Luca 12:1-59
12 Rü joxni jexma nangutaque̱xegü ga muxũchixü̃ ga duü̃xü̃gü. Rü jema na namuxũchixü̃ca̱x rü düxwa nügücutüwa ningagüetanü ga duü̃xü̃gü. Rü Ngechuchu inanaxügü ga norü ngúexü̃gümaãxĩra na jadexaxü̃, rü nhanagürü: —¡Pexuãẽgü naxca̱x i Parichéugü! Erü duü̃xü̃güpe̱xewa meã namaxẽneta notürü naãẽwa rü chixexü̃gu narüxĩnüẽ.
2 —Notürü guxü̃ma i ṯacü i wüxie cúãcü üxü̃ rü tá nango̱xoma. Rü guxü̃ma i ṯacü iicúxü̃ rü jixcüra rü tá duü̃xü̃gü nüxü̃ nacua̱xgüama.
3 —Rü ngẽmaca̱x guxü̃ma i ngẽma ore i ẽãnexü̃wa cúãcü nüxü̃ peixuxü̃ rü jixcüra rü tá nango̱xoma rü guxü̃ i duü̃xü̃gü tá nüxü̃ naxĩnüẽ. Rü ngẽma ore i ucapuarü aixepewa cúãcü nüxü̃ peixuxü̃, rü jixcüra rü guxãpe̱xewa tá nüxü̃ nixugügü i duü̃xü̃gü.
Name nixĩ na Tupanaxü̃ imuü̃ẽxü̃
4 —Rü ngẽmaca̱x i pemax, Pa chamücügüx, rü pemaã nüxü̃ chixu rü ¡tama nüxü̃ pemuü̃ẽ i ngẽma duü̃xü̃gü i pexü̃ daixchaü̃xü̃! Erü taxünexü̃xĩcatama nima̱xgü, notürü taxucürüwama taãẽxü̃ nima̱xgü.
5 —Notürü pemaã tá nüxü̃ chixu na texéxü̃ tá na pemuü̃ẽxü̃. ¡Nüxü̃ pemuü̃ẽ ja Tupana! Erü nüma nüxü̃́ nangẽxma i pora na jamáãxü̃ca̱x i pexene, rü ngẽxgumarüü̃ ta na napocuãxü̃ca̱x i peãẽ i ngextá ṉg̱oxogüxü̃ ínapocuxü̃gu. ¡Rü jimaxü̃ tá nixĩ i pemuü̃ẽxü̃!
6 —¿Tama e̱xna taxretachinü i dĩẽruxacügu namaã petaxe i wüxime̱ẽ̱xpü̱x i werixacügü? Notürü Tupana rü tama tüxü̃ inajarüngüma ja jíxema werixacüã̱xgü, rü bai ja wüxi.
7 —Rü woo i pejaegü rü Tupana nüxü̃ nacua̱x na nhuxre i pejae ngẽxmaxü̃. Rü ngẽmaca̱x, ¡tãṹ i pexoegaãẽgüxü̃! Erü pema rü muxü̃ma i werixacügüarü jexeraxü̃chi pexü̃ nangechaü̃ ja Tupana.
Jíxema duü̃xü̃güpe̱xewa tügü ixuxe na Ngechuchu ja Cristuarü duü̃xü̃ tiĩxü̃
8 —Rü pemaã nüxü̃ chixu rü guxãma ja texé i nhama i naãnewa duü̃xü̃güpe̱xewa tügü ixuxe na chorü duü̃xü̃ tiĩxü̃, rü chama i Tupana Nane na duü̃xü̃xü̃ chiĩxü̃, rü nape̱xewa i Tupanaãrü orearü ngeruü̃gü i dauxü̃cü̱̃ã̱x rü tá tüxü̃ chixu na chorü duü̃xü̃ tiĩxü̃ i tümax.
