Ester 6:1-14
6 Rü yema ga chütaxü̃gu ga ãẽ̱xgacü rü tama nape rü inadauecha. Rü yemaca̱x naxca̱x nangema ga yema popera ga nagu naxümatüxü̃ ga guxü̃ma ga yema nachixü̃anewa ngupetüxü̃ nax naxca̱x nüxü̃ nadaumatügüxü̃ca̱x.
2 Rü yexguma nüxü̃ nadaumatügügu ga yema popera rü yexma nüxü̃ nayangaugü ga ore ga Marduquéuchiga ga nhuxãcü ãẽ̱xgacü ga Achuéruxü̃ ínapoxü̃xü̃ ga yexguma yema ãẽ̱xgacüpataarü daruü̃gü ga Bigatá rü Tére nügü ucu̱xẽgügu nax ãẽ̱xgacüxü̃ yama̱xgüchaü̃xü̃.
3 Rü yemaxü̃ naxĩnügu ga ãẽ̱xgacü rü ínaca rü nhanagürü: —¿Ta̱xacürü ãmare rü cua̱xüxü̃ nixĩ ga nayaxuxü̃ ga Marduquéu naxca̱x ga yema mexü̃ ga cha̱u̱xca̱x naxüxü̃? —nhanagürü. Rü nüma ga norü ngü̃xẽẽruü̃gü rü nanangãxü̃gü rü nhanagürügü: —Taxuxü̃ma noxtacüma, Pa Ãẽ̱xgacüx —nhanagürügü.
4 Rü yexguma íyadexagüyane rü yoxni ga nüma ga Amáũ rü yéma nangu rü yemaca̱x ĩã̱xtüwa nayexma nax ãẽ̱xgacüna yacaxü̃ca̱x nax Marduquéuxü̃ yema wẽxnaxãchica ga naxüxü̃gu nawẽxnaxãxü̃ca̱x. Rü yexguma ga nüma ga ãẽ̱xgacü rü ínaca rü nhanagürü: —¿Texé tixĩ ya ĩã̱xtüwa ngẽxmaxe? —nhanagürü.
5 Rü yema norü ngü̃xẽẽruü̃gü rü nanangãxü̃ rü nhanagürügü: —Amáũ nixĩ i ngẽ́ma ngẽxmaxü̃ —nhanagürügü. Rü nüma ga ãẽ̱xgacü rü nhanagürü: —¡Namaxã nüxü̃ pexu rü nua naxũ! —nhanagürü.
6 Rü yexguma ga nüma ga Amáũ rü nixücu rü ãẽ̱xgacüpe̱xegu nayachi. Rü nüma ga ãẽ̱xgacü rü nüxna naca rü nhanagürü: —¿Nhuxãcü chi i nüxü̃ quicua̱xüüxü̃ i wüxi i yatü i cuma cunaxwa̱xexü̃ nax nüxü̃ quicua̱xüüxü̃? —nhanagürü. Rü nüma ga Amáũ rü nügüãẽwa nagu narüxĩnü: “¿Texéxü̃ tá nicua̱xüxü̃ ya ãẽ̱xgacü? ¿Rü taux ẽ̱xna i choxü̃ tátama yixĩxü̃?”, nhaxü̃gu narüxĩnü.
7 6:7-8 Rü yemaca̱x ga nüma ga Amáũ rü ãẽ̱xgacüxü̃ nangãxü̃ rü nhanagürü: —Ngẽxguma chi nüxü̃ chicua̱xüxü̃chaü̃gu i wüxi i yatü rü naxchiru i ãẽ̱xgacü nagu icúxü̃gu chi chayacu̱xẽxẽ, rü nhu̱xũchi norü cowaru i ãẽ̱xgacü nagu ixũxü̃gu chi chayaxũxẽxẽ rü nga̱xcueruxü̃ i ãẽ̱xgacü namaxã nga̱xcueruü̃maxã chi chananga̱xcueru.
8 Nüü̃ nadau 6:7
9 Rü chi chorü ngü̃xẽẽruü̃güeruxü̃ chamu nax nagu yacu̱xẽẽãxü̃ca̱x i ngẽma naxchiru rü chi cowaruétügu chanaxaunagüxẽxẽ nax ngẽmaãcü ĩanemaü̃gu namaxã yacaechigüxü̃ca̱x: “Nhaãcü nixĩ ya ãẽ̱xgacü i nüxü̃ yacua̱xüüxü̃ i wüxi i duü̃xü̃ i namaxã nataãxẽxü̃”, nhachagürü chi —nhanagürü ga Amáũ.
10 Rü yexguma ga nüma ga ãẽ̱xgacü rü nhanagürü: —Namexechi nixĩ i ngẽma. ¡Ẽcü nhu̱xmax rü nayaxu i ngẽma naxchiru rü ngẽma cowaru rü ngẽma nüxü̃ quixuxü̃ãcüma naxü namaxã ya Marduquéu ya Yudéu ya ãẽ̱xgacüpataarü ĩã̱xarü daruxü̃! —nhanagürü.
11 Rü yexguma ga Amáũ rü nanayaxu ga yema ãẽ̱xgacüchiru rü ga cowaru ga ãẽ̱xgacü natagu tonagüxü̃, rü Marduquéuxü̃ nicu̱xcuchi rü yema cowarutagu nayaga. Rü ĩanemaü̃gu namaxã nanaxũane rü namaxã nicaechigü rü nhanagürü: —Rü nhaãcü nixĩ i namaxã naxüãxü̃ i ngẽma yatü i ãẽ̱xgacü nüxü̃ icua̱xüü̃xü̃ —nhanagürü.
12 Rü yemawena rü nüma ga Marduquéu rü natáegu nax ãẽ̱xgacüpataarü ĩã̱xna yadauxü̃ca̱x. Notürü nüma ga Amáũ rü nügü nidüxchiwe rü nangechaü̃ãcüma paxa nachiü̃wa naxũ.
13 Rü yexguma nachiü̃wa nanguxgu rü naxma̱xmaxã rü namücügümaxã nüxü̃ nixu ga yema ngupetüxü̃. Rü nümagü nanangãxü̃gü rü nhanagürügü: —Ngẽma Yudéu i Marduquéu rü taxucürüwa nüxü̃ curüyexera, erü ngẽxguma chi ngẽmaãcü namaxã cunaxü̱xgux rü tá cu̱xchaama chixexü̃ cuxca̱x ínangu —nhanagürügü.
14 Rü yexguma íyadexayane rü ínangugü ga ãẽ̱xgacü ga Achuéruarü duü̃xü̃gü nax Amáũca̱x yacagüxü̃ca̱x nax Itéarü õnawa nagagüaxü̃ca̱x.
