Eclesiastes 2:1-26
2 “Rü chaugümaxã nhachagürü: ‘Nhu̱xma rü tá nüxü̃ chaxü i ngẽma duü̃xü̃gü nagu maxẽxü̃ rü namaxã nataãxẽgüxü̃, rü chaugüxü̃́ tá chanadetaque̱xe i muxü̃ma i ngẽmaxü̃gü.’ Notürü woo i ngẽma ĩnü rü notüca̱xmamare nixĩ.
2 Rü ngẽmawa nüxü̃ chacua̱x i ngẽma cugü rü wüxi i notüca̱xmamare yixĩxü̃, rü ngẽma chaxunearü ngúchaü̃gü rü taxuwama namexü̃.
3 Rü chauãxẽwa nagu charüxĩnü rü tá nüxü̃ chaxü ya yimá wíũ ya ngúchiacüarü pora. Rü namaxã chaugü changãxẽxẽ nax ngẽmaãcü nüxü̃ chacuáxü̃ca̱x rü name nax ngẽma naxüxü̃ ya yatü nagu i ngẽma ngunexü̃gü i nhama i naanewa nax namaxü̱̃xü̃.
4 Rü taxü̃ ga puracü chaxü. Rü íchanaxüxü̃ ga ãẽ̱xgacüpata ga taxüchine rü mexechine. Rü choxrütama úwanecü choxü̃́ nayexma.
5 Rü chama ichanato ga nanetügü rü chorü putüranecügü. Rü yexma chanatogü ga naguxü̃raxü̃xü̃ i nanetü i ori̱xnaxca̱x.
6 Rü puchu íchaxüxü̃xẽxẽ nax yema dexámaxã yamegüxü̃ca̱x ga yema nanetügü ga chatogüxẽẽxü̃.
7 Rü duü̃xü̃gü ga puracütanüxü̃ruxü̃ ga yatüxü̃ rü ngexü̃ rü naxca̱x chataxe. Rü choxü̃́ nayexma ta ga togü ga chorü duü̃xü̃gü ga chauchiü̃gutama buexü̃. Rü yexgumarüxü̃ ta rü yema Yerucharéü̃wa nüxíra ãẽ̱xgacü ixĩgüxü̃arü yexera choxü̃́ nayexma ga wocagü rü carnérugü.
8 Rü choxü̃́ nayexma ga muxü̃ma ga úiru rü diẽrumü ga togü ga nachixü̃anegüarü ãẽ̱xgacügüxü̃tawa rü chorü ĩanegüwa chayaxuxü̃. Rü choxü̃́ nayexma ga duü̃xü̃gü ga iyatüxü̃ rü ngexü̃ ga cha̱u̱xca̱x wiyaegüxü̃. Rü chorü ngúchaü̃ chaxü rü choxü̃́ nayexma ga ngexü̃gü ga namaxã chamaxmarexü̃.
9 Rü yemaacü nata ga chauchiga. Rü guxü̃ma ga yema nüxíra Yerucharéü̃wa ãẽ̱xgacü ixĩgüxü̃arü yexera choxü̃́ nayexma. Rü woo yemaacü nixĩ notürü taguma choxna nixũgachi ga cua̱x.
10 Rü guxü̃ma ga yema choxü̃́ ngúchaü̃xü̃ rü chanaxü. Rü taguma chaugüna chanachu̱xu ga ta̱xacürü taãxẽ. Rü guxü̃ma ga chorü puracümaxã chataãxẽ. Rü yema taãxẽ nixĩ ga chorü natanü ga yema chaxüxü̃.
11 Rü yemawena rü chanangugü ga guxü̃ma ga yema chaxüxü̃ rü yema puracü ga guxchaxãcü chaxüxü̃. Rü yemawa nüxü̃ chacua̱x ga notüca̱xmamare nax yixĩxü̃ ga yema rü nhama buanecü ya ya̱u̱xemachaü̃cürüü̃mare nixĩ. Rü taxuxü̃ma i ta̱xacü i mexü̃ yixĩxü̃ i ngẽma nhama i naanewa ngẽxmaxü̃.
12 Rü yemawena rü meama nagu charüxĩnü rü nügümaxã chanangu i ngẽma cua̱x rü ngẽma notüca̱xmamare ixĩxü̃. ¿Rü ta̱xacü i to i puracü tá naxü i ngẽma chawena ãẽ̱xgacü ixĩxü̃? ¿Rü ẽ̱xna ngẽma marü üxü̃tátama chawena naxüxü̃?
