Ester 5:1-14
5 Rü tamaepü̱x ga ngunexü̃guwena rü ngĩma ga Ité rü nagu iyacu̱x ga ngĩrü ãẽ̱xgacüma̱xchiru rü nhu̱xũchi ãẽ̱xgacüpatagu ixücu. Rü yema ucapu ga ãẽ̱xgacü nawa rütoxü̃arü ĩã̱xarü we̱xgu iyachi ga ãẽ̱xgacü mea ngĩxü̃ ídauxü̃wa.
2 Rü nüma ga ãẽ̱xgacü rü yexguma ngĩxü̃ nada̱xgux ga Ité nax yexma nachixü̃, rü ngĩmaxã nataãxẽ rü nanawe̱xnagü ga norü úirumena̱xã. Rü ngĩma ga Ité rü naxca̱x iyaxũ rü norü úirumena̱xãpe̱xegu iyarüngógü.
3 Rü nüma ga ãẽ̱xgacü rü ngĩxna naca rü nhanagürü: —¿Ta̱xacü cuxü̃ nangupetü Pa Itéx? ¿Rü ta̱xacü cunaxwa̱xe? ¡Rü woo chi ngãxü̃gu i chauchixü̃aneca̱x choxna cuca̱xgu rü chi cuxna chanaxã! —nhanagürü. Rü Ité rü inangãxü̃ rü ngĩgürügü:
4 —Rü ngẽxguma chi curü me yixĩxgu, Pa Ãẽ̱xgacüx, rü cuxna chaxu nax chauxü̃tawa cuxũxü̃ca̱x erü cuxca̱x rü Amáũca̱x chanaxü i wüxi i õna i mexü̃ i nhu̱xmax —ngĩgürügü.
5 Rü nüma ga ãẽ̱xgacü rü norü duü̃xü̃güxü̃ namu rü nhanagürü: —¡Naxca̱x peda̱u̱x ya Amáũ rü nua naxũ nax ngẽmaãcü nataãxẽxü̃ca̱x i Ité! —nhanagürü. Rü nhu̱xũchi ga nüma ga ãẽ̱xgacü rü Amáũ rü yéma naxĩ nawa ga yema õna ga Ité naxca̱x üxü̃.
6 Rü yexguma ínachibüeyane rü nüma ga ãẽ̱xgacü rü Itéxü̃ nhanagürü: —¡Choxna naxca̱x naca i ta̱xacü i cuma cunaxwa̱xexü̃ rü tá cuxna chanaxã woo chitama ngãxü̃gu i chauchixü̃aneca̱x choxna cuca̱xgu! —nhanagürü.
7 Rü ngĩma ga Ité rü inangãxü̃ rü ngĩgürügü: —Nhaaxicatama nixĩ i ngẽma chanaxwa̱xexü̃ i tá cuxna naxca̱x chaca̱xü̃.
8 Pa Ãẽ̱xgacüx, ngẽxguma chi aixcuma choxü̃ cungechaü̃xgu, rü chi curü me yixĩxgu i ngẽma chanaxwa̱xexü̃, rü chi choxna cunaxãxchaü̃gu i ngẽma cuxna naxca̱x chaca̱xaxü̃, rü cuxna chaxu nax moxü̃arü ngunexü̃gu Amáũmaxã nua chauxü̃tawa pexĩxü̃ naxca̱x i to i õna i pexca̱x tá chamexẽẽxü̃. Rü ngẽ́ma tá nixĩ i cumaxã nüxü̃ chixuxü̃, Pa Ãẽ̱xgacüx, i ngẽma choxna naxca̱x cuca̱xaxü̃ —ngĩgürügü.
Amáũ rü Marduquéuca̱x nanaxü ga wüxi ga wẽxnaxãchicaxü̃
9 Rü nüma ga Amáũ rü poraãcü nataãxẽãcüma natáegu nawa ga chibü. Notürü yexguma ãẽ̱xgacüpataarü ĩã̱xwa ínaxũxũ̱xgu rü poraãcü nanu yerü ga Marduquéu ga ĩã̱xwa yexmacü rü tama inachi rü bai ga nax naxĩã̱xãchixü̃ ga yexguma nüxü̃ nada̱xgux ga yéma nax naxüpetüxü̃.
10 Notürü yexgumatama rü tama nügü nango̱xẽxẽ ga nax nanuxü̃. Rü yexguma nachiü̃wa nanguxgu rü namücügüca̱x nangema rü ngĩxca̱x nangema ga Chére ga naxma̱x.
11 Rü yema namücügüpe̱xewa inanaxügü ga nügü nax yacua̱xüüxü̃. Rü nüxü̃ nixu nax nhuxãcü namuarü ngẽmaxü̃ã̱xü̃chixü̃ rü namuxacüxüchixü̃ rü nhuxãcü ãẽ̱xgacü nüxü̃ icua̱xüü̃xü̃ natanüwa ga yema norü ngü̃xẽẽruü̃gü rü yemaca̱x yema togüétüwa nanaxǘxẽxẽ ga ãẽ̱xgacü.
12 Rü nhanagürü ta: —Rü chaxicatama nixĩ i choxna naxuxü̃ i Ité i ãẽ̱xgacü naxma̱x nawa i ngẽma õna i nhu̱xmax ãẽ̱xgacüca̱x naxca̱x nangemaxü̃. Rü wenaxarü choxna ixu nawa i ngẽma õna i moxü̃ tá ãẽ̱xgacüca̱x naxüxü̃.
13 Notürü ngẽxguma nüxü̃ chada̱xgu i ngẽma Yudéu i Marduquéu i ãẽ̱xgacüpataarü ĩã̱xwa rütoxü̃ rü chauãẽwa nangu̱x erü tama choxü̃ nicua̱xüxü̃. Rü ngẽmagagu choxna ninha i ngẽma chorü taãxẽ i ãẽ̱xgacü naxma̱x cha̱u̱xca̱x üxü̃ —nhanagürü ga Amáũ.
14 Rü yexguma ga naxma̱x rü namücügü rü nhanagürügü nüxü̃: —¡Ẽcü duü̃xü̃güxü̃ naxüxẽxẽ i wüxi i wẽxnaxãchica i 22 métru i norü máchane, rü moxü̃ pa̱xmama rü ãẽ̱xgacüna naca nax ngẽmagu nawẽxnaxãgüãxü̃ca̱x i Marduquéu! ¡Rü nhu̱xũchi ngẽmaãcü chibüwa naxũ namaxã ya ãẽ̱xgacü! Erü marü taxugutáma curüxĩnü i ngẽxguma —nhanagürügü. Rü yema ĩnü rü norü me nixĩ ga Amáũ rü yemaca̱x duü̃xü̃güxü̃ nanaxüxẽxẽ ga wüxi ga wẽxnaxãchica.
