Daniel 9:1-27
9 —Rü nüma ga Daríu ga Achuéru nane ga Médiaanecüã̱x rü ãẽ̱xgacü nixĩ ga Babiróniaanewa.
2 Rü gumá taunecü ga nagu yangucuchicügu ga Daríu rü chama ga Danié rü nawa íchangu̱x ga yema popera ga orearü uruxü̃ ga Yeremía ümatüxü̃. Rü yema ore ga nawa changúxü̃ rü nüxü̃ nixu nax 70 ya taunecü tá ninge nax chixexü̃wa nangexmaechaxü̃ ya Yerucharéü̃, yerü yemaacü nixĩ ga Cori ya Tupana Yeremíamaxã nüxü̃ yaxuxü̃.
3 Rü yemaca̱x chayumüxẽ rü Cori ya Tupanana chaca nax toxü̃ ínanguxü̃xẽẽ̱xü̃ca̱x naxme̱xwa i torü uanügü rü wena torü naanewa toxü̃ nawoeguxẽẽxü̃ca̱x. Rü yemaacü tama chachibüãcüma chayumüxẽ rü nhoxẽrüü̃mare ixĩxü̃ ga naxchirugu chicu̱x rü tanimucate̱xewa charüto.
4 Rü yema chorü yumüxẽwa rü Tupanamaxã nüxü̃ chixu ga chorü pecádugü rü chautanüxü̃güarü pecádugü rü nhachagürü: “Pa Cori Pa Tupanax, cuma rü guxãétüwa cungexma rü cuporaxüchi rü guxü̃guma cuyanguxẽxẽ i curü unetagü. Rü ngẽmawa tüxü̃ cunawe̱x nax tüxü̃ cungechaü̃xü̃ ya yíxema aixcuma cuga ĩnüexe rü nagu maxẽxe i curü mugü.
5 Rü toma rü poraãcü pecádu cupe̱xewa taxüe rü chixexü̃ taxüe. Rü tamaxẽmare rü tama cugu tarüxĩnüe. Rü nüxü̃ tarüxoe i curü mugü rü curü ucu̱xẽgü.
6 Rü gumá curü orearü uruü̃gü ga nawa quidexacü namaxã ga torü ãẽ̱xgacügü rü torü o̱xigü, rü guxü̃ma i tomax i Iraéutanüxü̃gü, rü tama naga taxĩnüechaü̃ ga yexguma tomaxã nüxü̃ yaxugüegu ga curü ore.
7 Rü cumax, Pa Cori Pa Tupanax, rü aixcumacü quixĩ. Rü ngẽmaca̱x poraãcü cupe̱xewa taxãnee i toma i Yerucharéü̃cüã̱xgü, rü ngẽma togü i totanüxü̃ i Iraéutanüxü̃gü i ngaicamawa rü yáxü̃wa to i nachixü̃anegu cuwoonexü̃ nagagu nax tama cuga naxĩnüexü̃.
8 Rü nhu̱xmax i tomax, Pa Cori Pa Tupanax, rü naxrüü̃tama i ngẽma torü ãẽ̱xgacügü rü torü o̱xigü rü taxãnee erü cupe̱xewa chixexü̃ taxügü.
9 Notürü i cumax, Pa Torü Tupanax, rü woetama cucüma nixĩ nax cumecümaxü̃ rü toxü̃́ nüxü̃ curüngümaxü̃ i torü chixexü̃. Rü ngẽmaca̱x cupe̱xewa tangugü erü toma rü poraãcü chixexü̃ taxü.
10 Rü tama cuga taxĩnüe rü nüxü̃ tacugüe ga curü mugü ga curü duü̃xü̃gü ga orearü uruü̃güwa tomaxã nüxü̃ quixuxü̃.
11 Rü guxü̃ma i chautanüxü̃ i Iraéutanüxü̃gü rü tama naga naxĩnüe i curü mugü. Rü cuxna nixĩgachi rü tama naga naxĩnüe i curü ucu̱xẽgü. Rü yemaca̱x ga yema poxcu ga curü duü̃ ga Moichéwa nüxü̃ quixuxü̃ rü togu nangu.
12 Rü yema nax toxca̱x núma cunamuxü̃ ga yema taxü̃ ga guxchaxü̃ rü yemamaxã cuyanguxẽxẽ ga yema poxcu ga tomaxã rü torü ãẽ̱xgacügümaxã cuxueguxü̃, yerü yema poxcu ga Yerucharéü̃na cunguxẽẽxü̃, rü taguma yemaacü cunapoxcu ga to ga ĩane.
13 Rü guxü̃ma ga yema chixexü̃ rü toxna nangu yematama Moiché ümatüxü̃ ga mugüwa nüxü̃ ixuxü̃rüxü̃. Notürü ga toma rü tama cuxca̱x tadaugü, Pa Cori Pa Torü Tupanax. Rü tama nüxü̃ tarüxoe ga yema torü chixexü̃gü, rü tama nagu tamaxẽ ga curü ore i aixcuma ixĩxü̃.
14 Rü yemaca̱x, Pa Cori Pa Tupanax, rü toxca̱x ícunanguxẽxẽ ga yema taxü̃ ga guxchaxü̃ ga cumatama tomaxã cuxueguxü̃. Erü cuma rü aixcuma cuyanguxẽxẽ i ngẽma nüxü̃ quixuxü̃. Notürü i toma rü tama cuxü̃́ itarüxĩnüechaü̃.
15 Notürü ga cumax, Pa Cori Pa Torü Tupanax, rü nũxcüma icunawe̱x ga yema taxü̃ ga curü pora ga yexguma Eyítuanewa ícunguxü̃xẽẽgu ga curü duü̃xü̃gü. Rü yemaacü cugü cutachigaxẽxẽ nhu̱xmata nhama i ngunexü̃wa nangu. Notürü ga toma rü poraãcü cupe̱xewa chixexü̃ taxü.
