Jeremias 38:1-28
38 Rü ãẽ̱xgacüarü ngü̃xẽẽruü̃gü ga Chepatía ga Matáü̃ nane rü Yedaría ga Pachúru nane rü Yucá ga Cheremía nane, rü Pachúru ga Maraquía nane rü Yeremíaxü̃ naxĩnüe ga yexguma duü̃xü̃güpe̱xewa nhaxgu:
2 “Nüma ya Cori ya Tupana rü nhanagürü: ‘Rü texé ya ĩanegu rüxã́ũxe rü tá tayu nagu i dai, rüe̱xna taiyamaxã tayu, rüe̱xna da̱xaweanemaxã tayu. Notürü yíxema inhaxe rü Babiróniaanecüã̱xgüna tügü yaxãxe rü tá tügü ítapoxü̃ nax tama tayuxü̃ca̱x.’
3 Rü nüma ya Cori ya Tupana rü nhanagürü: ‘Daa ĩane rü Babiróniaanecüã̱xarü ãẽ̱xgacüarü churaragüme̱xẽgu tá nangu. Rü nüma rü tá nagu nachocu, rü taxúetáma ítanapoxü̃’ ”, nhaxgu ga Yeremía.
4 Rü yexguma yemaxü̃ naxĩnüegu ga yema ãẽ̱xgacüarü ngü̃xẽẽruü̃gü, rü nhanagürügü ãẽ̱xgacüxü̃: “Pa Ãẽ̱xgacüx, name nixĩ i tayama̱x i nhaa yatü erü ngẽma dexa i nüxü̃ yaxuxü̃maxã rü nananuexẽxẽ i duü̃xü̃gü rü tórü churaragü i nua tórü ĩanewa yaxügüxü̃. Rü nhaa yatü rü tama daa ĩanearü mexü̃ca̱x nadau, notürü norü chixexü̃ca̱x nixĩ i nadauxü̃”, nhanagürügü.
5 Rü nüma ga ãẽ̱xgacü ga Yedequía rü nanangãxü̃ rü nhanagürü: “Marü name nax ngẽma yatümaxã penaxüxü̃ i ngẽma pema penaxwa̱xexü̃. Chama rü taxucürüwa pexna chanachu̱xu i ngẽma”, nhanagürü.
6 Rü yexguma ga nümagü ga norü ngü̃xẽẽruü̃gü rü Yeremíaxü̃ niyauxgü rü wüxi ga ãxmaxü̃ ga dauxü̃taepataa̱xtüwa yexmaxü̃gu nayata̱xcuchigü. Rü yema ãxmaxü̃ rü ãẽ̱xgacü nane ga Maquíaarü nixĩ. Rü wüxi ga napana̱xãmaxã ínanachü̱xüegü. Rü yema ãxmaxü̃ rü nangearü dexáã̱x notürü naxãcharamaü̃ rü yemaca̱x yéma narüwa̱x ga Yeremía.
7 38:7-8 Rü ãẽ̱xgacüpatawa nayexma ga wüxi ga Echiopíaanecüã̱x ga ãẽ̱xgacü nüxü̃ ngechaü̃cü ga Ebemeréquigu ãégacü. Rü nüma rü nüxü̃ nacuáchiga nax ãxmaxü̃gu Yeremíaxü̃ yata̱xcuchigüxü̃. Rü yema ga ngunexü̃gu rü ãẽ̱xgacü rü Yerucharéü̃arü ĩã̱x ga Bẽyamígu ãégaxü̃wa duü̃xü̃gümaxã nangutaque̱xe. Rü yemaca̱x nüma ga Ebemeréqui rü yéma naxũ nax ãẽ̱xgacümaxã nüxü̃ nax yanaxuxü̃ca̱x ga yema Yeremíamaxã üpetüxü̃.
