Ezequiel 9:1-11
9 Rü yema nhaxguwena rü nüxü̃ chaxĩnü ga wüxi ga naga ga tagaxü̃ ga cho̱xmaxchi̱xẽwa nhaxü̃: “Marü ínangugü i ngẽma tá naxca̱x íyaxüãchixü̃ ya yima ĩane nax nagu napogüexü̃ca̱x. Rü wüxichigü i ngẽma norü uanügüarü churaragü rü naxme̱xgu nayange ya naxne ya namaxã tá nadaiane ya yima ĩanearü duü̃xü̃gü”, nhaxü̃.
2 Rü nhu̱xũchi nüxü̃ chadau ga 6 ga yatügü ga guma Tupanapatagu chocuxü̃ nawa ga yema norü ĩã̱x ga dauxchitawaama üxü̃ ga nórchiwa. Rü wüxichigü ga yema yatü rü nayange ga wüxi ga ma̱xeruxü̃. Rü yemaarü ngãxü̃tanügu nixũchigü ga wüxi ga yatü ga líũchimaxã ãxchiruxü̃. Rü norü goyexü̃wa nayangacuchiwexü̃ ga norü ümatüruxü̃. Rü yema yatügü rü Tupanapatawa nichocu, rü yema ãmarearü guchicaxü̃ ga brṍchenaxca̱xü̃tawa nayachaxãchitanü.
3 Rü Tupanaarü üüne rü nüxna nayachü̱xãchi ga yema taxre ga ixãxpe̱xátüxü̃ ga noxri norü ngãxü̃wa nayexmaxü̃, rü Tupanapataarü ĩã̱xwaama naxũ. Rü nüma ga Cori ya Tupana rü naxca̱x naca ga yema yatü ga líũchimaxã ãxchiruxü̃ ga norü goyexü̃gu ümatüruxü̃ ingexü̃.
4 Rü nhanagürü nüxü̃: “¡Ẽcü, nagu ixũãgüchigü ya daa ĩane ya Yerucharéü̃ rü yaxüégacatü i guxü̃ma i ngẽma duü̃xü̃gü i nhaa ĩanearü chixexü̃gagu ngechaü̃güxü̃ rü ngúxü̃ ingegüxü̃!” nhanagürü.
5 Rü yemawena nüxü̃ chaxĩnü ga Cori ya Tupana nax yema togü ga yatügüxü̃ nhaxü̃: “¡Rü ngẽma yatüwe pexĩxü̃tanü nawa ya daa ĩane! Rü guxü̃ma i ngẽma duü̃xü̃gü i ngeégacatüxü̃ ¡rü penada̱i̱x! ¡Rü tauxü̃táma nüxü̃ pengechaxü̃ rü bai tá i pexü̃́ nax nangechaü̃tümüxü̃güxü̃!
6 ¡Rü chapatawa tá ipenaxügü nax penadaixü̃ rü guxü̃táma pedai rü yaxguã̱xgü, rü ngextü̱xüxü̃gü, rü paxü̃gü, rü buxü̃gü, rü ngexü̃gü! ¡Notürü taxũtáma nüxü̃ pedáu i ngẽma ãégacatüxü̃!”, nhanagürü. Rü yemaacü inanaxügüe nax nadaiaxü̃ ga yema yaxguã̱xgü ga Tupanapatamaxã icua̱xgüxü̃.
7 Rü yemawena rü nüma ga Cori ya Tupana rü yema yatügüxü̃ namu rü nhanagürü nüxü̃: “¡Rü nagu pichocu ya yima chapata rü yuexü̃maxã penaxãũãchixẽxẽ! Rü duü̃xü̃gü i yuexü̃maxã penapaxẽxẽ i naa̱xtü!” nhanagürü. Rü nüma ga yema yatügü rü ínachoxü̃ rü inanaxügüe ga nax nadaiaxü̃ ga yema ĩanecüã̱x ga duü̃xü̃gü.
8 Rü yema ínaxügüyane rü chaxicatama íchayaxü. Rü yexguma ga chama rü nhaxtüanegu chanangücuchi rü poraãcü changechaü̃ãcüma aita chaxü rü nhachagürü: “Pa Corix, rü nhu̱xmax nax yima ĩane ya Yerucharéü̃cüã̱xgümaxã nax cunuxü̃ ¿rü tá cunadaixü̃ i ngẽma noxretama i Iraéutanüxü̃ i ngẽ́ma yaxügüxü̃?” nhachagürü.
9 Rü nüma ga Cori ya Tupana rü choxü̃ nangãxü̃ga rü nhanagürü: “Ngẽma Iraéuanecüã̱xgü rü ngẽma Yudáanecüã̱xgüarü pecádu rü nataxüchi. Rü ngẽma nachixü̃ane rü máetagüxü̃maxã nanapá. Rü yima ĩane ya Yerucharéü̃wa rü norü duü̃xü̃gü rü chixeãcü nügümaxã inacua̱xgü. Rü nüma nagu naxĩnüegu rü marü nüxna chixũ i ngẽma nachixü̃ane, rü ngẽmaca̱x tama nüxü̃ chadau i ngẽma naxügüxü̃.
10 Notürü taxũtáma choxü̃́ nangechaü̃tümüxü̃ i ngẽma duü̃xü̃gü, rü nüxna tá chaca naxca̱x ga yema nhuxãcü chixri nax namaxẽxü̃”, nhanagürü.
11 --
