Luca 13:1-35
13 Rü jexgumatama Ngechuchuxü̃tawa nangugü ga nhuxre ga duü̃xü̃gü. Rü Ngechuchumaã nüxü̃ nixugü ga na nhuxãcü ãẽ̱xgacü ga Piratu namuxü̃ ga norü churaragü na nadaiãxü̃ca̱x ga nhuxre ga jatügü ga Gariréaanecü̱̃ã̱x ga jexguma jema jatügü rü Tupanaca̱x carneru nadaixgu tupauca ga taxü̃newa.
2 Rü Ngechuchu nüxna naca rü nhanagürü nüxü̃: —¿Pema nagu perüxĩnüẽgu rü jemaãcü nüxü̃ nangupetü ga jema jatügü, jerü jema togü ga Gariréaanecü̱̃ã̱xãrü jexera nipecaduã̱xgü?
3 —Pemaã nüxü̃ chixu rü tama nixĩ. Rü ngẽxguma chi pema rü tama nüxü̃ perüxoegu i pecüma i chixexü̃, rü guxãma i pema rü tá ta ipejarütauxe.
4 —¿Rü e̱xna pema nagu perüxĩnüẽgu rü guxü̃ ga Jerucharéü̃cü̱̃ã̱xãrü jexera nipecaduã̱xgü ga jema 18 ga jatügü ga juexü̃ ga jexguma Chiruéwa jexmaxü̃ ga dauxü̃taechica naẽ́tü rüngutaü̃gu?
5 —Pemaã nüxü̃ chixu rü tama nixĩ. Rü ngẽxguma chi pema rü tama nüxü̃ perüxoegu i pecüma i chixexü̃, rü guxãma i pema rü tá ta ipejarütauxe —nhanagürü ga Ngechuchu.
Cua̱xruü̃ ga Nanetü ga figuera ga ngearü õṍxü̃gu ixuxü̃
6 Rü jexguma ga Ngechuchu rü wüxi ga ore ga cua̱xruü̃wa namaã nüxü̃ nixu na nhuxãcü jaxna duü̃xü̃gümaã, naxĩnüxü̃, rü nhanagürü: —Wüxi ga jatü nüxü̃́ najexma ga wüxi ga nanetü ga figuera ga norü naãnegu natoxü̃. Rü ínajadau rü ngoxi naxõṍ, notürü taxuü̃ma ga norü oxü̃ inajangau.
7 —Rü jemaca̱x jema norü duü̃xü̃ ga norü naãnena dauxü̃xü̃ nhanagürü:
“Dücax, tamaẽ̱xpü̱x ja taunecü guxü̃guma íchajadauxü̃ i nhaã nanetü, rü taguma naxo. Rü ngẽmaca̱x chanaxwa̱xe na cujadaxüchixü̃ na tama notüca̱xma nuã naãnewa naxíaneã̱xü̃ca̱x”, nhanagürü nüxü̃.
8 —Notürü ga jema norü duü̃xü̃ ga norü naãnena dauxü̃, rü norü corixü̃ nangãxü̃, rü nhanagürü:
“Pa Corix, ¡nüẽ́tama dama taunecüxicatama nangẽma̱x! Rü tá chanaxaimüãnepǘne rü waxmüãnexü̃maã tá chanagüpǘne.
9 —Rü bexmana ngẽxguma rü tá naxo. Notürü ngẽxguma tãũxü̃táma naxo̱xgu rü tá chajadaxüchi”, nhanagürü.
Ngechuchu rü ngü̃xchigaarü ngunexü̃gu ngĩxca̱x najataanexẽẽ ga wüxi ga ngecü ga püca̱xwecü
10 Rü wüxi ga ngü̃xchigaarü ngunexü̃gu rü Ngechuchu nangu̱xẽẽtae ga wüxi ga ngutaque̱xepataü̃wa.
11 Rü jéma ijexma ga wüxi ga ngecü ga 18 ga taunecü iḏaawecü. Rü ipüca̱xwe jerü wüxi ga ṉg̱oxo ngĩxü̃ napüca̱xwexẽẽ, rü taxuacüma ijarüwe̱xãchi.
12 Rü jexguma Ngechuchu ngĩxü̃ da̱xgu rü ngĩxca̱x naca, rü nhanagürü ngĩxü̃: —Pa Ngecüx, nhu̱xma rü marü cuxca̱x nitaane i curü ḏaawewa —nhanagürü.