8 Nüü̃ nadau 38:7
9 Rü nhanagürü nüxü̃: “Pa Chorü Ãẽ̱xgacüx, rü ngẽma Yeremíamaxã naxügüxü̃ i ngẽma yatügü rü poraãcü nachixe erü ãxmaxü̃gu nayata̱xcuchigü. Rü nhu̱xmax rü tá taiyamaxã ngẽxma nayu erü marü wixgutaa̱x nataxu i õna i nua ĩanewa”, nhanagürü.
10 Rü yexgumatama nüma ga ãẽ̱xgacü rü Ebemeréquixü̃ namu nax 30 ga yatügü yagagüxü̃ca̱x nax Yeremíaxü̃ ínamuxũchigüxü̃ca̱x ga ãxmaxü̃wa naxü̃pa ga nax nayuxü̃.
11 Rü nüma ga Ebemeréqui rü nayagagü ga 30 ga yatügü. Rü ãẽ̱xgacüpatawa yexmaxü̃ ga ucapu ga naxchiru nagu nucuxü̃wa naxũ, rü yéma we̱xáta nayaxu rü ínayana nax yema Yeremíaca̱x napana̱xã ínachü̱xüegüxü̃ca̱x.
12 Rü nüma ga Ebemeréqui rü Yeremíana naca rü nhanagürü: “¡Ngẽma wexágümaxã cugü napépacütüxü̃ nax tama cuxü̃ napi̱xẽẽxü̃ca̱x i napana̱xã!” Rü nüma ga Yeremía rü yemamaxã nügü napépacütüxü̃.
13 Rü yema yatügü ga Ebemeréqui yéma gagüxü̃ rü naxca̱x nanachü̱xüegü ga napana̱xã rü yemagu nanatúnagügü. Rü yexguma ínanguxuchiguwena rü nüma ga Yeremía rü poxcupataxü̃ã̱xtügu narüxã̱ũ̱x.
Ãẽ̱xgacü ga Yedequía rü Yeremíaca̱x nangema
14 Rü nüma ga ãẽ̱xgacü ga Yedequía rü Tupanaarü orearü uruxü̃ ga Yeremíaca̱x nangema. Rü tupaucawa namaxã nangutaque̱xe nawa ga norü tamaepü̱x ga ĩã̱x. Rü yéma rü nüma ga ãẽ̱xgacü rü nhanagürü nüxü̃: “Nhu̱xma rü tá cuxna chaca, rü chanaxwa̱xe nax chamaxã aixcumaxü̃ quixuxü̃ nax choxü̃ cungãxü̃xü̃”, nhanagürü.
15 Rü nüma ga Yeremía rü nanangãxü̃ rü nhanagürü: “Pa Ãẽ̱xgacüx, ngẽxguma chi aixcuma ixĩxü̃ i oremaxã cuxü̃ changãxü̃gu, rü cuma rü chi cunamu nax choxü̃ yama̱xgüxü̃ca̱x. Rü ngẽxgumachi wüxi i ucu̱xẽ cuxna chaxãxgu rü taxũchima chauga cuxĩnü”, nhanagürü.
16 Notürü nüma ga ãẽ̱xgacü ga Yedequía rü bexma nüxicatama Yeremíamaxã nhanagürü: “Yimá tüxü̃ maxẽxẽẽcü ya Cori ya Tupanaégagu cumaxã nüxü̃ chixu rü taxũtáma texéxü̃ chamu nax cuxü̃ yamáxü̃ca̱x, rü taxũtáma ngẽma cuxü̃ ima̱xgüchaü̃xü̃me̱xẽgu cuxü̃ changuxẽxẽ”, nhanagürü.
17 Rü nüma ga Yeremía rü Yedequíaxü̃ nangãxü̃ rü nhanagürü: “Nüma ya Iraéutanüxü̃arü Tupana ya guxü̃étüwa ngẽxmacü rü nhanagürü: ‘Ngẽxguma chi cugü nüxna cuxãxgu ya yimá Babiróniaanearü ãẽ̱xgacüarü churaragüarü ãẽ̱xgacügü, rü cuma rü guxü̃ma i cutanüxü̃gü rü tá pemaxẽ, rü daa ĩane rü taxũtáma nayagugü.
