Esdras 3:1-13
3 Rü yexguma 7 ga tauemacüwa nanguxgu nax Babiróniaanewa ne naxĩxü̃ rü nüma ga Iraéutanüxü̃gü ga norü ĩanewachigü ngugüxü̃ rü Yerucharéü̃wa naxĩ nax yéma yangutaque̱xegüxü̃ca̱x.
2 Rü yemaca̱x ga Yuchué ga Yochadáchi nane rü namücügü ga chacherdótegümaxã rü Chorobabé ga Charatié nane rü natanüxü̃gümaxã wenaxarü nanaxügü ga Tupanaarü ãmarearü guchicaxü̃ nax yéma ínaguaxü̃ca̱x ga Tupanaarü ãmaregü, yema mugü ga Moiché ümatüxü̃ nüxü̃ ixuxü̃rüxü̃.
3 Rü yema Tupanaarü ãmarearü guchicaxü̃ rü nüxíraxü̃xü̃ ga nachicagutama nanaxügü rü meama natai. Rü yema nax naxca̱x namuü̃exü̃ ga yema duü̃xü̃gü ga yema naanewa yexmagüxü̃, rü yemaca̱x guxü̃guma ga pa̱xmama rü yáuanecü rü Cori ya Tupanaca̱x ínanagugüxü̃ ga norü ãmaregü.
4 Rü yema Moiché ümatüxü̃ ga mugü nüxü̃ ixuxü̃rüxü̃ rü nanaxüchigagüxü̃ ga yema naixatümaxã nügü nax yaxüpataxü̃. Rü guxü̃ma ga ngunexü̃gu rü ínanaguuxü̃ ga ãmaregü aixrügumarüü̃tama yema Moiché ümatüxü̃ ga mugü nüxü̃ ixuxü̃rüxü̃.
5 Rü yexgumarüxü̃ ta ínanagu ga ãmaregü ga ngü̃xchigaarü ngunexü̃gu íguxü̃, rü yema ãmaregü ga yexwaca ixücucü ga tauemacügu íguxü̃, rü yema ãmaregü ga togü ga petagu Tupanaca̱x íguxü̃. Rü yexgumarüxü̃ ta ínanagu ga yema ãmaregü ga texé tümaarü ngúchaü̃maxã Tupanaca̱x ixãmaregüxü̃.
6 Rü yema nax Tupanaca̱x ínaguaxü̃ ga ãmaregü, rü inanaxügüe meama 7 ga tauemacüarü ügügu naxü̃pa nax inachixẽẽgüaxü̃ ga yema naxtapü̱x ga guma Tupanapata.
7 Rü nhu̱xũchi naxca̱x nadaugü ga ĩpataarü üruü̃gü ga nutaarü nhaxcuruü̃gü rü corapínagü, rü diẽrumaxã nüxü̃́ nanaxütanü. Rü Líbanuanewa ga Tíruwa rü Chidáũwa naxca̱x nataxegü ga mürapewa ga ocayiwagü. Rü yema mürapewa rü õnamaxã, rü wíũmaxã, rü oríwaarü chíxü̃maxã nanaxütanügü. Rü yema mürapewagü rü Líbanuanewa nixĩ ga ne nanaãxü̃. Rü márpechinügu nayana nhu̱xmata Yópearü türewa nangugü, yerü yemaacü nixĩ ga nüxna naxãgaxü̃ ga Pérchiaanecüã̱xarü ãẽ̱xgacü ga Chíru.
Inanaxügüe ga wena nax naxügüãxü̃ ga Tupanapata
8 Rü nüma ga Chorobabé ga Charatié nane rü Yuchué ga Yochadáchi nane rü nüma ga chacherdótegü rü Lewítanüxü̃gü rü guxü̃ma ga yema Iraéutanüxü̃gü ga wenaxarü Yerucharéü̃ca̱x woeguxü̃ rü inanaxügüe ga yema puracü nax wena namexẽẽgüaxü̃ ga Tupanapata. Rü yema puracü rü inaxügü ga yexguma marü taxre ga taunecü ínguxgu rü naétü taxre ga tauemacü yixĩxgu ga Yerucharéü̃wa nax nayexmagüxü̃. Rü yema puracümaxã inacua̱xgü ga yema Lewítanüxü̃ ga 20 ga taunecüarü yexera nüxü̃́ yexmagüxü̃.
9 Rü nüma ga Yuchué rü nanegü rü naeneegü rü nügü nade, rü wüxitücumü nügümaxã naxü namaxã ga Camierí rü nanegü ga Yudátaagü ixĩgüxü̃. Rü yexgumarüxü̃ ta nügütanüwa nanaxügüxẽxẽ ga Enadáchi nanegü rü naeneegü rü natanüxü̃gü ga Lewítaagü ixĩgüxü̃. Rü nümagü nixĩ ga namaxã inacuáxü̃ ga yema Tupanapataarü mexẽẽruü̃gü.
10 Rü yexguma yema Tupanapataarü mexẽẽruü̃gü nanucuxgu ga nüxíraxü̃cü ga nutagü ga natapü̱xparagü nawa rütogüne, rü nüma gachacherdótegü rü mea nügü nanga̱xãẽãcüma yexma nachigü rü nayacue ga norü cornétagü. Rü yema Lewítanüxü̃ ga Achátaagü rü yéma nanana ga norü paxetaruü̃gü ga namaxã Tupanaxü̃ yacua̱xüü̃güxü̃, yema ãẽ̱xgacü ga Dawí unagüxü̃rüxü̃.
11 Rü nhuxre ga nümagü rü nawiyaegü rü Tupanaxü̃ nicua̱xüxü̃gü. Rü yema togü rü nanangãxü̃gü rü nhanagürügü: —¡Nüxna moxẽ pexã ya Cori ya Tupana erü nüma rü tamaxã namecüma rü ngẽma norü ngechaü̃ i taxca̱x rü taguma nagu̱x! —nhanagürügü. Rü guxü̃ma ga duü̃xü̃gü rü nataãxẽgü, rü tagaãcü Cori ya Tupanaxü̃ nicua̱xüxü̃gü, yerü marü inaxügü ga nax wena namexẽẽxü̃ ga Cori ya Tupanapata.
12 Rü muxü̃ma ga yema chacherdótegü rü Lewítanüxü̃ rü ãẽ̱xgacügü ga iyaxü̃ ga marü nüxü̃ daugüxü̃ ga guma nüxíraxü̃ne ga Tupanapata, rü yemagü rü tagaãcü naxauxe, yerü nüxü̃ nadaugü ga wena nax inaxügüxü̃ ga guma yexwaca̱xü̃ne ga Tupanapata. Rü yexgumarüxü̃ ta ga togü rü norü taãxẽmaxã tagaãcü aita naxügü.
13 Rü yemaacü taxúema nüxü̃ tacua̱x rü nataãxẽgü rüe̱xna nangechaü̃gü yerü yema auxexü̃ rü yema taãxẽgüxü̃ rü wüxigu aita naxüe rü yáxü̃guma nüxü̃ naxĩnüe.
