Esdras 1:1-11
1 Rü gumá taunecü ga nagu ãẽ̱xgacü yangucuchicü ga Chíru ga Pérchiaanecüã̱xarü ãẽ̱xgacü, rü Cori ya Tupana nayanguxẽxẽ ga norü ore ga noxri Yeremíaa̱xwa nüxü̃ yaxuxü̃. Rü yemaca̱x ga nüma ga Tupana rü ãẽ̱xgacü ga Chíruãẽwa ínananguxẽxẽ nax guxü̃ ga nachixü̃anegü ga nüma namaxã inacuáxü̃maxã naxunagüaxü̃ca̱x ga nhaa ore ga ümatüxü̃ ga nhaxü̃:
2 “Rü chama i Chíru i Pérchiaanecüã̱xarü ãẽ̱xgacü rü chanaxunagü i nhaa ore. Rü nüma ya dauxü̃cüã̱x ya Cori ya Tupana rü marü cha̱xme̱xwa nanangexmagüxẽxẽ i guxü̃ma i nachixü̃anegü i nhama i naanewa ngẽxmagüxü̃. Rü choxü̃ namu nax naxca̱x chanaxüxü̃ca̱x ya wüxi ya napata nawa ya yima ĩane ya Yerucharéü̃ i Yudáanewa ngexmane.
3 Rü ngẽmaca̱x i guxãma i pema ya Yudáanecüã̱xgü ixĩgüxe, rü name nixĩ nax Yerucharéü̃ca̱x pewoeguxü̃ nax wena penaxügüxü̃ca̱x ya napata ya yimá perü Tupana. ¡Rü nüma pexü̃ nangü̃xẽxẽ nawa i ngẽma puracü!
4 Rü yíxema petanüxü̃gü ya tama woeguchaü̃xe, rü name nixĩ i naxchirumaxã, rü tümawexü̃maxã, rü õnamaxã nüxü̃ tarüngü̃xẽẽ i ngẽma woeguxü̃. Rü naétü rü name nixĩ i nüxna tanaxã i tümaarü ãmare naxca̱x ya Tupanapata ya Yerucharéü̃wa wena tá naxügüne”, nhanagürü ga ãẽ̱xgacü ga Chíru.
Yudáanecüã̱xgü rü wena Yerucharéü̃ca̱x nawoegu
5 Rü nüma ya Tupana rü yema Yudátanüxü̃arü rü Bẽyamítanüxü̃arü ãẽ̱xgacügüãẽwa rü chacherdótegüãẽwa nananguxẽxẽ ga wüxi ga ngúchaü̃ nax Yerucharéü̃ca̱x nawoeguxü̃ca̱x nax wena naxügüãxü̃ca̱x ga Tupanapata.
6 Rü yema Yudáanecüã̱xgü ga tama Yerucharéü̃ca̱x woeguchaü̃xü̃, rü yema woeguxü̃xü̃ narüngü̃xẽẽgü diẽrumaxã, rü úirumaxã, rü wocagümaxã rü norü yemaxü̃gü ga tatanüxü̃maxã. Rü naétü nüxna nanaxãgü ga ãmaregü Tupanapataca̱x.
7 Rü nümatama ga ãẽ̱xgacü ga Chíru rü nanawoeguxẽxẽ ga yema cópugü ga úirunaxca̱x rü guxü̃ma ga togüamachigü ga Tupanapataarü yemaxü̃gü ga ãẽ̱xgacü ga Nabucudonochó Yerucharéü̃wa naxü̃ rü norü tupanapatagu yanuxü̃.
8 Rü nüma ga Chíru ga Pérchiaanecüã̱xarü ãẽ̱xgacü rü norü diẽruarü daruxü̃ ga Mitradáchixü̃ namu nax Yudáanecüã̱xarü ãẽ̱xgacü ga Chebachárana nanaãxü̃ca̱x ga yema Tupanapataarü yemaxü̃gü.
9 --
10 --
11 Rü yema Tupanapataarü yemaxü̃gü ga úirunaxca̱x rü diẽrumünaxca̱x rü 5,400 nixĩ ga norü mu. Rü guxü̃ma ga yema yemaxü̃gü rü Chebachára nayana ga yexguma Babiróniaanewa natáegu̱xgu namaxã ga yema duü̃xü̃gü ga Yerucharéü̃ca̱x woeguxü̃.
