Ester 8:1-17
8 Rü yematama ngunexü̃gu rü nüma ga ãẽ̱xgacü ga Achuéru rü naxma̱x ga Iténa nanaxãmare ga guma napata ga Amáũ ga Yudéugümaxã rüxuanüxü̃. Rü nüma ga ãẽ̱xgacü rü Marduquéuca̱x nangema rü yemaca̱x ãẽ̱xgacüxü̃tawa naxũ yerü ngĩma ga Ité rü nüxü̃ iyaxu nax ngĩnepü nane yixĩxü̃.
2 Rü yexguma ga nüma ga ãẽ̱xgacü rü ngĩxü̃ ínangaxüchi ga norü ãnera ga Amáũna ngĩxü̃ nayaxu̱xcü. Rü Marduquéuna ngĩxü̃ naxã. Rü ngĩma ga Ité rü Marduquéuxü̃ ixuneta nax namaxã inacuáxü̃ca̱x ga yema yemaxü̃gü ga Amáũarüchire̱x ixĩxü̃.
3 Rü nhu̱xũchi ngĩma ga Ité rü wenaxarü ãẽ̱xgacüxü̃tawa ixũ. Rü nape̱xegu iyangücuchi rü ixaxu. Rü nüxü̃ ica̱xaxü̃ nax ínapiãxü̃ca̱x ga yema mu ga Amáũ unagüxü̃ ga Yudéugüarü daixchiga nax yemaacü yanaxomarexü̃ca̱x.
4 Rü nüma ga ãẽ̱xgacü rü Itéétüguama nanawe̱xnagü ga norü úirumena̱xã. Rü yexguma ga ngĩma ga Ité rü nape̱xewa ichi, rü ngĩgürügü nüxü̃:
5 —Pa Ãẽ̱xgacüx, ngẽxguma chi aixcuma choxü̃ cungechaü̃xgu, rü aixcuma cuxca̱x namexgu i ngẽma cuxna naxca̱x chaca̱xaxü̃, rü chanaxwa̱xe i cunaxümatü i to i mu i nüxü̃ ixuxü̃ nax marü yanaxoxü̃ i ngẽma mu ga Amáũ unagüxü̃ nax chautanüxü̃gü i Yudéugüxü̃ nadaixü̃ca̱x i guxü̃ma i cuchixü̃anewa.
6 Rü ngẽmaca̱x taxucürüwa yaxna namaxã chaxĩnü i ngẽma chixexü̃ i chautanüxü̃maxã naxueguxü̃ nax nadaixchaü̃ãxü̃ —ngĩgürügü.
7 Rü yexguma ga nüma ga ãẽ̱xgacü ga Achuéru rü naxma̱x ga Itémaxã rü Yudéu ga Marduquéumaxã nüxü̃ nixu rü nhanagürü: —Chama rü marü cuxna chanaxã, Pa Itéx, ya yima Amáũpata. Rü nüma ga Amáũ rü marü chanamu nax nawẽxnaxãgüãxü̃ca̱x yerü nanaxunagü nax guxãma i pemax i Yudéugü pexü̃ nadaixchaü̃xü̃.
8 Rü nhu̱xmax rü pexü̃ chamu nax chauégagu penaxümatüxü̃ rü penaxunagüxü̃ i wüxi i to i mu i pexca̱x mexü̃ nax peétüwa nachogüxü̃. ¡Rü chorü ãnera i chauéga ngĩwa ngẽxmacümaxã penaxüéga! Erü wüxi i mupane i chauégagu unagüxü̃ rü chorü ãneraéga nawa ngóxü̃ rü taxucürüwama texé itayanaxoxẽxẽ —nhanagürü.
9 Rü yexgumatama naxca̱x nangema ga ãẽ̱xgacüarü poperaarü ümatüruü̃gü. Rü yema ngunexü̃ ga nagu naxümatüxü̃ rü meama norü tamaepü̱x ga tauemacü ga siwáü̃gu ãégacüarü 23 ga ngunexü̃gu nixĩ (yúriuarü 23). Rü Marduquéu rü yema poperaarü ümatüruü̃gümaxã nüxü̃ nixu nax nhuxãcü tá naxümatügüãxü̃ naxca̱x ga Yudéugü, rü naxca̱x ga wüxichigü ga ãẽ̱xgacü ga namaxã icua̱xgüxü̃ ga yema 127 ga Achuéruchixü̃anegü ga Ĩ́diaanewa ixügüxü̃ rü nhu̱xmata Echiopíaanewa nangu. Rü yema mupane rü wüxichigü ga nagawachigü naxümatü. Rü Yudéugügawa rü ta naxümatü.
