Esdras 5:1-17
5 Rü nüma ga Tupanaarü orearü uruü̃gü ga Ayéu rü Yacaría ga Ídu nane, rü yema Yudéugü (ga Iraéutanüxü̃gü) ga Yudáanecüã̱xmaxã, rü Yerucharéü̃cüã̱xmaxã nüxü̃ nayarüxugüe ga yema ore ga Cori ya Tupana namaxã nüxü̃ ixuxü̃.
2 Rü yexguma ga Chorobabé ga Charatié nane rü Yuchué ga Yochadáchi nane rü wenaxarü inanaxügüe ga nax nawa napuracüexü̃ ga Tupanapataarü mexẽxẽ ga Yerucharéü̃wa. Rü nüma ga Tupanaarü orearü uruü̃gü rü ta nüxü̃ narüngü̃xẽẽgü.
3 5:3-4 Notürü nüma ga Tanái ga taxtü ga Eufrátearü oéstewaamaarü ãẽ̱xgacü, rü nüma ga Chetáru-Bonái rü namücügü, rü Yerucharéü̃wa naxĩ rü Yudéugüna nayacagü rü nhanagürügü: —¿Texé pexü̃ tamu nax wena penamexẽẽxü̃ ya daa Tupanapata rü nax peyamexẽẽgüxü̃ i norü poxeguxü̃ ya daa ĩane? —nhanagürügü. Rü nhu̱xũchi naxca̱x ínaca ga tümaéga ga guxema Tupanapataarü mexẽẽwa puracüexe.
4 Nüü̃ nadau 5:3
5 Notürü nüma ga Tupana rü nüxna nadau ga yema Yudéugü ga yema puracümaxã icua̱xgüxü̃. Rü yemaacü nataxuma ga texé nüxna nachu̱xuxü̃ nax napuracüeamaxü̃ca̱x. Rü yoxni ga yema Yudéugüarü uanügü rü Pérchiaanecüã̱xarü ãẽ̱xgacü ga Daríuca̱x nanaxümatü ga wüxi ga popera nax nüma namexẽẽãxü̃ca̱x ga yema guxchaxü̃.
6 Rü yema popera ga Daríuxü̃tawa namugüxü̃ ga Tanái, rü Chetáru-Bonái rü norü ngü̃xẽẽruü̃gü ga ãẽ̱xgacügü rü nhanagürügü:
7 “Pa Ãẽ̱xgacüx, Pa Daríux, rü cuxü̃ tarümoxẽgü.
8 Rü cumaxã nüxü̃ tixu nax Yudáanewa ítayadauxü̃ ya napata ya yimá Yudéugüarü Tupana ya guxãétüwa ngẽxmacü. Rü yima rü ínanamexẽẽgü nuta ya itaxüchicümaxã. Rü ngẽma natapü̱x rü meama mürapewamaxã natüchiã. Rü ngẽma puracü rü naxca̱x napaxaãẽgü rü ngẽmaca̱x paxama inixũ.
9 Rü yema Yudéugü ga yema puracümaxã icua̱xgüxü̃na taca nax texé tixĩxü̃ ga namuxe nax wena namexẽẽgüaxü̃ca̱x ya yima Tupanapata, rü mürapewamaxã nax napexgüãxü̃ i nachiãwaama.
10 Rü naxca̱x ítacagü ta ga naégagü ga yema puracümaxã icua̱xgüxü̃ rü tayawügüéga nax ngẽmaãcü cumaxã nüxü̃ tixuxü̃ca̱x, Pa Ãẽ̱xgacüx.
11 Rü nüma rü toxü̃ nangãxü̃gü rü nhanagürügü: ‘Toma rü yimá Tupana ya dauxü̃guxü̃ i naanearü üruxü̃ rü nhama i naanearü üruü̃arü duü̃xü̃gü tixĩgü. Rü ítanamexẽxẽ ya daa napata ga nũxcümaxü̃chima ga torü o̱xigüarü ãẽ̱xgacü ga Charumáu üxü̃ne’, nhanagürügü.
12 Rü nüxü̃ nixugügü ta rü nhanagürügü: ‘Rü torü o̱xigü rü Tupana ya dauxü̃cüã̱xü̃ nanuxẽẽgü rü yemaca̱x nüma ga Tupana rü ãẽ̱xgacü ga Nabucudonochóme̱xẽgu nanayixẽxẽ. Rü nüma ga Nabucudonochó rü nagu napogü ga guma Tupanapata, rü yema duü̃xü̃gü rü ínanayauxü̃ rü Babiróniaanewa nanagagü’, nhanagürügü.
13 Rü nüma i Yudéugü rü nüxü̃ nixugüe rü gumá nüxíraxü̃cü ga taunecü ga nagu Babiróniaanearü ãẽ̱xgacü yixĩcü ga Chíru, rü nüma ga gumá ãẽ̱xgacü rü nanaxunagü nax guma Tupanapata rü tá wena namexẽẽgüaxü̃.
14 Rü yexgumarüxü̃ ta nüxü̃ nixugüe rü nüma ga ãẽ̱xgacü ga Chíru rü marü nanawoeguxẽxẽ ga yema Tupanapataarü yemaxü̃gü ga úirunaxca̱x rü diẽrumünaxca̱x ga Nabucudonochó Yerucharéü̃wa dexü̃ rü Babiróniaanewa yexmane ga norü tupanapatagu yanuxü̃. Rü nüxü̃ nixugüe ta rü yema Tupanapataarü yemaxü̃gü rü ãẽ̱xgacü ga Chíru rü wüxi ga yatü ga Chebacháragu ãégaxü̃na nanana. Rü nüma ga Chebachára nixĩ ga Chíru nüxü̃ unetaxü̃ nax Yudáanecüã̱xarü ãẽ̱xgacü yixĩxü̃ca̱x.
15 Rü nüma ga ãẽ̱xgacü ga Chíru rü gumá Chebacháraxü̃ namu nax yima Yerucharéü̃wa ngexmane ya Tupanapatawa nanaãxü̃ca̱x ga yema yemaxü̃gü. Rü nhu̱xũchi nanamu nax wena namexẽẽgüaxü̃ca̱x ga Tupanapata ga noxritama ínaxüxü̃wa.
16 Rü yemawena ga nüma ga Chebachára rü Yerucharéü̃wa naxũ, rü nananucu ga guma nutagü ya natapü̱xparagü nawa rütogüne ya yima Tupanapata. Rü ga duü̃xü̃gü rü yexgumaü̃cüxü rü inanaxügüe ga nawa nax napuracuexü̃, notürü taxũta ningu.
17 Rü ngẽmaca̱x i nhu̱xmax, Pa Ãẽ̱xgacüx, rü cuxna naxca̱x taca nax naxca̱x cudauxü̃ i Babiróniaanearü poperatanügu nax nüxü̃ cucuáxü̃ca̱x ngoxi aixcuma yixĩxü̃ nax ãẽ̱xgacü ga Chíru naxunagüxü̃ nax wena naxügüãxü̃ca̱x ya yima Tupanapata i Yerucharéü̃wa. Rü nhu̱xũchi cuxna naxca̱x taca nax tomaxã nüxü̃ quixuxü̃ca̱x rü ta̱xacü yixĩxü̃ i nagu curüxĩnüxü̃ i cuma i ngẽmachiga”, nhanagürügü ga norü poperawa.
