Juda 1:1-25
1 Pa Jaxõgüxü̃ i Guxü̃wama Ngẽxmagüxü̃x, chama i Juda nixĩ i pexca̱x chanaxümatüxü̃ i nhaã popera. Rü chama nixĩ i Tiagueneẽ chiĩxü̃, rü Ngechuchu ja Cristuarü duü̃xü̃ chixĩ. Rü pexca̱x chanaxümatü i pema na Tanatü ja Tupana pexü̃ idexechixü̃ rü pexü̃ ngechaü̃xü̃ rü Ngechuchu ja Cristu pexna dauxü̃.
2 Rü pexca̱x chajumuxẽ na guxü̃guma Tupanaãxü̃́ pengechaü̃tümüü̃güxü̃ca̱x, rü pexü̃ nataãẽxẽẽgüxü̃ca̱x, rü pexü̃ nangechaü̃xü̃ca̱x.
Duü̃xü̃gü i doramaã ngúexẽẽtaegüxü̃chiga
3 Pa Chaueneẽgü ja Pexü̃ Changechaü̃güxex, noxri rü poraãcü choxü̃́ nangúchaü̃ na pexca̱x chanaxümatüxü̃ nachiga i ngẽma maxü̃ i taguma gúxü̃ i tüxü̃́ ngẽxmaxü̃. Notürü nhu̱xma na petanügu nachocuxü̃ i nhuxre i duü̃xü̃gü i íjatoxẽẽgüchaü̃xü̃ i Tupanaãrü ore, rü ngẽmaca̱x chanaxwa̱xe na pexca̱x chanaxümatüxü̃ na pexü̃ chaxucu̱xẽxü̃ca̱x rü ípenapoxü̃xü̃ca̱x i ngẽma ore i aixcuma ixĩxü̃ ga nuxcüma wüxicanatama Tupana norü duü̃xü̃güna ãxü̃.
4 Rü ngẽma duü̃xü̃gü i pexü̃ nawomüxẽẽãcüma petanügu chocuxü̃ nixĩ i pexü̃ ngúexẽẽxü̃ rü nhaxü̃:
“Tupana rü namecümaxü̃chi rü ngẽmaca̱x tãũxü̃táma pexü̃ napocue ega woo chixri pemaxẽgu”, nhaxü̃. Rü ngẽxgumarüü̃ ta tama nüxü̃ nacua̱xgüchaü̃ ja tórü Cori ja Ngechuchu ja Cristu ja tórü jora ixĩcü. Notürü ngẽma duü̃xü̃gü i ngẽmaãcü maxẽxü̃, rü woetama nuxcümama Tupanaãrü ore i ümatüxü̃wa rü marü nüxü̃ nixu na Tupana tá napocuexü̃.
5 Rü woo na marü nüxü̃ pecuáxü̃ notürü pexna nüxü̃ chacua̱xãchixẽẽchaü̃ na nhuxãcü namaã nangupetüxü̃ ga jema nuxcümaxü̃güxü̃ ga Judéugü ga Muĩséwe rüxĩxü̃. Rü tórü Cori ja Tupana rü poraãcü nüxü̃ narüngü̃xẽẽ na Ejituanewa ínanguxü̃xü̃ca̱x, notürü jixcaama rü nanadai ga jema tama naga ĩnüẽchaü̃xü̃.
6 Rü ngẽxgumarüü̃ ta pexna nüxü̃ chacua̱xãchixẽẽ na nhuxãcü namaã nangupetüxü̃ ga jema dauxü̃cü̱̃ã̱x ga orearü ngeruü̃gü ga noxri ixüünechiréxü̃ notürü jixcaama nagagutama pecadu ügüxü̃. Rü jemaca̱x ga Tupana rü ẽãnexü̃wa nanawogü, rü ngẽxma nanapocue nhu̱xmatáta nawa nangu i ngẽma ngunexü̃ i nagu tüxü̃ jacagüxü̃.
7 Rü jexgumarüü̃ ta nüxü̃ nangupetü ga guma ĩãnegü ga Chodoma rü Gomora rü guma ĩãnegü ga norü ngaicamagugüne. Jerü guma ĩãnecü̱̃ã̱xgü, rü poraãcü chixri nügümaã namaxẽ, rü jemaca̱x ga Tupana rü üxümaã ínanagu. Rü jemaãcü inajanaxoxẽẽ ga guma ĩãnegü na jemawa tüxü̃ nüxü̃ nacua̱xẽẽxü̃ca̱x na nangẽxmaxü̃ i wüxi i pocu naxca̱x i guxü̃ma i ngẽma chixexü̃ ügüxü̃.