9 —Notürü texé ja nhama i naãnewa duü̃xü̃güpe̱xewa tügü ixuxe na tama chorü duü̃xü̃ tiĩxü̃, rü chama rü tá ta nape̱xewa i Tupanaãrü orearü ngeruü̃gü i dauxü̃cü̱̃ã̱x rü tá tüxü̃ chixu na tama chorü duü̃xü̃ tiĩxü̃ i tümax.
10 —Rü guxãma ja texé ja chixri chauchiga idexaxe i chama i Tupana Nane na duü̃xü̃xü̃ chiĩxü̃, rü Tupana tá tüxü̃́ nüxü̃ nangechaü̃ i ngẽma. Notürü texé ja Tupanaãẽ i Üünexü̃chiga chixri idexaxe, rü Tupana rü tãũxü̃táma tüxü̃́ nüxü̃ nangechaü̃ i ngẽma.
11 —Rü ngẽxguma duü̃xü̃gü ngutaque̱xepataü̃güwa rü e̱xna ãẽ̱xgacügüpe̱xewa pexü̃ nagagügu na pexü̃ napocuexü̃ca̱x, rü ¡tãṹ i pexoegaãẽgüxü̃ na ṯacümaã tá penangãxü̃xü̃ rü e̱xna ṯacüxü̃ tá namaã na peixuxü̃!
12 —Erü ngẽxguma nawa nanguxgu na peidexagüxü̃, rü Tupanaãẽ i Üünexü̃ tá pexü̃ nangu̱xẽẽ na ṯacüxü̃ tá namaã peixuxü̃ —nhanagürü ga Ngechuchu.
Wüxi i ãũcümaxü̃ nixĩ na imuãrü dĩẽruã́xü̃
13 Rü jema duü̃xü̃gütanüwa rü wüxi ga jatü Ngechuchuxü̃ nhanagürü: —Pa Ngúexẽẽruü̃x, ¡namaã nüxü̃ ixu ja chaueneẽ rü choxna naxãã i ngẽma chaunatü ga jucüarü ngẽmaxü̃ i choxna üxü̃! —nhanagürü.
14 Notürü Ngechuchu rü nhanagürü nüxü̃: —Pa Jatüx, ¿texé perü ãẽ̱xgacüxü̃ choxü̃ tingucuchixẽẽ na chajatojexü̃ca̱x i ngẽma penatüarü ngẽmaxü̃? —nhanagürü.
15 Rü nhanagürü ta ga Ngechuchu: —¡Pexuãẽ na tama pexü̃́ nangúchaü̃xü̃ca̱x i togüarü ngẽmaxü̃! Erü wüxi i duü̃xü̃ rü tama ngẽma na namuãrü ngẽmaxü̃ã́xü̃ca̱x nixĩ i najauxãxü̃ i norü maxü̃ i taguma gúxü̃ —nhanagürü.
16 Rü jexguma wüxi ga ore ga cua̱xruü̃xü̃ namaã nixu, rü nhanagürü: —Najexma ga wüxi ga jatü ga muãrü dĩẽruã́cü, rü guxü̃ma ga jema nanetügü ga naãnegu natogüxü̃ rü meãma nüxü̃́ nixo.
17 —Rü guma jatü rü nagu narüxĩnü rü naãẽwa nhanagürü:
“¿Ṯacü tá chaxüxü̃ i nhu̱xmax? Erü nataxuma i chorü nachica i ngexta namaã na changuxü̃xü̃ i chaunetügüarü o”, nhanagürü.
18 —Rü naãẽwa nhanagürü:
“Marü nüxü̃ chacua̱x na ṯacü tá chaxüxü̃. Rü nagu tá chapogü ja guxü̃nema ja chorü ĩpatagü ga nagu namaã changuxü̃ne ga chaunetügüarü o. Rü náĩ ja taxüragüne tá chaxü na ngẽxma namaã changuxü̃xü̃ca̱x i guxü̃ma i chaunetügüarü o rü guxü̃ma i chorü ngẽmaxü̃gü.
