Esdras 7:1-28
7 Rü yexguma Artayére rü Pérchiaanecüã̱xarü ãẽ̱xgacü yixĩgu, rü nayexma ga wüxi ga chacherdóte ga Yudéu ga Édragu ãégacü. Rü nüma rü nũxcümaü̃cü ga Aróũtaxa nixĩ.
2 --
3 --
4 --
5 --
6 Rü nüma ga Édra rü wüxi ga ngu̱xẽẽtaeruxü̃ nixĩ, rü meama nüxü̃ nacua̱x ga Tupanaarü mugü ga Moiché ümatüxü̃. Rü wüxi ga ngunexü̃gu rü ãẽ̱xgacü ga Artayérena naca nax Yerucharéü̃ca̱x namueguaxü̃ca̱x. Rü nüma ga ãẽ̱xgacü rü naga naxĩnü, yerü Tupana rü poraãcü Édraxü̃ narüngü̃xẽẽ. Rü yemaacü ga Édra rü Babiróniaanewa inaxũãchi rü Yerucharéü̃ca̱x natáegu.
7 7:7-9 Rü yexguma marü 7 ga taunecü ãẽ̱xgacü yixĩgu ga Artayére rü natáegu ga Édra. Rü namaxã nawoegu ga wüxitücumü ga Iraéutanüxü̃gü. Rü yematanüwa nayexmagü ga chacherdótegü rü Lewítanüxü̃gü, rü wiyaetanüxü̃gü, rü Tupanapataarü ĩã̱xarü daruü̃gü, rü Tupanapatawaarü ngü̃xẽẽruü̃gü. Rü yemamaxã inaxũãchi ga Édra meama nüxíraxü̃cü ga tauemacüarü ügügu. Rü Yerucharéü̃wa nangugü meama guma norü 5 ga tauemacüarü ügügu yerü Tupana rü poraãcü nüxü̃ narüngü̃xẽẽ.
8 Nüü̃ nadau 7:7
9 Nüü̃ nadau 7:7
10 Rü nüma ga Édra rü aixcuma nagu narüxĩnü nax Tupanaarü mugüwa nangúxü̃ rü nagu nax namaxü̱̃xü̃ rü yema togü ga Iraéutanüxü̃güxü̃ nax nangúexẽẽxü̃ca̱x ga yema Tupanaarü mugü.
11 7:11-12 Rü nüma ga Édra rü wüxi ga ngu̱xẽẽtaeruxü̃ ga meama guxü̃ma ga Tupanaarü mugüxü̃ cuácü nixĩ. Rü yexguma Babiróniaanewa inaxũãchichaxü̱̃xgu ga Édra, rü nüma ga ãẽ̱xgacü rü Édrana nanaxã ga wüxi ga popera ga nhaxü̃: “Chama i ãẽ̱xgacü i Artayére rü cuxü̃ charümoxẽ Pa Chacherdóte, Pa Édrax. Rü cuma rü wüxi i ngu̱xẽẽtaeruxü̃ i meama Tupana ya dauxü̃gucüarü mugüxü̃ cuáxe quixĩ.
12 Nüü̃ nadau 7:11
13 Rü marü chanaxunagü i wüxi i mu nax ngẽmaãcü guxü̃ma i Iraéutanüxü̃gü i cha̱xme̱xwa ngẽxmagüxü̃ rü naxwa̱xegüxü̃ nax cumaxã Yerucharéü̃ca̱x nawoeguxü̃, rü marü name nax cuwe naxĩxü̃. Rü ngẽxgumarüxü̃ ta i ngẽma Lewítanüxü̃gü rü chacherdótegü rü marü name nax nawoeguxü̃.
14 Erü chama i ãẽ̱xgacü, rü ngẽma 7 i chorü ngü̃xẽẽruü̃gümaxã rü ngẽ́ma cuxü̃ tamu nax mea cuyangugüxü̃ca̱x nax nhuxãcü ínamaxẽxü̃ i ngẽma cutanüxü̃gü i Yudáanewa, rü ĩane ya Yerucharéü̃wa, rü ngoxi nagu ínamaxẽ i ngẽma curü Tupanaarü mugü i cuxü̃́ ngẽxmaxü̃.
15 Rü ngẽxgumarüxü̃ ta cuxna taxãga nax cuyanaxü̃ca̱x i ngẽma diẽrumü rü úiru i chama i ãẽ̱xgacü rü chorü ngü̃xẽẽruü̃gümaxã torü ngúchaü̃maxã cuxna taxãmaregüxü̃ naxca̱x ya perü Tupana ya Yerucharéü̃gu ãpatacü.
16 Rü ngẽxgumarüxü̃ ta rü name nixĩ i cutanüxü̃gü i duü̃xü̃gü rü chacherdótegü i Babiróniaanewa ngẽxmagüxü̃tanüwa cunade i ngẽma diẽrumü, rü úiru, rü ãmaregü i norü ngúchaü̃maxã inaxãgüxü̃ naxca̱x ya yima Tupanapata ya Yerucharéü̃wa ngexmane.
17 Rü ngẽma diẽrumaxã rü tá naxca̱x cutaxe i wocaxacügü, rü carnérugü rü carnéruxacügü wüxigu namaxã i ãmaregü i trígu rü wíũ. Rü ngẽma ãmaregü tá nixĩ i Tupanapataarü ãmarearü guchicaxü̃wa ícuyaguxü̃ i ngẽxguma Yerucharéü̃wa pengugügu.
