Jonas 1:1-17
1 Rü nüma ga Cori ya Tupana rü Amitái nane ga Yónamaxã nidexa rü nhanagürü:
2 —¡Ẽcü inaxũãchi rü nawa naxũ ya yima ĩane ya taxü̃ne ya Níniwe rü norü duü̃xü̃gümaxã nüxü̃ ixu rü tá chanapoxcue! Erü chauxü̃tawa nanguchiga nax poraãcü chixexü̃ naxügüxü̃ —nhanagürü.
3 Notürü nüma ga Yóna rü tama Tupanaga naxĩnü, rü naxca̱x nadau nax nhuxãcü naxcha̱xwa yaxũxü̃. Rü yemaca̱x Yópearü türewa naxũ, rü yexma nüxü̃ inayangau ga wüxi ga wapuru ga ixũãchichaxüne ga Tárchiawa ũxũne. Rü gumawa nanaxütanü nax yexma yaxũxü̃ca̱x.
4 Notürü nüma ga Cori ya Tupana rü wüxi ga buanecü ga tacü inanaxǘxẽxẽ ga yexguma már-arü ngãxü̃tüwa nanguxgu. Rü guma wapuru rü nhama yapuxchaü̃xü̃rüxü̃ nixĩ, yerü nataxüchi ga yuape.
5 Rü yema norü duü̃xü̃gü ga guma wapuru rü poraãcü namuü̃e, rü yemaca̱x wüxichigü norü tupananetaarü ngü̃xẽẽca̱x ínaca. Rü yema nax iyangüãchixü̃ca̱x ga guma wapuru rü ínanawoxü̃ ga guxü̃ma ga yema naãcu. Notürü nüma ga Yóna rü guma wapuruarü aixepegu naxücu rü yéma nayape.
6 Rü nüma ga wapuruarü capitáü̃ rü yéma Yóna ípexü̃wa naxũ rü nhanagürü nüxü̃: —¿Ta̱xacü ngẽ́ma cuxü Pa Pexwa̱xexü̃x? ¡Írüda rü curü Tupanana naca! Rü bexmana nüxü̃́ ingechaü̃tümüxü̃gü nax tama iyuexü̃ca̱x —nhanagürü.
7 Rü yoxni ga yema norü duü̃xü̃gü ga guma wapuru rü nügümaxã nhanagürügü: —Ngĩxã tananhanagü i wüxi i diẽru nax ngẽmaãcü nüxü̃ icuáxü̃ca̱x nax texégagu yixĩxü̃ nax guxchaxü̃ tüxü̃ ngupetüxü̃ —nhanagürügü. Rü nananhanagügü rü Yónagu nangu nax nagagu yixĩxü̃ ga yema nüxü̃ ngupetüxü̃.
8 Rü nümagü rü nüxna nacagüe rü nhanagürügü nüxü̃: —¡Tomaxã nüxü̃ ixu rü ta̱xacüca̱x nixĩ i taxca̱x ínanguxü̃ i nhaa guxchaxü̃! ¿Rü ta̱xacü nixĩ i curü puracü i naxca̱x nua cuxũxü̃? ¿Rü ngextácüã̱x quixĩ? ¿Rü ta̱xacü nixĩ i cuchixü̃ane? ¿Rü ta̱xacürü duü̃xü̃ quixĩ? —nhanagürügü.
9 Rü nüma ga Yóna rü nanangãxü̃ rü nhanagürü: —Chama rü Iraéutanüxü̃ chixĩ. Rü Cori ya Tupana i dauxü̃guxü̃ i naanearü üruxü̃ rü már-arü üruxü̃ rü nhama i naanearü üruü̃axü̃́ nixĩ i chayaxõxü̃ rü nüxü̃ chicua̱xüüxü̃ —nhanagürü.
10 Rü nhu̱xũchi nüma ga Yóna rü meama guma wapuruarü duü̃xü̃gümaxã nüxü̃ nixu nax Cori ya Tupanacha̱xwa nax yaxũxü̃. Rü yexguma yemaxü̃ naxĩnüegu ga nümagü, rü nüxü̃ nadaugü ga yema már ga nax yexeraãcü nayuapexü̃, rü poraãcü namuü̃e. Rü nüxna nacagüe rü nhanagürügü:
11 —¿Tü̱xcüü̃ ngẽmaãcü cunaxü? ¿Rü ta̱xacü tá cumaxã taxüexü̃ i nhu̱xmax nax íyachaxãchixü̃ca̱x ya yimá yuape? —nhanagürügü.
12 Rü nüma ga Yóna rü nanangãxü̃ rü nhanagürü: —¡Ẽcü choxü̃ ípetáe nachixüwa i nhaa már! Rü ngẽxguma rü tá ínayachaxãchi ya yuape. Rü chama rü nüxü̃ chacua̱x nax chaugagu yixĩxü̃ ya daa buanecü ya tacü i nuxã pexü̃ naxüxü̃ —nhanagürü.
13 Rü nümagü ga yema wapuruarü duü̃xü̃gü rü poraãcü inixãgü nax naxãnacüwa nangugüxü̃ca̱x, notürü tama yéma nangugü yerü ga már rü yexeraãcü poraãcü nayuape.
14 Rü yexguma ga nümagü rü Cori ya Tupanana nacagüe rü nhanagürügü: “Pa Cori Pa Tupanax ¡Tauxü̃́ i nuxã toxü̃ cuyuexẽẽxü̃ nagagu i nhaa yatü! Rü ngẽxguma chi taxuxü̃ma i chixexü̃ naxü̱xgux rü ¡tauxü̃́ i cuyatoguãchixẽẽxü̃ nax nayuxü̃! Erü cumax, Pa Corix, Pa Tupanax, rü cunaxü i ta̱xacü i cuma cunaxwa̱xexü̃ãcüma”, nhanagürügü.
15 Rü yema nhagüguwena rü márwa Yónaxü̃ natáegü, rü ínayachaxãchi ga yuape.
16 Rü yexguma yemaxü̃ nadaugügu ga yema wapuruarü duü̃xü̃gü rü poraãcü Cori ya Tupanaxü̃ nicua̱xüxü̃gü rü naxca̱x nayama̱xgü ga wüxi ga naxü̃na rü nayagugü. Rü Tupanamaxã inaxunetagü nax naga tá naxĩnüexü̃.
17 Rü yoxni ga nüma ga Cori ya Tupana rü yéma nanamu ga wüxi ga choxni ga taxüchixü̃ nax Yónaxü̃ ínagaxü̃ca̱x. Rü nüma ga Yóna rü tamaepü̱x ga ngunexü̃ rü tamaepü̱x ga chütaxü̃ yema choxni ga taxüchixü̃ãnüwa nayexma.