19 —Rü ngẽxguma marü namexgu i guxü̃ma, rü chaugümaã tá nhacharügü: ‘Nhu̱xma rü tá icharüngü̃ rü meã tá chachibü rü meã chaxaxe rü ngẽmaãcü tá chataãẽ. Erü namuxũchi i chorü ngẽmaxü̃gü, rü mucüma ja taunecü tá choxü̃́ natai’, nhacharügü tá chaugümaã”.
20 —Notürü Tupana rü nhanagürü guma jatüxü̃:
“Pa Jatüx, cungẽãẽmare i cuma erü nhama i chütaxü̃gu tátama cuju. Rü ngẽma curü ngẽmaxü̃gü i namaã cunguxü̃xü̃, rü ¿texéarü tá nixĩ i ngẽxguma?” nhanagürü ga Tupana.
21 —Rü ngẽxgumarüü̃ tá ta namaã nangupetü i ngẽma duü̃xü̃gü i nügüca̱xtama norü ngẽmaxü̃gümaã nguxü̃xü̃ rü tama nügü ímexẽẽxü̃ i Tupanape̱xewa —nhanagürü ga Ngechuchu.
Tupana rü naxãcügüna nadau
22 Rü jemawena rü norü ngúexü̃güxü̃ nhanagürü ga Ngechuchu: —Pemaã nüxü̃ chixu ¡rü tãṹ i pexoegaãẽgüxü̃ naxca̱x i ṯacü tá na pengṍxü̃ rü ṯacümaã tá na peixãxchiruxü̃!
23 —Erü perü maxü̃ rü õnaãrü jexera nixĩ, rü pexene rü naxchiruarü jexera nixĩ.
24 —¡Dücax penangugü i werigü i tama toegüchiréxü̃, rü tama nanetüarü o ibuxgüxü̃, rü ngepatagüxü̃ na ngexta namaã nanguxü̃güxü̃ca̱x i norü õna! Notürü Tupana rü nanaxüwemü. Rü pema rü Tupanaca̱x rü poraãcü guxü̃ma i werigüarü jexera peixĩgü.
25 —Rü taxuwama name na pexoegaãẽgüxü̃. Erü taxucürüwama wüxie i pema rü pegütama ipema̱xãchixẽẽ ngãxü̃ ja metrugu ega woo poraãcü naxca̱x pexoegaãẽgügu.
26 —Rü ngẽxguma tama pemaã nanguxü̃ i ngẽma íraxü̃ rü taxucürüwama pegütama ipema̱xãchixẽẽ ega woo naxca̱x pexoegaãẽgügu, rü ¿tü̱xcüü̃ i ngẽxguma rü ta ṯacü i togü i ngẽmaxü̃güca̱x pexoegaãẽgüxü̃?
27 —¡Dücax penangugü i putüragü na nhuxãcü najaexü̃ i nachacu! Rü tama napuracüexü̃, rü tama nügü üxchirugüxü̃. Notürü woo guma ãẽ̱xgacü ga Charumáũ ga na namexẽchixü̃ ga naxchiru rü taguma wüxi ga putürachacuarü mexü̃rüü̃ nixĩ.
28 —Rü marü nüxü̃ pedau i nhuxãcü Tupana na nanga̱xãẽxü̃ i putüragü i nhu̱xma naãnewa rüxügümarexü̃ notürü moxü̃ rü marü taxuxü̃. Rü ngẽxguma Tupana ngẽmaãcü nanga̱xãẽgu i putüragü rü pema rü tá ngẽmaãrü jexera pexchiru pexna naxã, Pa Duü̃xü̃gü i Íraruwatama Jaxõgüxü̃x.
29 —Rü ngẽmaca̱x tama name i pexoegaãẽ naxca̱x i ṯacü tá na pengṍxü̃ rü ṯacü tá na peixaxüxü̃.
30 —Erü nhama i naãnecü̱̃ã̱x i duü̃xü̃gü rü naxca̱x nadaugü i guxü̃ma i ngẽma pemaã nüxü̃ chixuxü̃. Notürü pema rü pexü̃́ nangẽxma ja Penatü ja Tupana ja nüẽchama nüxü̃ cuácü na pexü̃́ nataxuxü̃ i guxü̃ma i ngẽma.