8 Notürü woo ngẽmaxü̃ na nacua̱xgüxü̃ i ngẽma idoraexü̃ i petanügu chocuxü̃, notürü norü chixexü̃gu narüxĩnüẽãma. Rü poraãcü chixri nügümaã namaxẽ, rü tama tórü Cori ja Tupanaga naxĩnüẽchaü̃, rü chixri Tupanaãrü orearü ngeruü̃gü i dauxü̃cü̱̃ã̱xchigagu nidexagü.
9 Rü ngẽma duü̃xü̃gü rü naẽchitamare nidexagü rü tama Tupanaãrü orearü ngeruü̃ ga Miguéurüü̃ nügüna nadau i norü orewa. Rü guma Miguéu rü woo guxü̃ i Tupanaãrü orearü ngeruü̃gü i dauxü̃cü̱̃ã̱xãrü ãẽ̱xgacü na jiĩxü̃, notürü tama ṉg̱oxo ga Chatanámaã naguxchiga ga jexguma Muĩséxü̃neca̱x jéma nügümaã japoragatanücüüxgu, na nüxü̃ nacua̱xgüxü̃ca̱x na texéarü tá jiĩxü̃ ga Muĩséxü̃ne. Notürü nüma ga Miguéu rü nhanagürümare:“Cori ja Tupana tá cuxü̃ naxoregü”,
nhanagürümare.
10 Notürü ngẽma duü̃xü̃gü i doramaã i petanügu chocuxü̃, rü tama Tupanaxü̃ nacua̱xgüãcüma chixri nachiga nidexagü, rü chixri norü orearü ngeruü̃gü i dauxü̃cü̱̃ã̱xchiga nidexagü. Rü nhama naẽxü̃gürüü̃ naxü̃neãrü ngúchaü̃wemare narüxĩ, rü ngẽmaãcü namaxẽ. Notürü ngẽma chixexü̃ i naxügüxü̃ca̱x, rü Tupana tá nanapocue.
11 Rü wüxi i ngechaü̃xü̃chi nixĩ naxca̱x i ngẽma duü̃xü̃gü erü ngẽmaãcü namaxẽ. Rü Caĩ́ ga naẽneẽxü̃ imáxü̃rüü̃ nixĩgü. Rü ãẽ̱xgacü ga Barã́ũrüü̃ dĩẽruca̱x chixexü̃ naxügü. Rü Corérüü̃ tama Tupanaga naxĩnüẽchaü̃, rü ngẽmaca̱x Tupana tá nanapocue.
12 Rü ngẽxguma tupaucawa tórü Coriarü õnaca̱x pengutaque̱xegügu, rü wüxi i ãnexü̃chi nixĩgü. Erü narücutanüxü̃, rü poraãcü nachibüe rü naxaxegü, rü nügüguxicatama narüxĩnüẽ. Rü nhama caixanexü̃ i ngearü pucüã́xü̃ i paanexü̃ẽ́tüwa üpetüxü̃ notürü tama nanetüxü̃ ixaijagüxü̃rüü̃ taxuwama nime. Rü ngẽma nanetügü i ngẽxguma norü owa nanguxgu rü tama ixoxü̃rüü̃ nixĩgü. Rü nhama naĩgü i guxü̃ma i naxchúma̱xãmaã napuxü̃ rü juxuchixü̃rüü̃ taxuwama nime i ngẽma duü̃xü̃gü.
13 Rü nhama juãpe i taxü̃ i norü chixixü̃ i ãũãchixü̃ naxãnacüwa jataxü̃rüü̃ nixĩgü, erü poraãcü chixexü̃ naxügü. Rü nhama woramacurigü ja nu ne naxĩmarecürüü̃ nixĩgü. Notürü Tupana rü marü namaã nanaxuegu na ngẽma waanexü̃chixü̃wa guxü̃gutáma nawogüãxü̃.
14 1:14-15 Rü nuxcümaxü̃cü ga Enoqui ga Adã́ũtaa ixĩcü rü ngẽma duü̃xü̃güchiga nidexa ga jexguma Tupana jadexaxẽẽgu, rü nhanagürü:“Rü nüxü̃ chadau ja Cori ja Tupana na muxũchixü̃ i norü orearü ngeruü̃gü i dauxü̃cü̱̃ã̱xmaã núma ũcü na duü̃xü̃güna nac̱axü̃ca̱x i norü maxü̃chiga rü napocueãxü̃ca̱x i guxü̃ma i ngẽma duü̃xü̃gü i chixexü̃ ügüxü̃ rü namaã guxchigagüxü̃”,nhanagürü.