13 Rü jexguma rü ngĩxü̃ ningõgü, rü jexgumatama ijarüwe̱xãchametümüxü̃, rü inaxügü ga Tupanaxü̃ na jacua̱xüü̃xü̃.
14 Notürü jema ngutaque̱xepataü̃ãrü ãẽ̱xgacü rü nanu, jerü Ngechuchu rü ngü̃xchigaarü ngunexü̃gu ngĩxü̃ narümexẽẽ ga jema nge. Rü jemaca̱x ga jema ãẽ̱xgacü rü nhanagürü duü̃xü̃güxü̃: —Nangẽxma i 6 i ngunexü̃ i nagu namexü̃ na ipuracüexü̃. Rü ngẽma ngunexü̃gügu nixĩ i namexü̃ na nuã pexĩxü̃ na pegü pejarümexẽẽgüxü̃ca̱x rü tama i ngü̃xchigaarü ngunexü̃gu —nhanagürü.
15 Rü jexguma ga Cori ga Ngechuchu rü nanangãxü̃, rü nhanagürü: —Pa Duü̃xü̃güx, pema rü togü i duü̃xü̃güpe̱xewa meã pemaxẽneta, notürü peãẽwa rü chixexü̃gu perüxĩnüẽ. ¿Tama e̱xna guxã i pema rü ngü̃xchigaarü ngunexü̃gu pejawẽxü̃ i perü woca rü e̱xna perü cowaru na pejaxaxexẽẽgüxü̃ca̱x?
16 —Rü nhaã ngecü rü Abrã́ũtanüxü̃ ijixĩ, rü Chataná rü 18 ja taunecü ngĩxü̃ nachixexẽẽ namaã i nhaã ḏaawe. ¿Rü taux e̱xna i namexü̃ na ngĩxca̱x chajataanexẽẽxü̃ i ngü̃xchigaarü ngunexü̃gu? —nhanagürü.
17 Rü jexguma jema nhaxgu ga Ngechuchu, rü guxü̃ma ga norü uwanügü rü poraãcü naxãneẽ. Notürü guxü̃ma ga togü ga duü̃xü̃gü rü nataãẽgü ga jexguma nüxü̃ nadaugügu ga jema mexü̃gü ga Ngechuchu üxü̃.
Cua̱xruü̃ ga motachachiregu ixuxü̃
18 Rü nhanagürü ga Ngechuchu: —¿Nhuxãcü nixĩ i ãẽ̱xgacü na jiĩxü̃ ja Tupana, rü nanhuxraü̃xü̃ i nüma ãẽ̱xgacü íjiĩxü̃wa? ¿Rü ṯacügu tá chanangu?
19 —Maneca wüxi ja motachachire ja wüxi ja jatü naãnegu toxü̃nerüü̃ nixĩ. Rü woo naxíraxüchichire̱x ja naxchire notürü narüxü, rü naja nhu̱xmata wüxi i nanetü i taetaxü̃ nixĩ. Rü ngẽmaca̱x i werigü rü natanügu nixüachiãü̃ —nhanagürü.
Cua̱xruü̃ ga põũãrü puxẽẽruü̃gu ixuxü̃
20 Rü nhanagürü ta ga Ngechuchu: —¿Nhuxãcü nixĩ i Tupana ãẽ̱xgacü íixĩxü̃wa? ¿Rü ṯacügu tá chanangu?
21 —Rü põũãrü puxẽẽruü̃rüü̃ nixĩ na guxü̃wama nanguxü̃. Erü wüxi i ngecü rü íraxü̃tama i põũãrü puxẽẽruü̃maã inaxüéü̃ i taxü̃ i ngĩrü põũchara. Rü ngẽma põũãrü puxẽẽruü̃ rü woo naxíra rü najapuxẽẽ i guxü̃ma i ngĩrü põũchara —nhanagürü ga Ngechuchu.
Ĩã̱x i íraxü̃chiga
22 Rü inixũchigü ga Ngechuchu ga Jerucharéü̃wa na naxũxü̃. Rü jexguma namagu jaxũxgu rü ĩãnegüwa rü ĩãnexãcügüwa nixüpetüchigü, rü jéma najangúexẽẽtanü ga duü̃xü̃gü.
23 Rü wüxi ga duü̃xü̃ nüxna naca rü nhanagürü: —Pa Corix ¿noxretátama nixĩ i ngẽma najauxgüxü̃ i maxü̃ i taguma gúxü̃? —nhanagürü. Rü nüma ga Ngechuchu nanangãxü̃, rü nhanagürü:
24 —Dauxü̃guxü̃ i naãneãrü ĩã̱x rü naxíraxü̃chi. ¡Rü paxa naxca̱x pedau na nawa peichocuxü̃ca̱x! Erü pemaã nüxü̃ chixu rü muxũchixü̃ma i duü̃xü̃gü tá nüxü̃́ nangúchaü̃ na nawa jachocuxü̃, notürü tãũxü̃táma nawa nichocu.
25 —Erü ngẽxguma ĩãrü jora marü nawãxtagu i ĩã̱x, rü pema i düxétüwa ngẽxmagüxe rü tá penatutuã́ü̃. Rü nhaperügügü tá:
“Pa Corix, ¡paxa toxca̱x jawãxna i ĩã̱x!” nhaperügügü tá. Notürü nüma i cori rü tá pexü̃ nangãxü̃, rü nhanagürü tá:
“Tama pexü̃ chacua̱x na ngextácü̱̃ã̱x peixĩgüxü̃”, nhanagürü tá pexü̃.
