Jeremias 20:1-18
20 20:1-2 Rü nüma ga Pachúru ga Imé nane ga tupaucaarü ãẽ̱xgacü ga chacherdóte ixĩcü, rü yexguma nüxü̃ naxĩnügu ga yema ore ga Yeremía nüxü̃ ixuxü̃, rü norü duü̃xü̃güxü̃ namu nax yayauxgüaxü̃ca̱x rü nacua̱i̱xgüãxü̃ca̱x. Rü Bẽyamígu ãégaxü̃ ga ĩã̱xü̃tawa yexmaxü̃ ga poxcuruü̃wa nayachotaparagü ga tupaucaarü ngaicamána.
2 Nüü̃ nadau 20:1
3 Rü moxü̃ãcütama rü nüma ga Pachúru rü norü duü̃xü̃güxü̃ namu nax Yeremíaxü̃ íyachogüparagüxü̃. Rü yexguma ga nüma ga Yeremía rü nhanagürü nüxü̃: “Nüma ya Cori ya Tupana rü nanaxüchicüxü i cuéga, rü Magúru-Michabígu cuxü̃ naxüéga. (Rü ngẽma naéga rü ‘yatü i muü̃ãcü maxü̃xü̃’ nhaxü̃chiga nixĩ.)
4 Erü nüma ya Cori ya Tupana rü nhanagürü: ‘Rü muü̃ tá cuxca̱x rü cumücügüca̱x íchanguxẽxẽ. Rü cuxetümaxã tá nüxü̃ cudau nax cupe̱xegu taramaxã cumücügüxü̃ nadaixü̃ i norü uanügü. Rü ngẽma Yudáanecüã̱x rü Babiróniaanecüã̱x ya ãẽ̱xgacüme̱xẽgu tá nayi. Rü nüma rü tá Babiróniaanewa nanagagü ya daa ĩanecüã̱x i duü̃xü̃gü norü puracütanüxü̃ rü ngẽxma tá nayadai.
5 Rü ngẽxgumarüxü̃ ta rü curü uanügüna tá chanana i guxü̃ma ya daa ĩanearü diẽrugü rü norü ngẽmaxü̃gü i tatanüxü̃ rü guxü̃ma i diẽru i Yudáanecüã̱xarü ãẽ̱xgacüarü ixĩxü̃ nax Babiróniaanewa nanaãxü̃ca̱x.
6 Rü cumax, Pa Pachúrux, rü Babiróniaanewa tá cuxü̃ nagagü wüxigu namaxã i cuxacügü rü cuxma̱x rü cumücügü. Rü ngẽxma tá nixĩ i cuyuxü̃, rü ngẽxma tá cuxü̃ nata̱xgüxü̃ i cuxma̱x rü guxü̃ma i cumücügü ga dora ga orexü̃ namaxã quixuxü̃’ ”, nhanagürü ga Yeremía.
Yeremía rü Tupanamaxã narüxutaga
7 Rü nüma ga Yeremía rü Tupanamaxã narüxutaga rü nhanagürü nüxü̃: “Pa Corix, Pa Tupanax, cuma rü choxü̃ cuwomüxẽxẽ, erü chamaxã icuxunetachire̱x nax choxü̃ curüngü̃xẽẽxü̃. Rü cumax rü choxü̃ cumuama nax namaxã nüxü̃ chixuxü̃ca̱x i curü ore erü cuxrütama ngúchaü̃ nixĩ i ngẽma, rü tama i choxrü. Notürü i nhu̱xmax rü daa ĩanearü cugüruxü̃ chixĩ, rü chagu nidauxcüraxü̃gü.
8 Rü guxü̃guma i ngẽxguma chidexagu rü chanaxunagü nax cuma rü tá cunadaixü̃ i daa ĩanecüã̱x. Rü ngẽmaca̱x guxü̃guma ta̱xacü chamaxã nixugüe rü choxü̃ nacugüe erü nüxü̃ chixu i curü ore.
9 Rü ngẽxguma chi nagu charüxĩnügu nax nüxü̃ charüxoxü̃ nax nüxü̃ chixuxü̃ i curü ore, rü chi ngẽma curü ore i chorü aixepena ngẽxmaxü̃, rü nhama üxü ya choxü̃ iguxü̃nerüxü̃ nixĩ, rü ngẽma norü pora rü nhu̱xmata cha̱u̱xchina̱xãwa nangu. Rü yaxna taa̱x namaxã chaugü chaxĩnüxẽxẽ nax tama nüxü̃ chixuxü̃ca̱x i ngẽma curü ore, notürü tama namaxã chapora.
10 Notürü guxü̃wama nüxü̃ chaxĩnü i chauchiga nax yadexagüxü̃ rü choxü̃ naxãxũnegüxü̃ i duü̃xü̃gü rü ngẽmaca̱x chamuü̃. Rü nhanagürügü: ‘Rü cuxü̃ tá ítaxuaxü̃gü’, nhanagürügü. Rü woo i ngẽma tama chamücü ixĩgüxü̃ rü choxü̃ nangugügü, rü ínanangu̱xẽẽgü nax ngürüãchi chixexü̃ chaxüxü̃. Rü nhanagürügü: ‘Rü nügütátama nixĩ i chixexü̃gu nanguxẽẽxü̃, rü ngẽxguma i yixema rü tá tayayauxgü rü yixema inaxwa̱xexü̃ tá namaxã taxü’, nhanagürügü.
11 Notürü i cumax, Pa Corix, Pa Tupanax, rü chauxü̃tawa cungexma, rü chorü poxü̃ruxü̃ quixĩ rü guxü̃xü̃ curüporamae. Rü ngẽma chawe ingẽxü̃tanüxü̃ rü cuxme̱xgu tá nayi, rü tagutáma choxü̃ narüporamaegü. Rü ngẽma norü ĩnügü rü chixri tá nüxü̃́ ínanguxuchi rü tá naxãnee. Rü ngẽma chixexü̃ i naxügüxü̃ rü tagutáma nüxna inarüxo.
12 Pa Corix, Pa Tupana ya Guxãétüwa Ngẽxmacüx, cuma rü aixcuma nüxü̃ cucua̱x nax mea cunangugüxü̃ i guxü̃ma i norü maxü̃ i wüxichigü i duü̃xü̃gü. ¡Rü choxü̃ nüxü̃ nadauxẽxẽ nax nhuxãcü tá cunapoxcuxü̃ i ngẽma duü̃xü̃gü! Erü cuxme̱xgu nixĩ i chanaxüxü̃ i ngẽma guxchaxü̃gü i nagu charüxĩnüxü̃.
13 Rü nhu̱xmax rü tá chorü wiyaemaxã cuxü̃ chicua̱xüxü̃ rü moxẽ cuxna chaxã, Pa Cori Pa Tupanax. Rü woo chaturaxgu, notürü i cuma rü choxü̃ ícupoxü̃ nüxna i chorü uanügü”, nhanagürü ga Yeremía.
14 --
15 --
16 --
17 --
18 --