13 Rü nhu̱xmax rü nüxü̃ chacua̱x rü ngẽma taãxẽxü̃ nax icuáxü̃ rü nüxü̃ narümemae i ngẽma nax taechitamare imaxü̃xü̃, ngẽxgumarüxü̃ i ngẽma ngóonexü̃ rü ngẽma ẽanexü̃xü̃ nax namemaexü̃rüxü̃.
14 Rü ngẽma duü̃xü̃ i naãxẽxü̃ cuáxü̃ rü mea nanangugü ega ta̱xacü naxü̱xgu, notürü ngẽma naechitamare maxü̃xü̃ rü tama aixcuma mea nagu naxĩnüãcüma ta̱xacü naxü. Notürü chanangugü i ngẽma naãxẽxü̃ cuáxü̃ rü ngẽma naechitamare maxü̃xü̃ rü ngẽmatátama nixĩ i norü gu̱x.
15 Rü chaugümaxã nhachagürü: ‘Ngẽma naechitamare maxü̃xü̃rüü̃tátama chayu i chamax. ¿Rü ta̱xacüwa choxü̃́ namexü̃ i guxü̃ma i ngẽma chorü cua̱x? Rü ngẽma rü ta rü notüca̱xmamare nixĩ.
16 Erü tagutáma texé nüxna tacua̱xãchi i ngẽma duü̃xü̃ i cua̱x nüxü̃́ ngẽxmaxü̃ rü ngẽma duü̃xü̃ i naechitamare maxü̃xü̃. Rü ngẽxguma nangupetü̱xgu i ngunexü̃gü rü guxü̃xü̃ tarüngüma, rü ngẽma nüxü̃ cuáxü̃ rü ngẽma naechitamare maxẽxü̃ rü ta nayue.’
17 --
18 --
19 --
20 Rü ngẽxguma nüxna chacua̱xãchigu ga yema chaxüxü̃ ga nhama ga naanewa, rü chaugümaxã chixauxãchi nax yemaacü poraãcü chapuracüxü̃.
21 Erü ngẽxguma texé ya nüxü̃ cuáxe rü taxuãẽãcüma mea puracüxe nax tangemaxü̃ã́xü̃ca̱x rü notüca̱xmamare tapuracü, erü guxü̃ma i ngẽma tayaxuxü̃ i tümaarü puracüwa rü togü i tama naxca̱x ixõṍxẽxü̃arü tá nixĩ. Rü ngẽmaãcü i tümaarü puracü rü notüca̱xmamare nixĩ erü tümaarü ngẽmaxü̃gü rü togüarü tá nixĩ.
22 ¿Rü ta̱xacüwa nüxü̃́ namexü̃ ya yatü nax poraãcü napuracüxü̃ rü naxca̱x naxoegaãẽxü̃ i nhama i naanewa?
23 Rü guxü̃guma i nhama i naanewa nax namaxü̱̃xü̃ rü ngúxü̃ ninge, rü nachixeãxẽ. Chütacü rü taguma narüngü̃ i naãxẽ. Ngẽma rü ta wüxi i ĩnü i notüca̱xmamare ixĩxü̃ nixĩ.
24 Rü ngẽma rümemaexü̃ nüxü̃́ ya yimá yatü nixĩ nax nachibüxü̃ rü naxaxexü̃ rü nangṍõxü̃ i ngẽma norü puracütanü. Erü guxü̃ma i ngẽma rü ta Tupanawa ne naxũ.
25 ¿Rü texé ẽ̱xna tachibü rü ẽ̱xna tataãxẽ ega taxũchima Tupanagagu yixĩxgu?
26 Rü aixcuma nixĩ i Tupana tümaãẽxü̃ tüxü̃ cua̱xẽẽxü̃ rü tüxna naxããxü̃ i cua̱x rü taãxẽ ya yíxema tümamaxã nataãxẽxẽ. Notürü yíxema chixexü̃arü üruxü̃ ixĩxe, rü nüma ya Tupana rü tüxü̃ nayixerü nax tügü tamuarü ngẽmaxü̃güã̱xẽẽxü̃, notürü yixcüama ya Tupana rü tüxna nanade i tümaarü ngẽmaxü̃gü nax yíxema tümamaxã nataãxẽxẽna naxããxü̃ca̱x. Rü yíxema chixexü̃ ǘxe rü guxü̃ma i ngẽma tayaxuxü̃ rü notüca̱xmamare nixĩ erü tümaarü ngẽmaxü̃gü rü nhama buanecü ya yauxemachaü̃cürüxü̃ nixĩ.”
