Esdras 9:1-15
9 Rü yemawena ga yema Iraéutanüxü̃güarü ãẽ̱xgacügü ga marü nüxíra Yerucharéü̃wa ngugüxü̃ rü cha̱u̱xca̱x naxĩ rü chamaxã nüxü̃ nayarüxugüe rü nhanagürügü: “Muxü̃ma i ngẽma tatanüxü̃gü i Iraéutanüxü̃gü ga nüxíra tomaxã woeguxü̃, rü woo chacherdótegü rü Lewítanüxü̃gü rü tama nügüxü̃́ nüxü̃ naxo̱xo̱xgü i nacümagü i chixexü̃gü i nagu naxĩxü̃ i ngẽma togü i duü̃xü̃gü i nua tórü naanegu yaxãchiü̃güxü̃. Notürü ngẽma tatanüxü̃gü rü woo poraãcü Tupanape̱xewa nachixe nax ngẽma togücümagu nax naxĩxü̃, notürü nagu naxĩama i nacümagü i ngẽma Canaã́tanüxü̃gü rü Etéutanüxü̃gü, rü Ferechéutanüxü̃gü, rü Yebuchéutanüxü̃gü, rü Amóũtanüxü̃gü, rü Moábitanüxü̃gü, rü Eyítuanecüã̱xgü, rü Amuréutanüxü̃gü.
2 Yerü nüma i tatanüxü̃gü rü nanegü rü marü nixãxma̱xgü namaxã i ngẽma togü i duü̃xü̃güxacügü i nua tórü naanegu yaxãchiü̃güxü̃ i tama Tupanaaxü̃́ yaxõgüxü̃. Rü yemaacü ga Tupanaarü duü̃xü̃gü rü yema tama yaxõgüxü̃ ga duü̃xü̃gümaxã nügü narüxücutanü. Rü tatanüxü̃gü i ãẽ̱xgacügü nixĩ ga nüxíra inaxügüxü̃ nax nagu naxĩxü̃ ga yema chixexü̃”, nhanagürügü choxü̃.
3 Rü yexguma yema orexü̃ chaxĩnügu rü chorü ngechaü̃maxã chaugü charügáutechiru rü chaugü chapuxü̃yáe rü chaugü chapuxü̃chinágu, yerü poraãcü chauãẽwa nangu̱x ga yema.
4 Rü guxü̃ma ga yema Iraéutanüxü̃gü ga norü Tupanaarü poxcuca̱x muü̃exü̃ nagagu ga natanüxü̃güarü chixexü̃gü rü chauxü̃tawa nayarütogü. Rü chama rü chorü ngechaü̃maxã yematama chauchicawa charüto nhu̱xmata nawa nangu ga yema yáuanecüarü ora ga nagu Tupanaca̱x yagugüãxü̃ ga ãmaregü.
5 Rü yexguma yema orawa nanguxgu rü marü choxü̃ nangupetüxüra ga nax changechaü̃xü̃. Rü charügáuchiruãcüma ichanaxügü nax chayumüxẽxü̃. Rü Cori ya Tupanamaxã chidexa.
6 Rü nhachagürü nüxü̃: “Pa Chorü Tupanax, Pa Chorü Tupanax, rü poraãcü chaxãnexü̃chi i cupe̱xewa. Rü tama nüxü̃ chacua̱x nax ta̱xacü chaxüxü̃ rü nhuxãcü cumaxã chidexaxü̃. Erü ngẽma torü chixexü̃ rü marü nangupetüxüchiama rü ngẽma torü pecádugü rü marü nhama i naane namaxã nanapá.
7 Rü nũxcümacürüwa ga torü o̱xigü rü chixexü̃gu namaxẽ rü nhamaxü̃cüxü i toma rü ta nagu ítamaxẽ. Rü ngẽma torü chixexü̃gagu rü toma rü torü ãẽ̱xgacügü rü torü chacherdótegü rü naxme̱xgu tayi i ngẽma to i nachixü̃anecüã̱xgüarü ãẽ̱xgacügü i tama cuxü̃́ yaxõgüxü̃. Rü nümagü rü toxü̃ ínayauxü̃ rü toxca̱x nangĩ̱xgü rü duü̃xü̃güpe̱xewa toxü̃ nacugüe. Rü ngẽmatama nixĩ i nhu̱xmax toxü̃ ngupetüxü̃.
8 Notürü i nhu̱xmax, Pa Corix, Pa Torü Tupanax, rü ngẽma nax tomaxã cumecümaxü̃gagu rü toxü̃́ cunatauxchaxẽxẽ nax nhuxre i toma rü wena nhaa naane i cuma cuxüünexẽẽxü̃ca̱x tawoeguxü̃ nax nagu taxãchiü̃güxü̃ca̱x. Rü cuma rü wüxi i ngexwaca̱xü̃xü̃ i ĩnü toxna cuxã, rü ngẽmaãcü paxaãchi toxü̃ cutaãxẽxẽxẽ naétüwa i torü guxchaxü̃gü.
9 Rü woo to ga ãẽ̱xgacüme̱xẽwa nax tangexmagüxü̃ notürü i cumax rü tama toxü̃ ícuwogü. Rü ngẽma Pérchiaanecüã̱xarü ãẽ̱xgacügüãẽwa ícunanguxẽxẽ nax tomaxã namecümagüxü̃ca̱x. Rü toxna cudau nax nhu̱xmax rü ta tamaxẽxü̃ca̱x, rü ngẽmaãcü tawoeguxü̃ca̱x, rü wena noxrixü̃xü̃ ga nachicagutama tanaxüxü̃ca̱x ya yima cupata. Rü cumax, Pa Tupanax, rü toxna cudau i guxü̃ma i nhaa naane i Yudáanewa rü daa ĩane ya Yerucharéü̃wa.
10 Notürü i nhu̱xmax, Pa Tupanax ¿rü ta̱xacüxü̃ tá cumaxã tixuxü̃ nawena i guxü̃ma i ngẽma chixexü̃ i taxüxü̃. Erü aixcuma nixĩ nax tama naga taxĩnüexü̃ i curü mugü”, nhachagürü ga chorü yumüxẽwa.
11 --
12 --
13 --
14 --
15 --
