Esdras 6:1-22
6 Rü yexguma ga nüma ga ãẽ̱xgacü ga Daríu rü norü duü̃xü̃güxü̃ namu ga naxca̱x nax nadaugüxü̃ca̱x ga yema mugüpane ga Chíru ümatüxü̃ natanügu ga nũxcümaü̃xü̃ ga poperagü ga Babiróniaanewa yexmagüxü̃.
2 Rü yema popera ga nagu naxümatüxü̃ ga yema Chíruarü mugü rü nüxü̃ inayangaugü nagu ga guma ãẽ̱xgacüpata ga ĩane ga Ebatánawa yexmane ga Médiaanewa.
3 Rü yema mu ga yema poperagu ümatüxü̃ rü nhanagürü: “Gumá nüxíraxü̃cü ga taunecü nagu ãẽ̱xgacü yixĩcü ga Chíru rü nhaxü̃ ga mu naxunagü: ‘Rü guma Tupanapata ga Yerucharéü̃wa yexmane ga Yudéugü norü ãmare ga naxü̃na nawa ígugüxü̃ne, rü tanaxwa̱xe i wena namexẽxẽ, rü yima naparagü rü mea inapugü. Rü ngẽma norü máchane rü 27 i métruarü ngãxü̃ tá nixĩ, rü ngẽma norü tachiü̃ rü 27 i métruarü ngãxü̃ tá nixĩ.
4 Rü natapü̱xarü ügü rü tamaepü̱xchimüxü̃ ya nutagü ya itacü tá nixĩ. Rü yimaétüwa rü ngexwaca̱xü̃xü̃ i mürapewa i yaxcüxü̃ tá nixücuchigü. Rü chorü diẽruarü daruxü̃ tá nixĩ i naxütanüxü̃ i guxü̃ma i ngẽma puracü.
5 Rü Tupanapataarü yemaxü̃gü i úirunaxca̱x rü diẽrumünaxca̱x ga Nabucudonochó Tupanapatawa dexü̃, rü tanaxwa̱xe i Yerucharéü̃ca̱x tanawoeguxẽxẽ rü nagu tayanu ya yima Tupanapata ya wena tá üxüne, erü woetama ngẽma nixĩ i nachica’ ” nhanagürü ga yema Chíruarü poperawa.
6 Rü yexguma ga nüma ga Pérchiaanecüã̱xarü ãẽ̱xgacü ga Daríu rü nanaxümatü ga wüxi ga popera naxca̱x ga Tanái ga taxtü ga Eufrátearü oéstewaamaarü ãẽ̱xgacü, rü Chetáru-Bonái rü norü ngü̃xẽẽruü̃gü ga ãẽ̱xgacügü ixĩgüxü̃ ga yema naanewa. Rü norü poperawa rü nhanagürü: “¡Taxũtáma nüxü̃́ penaguxchaxẽxẽ i ngẽma Yudéugü nax wena naxügüãxü̃ ya yima Tupanapata! Rü ngẽma noxrirüxü̃ i nachicagu tátama nanaxügü.
7 ¡Rü taxũtáma penachixewe ya yimá Yudáanecüã̱xarü ãẽ̱xgacü rü ngẽma togü i duü̃xü̃gü i ngẽma puracümaxã icua̱xgüxü̃!
8 Rü nhu̱xũchi pemaxã nüxü̃ chixu nax perü diẽrumaxã nüxü̃ perüngü̃xẽẽgüxü̃ i ngẽma Yudéugü i ngẽma puracümaxã icua̱xgüxü̃ nax naxügüãxü̃ca̱x ya yima Tupanapata. Rü ngẽma diẽru i perü naanewachigütama perü duü̃xü̃gütanüwa ngĩxü̃ peyaxucümaxã tá nixĩ i paxa penaxütanüxü̃ i ngẽma Tupanapataarü mexẽxẽ nax ngẽmaãcü tama íyachaxãchixü̃ca̱x i ngẽma puracü.
9 Rü ngẽma chacherdótegü i Yerucharéü̃wa ngẽxmagüxü̃ rü chanaxwa̱xe i nüxna penamugü i ngẽma wocaxacügü rü carnérugü i nanaxwa̱xegüxü̃ nax naxca̱x yagugüãxü̃ ya yimá Tupana ya dauxü̃wa ngẽxmacü. ¡Rü naétü nüxna penaxã i trígute̱xe, rü wíũ, rü yucüra, rü oríwaarü chíxü̃ i wüxichigü i ngunexü̃gügu rü tagutáma nixüye!
10 Rü ngẽmaãcü tá nüxü̃́ natauxcha nax yimá dauxü̃gucü ya Tupanaca̱x yagugüãxü̃ i ta̱xacü i namaxã nataãxẽxü̃ rü nhu̱xũchi cha̱u̱xca̱x rü chauxacügüca̱x nayumüxẽgüxü̃ca̱x.
11 Rü ngẽxguma chi texé tama naga ĩnügu i nhaa chorü mu, rü name nixĩ i wüxi ya tümapataarü omüta tayaxu rü yimamaxã tüxü̃ tapai nax ngẽxma tayuxü̃ca̱x ya yixema tama naga ĩnüxe. Rü yima tümapata rü ngẽxma narüxo rü naachina̱xãgüxica ngẽ́ma nayaxü.
12 Rü yimá Tupana ya nügüca̱x nüxü̃ unetacü ya yima ĩane ya Yerucharéü̃ rü tá nanachixexẽxẽ i ngexü̃rüüxü̃mare i nachixü̃ane rüe̱xna norü ãẽ̱xgacü i tama yanguxẽẽxü̃ i nhaa chorü mu, rü nachixexẽẽxü̃ ya yima Tupanapata. Rü chama i Daríu nixĩ i chanaxunagüxü̃ i nhaa mu. Rü ngẽmaca̱x chanaxwa̱xe i aixcuma naga naxĩnüe”, nhanagürü ga norü poperawa.
Ningu ga Tupanapata
13 Rü nüma ga Tanái ga taxtü ga Eufrátearü oéstewaamaarü ãẽ̱xgacü rü Chetáru-Bonái rü norü ngü̃xẽẽruü̃gü rü paxama naga naxĩnüe ga yema mu ga ãẽ̱xgacü ga Daríu unagüxü̃.
14 Rü yemaacü ga nüma ga yema Yudéugü ga yema puracümaxã icua̱xgüxü̃ rü nayadaxẽẽgü ga nax napuracüexü̃. Rü Tupanaarü orearü uruü̃gü ga Ayéu rü Yacaría ga Ídu nane rü Tupanaarü oremaxã poraãcü nanataãxẽxẽxẽ. Rü yemaacü ga guma Tupanapataarü mexẽxẽ rü ningu yema Tupana nüxü̃ ixuxü̃rüxü̃ rü yema Chíru rü Daríu rü Artayére ga Pérchiaanecüã̱xarü ãẽ̱xgacügü unagügüxü̃rüxü̃.
15 Rü yexguma 6 ga taunecü ãẽ̱xgacü yixĩgu ga Daríu ga Pérchiaanearü naanewa, rü yexguma nixĩ ga nax yanguxü̃ ga guma Tupanapata, meama adáarü tauemacüarü tamaepü̱xarü ngunexü̃gu (18 feweréru).
16 --
17 --
18 --
19 --
20 --
21 --
22 --
