Joel 2:1-32
2 --
2 --
3 --
4 --
5 --
6 --
7 --
8 --
9 --
10 --
Nüma ya Cori ya Tupana rü nüxü̃́ nangechaü̃tümüxü̃ i duü̃xü̃gü
11 Rü nüma ya Cori ya Tupana rü nape̱xegu nixũ i ngẽma munügü i nhama muxũchixü̃ i churaragürüxü̃ ixĩxü̃. Rü nüma ya Tupana rü tagaãcü nanamu i ngẽma munügü, rü nüma rü naga naxĩnüe. Rü ngẽma nax namuxũchixü̃ rü taxucürüwama texé tayaxugü. Rü poraãcü naxãũcüma i nhaa ngunexü̃ i nagu Tupana tüxü̃ poxcuexe rü taxúema tapora nax ítayachaxãchixẽẽxü̃.
12 Notürü nüma ya Cori ya Tupana rü nhanagürü: “¡Guxü̃ma i perü ngúchaü̃maxã cha̱u̱xca̱x pewoegu nhamarüta pexü̃ íchanangu̱xẽxẽ! ¡Rü cha̱u̱xca̱x pexaureegü rü pegümaxã pengechaxü̃gü rü pexauxe!” nhanagürü.
13 Rü ngẽmaca̱x i nhu̱xmax rü name nixĩ i naxca̱x pewoegu ya Cori ya Tupana. Notürü tama nanaxwa̱xe i pegüchirugu pegáugüe nax ngẽmaãcü penawéxü̃ i perü ngechaü̃ erü ngẽma nüma nanaxwa̱xexü̃ nixĩ nax penaxüchicüüxü̃ i perü maxü̃. Erü nüma ya Cori ya Tupana rü namecüma rü nüxü̃́ pengechaü̃tümüxü̃, rü yaxna pemaxã naxĩnü, erü pexü̃ nangechaü̃. Rü nüma rü ínamemare nax íyachaxãchixẽẽãxü̃ i ngẽma poxcu i pemaxã naxueguxü̃.
14 Rü ngẽxguma chi aixcuma naxca̱x pewoegu̱xgux rü bexmana tá ínayachaxãchi nax pexü̃ napoxcuexü̃, rü tá pexü̃ narüngü̃xẽẽ nax wena naxügüxü̃ca̱x i perü trígu rü úwagü nax ngẽmamaxã nüxü̃ pecua̱xüü̃güxü̃ca̱x.
15 Rü pemax, Pa Chacherdótegüx ¡rü yima ma̱xpǘne ya Tupanapata nawa ngexmanewa peyacue ya perü cornéta rü naxca̱x peca i duü̃xü̃gü! ¡Rü penaxunagü nax aureãcüma nayumüxẽgüxü̃ca̱x!
16 ¡Rü penangutaque̱xexẽxẽ i ngẽma Tupanaarü duü̃xü̃gü, Pa Chacherdótegüx, nax Tupanape̱xewa peyamexẽẽgüxü̃ca̱x i yaxü̃gü, rü buxü̃gü rü woo i ngẽma buxü̃gü i maiexü̃! ¡Rü ngẽxgumarüxü̃ ta i ngẽma ngexwaca̱x ingĩgüxü̃, rü norü ucapuwa ípenachoxü̃xẽxẽ!
17 ¡Rü pexauxe, Pa Chacherdótegüx i Tupanaarü Puracümaxã Icua̱xgüxex, rü ãmarearü guchicaxü̃pe̱xewa nhapegü i perü yumüxẽwa: “Nüxü̃ nangechaxü̃ i nhaa curü duü̃xü̃gü, Pa Torü Cori ya Tupanax! ¡Rü tauxü̃́ i cunangexrüxü̃ nax taxúema nüxü̃ cugüexü̃ca̱x! ¡Rü tauxü̃́ i cunangexrüxü̃ nax togü i nachixü̃anecüã̱xgü namaxã icuáxü̃ca̱x! ¡Rü tauxü̃́ i cunangexrüxü̃ i ngẽma tama yaxõgüxü̃ nax curü duü̃xü̃güxü̃ nacugüexü̃ nhaxü̃maxã: ‘¿Ngexcü ya yimá perü Tupana?’ nhaxü̃maxã!”
18 Rü nhu̱xũchi ga nüma ga Cori ya Tupana rü nüxü̃́ nangechaü̃tümüxü̃gü yerü poraãcü nüxü̃ nangechaü̃.
19 Rü nüma rü nhanagürü nüxü̃: “Rü tá pexna chanaxã i trígu rü wíũ rü chíxü̃ nhu̱xmatáta mea pexü̃́ yangu. Rü marü taxũtáma wena pexü̃ changexrü nax pexü̃ nacugüexü̃ca̱x i ngẽma togü i nachixü̃anecüã̱xgü i tama choxü̃ cua̱xgüxü̃.