18 Rü ngẽma diẽru rü úiru íyaxüxü̃maxã rü cuma rü cumücügü rü tá naxca̱x petaxe i ngẽma pema nagu perüxĩnüegu rü Tupanaarü ngúchaü̃ ixĩxü̃.
19 Notürü ngẽma curü Tupanapataarü ngẽmaxü̃gü i pexna taxãxü̃ rü cunaxwa̱xe nax cumatama yima Tupanapatagu cuyanuxü̃ i Yerucharéü̃wa.
20 Rü ngẽxguma iyataxu̱xgu i diẽru naxca̱x ya yima Tupanapata rüe̱xna ta̱xacü i to i puracü i Tupanaca̱x pexüxchaü̃xü̃, rü marü name i chorü diẽruarü daruxü̃xü̃tawa naxca̱x ícuca.
21 Rü pemax, Pa Ãẽ̱xgacügüx i Taxtü i Eufrátearü Oéstewaama Ngẽxmagüxe i Diẽrumaxã Icua̱xgüxex, rü chama i Pérchiaanecüã̱xarü ãẽ̱xgacü i Artayére rü pexca̱x chayamupane i nhaa mugü: ‘¡Rü nüxna penaxã i guxü̃ma i ta̱xacü i pexü̃tawa naxca̱x ínaca̱xaxü̃ ya yimá chacherdóte ya ngu̱xẽẽtaeruxü̃ ya Édra i meama Tupana ya dauxü̃cüã̱xarü mugüxü̃ cuácü!
22 Rü name nixĩ i nüxna penaxã nhu̱xmata 3,600 quíru naguxü̃ i diẽrumü rü 22,000 lítru naguxü̃ i trígu, rü 2,200 lítru nagucü ya wíũ, rü 2,200 lítru naguxü̃ i chíxü̃. Rü yimá yucüra ya nüma naxca̱x ínaca̱xacü ¡rü nüxna penaxã!
23 Rü ngẽxgumarüxü̃ ta i ngexü̃rüüxü̃mare i ngẽmaxü̃gü i Tupana ya dauxü̃cüã̱x naxwa̱xexü̃ i napataca̱x, rü name nixĩ i nüxna penaxã nax tama cha̱u̱xca̱x rü chauneca̱x poxcu ínanguxẽẽxü̃.’
24 Rü ngẽxgumarüxü̃ ta chanaxunagü i nhaa mu: ‘Rü ngẽma chacherdótegü, rü Lewítanüxü̃gü, rü wiyaetanüxü̃gü, rü ĩã̱xarü daruü̃gü rü guxü̃ma i ngẽma togü i Tupanapatawa puracüexü̃, rü tama chanaxwa̱xe nax ãẽ̱xgacüaxü̃́ nax naxütanügüaxü̃.’
25 Rü cumax, Pa Édrax, rü name nixĩ i nagu quixũ i ngẽma cua̱x i Tupana cuxna ãxü̃. Rü ngẽmaãcü ngẽma naanegü i taxtü i Eufrátearü oéstewaama ngẽxmagüxü̃ i duü̃xü̃güca̱x tá nüxü̃ cuxuneta i ãẽ̱xgacügü i duü̃xü̃güarü guxchaxü̃arü mexẽẽruxü̃ ixĩgüxü̃, rü ãẽ̱xgacügü i mea ngẽma duü̃xü̃gümaxã icuáxü̃. Rü ngẽxguma nangemagu i duü̃xü̃gü i tama curü Tupanaarü mugüxü̃ cua̱xgüxü̃, rü name nixĩ i cuma cunangúexẽxẽ.
26 Rü ngexerüxǘxemare ya tama naga ĩnüxe i ngẽma curü Tupanaarü mugü rü chorü mugü ¡rü noxtacüma tüxü̃ pima̱x rüe̱xna tüxü̃ ípeta̱xüchi i perü naanewa, rüe̱xna tüxna penapuxü̃ i tümaarü ngẽmaxü̃gü, rüe̱xna tüxü̃ pepoxcu!” nhanagürü ga ãẽ̱xgacü ga Artayére norü poperawa.
Édraarü yumüxẽ
27 Rü yexguma ga Édra rü nayumüxẽ rü nhanagürü: “Pa Torü O̱xigüarü Tupanax, rü cuma rü cumecümaxü̃chi. Rü ngẽmaca̱x ãẽ̱xgacüãẽwa ícunanguxẽxẽ nax yima cupata ya Yerucharéü̃wa ngexmane wena namexẽẽgüaxü̃ca̱x i curü duü̃xü̃gü.
28 Rü moxẽ cuxna chaxã, Pa Tupanax, erü cuxü̃́ changechaü̃tümüxü̃ nape̱xewa ya ãẽ̱xgacü, rü ngẽma 7 i namücügü, rü guxü̃ma i norü ngü̃xẽẽruü̃gü. Rü chapora erü cumax, Pa Tupanax, chauxü̃tawa cungexma rü ngẽmaca̱x choxü̃́ natauxcha nax nüxü̃́ chanangúchaü̃xẽẽxü̃ i nhuxre i chautanüxü̃gü i Iraéutanüxü̃güarü ãẽ̱xgacügü nax chawe Yerucharéü̃ca̱x nawoeguxü̃”, nhanagürü ga norü yumüxẽwa.
