Jeremias 1:1-19
1 Rü nhaa nixĩ ga Tupanaarü ucu̱xẽ ga Yeremíamaxã nüxü̃ yaxuxü̃. Rü nüma ga Yeremía rü chacherdóte ga Irichía nane nixĩ. Rü ĩane ga Anatógu naxãchiü̃ ga Bẽyamítanüxü̃arü naanewa.
2 Rü yexguma Amú nane ga Yochía rü marü 13 ga taunecü ãẽ̱xgacü yixĩxgu ga Yudáanewa, rü nüma ga Tupana rü Yeremíamaxã nidexa.
3 Rü yexgumarüxü̃ ta Yeremíamaxã nidexa ga Cori ya Tupana ga yexguma Yochía nane ga Yoachĩ́ ãẽ̱xgacü ixĩxgu ga Yudáanewa. Rü yemaacü namaxã nidexa nhu̱xmata nai ga Yochía nane ga Yedequía rü 11 ga taunecü yanguxẽxẽã nax ãẽ̱xgacü yixĩxü̃ ga Yudáanewa. Rü yexguma gumá taunecüarü 5 ga tauemacüwa nanguxgu nixĩ ga Yerucharéü̃cüã̱x ga duü̃xü̃gü ga to ga nachixü̃anewa nagagüaxü̃.
4 Nüma ga Cori ya Tupana rü chamaxã nidexa rü nhanagürü choxü̃:
5 “Rü yexguma taxũta cuxü̃ chango̱xẽẽgu rü woetama marü chama cuxü̃ chaxuneta nax choxrü quixĩxü̃. Rü naxü̃pa nax cubuxü̃ rü chama rü marü cuxü̃ chayaxu rü nachixü̃anegüarü orearü uruxü̃ cuxü̃ chixĩxẽxẽ”, nhanagürü.
6 Rü yexguma ga chamax rü chanangãxü̃ rü nhachagürü: “Dücax, Pa Corix, Pa Tupanax, chama rü changextü̱xüxüchi rü tama nüxü̃ chacua̱x nax nhuxãcü chidexaxü̃”, nhachagürü.
7 Notürü nüma ga Cori ya Tupana rü choxü̃ nhanagürü: “¡Tauxü̃́ i nüxü̃ quixuxü̃ nax cungextü̱xüxü̃! Rü chanaxwa̱xe i chama cuxü̃ íchamuxü̃wa nax cuxũxü̃. Rü tá nüxü̃ quixu i ngẽma chama cuxü̃ chamuxü̃ nax nüxü̃ quixuxü̃.
8 ¡Rü tauxü̃́ i texéxü̃ cumuü̃xü̃! Erü chama rü tá chacuxü̃tagu nax cuxü̃ íchapoxü̃xü̃ca̱x. Rü chama ya Cori ya Tupana nixĩ i cumaxã nüxü̃ chixuxü̃ i nhaa chorü ore”, nhanagürü.
9 Rü nhu̱xũchi nüma ga Cori ya Tupana rü chauã̱x ningṍgü rü nhanagürü choxü̃:
10 “Rü nhu̱xmax i chama rü cuxna chanaxã i chorü ore nax ngẽmamaxã cuyaxucu̱xẽgüxü̃ca̱x i ngẽma ãẽ̱xgacügü rü duü̃xü̃gü i guxü̃ i nachixü̃anecüã̱xgü. Rü ngẽxguma tama naga naxĩnüegu i ngẽma chorü ore i namaxã nüxü̃ quixuxü̃, rü chama rü choxü̃́ nangexma i pora nax chanamuxü̃ca̱x i norü uanügü nax nagu napogüexü̃ca̱x i norü ĩanegü rü ínawoxü̃ãxü̃ca̱x i norü duü̃xü̃gü rü ngẽmaãcü iyanaxoxü̃ca̱x i nachixü̃anegü. Notürü ngẽma naga ĩnüexü̃ i chorü ore i namaxã nüxü̃ quixuxü̃ rü ngẽxgumarüxü̃ ta choxü̃́ nangexma i pora nax wena ichanachixẽẽxü̃ rü chanatachigaxẽẽxü̃”, nhanagürü ga Tupana.