20 Rü tá pexna chayaxĩgachixẽxẽ i ngẽma munügü ga nórchiwaama ne ĩxü̃, rü tá ngextá ínachianexü̃wa chanamugü. Rü ngẽma nape̱xegu ĩxü̃ rü naxtaxa i ngearü maxü̃ã́xü̃wa tá chanawoü̃. Rü ngẽma wixweama ügüxü̃ rü Már i Mediterániuwa tá chanawoü̃. Rü ngẽxma tá niyixe rü tá ngẽ́ma nayianegü. Rü ngẽmaãcü tá poraãcü pexü̃ charüngü̃xẽẽ”, nhanagürü ga Cori ya Tupana.
21 Rü ngẽmaca̱x, Pa Duü̃xü̃gü rü Guxü̃ma i Ta̱xacü i Nhama i Naanewa Maxẽxü̃x, ¡rü petaãxẽgü rü tauxü̃́ i pemuü̃exü̃! Erü nüma ya Cori ya Tupana rü taxü̃ i mexü̃gü tá pexca̱x naxü.
22 ¡Rü tauxü̃́ i pemuü̃exü̃ Pa Naexü̃güx! Erü ngẽma pebüchitaxü̃ rü tá wena narüxügü rü nabaca. Rü ngẽma nanetügü i ori̱xgü rü tá nixo. Rü tá namuxũchi i figugü rü úwagü.
23 ¡Rü petaãxẽgü, Pa Yerucharéü̃cüã̱xgüx! ¡Rü namaxã petaãxẽgü ya Cori ya Tupana! Yerü pexca̱x nanapuxẽxẽ ga yexguma meama nawa nanguxgu nax mucüca̱x napuxẽẽãxü̃ rü taunecüca̱x napuxẽẽãxü̃ yema noxri mea napuxẽẽã̱xgurüxü̃.
24 Rü ngẽmaãcü tá mea pexü̃́ nixo i trígu rü poraãcü tá nata ya perü wíũ rü chíxü̃.
25 Rü nüma ya Cori ya Tupana rü nhanagürü pexü̃: “Chama rü tá pexü̃́ chanatáeguxẽxẽ ga yema penetügü ga nhuxre ga taunecü pexü̃́ nax nangṍõxü̃ ga yema munügü ga yéma chamugüxü̃.
26 Rü nhu̱xmax rü tá meatáma pechibüe i pemax nhu̱xmatáta mea pengãxpütüwegü. Rü choxü̃ tá pecua̱xüxü̃gü naxca̱x ga yema taxü̃ ga mexü̃ ga pexca̱x chaxüxü̃. Rü tagutáma wena texé pexü̃ taxãneexẽxẽ Pa Chorü Duü̃xü̃güx.
27 Rü pemax, Pa Iraéutanüxü̃güx, rü tá nüxü̃ pecua̱xãchitanü nax chama ya Cori rü aixcuma petanüwa changexmaxü̃ rü chaxicatama yixĩxü̃ i perü Tupana chixĩxü̃. Rü tagutáma wena texé pexü̃ taxãneexẽxẽ, Pa Chorü Duü̃xü̃güx.
Tupana rü nhama i naanewa tá nanamu i Naãxẽ i Üünexü̃
28 Rü nhaawena rü tá guxü̃ma i duü̃xü̃güca̱x núma chanamu i Chauãxẽ i Üünexü̃. Rü ngẽma penegü rü pexacügü rü tá chorü orexü̃ nixugüe. Rü ngẽma yaxü̃ i duü̃xü̃gü rü tá nixãnegügü. Rü ngẽma ngextü̱xüxü̃gü rü tá nüxü̃ nadaugü i ẽxü̃guxü̃ i taguma texé nüxü̃ dauxü̃.
29 Rü woo i perü puracütanüxü̃ rü pexü̃taxü̃gü rü tá nüxna chananguxẽxẽ i Chauãxẽ i Üünexü̃ i ngẽma ngunexü̃gügu.
30 Rü dauxü̃wa rü tá chanango̱xẽxẽ i ta̱xacü i taguma texé nüxü̃ dauxü̃. Rü nhama i naanewa rü tá poraãcü nagü inaba, rü tá nixa ya ĩanegü rü taxü̃ i caxixü̃ tá naxĩnagüema.
31 Rü yimá üa̱xcü rü tá nixo rü yimá tauemacü rü nhama nagürüxü̃ tá naduema naxü̃pa i ngẽma ngunexü̃ i nagu tá ínanguxü̃ i chorü poxcu i nhama i naanewa. Rü ngẽma ngunexü̃ rü tá poraãcü naxãũcüma.
32 Notürü guxãma ya texé ya aixcuma chauga ĩnüxe rü taxũtáma tapoxcue. Erü yima ma̱xpǘne ya Chiã́ũ ya Yerucharéü̃ nawa ngexmanewa tá nango̱x ya yimá Maxẽxẽẽruxü̃ yema chama ya Cori ya Tupana pemaxã ichaxunetaxü̃rüxü̃. Rü yíxema chama tüxü̃ chidexechixe rü taxũtáma tapoxcue”, nhanagürü ya Cori ya Tupana.
