Ester 7:1-10
7 Rü nüma ga ãẽ̱xgacü rü Amáũ rü nawa naxĩ ga yema chibü ga Ité naxca̱x mexẽẽxü̃.
2 Rü yexguma norü wíũ íyaxaxgüyane rü nüma ga ãẽ̱xgacü rü wena ngĩxna naca ga Ité, rü nhanagürü: —¿Ta̱xacü nixĩ i naxca̱x ícuca̱xchaü̃xü̃, Pa Cha̱xma̱x, Pa Itéx? ¡Rü choxna naxca̱x naca i ngẽma cunaxwa̱xexü̃ rü chama rü tá cuxna chanaxã woo chi naxca̱x ícuca̱xgu i ngãxü̃gu i chauchixü̃ane! —nhanagürü.
3 Rü ngĩma ga Ité rü inangãxü̃ rü ngĩgürügü: —Pa Chorü Ãẽ̱xgacüx, ngẽxguma chi aixcuma choxü̃ cungechaü̃xgu, rü cuxca̱x namexgu i ngẽma cuxna naxca̱x chaca̱xaxü̃, rü nhaaxicatama nixĩ i chanaxwa̱xexü̃ nax cuxna naxca̱x chaca̱xaxü̃, Pa Ãẽ̱xgacüx: ¡Rü choxü̃́ nüxü̃ nangechaxü̃ i chorü maxü̃ rü nüxü̃́ nüxü̃ nangechaxü̃ i ngẽma chautanüxü̃güarü maxü̃!
4 Erü chama rü chautanüxü̃gü rü marü toxü̃ naxüpane nax ngẽmaãcü toxü̃ nadaixü̃ca̱x ya guxãma. Rü ngẽxguma chi tomaxã natáegügu nax togüarü puracütanüxü̃gü tixĩgüxü̃ca̱x, rü chama rü chi taxu nhachagürümare, woo i ngẽma rü ta rü wüxi i chixexü̃ i taxü̃ nixĩ i cuxca̱x, Pa Ãẽ̱xgacüx —ngĩgürügü.
5 Rü yexguma ga nüma ga Achuéru rü ngĩxna naca rü nhanagürü: —¿Texé tixĩ ya yíxema tügü írüporaxe nax ngẽma chixexü̃ cumaxã taxüxü̃? —nhanagürü.
6 Rü ngĩma rü inangãxü̃ rü ngĩgürügü: —Ngẽma torü uanü i chixexü̃ tomaxã üxchaü̃xü̃ rü nhaa chixecümaxü̃ i Amáũ nixĩ —ngĩgürügü. Rü yexguma yemaxü̃ naxĩnügu ga Amáũ rü poraãcü norü muü̃maxã nanaxĩ̱xãchiãxẽ nape̱xewa ga ãẽ̱xgacü rü naxma̱xpe̱xewa.
7 Rü nüma ga Achuéru rü norü numaxã nayuxnagü rü yéma nüxna ninha ga yema ínachibüexü̃wa rü ãẽ̱xgacüpataa̱xtüwa nanha. Rü nüma ga Amáũ ga marü nüxü̃ nax nacuáxü̃ nax ãẽ̱xgacü tá namaxã naxueguxü̃ nax yama̱xgüaxü̃, rü yoxni Itépe̱xegu nayangücuchi rü ngĩxü̃ naca̱a̱xü̃ nax naétüwa nachogüxü̃ nax tama ãẽ̱xgacü namaxã naxueguxü̃ca̱x nax yama̱xgüaxü̃.
8 Rü yexguma napataa̱xtüwa natáegu̱xgu ga ãẽ̱xgacü rü wena nixücu nawa ga yema ucapu ga nawa nachibüexü̃, rü nüxü̃ nadau ga Amáũ ga Itéxü̃tagu nangücuchixü̃ rü nugaãcü nhanagürü: —Chope̱xewatama ngĩmaxã cumáxchaü̃ i nhaa cha̱xma̱x nawa ya daa chapata —nhanagürü. Rü yexgumatama Amáũxü̃ nidüxchiwegü namaxã ga yema naxchiru ga duü̃xü̃ imáxchaü̃xü̃ namaxã natüchiwegüxü̃.
9 Rü yexguma ga Arbóna ga ãẽ̱xgacüarü ngü̃xẽẽruxü̃ ixĩxü̃ rü nhanagürü: —Pa Cori Pa Ãẽ̱xgacüx, nhaa Amáũ rü duü̃xü̃güxü̃ nanaxüxẽxẽ i wüxi i wẽxnaxãchica i 22 métruarü ngãxü̃ i norü máchane nax ngẽmagu nawẽxnaxããxü̃ca̱x ya Marduquéu ga cuxü̃ ípoxü̃cü ga yexguma Bigatá rü Tére cuxü̃ ima̱xgüchaü̃gu. Rü ngẽma wẽxnaxãchica rü Amáũpataa̱xtüwa nangexma —nhanagürü ga Arbóna. Rü nüma ga ãẽ̱xgacü rü nanangãxü̃, rü nhanagürü: —¡Ngẽmagu peyawẽxnaxã̱x i Amáũ! —nhanagürü.
10 Rü nüma ga ãẽ̱xgacüarü duü̃xü̃gü rü yema nümatama ga Amáũ Marduquéuca̱x naxüxü̃ ga wẽxnaxãchicagu nanawẽxnaxãgü. Rü yexguma narüngüxmü ga ãẽ̱xgacü.
