Ester 3:1-15
3 Rü yema ngupetü̱xguwena rü nüma ga ãẽ̱xgacü ga Achuéru rü wüxi ga yatü ga Amáũxü̃ naxuneta nax norü ngü̃xẽẽruü̃gümaxã inacuáxü̃ca̱x. Rü yemaacü nawa nangu nax guxü̃ma ga yema naanemaxã inacuáxü̃ ga Amáũ. Rü Achuéruxicatama nixĩ ga naétüwa yexmaxü̃. Rü nüma ga Amáũ rü Amedáta nane ga Agáchetanüxü̃ nixĩ.
2 Rü guxü̃ma ga yema ãẽ̱xgacüpatawaarü puracütanüxü̃gü rü Amáũpe̱xegu nacaxã́pü̱xügü rü inarümaxãchitanü ga yexguma Amáũ nape̱xewa üpetü̱xgu rüe̱xna nape̱xewa nayexmagu. Yerü yemaacü nixĩ ga ãẽ̱xgacü ga naxunagüãxü̃. Notürü nüma ga Marduquéu rü tama naga naxĩnüchaü̃ ga yema mu, rü yemaca̱x tama narümaxãchi ga yexguma Amáũ nape̱xewa üpetü̱xgu.
3 Rü yexguma yemaxü̃ nadaugügu ga ãẽ̱xgacüarü ngü̃xẽẽruü̃gü, rü Marduquéuna nacagüe rü nhanagürügü: —¿Tü̱xcüü̃ tama naga cuxĩnü i ngẽma ãẽ̱xgacü unagüxü̃? —nhanagürügü.
4 Rü guxü̃ma ga ngunexü̃gügu rü yemaacütama Marduquéuna nacagüxü̃, notürü nüma ga Marduquéu rü nanangãxü̃ nax nüma rü Yudéu yixĩxü̃ rü yemaca̱x tama Amáũpe̱xegu nayarümaxãchi. Rü yemaca̱x ga yema duü̃xü̃gü rü Amáũmaxã nüxü̃ nayarüxugüe rü nüxna naca rü name nax yemamaxã nügü ínapoxü̃xü̃ ga Marduquéu.
5 Rü yexguma Amáũ Marduquéuxü̃ da̱xgu nax tama inacaxã́pü̱xüxü̃ rüe̱xna yanamaxãchixü̃ ga yexguma yéma naxüpetüxgu, rü nüma ga Amáũ rü poraãcü nanu.
6 Notürü yema marü nüxü̃ nax nacuáxü̃ nax ta̱xacürü duü̃xü̃ yixĩxü̃ ga Marduquéu rü yemaca̱x tama nüxica nanapoxcuchaü̃. Rü nagu narüxĩnü nax nhuxãcü tá nadaiaxü̃ ga guxü̃ma ga yema Yudéugü ga yema naanegü ga Achuéru namaxã icuáxü̃wa yexmagüxü̃.
Mu ga Yudéugüarü daixchiga unagüxü̃
7 Rü yexguma 12 ga taunecü ãẽ̱xgacü yixĩxgu ga Achuéru, rü meama gumá nüxíraxü̃cü ga tauemacü ga Nisã́ũgu ãégacügu (abríu) rü Amáũpe̱xewa naxca̱x nadaugü nax ta̱xacürü ngunexü̃ tá yixĩxü̃ ga Yudéugüxü̃ nagu nadaixü̃. Rü nagu naxunetagü nax guma nai ga 12 ga tauemacü ga adágu ãégacüarü 13 ga ngunexü̃gu (13 feweréru) tá yixĩxü̃ nax nadaiaxü̃.
8 Rü nüma ga Amáũ rü ãẽ̱xgacü ga Achuéruxü̃tawa naxũ nax namaxã nüxü̃ yanaxuxü̃ca̱x nachiga ga yema. Rü nhanagürü: —Pa Ãẽ̱xgacüx, rü natanüwa i guxü̃ma i ngẽma togü i nachixü̃anecüã̱xgü rü nangexma i wüxitücumü i tama togümaxã wüxiguchaü̃xü̃. Erü ngẽma nacümagü rü nanatoraxü̃ rü tama naga naxĩnüe i ngẽma curü mugü, Pa Ãẽ̱xgacüx. Rü ngẽmaca̱x, Pa Ãẽ̱xgacüx, rü tama name nax nhaa naane i namaxã icucuáxü̃wa namaxẽxü̃.
9 Rü ngẽmaca̱x Pa Ãẽ̱xgacüx, ega curü me yixĩxgu i ngẽma nüxü̃ chixuxü̃ ¡rü ẽcü naxunagü i wüxi i mu i nüxü̃ ixuxü̃ nax noxtacüma nadaixü̃ i ngẽma Yudéugü! Rü chama rü tá 330,000 quíru naguxü̃ i diẽrumü ichaxã nax ngẽmamaxã naxütanüxü̃ca̱x nüxü̃́ i ngẽma nadaixü̃ —nhanagürü.
10 3:10-11 Rü yexguma ga nüma ga ãẽ̱xgacü rü nhanagürü nüxü̃: —¡Rü ngẽma diẽru rü cuxrütama yixĩ! ¡Rü ngẽma Yudéugü rü namaxã naxü i ta̱xacü i cuma cunaxwa̱xexü̃! —nhanagürü. Rü nhu̱xũchi nügüme̱xẽwa ngĩxü̃ nayaxu ga norü ãnera rü Amáũna ngĩxü̃ naxã nax yemaacü ãẽ̱xgacüéga nawa ngóxü̃ca̱x ga yema mu ga Amáũ unagüxü̃.
11 Nüü̃ nadau 3:10
12 Rü gumá taunecüarü nüxíraxü̃cü ga tauemacüarü 13 ga ngunexü̃gu rü nüma ga Amáũ rü nanangutaque̱xexẽxẽ ga ãẽ̱xgacüarü poperaarü ümatüruü̃gü. Rü namaxã nüxü̃ nixu nax naxümatügüãxü̃ca̱x ga wüxi ga mu naxca̱x ga guxü̃ma ga ãẽ̱xgacügü ga namaxã icuáxü̃ ga yema (127) nachixü̃anegü ga Achuérume̱xẽwa yexmagüxü̃. Rü wüxichigü ga yema nachiü̃anecüã̱xgügawa naxümatü ga yema mu, rü ãẽ̱xgacüéga nagu naxǘ rü norü ãneraéga nawa nango̱x.
13 Rü yema ãẽ̱xgacüarü orearü ngeruü̃gü rü inayanuetanü ga yema popera nawa ga guxü̃ma ga yema nachixü̃anegü ga ãẽ̱xgacü namaxã icuáxü̃. Rü yema poperawa rü nüxü̃ nixu rü nhanagürü. “Rü meama nai ya 12 ya tauemacü ya adágu ãégacüarü 13 ya ngunexü̃gu (13 feweréru) rü tá nadai i guxü̃ma i Yudéugü i yatüxü̃ rü ngexü̃ rü ngextü̱xüxü̃gü rü paxü̃gü rü buxü̃gü. Rü guxü̃ma i ngẽma norü ngẽmaxü̃gü rü ngẽma nadaixü̃me̱xẽwa tá nachoü̃”, nhanagürü.
14 --
15 --