15 Nüü̃ nadau 1:14
16 Rü ngẽma duü̃xü̃gü rü ṯacüca̱x idexagüwa̱xexü̃chixü̃ nixĩgü, rü ṯoguã̱xü̃ ixuxwa̱xegüxü̃chixü̃ nixĩgü. Rü noxrütama ngúchaü̃ca̱x daugüxü̃ nixĩgü. Rü nügü icua̱xüü̃güxü̃ nixĩgü. Rü nümaxü̃ meã tümachiga nidexagüneta ja duü̃xẽgü, na tümaxü̃tawa ṯacü na najauxgüxü̃ca̱xmare.
Juda najaxucu̱xẽgü ga jema jaxõgüxü̃
17 Pa Chaueneẽgü ja Pexü̃ Changechaü̃güxex, ¡nüxna pecua̱xãchie ga jema ore ga pemaã nüxü̃ jaxugügüxü̃ ga tórü Cori ja Ngechuchu ja Cristuarü ngúexü̃gü ga imugüxü̃!
18 Rü nümagü rü nhanagürügü pexü̃:“Ngẽxguma nagúxchaü̃gu i naãne rü tá nangẽxma i duü̃xü̃gü i tá nüxü̃ cugüexü̃ i Tupanaãrü ore rü noxrütama ngúchaü̃ i chixexü̃gumare maxẽxü̃”,
nhanagürügü pexü̃.
19 Rü ngẽma duü̃xü̃gü nixĩ i pexü̃ itojexü̃ na tama wüxigu perüxĩnüẽxü̃ca̱x rü tama meã pejaxõgüxü̃ca̱x. Rü nümagü rü naxü̃neãrü ngúchaü̃we narüxĩ, rü tama nawa nangẽxma i Tupanaãẽ i Üünexü̃.
20 Notürü pemax, Pa Chaueneẽgü ja Pexü̃ Changechaü̃güxex, ¡rü pegü perüngü̃xẽẽ̱x na guxü̃guma jexeraãcü nagu pexĩxü̃ rü pejaxõgüxü̃ i ngẽma ore i üünexü̃ i marü pejauxgüxü̃! ¡Rü guxü̃guma Tupanaãẽ i Üünexü̃ãrü ngü̃xẽẽmaã pejumuxẽgü!
21 ¡Rü meã pegüna pedaugü na Tupana naxwa̱xexü̃ãcüma pemaxẽxü̃ca̱x rü pexü̃ nangechaü̃ãcüma pexü̃ nangü̃xẽẽxü̃ca̱x! ¡Rü meã ípenaṉg̱uxẽẽx i ngẽma ngunexü̃ i nagu tá núma naxũxü̃ ja tórü Cori ja Ngechuchu ja Cristu na nüxü̃́ ingechaü̃tümüü̃güãcüma tüxna naxããxü̃ca̱x i maxü̃ i taguma gúxü̃!
22 ¡Rü pexü̃́ nangechaü̃tümüü̃gü i ngẽma tama aixcuma jaxõgüxü̃, rü nüxü̃ perüngü̃xẽẽgü na meã jaxõgüãxü̃ca̱x!
23 Rü togü, ¡rü paxa norü pecaduwa ípenajaxuchi na namaxẽxü̃ca̱x rü tama jima üxü ja Tupana mexẽẽ́negu janatauxexü̃ca̱x! Rü woo ngẽma tama jaxõgüchaü̃xü̃, ¡rü pexü̃́ nangechaü̃tümüü̃gü! ¡Notürü pegüna pedaugü na tama norü chixexü̃gu pej̱ixü̃ca̱x! Rü ngẽma norü chixexü̃ i pexca̱x mexcüraxü̃xü̃, ¡rü nüxü̃ pexo!
Tupanaxü̃ jacua̱xüü̃ãcüma inajacua̱xẽẽ ga norü popera
24 1:24-25 Rü jima wüxitama ja Tupana ja tórü Maxẽxẽẽruü̃ ixĩcü, rü nüxü̃́ nangẽxma i pora na pexna nadauxü̃ca̱x na tama pecadugu pej̱ixü̃ca̱x. Rü nüxü̃́ nangẽxma i pora na ijanaxoxẽẽãxü̃ca̱x i guxü̃ma i perü chixexü̃gü na petaãẽgüãcüma nügüpe̱xewa pexü̃ nagagüxü̃ca̱x i ngextá ãẽ̱xgacü íjiĩxü̃wa. Rü ngẽmaca̱x tanaxwa̱xe i tórü Cori ja Ngechuchu ja Cristuégagu Tupanaxü̃ ticua̱xüü̃gü, erü nüma rü guxü̃ãrü jexera name rü napora, rü guxü̃ẽ́tüwa nangẽxma, rü guxü̃maã inacua̱x. Rü jemaãcü nixĩ ga nuxcümaxü̃chima, rü ngẽmaãcü nixĩ i nhu̱xmax, rü guxü̃gutáma ngẽmaãcü jiĩxü̃.Rü nuãma pexna,Juda
25 Nüü̃ nadau 1:24