31 —Rü ngẽmaca̱x narümemaẽ nixĩ na Tupanaãrü ngúchaü̃ca̱x pedaugüxü̃ na perü ãẽ̱xgacü jiĩxü̃ca̱x. Rü nhu̱xmachi nüma rü tá pexna nanaxã i guxü̃ma i ṯacü i pexü̃́ taxuxü̃.
Nhuxãcü tüxü̃́ nangẽxma i tórü ngẽmaxü̃gü i dauxü̃guxü̃ i naãnewa
32 —¡Tãṹ i pemuü̃ẽxü̃, Pa Chauxacügüx! Pema rü noxretama peixĩgü notürü Penatü ja Tupana rü norü ngúchaü̃ nixĩ na pexna naxããxü̃ i pechica i ngextá nüma ãẽ̱xgacü íjiĩxü̃wa.
33 —¡Rü namaã petaxe i perü ngẽmaxü̃gü rü togü i duü̃xü̃gü i nüxü̃́ nataxuxü̃na penaxã i ngẽma dĩẽru! Rü ngẽmaãcü tá pegüxü̃́ penangẽxmaxẽẽ i perü ngẽmaxü̃gü i taguma pexü̃́ ṉg̱auxü̃ rü taguma gúxü̃ i dauxü̃guxü̃ i naãnewa i ngextá tama íjaxücuxü̃wa i ngĩ́ta̱xáxü̃ rü naweane tama ínachixexẽẽxü̃wa.
34 —Erü ngextá ínangẽxmaxü̃wa i perü ngẽmaxü̃gü, rü ngẽxma nixĩ i perüxĩnüẽxü̃.
Name nixĩ i jigü ítamexẽẽgü naxü̃pa na ínanguxü̃ ja Cristu
35 —¡Rü ípememare namaã i perü omügü i naĩgüxü̃!
36 —Rü name nixĩ i wüxi i coriarü duü̃xü̃gü i ímemaregüxü̃rüü̃ na peixĩgüxü̃. Rü penaxwa̱xe na nhama duü̃xü̃gü i ĩã̱xwa norü corixü̃ naṉg̱uxẽẽgüxü̃rüü̃ na peixĩgüxü̃. Rü ngẽxguma norü cori rü wüxi i ngĩgüarü petawa ne naxũxgu rü: Tu tu tu nhaxgu, rü paxa naxca̱x najawãxnagü i ĩã̱x.
37 —Rü nataãẽgü i ngẽma coriarü duü̃xü̃gü ega inadauegu i ngẽxguma ínanguxgu i norü cori. Rü pemaã nüxü̃ chixu rü ngẽma cori rü norü mechawa tátama nanatogüxẽẽ i ngẽma norü duü̃xü̃gü i nüxü̃ ínaṉg̱uxẽẽgüxü̃, rü nüma tátama ngẽma norü duü̃xü̃güxü̃ inaxüwemü.
38 —Rü woo ngãxü̃cüü ínanguxgu rü e̱xna marü jangunechaü̃gu rü nataãẽgü i ngẽma coriarü duü̃xü̃gü ega inadauegu i ngẽxguma ínanguxgu i norü cori.
39 —Rü ngẽxguma chi wüxi ja ĩãrü jora nüxü̃ cua̱xgu na nhuxguacü ínanguégaxü̃ i ngĩ́ta̱xáxü̃, rü tau chima nape. Rü chi nüxna nadau ja napata na tama jawãxnaãxü̃ca̱x rü tama na nüxü̃́ nangĩ́xü̃ca̱x.
40 —Rü pema rü ta penaxwa̱xe na ípememarexü̃. Erü ngürüãchi tama nagu íperüxĩnüẽjane tá íchangu i chama i Tupana Nane na duü̃xü̃xü̃ chiĩxü̃ —nhanagürü ga Ngechuchu.