10 Rü yema poperawa nango̱x ga naéga ga gumá ãẽ̱xgacü ga Achuéru rü norü ãneraéga rü ta nawa nango̱x. Rü nhu̱xũchi poperaarü nuruü̃gü ga ãẽ̱xgacüarü cowarugü ga iporaxüchixü̃gu ĩxü̃ namaxã nanuegü.
11 Rü yema poperawa rü nüma ga ãẽ̱xgacü rü guxü̃ma ga Yudéugüna naxãga nax nügü nanutaque̱xegüxü̃ca̱x nax nügütama ínapoxü̃güxü̃ca̱x rü nadaiaxü̃ca̱x ga guxü̃ma ga duü̃xü̃gü ga guxchaxü̃ namaxã üxü̃ rü noxrüxü̃ yaxĩxẽẽgüaxü̃ca̱x ga yema norü uanügüarü naanegü rü norü yemaxü̃gü.
12 Rü yematama ga ngunexü̃ ga Amáũ Yudéugüxü̃ nagu daixchaü̃xü̃gu rü yematama ngunexü̃gu nixĩ ga naxunetaxü̃ ga Marduquéuarü mu nax guxü̃wama Achuéruchixü̃anegüwa nügü nanutaque̱xegüxü̃ca̱x ga Yudéugü nax nügütama ínapoxü̃güxü̃ca̱x. Rü yema ngunexü̃ rü meama norü 12 ga tauemacü ga adágu ãégacüarü 13 ga ngunexü̃gu nangu (13 feweréru).
13 Rü yema muwa rü nüxü̃ nixu ta nax guxü̃anewa naxunagüxü̃ca̱x nax guxü̃ma ga duü̃xü̃gü nüxü̃ nacua̱xgüxü̃ca̱x rü nümagü ga Yudéugü rü ínamemaregüxü̃ca̱x nax norü uanügümaxã nügü nadaixü̃ca̱x rü nüxü̃ naporamaegüxü̃ca̱x.
14 Rü yema poperaarü nuruü̃gü rü paxama inaxĩãchi nagu ga yema ãẽ̱xgacüarü cowarugü ga iporaxüchixü̃ yerü yemaacü nanamu ga ãẽ̱xgacü. Rü yema mu rü Chuchã́arü ĩanewa rü ta naxunagü.
15 Rü yema ngunexü̃ ga nagu naxunagüxü̃ ga yema mu, rü nüma ga Marduquéu rü nagu nicu̱x ga ãẽ̱xgacüchiru ga cómüxü̃ rü yáuxü̃. Rü nügü natüãtü namaxã ga wüxi ga tüãtüruxü̃ ga líũchinaxca̱x ga dauracharaxü̃. Rü nügüeruwa nayanga̱xcuchi ga wüxi ga nga̱xcueruxü̃ ga úirunaxca̱x. Rü yemaacü ínaxũxü̃ ga ãẽ̱xgacüpatawa. Rü guxü̃ma ga duü̃xü̃gü ga Chuchã́cüã̱x rü tagaãcü nüxü̃ nicua̱xüxü̃gü.
16 Rü nüma ga Yudéugü rü poraãcü nataãxẽgü, rü guxü̃wama ga duü̃xü̃gü rü yema Yudéugüxü̃ nicua̱xüxü̃gü.
17 Rü guxü̃ma ga Achuéruchixü̃anegüwa rü ĩanegüwa ga ngextá ínanguxü̃wa ga yema mu ga ãẽ̱xgacü unagüxü̃, rü nüma ga Yudéugü rü poraãcü nataãxẽgü, rü nanaxüchigagü ga yema ngunexü̃. Rü muxü̃ma ga yema togü ga duü̃xü̃gü rü nügü nixugüe nax Yudéugü yixĩgüxü̃, yerü poraãcü yema Yudéugüxü̃ namuü̃e.