26 —Rü ngẽxguma rü tá nhaperügügü nüxü̃:
“Cumaãchire̱x wüxiwa tachibüe rü taxaxegü. Rü toxü̃ cungúexẽẽ ga torü ĩãnemaü̃güwa”, nhaperügügü tá.
27 —Notürü nüma rü tá pexü̃ nangãxü̃ rü nhanagürü tá: “Marü pemaã nüxü̃ chixu rü tama pexü̃ chacua̱x na ngextácü̱̃ã̱xgü peixĩgüxü̃. ¡Rü ípeixĩ i nuã chauxü̃tawa i guxãma i pemax, Pa Chixri Maxẽxü̃x!” nhanagürü tá.
28 —Rü ngẽ́ma tá pexauxe, rü tá peixü̃́xchapütagü i ngẽxguma nüxü̃ peda̱xgu i Abrã́ũ rü Isaqui rü Jacú rü guxü̃ma i Tupanaãrü orearü uruü̃gü na Tupana ãẽ̱xgacü íixĩxü̃wa na nangẽxmagüxü̃ rü pema rü nüxna na ípewoxü̃xü̃.
29 —Erü guxü̃watáma ne naxĩ i duü̃xü̃gü. Rü Tupana ãẽ̱xgacü íixĩxü̃wa tá nangẽxmagü. Rü ngẽ́ma tá narütogü na ngẽ́ma nachibüexü̃ca̱x.
30 —Rü tá nangẽxma i nümaxü̃ i nhama i naãnewa duü̃xü̃gü nüxü̃ oexü̃, notürü dauxü̃guxü̃ i naãnewa rü Tupana tá wixpe̱xewa nanaxügüxẽẽ. Rü tá nangẽxma i nümaxü̃ i nhama i naãnewa duü̃xü̃gü nüxü̃ icua̱xüü̃güxü̃, notürü dauxü̃guxü̃ i naãnewa rü Tupana rü tá wixweama nanaxügüxẽẽ —nhanagürü ga Ngechuchu.
Ngechuchu rü Jerucharéü̃cü̱̃ã̱x ga duü̃xü̃güca̱x naxaxu
31 Rü jematama ga ngunexü̃gu rü Ngechuchuxü̃tawa nangugü ga nhuxre ga Parichéugü. Rü nhanagürügü Ngechuchuxü̃: —¡Íixũ i nuã! Erü ãẽ̱xgacü ja Erudi rü cuxü̃ nima̱xéga —nhanagürügü.
32 Notürü nüma ga Ngechuchu nanangãxü̃ rü nhanagürü: —¡Naxü̃tawa pexĩ i ngẽma jatü i nüxü̃ cua̱xü̃chixü̃ na nhuxãcü duü̃xü̃güxü̃ nawomüxẽẽxü̃, rü namaã nüxü̃ peixu rü nhu̱xma rü moxü̃ rü tá íchanawoxü̃ i ṉg̱oxogü, rü tá chanameẽxẽẽ i ngẽma duü̃xü̃gü i iḏaaweexü̃, rü pa̱xmaãcü tá chanagu̱xẽẽ!
33 —Notürü chanaxwa̱xe i ichixũchigü i nhu̱xma rü moxü̃ rü paxmaãcü nhu̱xmatáta Jerucharéü̃wa changu. Erü Jerucharéü̃gu nixĩ i na najuexü̃ i guxü̃ma i Tupanaãrü orearü uruü̃gü.
34 —Rü dücax, Pa Jerücharéü̃cü̱̃ã̱x, pema pejadaietanü i Tupanaãrü orearü uruü̃gü, rü nutamaã ípenamuxũchigü i Tupanaãrü orearü ngeruü̃gü i pexca̱x núma namugüxü̃. Rü nhuxree̱xpü̱xcüna wüxigu chaugüxü̃tagu pexü̃ chanutaque̱xexẽẽchaü̃, nhama wüxi i ota ja naxãcüã̱x nügütüü̃gu tüxü̃ nutaque̱xexü̃rüü̃. Notürü pema rü tama penaxwa̱xe.
35 —Dücax i nhu̱xma ja perü ĩãne, rü Tupana tá ínanata̱x. Rü pemaã nüxü̃ chixu rü tãũxü̃táma wena choxü̃ pedau nhu̱xmatáta dauxü̃guxü̃ i naãnewa ne chaxũ. Rü ngẽxguma rü tá choxü̃ pedau rü tá nhaperügügü:
“Namexẽchi nixĩ ja jima Cori ja Tupana núma namucü”, nhaperügügü tá —nhanagürü ga Ngechuchu.