Wüxi ga duü̃xü̃ ga meã norü coriga ĩnüxü̃ rü to ga tama meã norü coriga ĩnüxü̃chiga
41 Rü jexguma ga Pedru rü Ngechuchuna naca rü nhanagürü: —Pa Corix, ¿toxca̱xicatama e̱xna nixĩ i nhaã ore i cua̱xruü̃ i tomaã nüxü̃ cuixuxü̃, rü e̱xna guxü̃ i duü̃xü̃güca̱x jiĩxü̃? —nhanagürü.
42 Rü nhanagürü ga Cori ga Ngechuchu: —¿Texé tiĩxü̃ ja jíxema tümaãrü coriarü duü̃xẽ ja aixcuma janguxẽẽ́xẽ rü meã tümaãẽxü̃ cuáxe? ¿Tama e̱xna jíxema tiĩxü̃ ja tümaãrü cori tüxna ãgaxe na meã nüxna tadauxü̃ca̱x rü meã ngoragu tanachibüexẽẽxü̃ca̱x i norü duü̃xü̃gü?
43 —Rü tataãẽ ja jíxema coriarü duü̃xẽ i ngẽxguma ínanguxgu i tümaãrü cori rü tüxü̃ íjangueü̃gu na meãma ítanaxüxü̃ i ngẽma puracü i nagu tüxü̃ namuxü̃.
44 —Rü aixcuma pemaã nüxü̃ chixu rü ngẽma tümaãrü cori rü tá guxü̃ma i norü ngẽmaxü̃güarü daruü̃xü̃ tá tüxü̃ nixĩxẽẽ.
45 12:45-46 —Notürü ngẽxguma chi ngẽma duü̃xü̃ nagu rüxĩnügu rü norü cori rü tama paxa na ínanguxü̃, rü inaxügüãgu na chixri namuãxü̃ i natanüxü̃gü i jatüxü̃gü rü ngexü̃gü, rü peta naxü̱xgu rü nachibüxgu, rü naxaxegu, rü nügü nangãxẽẽgu, rü ngürüãchi ngẽma ngunexü̃ rü ngẽma ngora i tama nagu ínaṉg̱uxẽẽãxü̃gu tá ínangu i norü cori. Rü poraãcüxü̃chi tá nanapocu ngẽma duü̃xü̃gü i tama norü coriga ĩnüẽxü̃xü̃ napocuexü̃rüü̃.
46 Nüü̃ nadau 12:45
47 —Rü ngẽma coriarü duü̃xü̃ i nüxü̃ cua̱xchiréxü̃ na ṯacü nanaxwa̱xexü̃ i norü cori, notürü tama nügü ímexẽẽxü̃ rü tama norü coriga ĩnüxü̃, rü tá poraãcü nanac̱uaxi.
48 —Notürü ngẽma coriarü duü̃xü̃ i tama nüxü̃ nacuáãcüma chixri norü coriga ĩnüxü̃, rü chixexü̃ üxü̃, rü tá íraruwaxüra nanac̱uaxi. Rü texé ja Tupana muxü̃ma tüxna ãxẽ, rü muxü̃ca̱xtáma tüxna naca. Rü texé ja muxü̃na tüxü̃ nadauxẽẽ́xẽ rü tá jexeraãcü tüxna naca.
Ngechuchugagu nixĩ i jatojexü̃ i duü̃xü̃gü
49 —Núma chaxũ na nhama i naãnewa duü̃xü̃güxü̃ chidauchitanüxẽẽxü̃ca̱x. Rü chierü aixcuma marü jadauchitanügu.
50 —Rü chama rü tá poraãcü ngúxü̃ chinge, rü chanaxi̱xãchiãẽ nhu̱xmatáta jangu i ngẽma.
51 —Rü tama name i nagu perüxĩnüẽ na núma chaxũxü̃ na guxü̃ i duü̃xü̃gü rü wüxigu naxĩnüẽxü̃ca̱x. Notürü pemaã nüxü̃ chixu rü núma chaxũ na chaugagu jatojexü̃ca̱x i duü̃xü̃gü.
