Jeremias 24:1-10
24 Rü Babiróniaanecüã̱xarü ãẽ̱xgacü ga Nabucudonochó rü Babiróniaanewa nanaga ga Yudáanecüã̱xarü ãẽ̱xgacü ga Yeconía ga Yoachĩ́ nane ixĩcü. Rü wüxigu namaxã yéma nanaga ga Yeconíaarü ngü̃xẽẽruü̃gü ga ãẽ̱xgacügü, rü norü puracütanüxü̃gü. Rü yemawena ga Tupana rü choxü̃ nüxü̃ nadauxẽxẽ ga taxre ga pexchi ga fígumaxã ixããcucü ga Tupaucaarü to̱xma̱xtagu nucü.
2 Rü wüxi ga guma pexchiwa rü nayexmagü ga fígu ga mexü̃ ga nüxíra idauxü̃. Rü guma nai ga pexchiwa rü nayexma ga fígugü ga poraãcü ichixexü̃ rü taxuacüma imúxü̃.
3 Rü nüma ga Cori ya Tupana rü choxna naca rü nhanagürü: “Pa Yeremíax ¿ta̱xacü yixĩxü̃ i ngẽma nüxü̃ cudauxü̃?” nhanagürü. Rü chama rü chanangãxü̃ rü nhachagürü: “Nüxü̃ chadau i ori̱x i fígu i mexechixü̃ rü togü i chixexüchixü̃ i taxuacüma ingṍxü̃”, nhachagürü.
4 Rü yexguma ga nüma ga Cori ya Tupana rü nhanagürü choxü̃:
5 “Chama ya Cori ya perü Tupana rü nhachagürü: ‘Rü ngẽma fígu i mexü̃rüü̃ãcü tá nüxü̃ chadau i ngẽma duü̃xü̃gü i Iraéutanüxü̃ i Yudáanecüã̱xgü ga nhaa naanewa íchawoxü̃xü̃ rü Caudéutanüxü̃güchixü̃anewa (Babiróniaane) chamugüxü̃. Rü ngẽmagü rü tá namaxã chataãxẽ rü tá nüxü̃ charüngü̃xẽxẽ.
6 Rü ngẽma naanewa rü nüxna tá chadau rü nhaa nachixü̃aneca̱x tá chanawoeguxẽxẽ. Rü nua tá nüxü̃ charüngü̃xẽxẽ rü tagutáma wena chanadai. Rü nua tá chanangexmagüxẽxẽ rü tagutáma wena íchanawoxü̃.
7 Rü cua̱x tá nüxna chaxã nax ngẽmaãcü choxü̃ yacua̱xãchigüxü̃ca̱x nax chama chixĩxü̃ ya Cori ya Tupana. Rü nümagü rü chorü duü̃xü̃gü tá nixĩgü, rü chama rü tá norü Tupana chixĩ erü guxü̃ i norü maxü̃maxã tá cha̱u̱xca̱x nawoegu.
8 Notürü i ngẽma Yudáanecüã̱xarü ãẽ̱xgacü i Yedequía rü norü ngü̃xẽẽruü̃gü i ãẽ̱xgacügü, rü ngẽma Yerucharéü̃cüã̱xgü i tama íchoxü̃xü̃, rü ngẽma duü̃xü̃gü i Eyítuanewa maxẽxü̃, rü ngẽma fígu i chixexü̃ i taxuacüma ingṍxü̃rüü̃ãcü tá namaxã chixĩ nax nüxü̃ chaxoxü̃.
9 Rü poraãcü tá chanapoxcue i ngẽma duü̃xü̃gü rü ngẽmaca̱x i ngẽma togü i nachixü̃anecüã̱xgü rü ngẽxguma ngẽmaxü̃ nadaugügu rü tá poraãcü namaxã naba̱i̱xãchie. Rü ngẽma nachixü̃anegü i nawa nabuxmüxü̃wa, rü duü̃xü̃gü rü tá nagu nidauxcüraxü̃gü rü nüxü̃ nacugüe rü nüxü̃ naxoe rü chixexü̃ namaxã nixugüe.
10 Rü ngẽma tá naxca̱x íchanguxẽẽxü̃ i ngẽma Yerucharéü̃wa yaxügüxü̃, rü ngẽxma tá nixĩ nax nadaiaxü̃, rü taiya naxca̱x íngugüxü̃ nhu̱xmatáta taxuxü̃táma íyaxü nawa i nhaa naane ga nüxna chaxãxü̃, rü norü o̱xigüna chaxãxü̃’ ”, nhanagürü ga Cori ya Tupana.