16 Pa Cori Pa Tupanax, nüxü̃ tacua̱x rü cuma rü cumecümaxü̃chi. Rü ngẽmaca̱x cuxna taca nax namaxã icurüngüxmüxü̃ca̱x ya yima ĩane ya Yerucharéü̃cüã̱xgü. Erü yima ĩane rü cuxrü nixĩ, rü ngẽ́ma nangexma ya curü ma̱xpǘne ya üünene. Rü nhu̱xmax rü guxü̃ma i ngẽma togü i nachixü̃anecüã̱xgü i duü̃xü̃gü rü nüxü̃ nacugüe i ngẽma curü duü̃xü̃gü rü yima Yerucharéü̃ nagagu i ngẽma chixexü̃gü i toma taxügüxü̃ rü torü o̱xigü ügüxü̃.
17 Pa Torü Tupanax ¡rü chamax nax curü duü̃xü̃ chixĩxü̃, rü nüxü̃ naxĩnü i chorü yumüxẽ i nawa cuxü̃ chaca̱a̱xü̃xü̃! ¡Rü cuégagagu nüxü̃ nangechaü̃ãcüma nüxü̃ nadau nax nhuxãcü wüxi i taxü̃ i ngechaü̃ yixĩxü̃ nax nachixexü̃ ya yima cupata!
18 Pa Chorü Tupanax ¡toxü̃́ nayaxu rü choxü̃́ nüxü̃ naxĩnü i nhaa chorü yumüxẽ erü curü duü̃xü̃ chixĩ! ¡Rü mea nangugü i ngẽma torü guxchaxü̃gü rü ngẽma norü chixexü̃ ya yima ĩane ya Yerucharéü̃ ya cuxrü ixĩxü̃ne! Rü tama ta̱xacürü mexü̃ i cupe̱xewa taxüxü̃gagu nixĩ i cuxü̃ taca̱xaxü̃xü̃, notürü cuxna taca erü cuma rü cuxü̃́ nangexma i taxü̃ma i curü ngechaü̃ i toxca̱x.
19 Pa Corix ¡rü toxü̃ naxĩnü rü toxü̃́ nüxü̃ irüngüma i torü chixexü̃ rü toxü̃ rüngü̃xẽxẽ! ¡Rü paxa toxü̃ nangãxü̃, Pa Corix! Erü cuxrütama ngúchaü̃ nixĩ i ngẽma rü cuma rü nüxü̃ cungechaü̃ ya yima curü ĩane ya Yerucharéü̃ rü ngẽma curü duü̃xü̃gü”, nhachagürü.
Tupana namaxã nüxü̃ nixu ga yema 70 ga yüxügüchiga
20 Rü chama rü íchayadaxẽxẽ ga nax chayumüxẽxü̃ rü Tupanamaxã nüxü̃ chixuxü̃ ga chorü chixexü̃gü rü chautanüxü̃ ya Iraéutanüxü̃güarü chixexü̃gü. Rü Cori ya Tupanaxü̃ chaca̱a̱xü̃ naxca̱x ya yima norü ĩane ya Yerucharéü̃ ya norü ma̱xpǘne ya üünenewa ngexmane.
21 Rü yexguma íchayumüxẽyane rü cha̱u̱xca̱x nango̱x ga Tupanaarü orearü ngeruxü̃ ya dauxü̃cüã̱x ga Gábi ga ü̃pa cha̱u̱xca̱x ngócü ga yexguma Tupana ta̱xacüxü̃ choxü̃ nadauxẽẽgu. Rü yagoeãcüma yema íchayexmaxü̃wa nangu. Rü yema ora ga yáuanecü nagu Tupanaca̱x chayaguxchaü̃xü̃ ga ãmaregügu nixĩ ga chauxü̃tawa nanguxü̃.
22 Rü nhanagürü choxü̃: “Pa Daniéx, nua chaxũ i nhu̱xmax nax cuxü̃ nuxü̃ chayacua̱xẽẽxü̃ca̱x ga yema Tupana nagu rüxĩnüxü̃.
23 Rü yexguma noxritama icunaxügügu ga nax cuyumüxẽxü̃ rü Tupana rü marü cuxü̃ nangãxü̃. Rü ngẽmaca̱x i chamax rü nua chaxũ nax cumaxã nüxü̃ chayarüxuxü̃ca̱x nax marü cuxü̃ nangãxü̃xü̃, erü nüma ya Tupana rü poraãcü cuxü̃ nangechaü̃. Rü nhu̱xmax rü ¡mea irüxĩnü i ngẽma tá cumaxã nüxü̃ chixuxü̃ nachiga ga yema nüxü̃ cudauxü̃ ga yexguma ta̱xacü ga ẽxü̃guxü̃ cuxü̃ nadauxẽẽgu!
24 Rü 70 i yüxügü ngupetüguwena rü yima curü ĩane ya Yerucharéü̃ rü ngẽma curü duü̃xü̃gü i Iraéutanüxü̃gü rü düxwa tá Tupanaga naxĩnüe, rü Tupana tá nüxü̃́ inanaxoxẽxẽ i ngẽma norü chixexü̃gü, rü tá nüxü̃́ nüxü̃ inarüngüma i ngẽma norü chixexü̃ ga noxri naxügüxü̃. Rü tá ningucuchi ya yimá Üünecü ya aixcuma mecü nax guxü̃guma norü duü̃xü̃gümaxã meama inacuáxü̃ca̱x rü ngẽmaãcü yanguxü̃ ga yema Tupana cuxü̃ dauxẽẽxü̃” —nhanagürü choxü̃.
25 --
26 --
27 --