52 —Erü nhaãwena ega wüxi ja ĩpatawa nangẽxmagu i wüxime̱ẽ̱xpü̱x i duü̃xü̃gü, rü tamaẽ̱xpü̱x tá choxü̃́ najaxõgü rü taxre i tama, rü e̱xna taxre tá choxü̃́ najaxõgü rü tamaẽ̱xpü̱x i tama.
53 —Rü wüxi i papa tá najaxõ rü nane rü tãũxü̃táma najaxõ, rü e̱xna nane tá najaxõ notürü nanatü i tama. Rü ngẽxgumarüü̃ ta wüxi i mama tá ijaxõ rü ngĩxãcü rü tãũxü̃táma ijaxõxchãü̃, rü e̱xna ngĩxãcü tá ijaxõ rü ngĩẽ rü tãũxü̃táma ijaxõxchãü̃. Rü wüxi ja ngĩ̱xẽ tá ijaxõ rü ngĩneã̱x rü tãũxü̃táma ijaxõ, rü e̱xna ngĩneã̱x tá ijaxõ rü ngĩ̱xẽ rü tãũxü̃táma ijaxõ —nhanagürü ga Ngechuchu.
Cua̱xruü̃gü i nachiga i ṯacü tá nangupetüxü̃
54 Rü Ngechuchu nhanagürü ta nüxü̃ ga duü̃xü̃gü: —Ngẽxguma nüxü̃ peda̱xgu na naxẽãchianexü̃, rü nagu perüxĩnüẽ tá na napuxü̃. Rü aixcuma ngẽmaãcü nixĩ.
55 —Rü pema nüxü̃ pecua̱x na nhuxãcü penangugüxü̃ ja buanecü, rü ngẽmaãcü nüxü̃ pecua̱x rü tá na nangu̱xetüxü̃. Rü aixcuma ngẽmaãcü nixĩ.
56 —Pa Duü̃xü̃güx, pema rü togü i duü̃xü̃güpe̱xewa meã pemaxẽneta, notürü peãẽwa rü chixexü̃gu perüxĩnüẽ. Pema nüxü̃ pecua̱x na nhuxãcü penangugüxü̃ ega tá napuxgu rü e̱xna tá nangu̱xetügu. ¿Rü nhuxãcü i nhu̱xma i tama nüxü̃ pecuáxü̃ na Tupana jiĩxü̃ ja petanüwa ngucü?
Name nixĩ na curüngüxmüxü̃ namaã i curü uwanü
57 —Rü tü̱xcüü̃ tama nüxü̃ pecuáxchaü̃ i ngẽma nama i mexü̃ i Tupana pexü̃́ naxwa̱xexü̃ na nagu pexĩxü̃.
58 —Rü ngẽxguma chi wüxie wüxi i ngetanüca̱x cuxü̃ íxuaxü̃gu rü ãẽ̱xgacüxü̃tawa cuxü̃ tagaxgu, rü name nixĩ i namawatama tüxü̃ icujarüngüxmüxẽẽ na tama ãẽ̱xgacüpe̱xewa cuxü̃ tagaxü̃ca̱x. Erü wüxicana na ãẽ̱xgacüxü̃tawa cunguxü̃ rü ãẽ̱xgacü tá purichíagüna cuxü̃ namu. Rü purichíagü tá cuxü̃ napocu.
59 —Rü cumaã nüxü̃ chixu rü ngẽxma pocuchicagu tá curüxã̱ũ̱x nhu̱xmatáta ngĩxü̃ cuxütanü i gu̱xcü i dĩẽru i nüxü̃́ ngĩxü̃ cungetanücü. [Rü aixcuma ngẽxgumarüü̃ tá cumaã nanaxü ja Tupana ega tama namaã cunamexẽẽ̱xgu i curü maxü̃ —nhanagürü ga Ngechuchu.]
