Ester 4:1-17
4 Rü yexguma Marduquéu nüxü̃ cua̱xgu ga yema unagüxü̃ rü nügü narügáutechiru yerü poraãcü nangechaü̃. Rü yemaca̱x témüxü̃ ga naxchirugu nicu̱x rü tanimucamaxã nügü nagüeru. Rü guma ĩanegu ínayaxüegu rü tagaãcü aita naxü norü ngechaü̃maxã.
2 Rü yemaacü inixũ rü nhu̱xmata ãẽ̱xgacüpataa̱xwa nangu rü yéma nayachaxãchi, yerü nachu̱xu ga ngechaü̃chirugu icúxe ãẽ̱xgacüpatagu nax ücuxü̃.
3 Rü yexgumarüxü̃ ta ga wüxichigü ga ĩanewachigü ga ngextá íyanguchigüxü̃wa ga yema mu ga ãẽ̱xgacü üxü̃, rü ga Yudéugü rü poraãcü nanaxĩ̱xãchiãẽtanü. Rü poraãcü nangechaü̃gü rü tama nachibüe rü naxauxe. Rü muxü̃ma ga nümagü rü tanimucate̱xegu napegü rü naxchiru ga témüxü̃gu nicu̱xgü.
Yudéugüétüwa ichogü ga Ité
4 Rü yema ngĩxü̃taxü̃gü ga Ité rü yema yatügü ga ngĩrü daruü̃gü ixĩgüxü̃ rü ngĩmaxã nüxü̃ nixugü ga yema Marduquéuxü̃ ngupetüxü̃. Rü yemaxü̃ naxĩnügu ga ngĩmax rü yexeraãcü inaxi̱xãchiãxẽ. Rü yemaca̱x Marduquéuca̱x yéma inamu ga mexü̃ ga naxchiru nax ínacuxuchixü̃ca̱x ga yema témüxü̃ ga naxchiru ga nagu yacúxü̃. Notürü ga nümax rü tama ínacuxuchichaü̃.
5 Rü ngĩma ga Ité rü naxca̱x ingema ga yema ngĩrü daruü̃eru ga Atáqui. Rü Marduquéuxü̃tawa inamu nax nüxna yaca̱xaxü̃ca̱x nax ta̱xacü ngupetüxü̃ rü ta̱xacüca̱x natémüchiruxü̃.
6 Rü nüma ga Atáqui rü Marduquéuna nayaca ga ĩanearü ngutaque̱xechicawa ga ãẽ̱xgacüpataarü ĩã̱xarü to̱xma̱xtawa.
7 Rü nüma ga Marduquéu rü namaxã nüxü̃ nixu ga guxü̃ma ga yema ngupetüxü̃ rü nhuxre ga diẽru ngĩxü̃ nax inaxãxü̃ ga Amáũ nax yemaacü guxü̃ma ga Yudéugüxü̃ nadaixü̃ca̱x.
8 Rü yexgumarüxü̃ ta Atáquina nanaxãpane ga yema mu ga nüxü̃ ixuxü̃ ga Yudéugüarü daixchiga. Rü Atáquimaxã nüxü̃ nixu nax Iténa naxããxü̃ca̱x rü yemaacü nüxü̃ nacuáxü̃ca̱x ga yema ngupetüxü̃. Rü yexgumarüxü̃ ta Itéca̱x yéma namuga nax ngĩmatama ãẽ̱xgacümaxã nüxü̃ yanaxuxü̃ca̱x rü yemaacü naétüwa nachogüxü̃ca̱x ga ngĩtanüxü̃gü.
9 Rü nüma ga Atáqui rü natáegu rü Itémaxã nüxü̃ nayarüxu ga yema Marduquéu namaxã nüxü̃ ixuxü̃.
10 Rü ngĩma ga Ité rü wenaxarü Marduquéuxü̃tawa inamu ga Atáqui nax namaxã nüxü̃ yanaxuxü̃ca̱x ga ngĩrü dexa ga nhaxü̃:
11 “Guxü̃ma i duü̃xü̃gü rü nüxü̃ nacua̱x rü ngẽxguma texé ãẽ̱xgacüxü̃tawa ũmaregu rü tama nüma tümaca̱x nangemaãcüma rü tayu ega nüma ya ãẽ̱xgacü rü tama norü nai i úirumaxã chauxmena̱xãne tümaétügu nawe̱xgu. Rü chamax rü marü 30 i ngunexü̃ taguma cha̱u̱xca̱x nangema ya ãẽ̱xgacü”, ngĩgürügü.
12 4:12-13 Rü yexguma Marduquéu nüxü̃ ĩnügu ga ngĩrü ngãxü̃ ga Ité, rü ngĩxca̱x yéma namuga rü nhanagürü: “¿Ẽ̱xna cuma nagu curüxĩnügu rü taxũtáma cuyuxü̃ erü ãẽ̱xgacüpatawa cungexma woo Yudéu nax quixĩxü̃?
13 Nüü̃ nadau 4:12
14 Rü nhu̱xmax nax ngẽ́ma cungea̱xmarexü̃ rü tama naétüwa nax cuchogüxü̃ i tatanüxü̃gü i Yudéugü, rü toxnamana tá ne naxũ i ngü̃xẽẽ nax nawa íinguxü̃xü̃ca̱x i ngẽma guxchaxü̃, notürü i cumax rü ngẽma cunatütanüxü̃gü rü tá nayue. Rü bexmana ngẽma nax toxü̃ ícupoxü̃xü̃ca̱x nixĩ i ãẽ̱xgacüma̱xwa nax cunguxü̃ i nhu̱xmax”, nhanagürü.
15 Rü yexguma ga ngĩma ga Ité rü nhaãcü Marduquéuca̱x yéma imuga:
16 “¡Ẽcü ngẽ́ma naxũ rü nangutaque̱xexẽxẽ i guxü̃ma i Yudéugü i Chuchã́wa ngẽxmagüxü̃ nax cha̱u̱xca̱x aureãcü nayumüxẽgüxü̃ca̱x! ¡Rü tamaepü̱x i ngunexü̃ rü tamaepü̱x i chütaxü̃ rü taxuxü̃táma ta̱xacü nangõ̱xgü rüe̱xna ta̱xacü nixaxgü! Rü chamax, rü namaxã i chauxü̃taxü̃gü rü ngẽmaãcü tátama tanaxügü. Rü ngẽmawena rü tá ãẽ̱xgacüxü̃tawa íchayadau woo nachu̱xu nax texé ngẽ́ma ũmarexü̃ tama tümaca̱x nangemayane. Notürü tá ngẽ́ma chaxũama rü nüétama ega woo chayu̱xgux”, ngĩgürügü.
17 Rü yexguma ga nüma ga Marduquéu rü nanaxü ga yema Ité namaxã nüxü̃ ixuxü̃.