18 Notürü ngẽxguma taxũtáma cugü cuxãxgu nüxna i ngẽma Babiróniaanecüã̱xarü churaragü, rü nümagü rü tá nagu nachocu ya daa ĩane rü tá nayagugü. Rü cuma rü taxucürüwa tá quinha’ ”, nhanagürü.
19 Rü nüma ga ãẽ̱xgacü ga Yedequía nanangãxü̃ rü nhanagürü: “Chama rü nüxü̃ chamuü̃ i ngẽma Yudéugü i Babiróniaanecüã̱xtanüwa choü̃xü̃, erü ngẽxguma naxme̱xgu changuxgu rü tá choxü̃ nacua̱i̱xgü rü ngẽmaãcü ngúxü̃ tá choxü̃ ningexẽẽgü”, nhanagürü.
20 Rü nüma ga Yeremía rü nanangãxü̃ rü nhanagürü: “Notürü, Pa Ãẽ̱xgacüx, rü taxũtáma naxme̱xgu cungu. Rü name nixĩ, Pa Ãẽ̱xgacüx, i naga cuxĩnü ya Cori ya Tupanaarü ore i cumaxã nüxü̃ chixuxü̃. Rü ngẽxguma naga cuxĩnügu rü taxuxü̃táma cuxü̃ nangupetü, rü tá cumaxü̃.
21 Rü nüma ya Cori ya Tupana rü marü choxü̃ nüxü̃ nadauxẽxẽ, Pa Ãẽ̱xgacüx, i ngẽma tá cuxü̃ ngupetüxü̃ ega cuma taxũtáma cugü icuxãxgu nüxna i Babiróniaanecüã̱xarü churaragü.
22 Rü guxü̃táma i ngẽma ngexü̃gü i cupatawa ngẽxmagüxü̃, Pa Ãẽ̱xgacüx, rü tá nayagagü rü Babiróniaanecüã̱xgüarü churaragüarü ãẽ̱xgacügüna tá nanamugü. Rü nümagü i ngẽma ngexü̃gü rü norü ngechaü̃maxã tá cumaxã nanue rü nhanagürügü tá cuxü̃: ‘Dücax, Pa Ãẽ̱xgacüx, rü ngẽma curü ngü̃xẽẽruü̃gü i namaxã cuxãmücügüxü̃ rü cuxca̱x rü mexü̃ i cumücügü nixĩgü, rü marü wüxi i taxü̃ i womüxẽxẽ cumaxã naxügü rü cuxü̃ narüyexeragü rü ngẽmaãcü chixexü̃gu cuxü̃ nanguxẽẽgü rü tama aixcuma cuxü̃ ínapoxü̃gü’, nhanagürügü tá cuxü̃ i ngẽma ngexü̃gü.”
23 Rü nüma ga Yeremía rü ãẽ̱xgacüxü̃ nhanagürüchigü: “Rü guxü̃ma i ngẽma ngexü̃gü rü cunegü, Pa Ãẽ̱xgacüx, rü tá Babiróniaanecüã̱xgüna nanamugü. Rü cumax, Pa Ãẽ̱xgacüx, rü taxũtáma quinha, rü Babiróniaanecüã̱xgüarü ãẽ̱xgacüna tá cuxü̃ namugü. Rü daa ĩane rü tá nayagugü”, nhanagürü.
24 Rü nüma ga ãẽ̱xgacü ga Yedequía rü Yeremíaxü̃ nangãxü̃ rü nhanagürü: “Ngẽxguma aixcuma cugü cungechaü̃xgu ¡rü taxũtáma texémaxã nüxü̃ quixu i nhaa chamaxã nüxü̃ quixuxü̃!” nhanagürü.
25 --
26 --
27 --
28 Rü nüma ga Yeremía rü yema ãẽ̱xgacüpataa̱xtüwa yexmaxü̃ ga poxcuchicaxü̃wa nayexma nhu̱xmata nawa nangu nax Yerucharéü̃ rü Babiróniaanecüã̱xgüme̱xẽgu nanguxü̃.
