Jeremias 19:1-15
19 Rü nüma ya Cori ya Tupana rü nhanagürü choxü̃: “¡Ngĩxca̱x nataxe i wüxi i tü̃xü̃ rü nhu̱xũchi naxca̱x nangema i nhuxre ya yimá ĩanearü ãẽ̱xgacügü rü chacherdótegüarü ãẽ̱xgacügü!
2 ¡Rü nhu̱xũchi Béü̃-inóü̃arü ngatewa naxũ rü daa ĩanearü ĩã̱x i ngẽma ngatexü̃waama üxü̃wa namaxã nüxü̃ ixu i ngẽma ore i tá cumaxã nüxü̃ chixuxü̃!
3 ¡Rü nhacurügü tá: ‘Pa Yudáanecüã̱xarü Ãẽ̱xgacügü rü Pa Yerucharéü̃cüã̱xgüx, rü iperüxĩnüe ya yimá tórü Tupana ya guxãétüwa ngẽxmacüarü ore i nhaxü̃: Rü nhaa naanewa tá chanamu i wüxi i taxü̃ i guxchaxü̃ rü guxãtáma ya yíxema nüxü̃ ĩnüchigaxe rü tá taba̱i̱xãchi!
4 Erü ngẽma Iraéutanüxü̃gü i Yudáanewa ngẽxmagüxü̃, rü choxna nixĩgachi rü nhaa ngatexü̃wa togümare i tupanaca̱x pumárate̱xe nigugü, rü ngẽmaãcü nüxü̃ nicua̱xüxü̃ i ngẽma tupananetagü i tama pexca̱x ixĩxü̃, rü bai i perü o̱xigüca̱x, rü bai i Yudáanecüã̱xarü ãẽ̱xgacügüca̱x. Rü yema tupananetape̱xewa tüxü̃ ínagu ga guxema naxacügü ga taxuxü̃ma ga chixexü̃ ügǘxe.
5 Rü yema ãmarearü guchicaxü̃gü ga naxügüxü̃wa rü naxacüxe tüxü̃ ínagu naxca̱x ga Baá. Rü ngẽma nacüma i chixexü̃ rü tama chama chanamu rü taguma namaxã nüxü̃ chixu rü bai i nhuxgu chauãẽwa ínguxü̃ nixĩ ga yema.
6 Rü ngẽmaca̱x rü tá nawa nangu i ngunexü̃gü i nhaa nachica i ngatexü̃ rü marü taxũtáma Topéarü ngate i Béü̃-inóü̃gu naxãéga. Rü tá ngatexü̃ i Máetachicagu naxãéga. Rü chamatama ya Cori ya Tupana nixĩ i nüxü̃ chixuxü̃ i ngẽma ore.
7 Rü nhaa ngatexü̃gu tá inayarüxo i ngẽma Yudáanecüã̱xgü, rü Yerucharéü̃cüã̱xgü nagu rüxĩnüexü̃. Rü norü uanügüme̱xẽgu tá chanayixẽxẽ nax nadaiaxü̃ca̱x, rü ngẽmaãcü ngurucugü rü ẽxchagü rü aigü namaxã ãwemügüxü̃ca̱x.
8 Rü ngẽmaãcü ya daa ĩane rü tá wüxi i chianexü̃xü̃ chananguxuchixẽxẽ. Rü ngẽxguma duü̃xü̃gü ngẽmaxü̃ nadaugügu rü tá naba̱i̱xãchie. Rü guxãma ya texé ya nawa üpetüxe rü namaxã tá taba̱i̱xãchie nax nhuxãcü nachixexü̃.
9 Rü daa ĩane ya Yerucharéü̃wa tá chanamugü i norü uanügü rü tá nüxü̃ ínachomaeguãchi. Rü ngẽmaca̱x taxucürüwa ngextá naxĩ ya yimá ĩanecüã̱x. Rü ngẽmagagu taiya tá naxca̱x ínangu rü ngẽmaca̱x i ngẽma duü̃xü̃gü rü düxwa tá naxacüegü tüxü̃ nangõ̱xgü, rü nügütátama nangõ̱xcue’, nhacurügü tá nüxü̃.
10 Rü nhaa orexü̃ quixuxguwena ¡rü yapuxẽxẽ i ngẽma tü̃xü̃ nape̱xegu i ngẽma ãẽ̱xgacügü i cuxü̃ ümücügüxü̃!
11 ¡Rü nüxü̃ nhacurügü tá: ‘Cori ya Tupana ya guxãétüwa ngẽxmacü rü nhanagürü: Rü daa ĩane rü tá chanapuxãchixẽxẽ nhama wüxi i tü̃xü̃ ngĩxü̃ ipuãchixẽẽxü̃rüxü̃ i taxuacüma wena ngĩxü̃ imexẽẽcürüxü̃! Rü nüma i duü̃xü̃gü rü tá nhaa ngatexü̃ i Topégu nanata̱xgü i norü yuexü̃gü erü marü taxugu nanata̱xgüéga.
12 Rü ngẽmaãcü tá namaxã chanaxü ya daa ĩane rü norü duü̃xü̃gü. Rü ngẽma nax Topéxü̃ naxoexü̃rüxü̃ rü duü̃xü̃gü rü tá nüxü̃ naxoe ya daa Yerucharéü̃ nagagu i ngẽma muxũchixü̃ i yuexü̃ i nagu ta̱xgüxü̃.’ Rü chamatama ya Cori ya Tupana nixĩ i nüxü̃ chixuxü̃ i ngẽma ore.
13 Rü ngẽma ngatexü̃ i Topérüxü̃ rü chape̱xewa rü nixãũãchi ya yima ĩpatagü ya Yerucharéü̃cüã̱x rü yima Yudáanecüã̱xarü ãẽ̱xgacüpatagü rü ngẽma ĩa̱xtügü ga nawa woramacurigüca̱x pumárate̱xe yagugüxü̃, rü guma wíũ ga norü ãmarexü̃ yexma nabagücü naxca̱x ga to ga norü tupananetagü”, nhanagürü ya Tupana.
14 Rü yemawena rü nüma ga Yeremía rü ínixũ ga Topéwa ga Cori ya Tupana namaxã idexaxü̃wa. Rü Tupanapataa̱xtügu nayachi rü yéma guxü̃ma ga duü̃xü̃gümaxã nidexa rü nhanagürü nüxü̃:
15 “Rü Cori ya tórü Tupana ya guxãétüwa ngẽxmacü, rü nhanagürü: ‘Rü daa ĩanewa rü guxü̃nema ya norü ngaicamagune ya ĩanegüwa tá chanamu i guxü̃ma i ngẽma poxcu i pemaxã nüxü̃ chixuxü̃ erü tama naga pexĩnüechaü̃ i ngẽma chorü ore’ ”, nhanagürü ya Tupana.