11 --
12 --
13 Rü nüma ya Cori rü wena chamaxã nidexa rü choxna naca rü nhanagürü: “¿Ta̱xacü nixĩ i nüxü̃ cudauxü̃?” nhanagürü. Rü chama rü chanangãxü̃ rü nhachagürü: “Nüxü̃ chadau ya wüxi ya buetare ya idocacü rü nórchiguama baãcuchaü̃cü i Yudáarü naanewa”, nhacharügü.
14 Rü yexguma ga nüma ga Cori ya Tupana rü chamaxã nüxü̃ nixu rü nhanagürü: “Ngẽma taxü̃ i guxchaxü̃ i nórchiwaama ixügüxü̃ rü tá nüxna nangu i guxü̃táma i duü̃xü̃gü i nua Yudáanewa maxẽxü̃.
15 Rü chama ya Cori ya Tupana rü aixcuma nüxü̃ chixu rü tá naxca̱x changema i guxü̃ma i nachixü̃anegüarü ãẽ̱xgacügü i nórchiwaama ngẽxmagüxü̃. Rü nua Yudáanewa tá naxĩ. Rü ngẽma ãẽ̱xgacügü rü Yerucharéü̃ca̱x íxücuxü̃gu tá nananu i norü tochicaxü̃gü nape̱xegu ya yima ĩanearü poxeguxü̃ rü nape̱xegu ya yima náigü ya ĩanegü ya Yudáanewa ngẽxmagüne.
16 Rü ngẽma tá nixĩ i ngẽma poxcu i namaxã chaxueguxü̃ i ngẽma duü̃xü̃gü i chixexü̃ ügüxü̃ rü choxna ixĩgachixü̃. Erü nüxü̃ nicua̱xüxü̃gü i ngẽma tupanachicüna̱xãgü i to i nachixü̃anecüã̱xgü ügüxü̃ rü ãmare naxca̱x ínagugü.
17 ¡Rü nhu̱xmax i cumax, rü inachi rü cugü naporaxẽxẽ, rü ngẽma duü̃xü̃gütanüwa naxũ rü namaxã nüxü̃ yarüxu i ngẽma chama cumaxã nüxü̃ chixuxü̃! ¡Rü tauxü̃́ i nüxü̃ cumuü̃xü̃! Erü ngẽxguma taxũtáma ngẽma cumaxã nüxü̃ chixuxü̃ãcüma cunaxü̱xgux, rü chama rü tá ngẽma duü̃xü̃güpe̱xewa cuxü̃ chamuü̃xẽxẽ.
18 Rü nhu̱xmax i chamax, rü pora cuxna chaxã. Rü nhama wüxi ya ĩane ya meama ípoxegunerüxü̃ rü wüxi ya caxta ya férunaxca̱xrüxü̃, rü nhama poxeguxü̃ i brṍchenaxca̱xrüxü̃ cuxü̃ chixĩxẽxẽ nax ngẽmaãcü tama cumuü̃ãcüma cuxunagüxü̃ i chorü ore nape̱xewa i Yudáanecüã̱xarü ãẽ̱xgacügü rü chacherdótegü rü guxü̃ma i duü̃xü̃gü i Yudáanewa ngẽxmagüxü̃.
19 Rü nümagü rü tá cumaxã nanueama, notürü taxũtáma cuxü̃ narüporamaegü. Erü chama rü tá chacuxü̃tagu rü cuxna chadau rü cuxü̃ íchapoxü̃. Rü chamatama ya Cori ya Tupana nixĩ i nüxü̃ chixuxü̃ i nhaa chorü ore.”
