —¡Ngĩxã nüxü̃ ticua̱xüxü̃gü ya norü Tupana i Chadráqui rü Mecháqui rü Abenidégu ya núma namucü i ngẽma dauxü̃cüã̱x nax íyapoxü̃ãxü̃ca̱x i norü duü̃xü̃gü i tama ãẽ̱xgacüga ĩnüechaü̃xü̃! Yerü yema tamaepü̱xca̱x rü narümemae nax nayuexü̃ naxü̃pa nax togümare ga tupanaxü̃ yacua̱xüü̃güxü̃.
29 Rü ngẽmaca̱x i nhu̱xmax rü chanaxunagü rü ngexerüüxe ya duü̃xẽ ya nachiga chixri idexáxe ya norü Tupana i nhaa tamaepü̱x i ngextü̱xüxü̃gü rü noxtacüma ãgümücügu tá tüxü̃ tarüchexte, rü tümapata rü tá naachina̱xãgüxica nügüétü nayi. Rü nüétama ega woo ngexnerüxünemare ya ĩanecüã̱x tixĩxgu, rü ngexü̃rüüxü̃ i nachixü̃anecüã̱x tixĩxgu, rü ngexü̃rüüxü̃ i nagawa tidexagux. Erü nataxuma i to i tupana i ngẽmaãcü norü duü̃xü̃güxü̃ ípoxü̃xü̃ —nhanagürü.
30 Rü yemawena ga nüma ga ãẽ̱xgacü rü yexera rümemaexü̃ ga puracü yema tamaepü̱x ga ngextü̱xüxü̃güna naxã ga Babiróniaanewa.
