Luca 14:1-35
14 Rü wüxi ga ngü̃xchigaarü ngunexü̃gu rü Ngechuchu rü wüxi ga Parichéupatawa najachibü. Rü jéma najexmagü ga togü ga Parichéugü ga jéma bexma Ngechuchuxü̃ ngugüexü̃.
2 Rü jéma najexma ta ga wüxi ga jatü ga iḏaawexü̃ ga rüchaxünexü̃.
3 Rü jexguma ga Ngechuchu rü jema ngúexẽẽruü̃gü ga Muĩséarü mugüwa ngu̱xẽẽtaegüxü̃na rü Parichéugüna naca, rü nhanagürü: —¿Tama penachu̱xuxü̃ ega ngü̃xchigaarü ngunexü̃gu chanamexẽẽ̱xgu i wüxi i iḏaawexü̃? —nhanagürü.
4 Notürü ga nümagü rü nangea̱xgümare. Rü jexguma ga Ngechuchu rü naxme̱xgu najajauxãchi ga jema iḏaawexü̃, rü nanamexẽẽ. Rü namaã nüxü̃ nixu ga na íjaxũxü̃ca̱x.
5 Rü Ngechuchu rü nhanagürü Parichéugüxü̃: —¿Texé i pema i ngẽxguma perü cowaru rü e̱xna perü woca puchugu nagoxgu, rü taux e̱xna i ngẽxgumatama ípejadauxü̃ rü ípejatúãchixü̃ i woo ngü̃xchigaarü ngunexü̃gu? —nhanagürü.
6 Rü nümagü rü taxuü̃maãma nanangãxü̃gü.
Duü̃xü̃gü ga ngĩgüarü petawa nüxna naxugüxü̃chiga
7 Rü jexguma mechawa natogüchaü̃gu ga jema nüxna naxugüxü̃, rü Ngechuchu nüxü̃ nadau na wüxichigü rü ĩãrü joraxü̃tawaxü̃chi natoxchaü̃xü̃. Rü jexguma jemaxü̃ nada̱xgu rü najaxucu̱xẽgü, rü nhanagürü:
8 —Ngẽxguma texé cuxna uxgu i wüxi i ngĩgüarü petawa, rü tama name i petaarü joraxü̃tawaxü̃chi üxü̃ i naxma̱xwewa cujarüto. Erü jixcüra ngürüãchi tá ínangu i to i nüxna naxuxü̃ i curü jexeraxü̃chi ixĩxü̃.
9 —Rü ngẽma petaarü jora i pexna uxü̃, rü tá cumaã nüxü̃ najarüxu na icuchixü̃ca̱x i ngẽma nachicawa na ngẽ́ma natoxẽẽãxü̃ca̱x i ngẽma to i curü jexera ixĩxü̃. Rü ngẽxguma i cuma rü poraãcü cuxãneãcüma rü nawa ijacuáxü̃ i naxma̱xwewa tá cujarüto.
10 —Rü narümemaẽ ega texé cuxna uxgu, rü nawa ijacuáxü̃ i naxma̱xwewa curüto. Rü ngẽxguma i ngẽma petaarü jora i cuxna uxü̃ rü nhanagürü tá cuxü̃:
“Pa Chamücüx, ¡nuã chauxü̃tawa jarüto!” nhanagürü tá cuxü̃. Rü ngẽmaãcü ngẽma petaarü jora rü wüxi i mexü̃ tá cumaã naxü nape̱xewa i guxü̃ma i duü̃xü̃gü i nüxna naxuxü̃ i cumaã ngẽ́ma rütogüxü̃.
11 —Erü texé ja tügü írütaxe rü Tupana tá tüxü̃ naxãnexẽẽ. Notürü texé ja tügü írüxíraxe rü Tupana tá tüxü̃ nicua̱xüü̃ —nhanagürü ga Ngechuchu.
12 Rü nhanagürü ta ga Ngechuchu nüxü̃ ga jema jatü ga nüxna uxü̃: —Rü ngẽxguma wüxi i õnaca̱x rü e̱xna petaca̱x texéna cuxuxchaü̃gu, rü tama name i nüxna cuxu i cumücügü, rü bai i cueneẽgü, rü bai i cutanüxü̃gü, rü bai i curü ngaicamagu pegüxü̃ i duü̃xü̃gü i dĩẽruã̱xgüxü̃. Erü nümagü rü tá nüxĩ cuxna naxugüe, rü ngẽmaãcü tá cuxü̃́ nanaxütanügü.
13 —Notürü ngẽxguma wüxi i peta cuxü̱xgu, rü narümemaẽ nixĩ i nüxna cuxu i duü̃xü̃gü i ngearü dĩẽruã̱xgüxü̃, rü duü̃xü̃gü i taxucürüwama puracüexü̃, rü ngẽma ichixeparagüxü̃, rü ngẽma ingexetügüxü̃.
14 —Rü tá cutaãẽxü̃chi i ngẽxguma erü nümagü rü taxucürüwa cuxü̃́ nanaxütanügü. Notürü tá cunajaxu i curü natanü i ngẽxguma wena namaxẽgu i Tupanaãrü duü̃xü̃gü i mexü̃ —nhanagürü.
Cua̱xruü̃ ga õna ga taxü̃gu ixuxü̃
15 Rü jexguma jemaxü̃ naxĩnügu ga wüxi ga jatü ga mechawa rütoxü̃ rü Ngechuchuxü̃ nhanagürü: —Rü tataãẽ ja jíxema Tupana ãẽ̱xgacü íixĩxü̃wa chibüxe —nhanagürü.
16 Rü jexguma ga Ngechuchu rü nhanagürü nüxü̃: —Wüxi ga jatü nanaxü ga wüxi ga õna ga taxü̃. Rü norü duü̃xü̃xü̃ namu na nüxna jaxuxü̃ca̱x ga muxü̃ma ga duü̃xü̃gü.
17 —Rü jexguma marü namexgu ga norü õna, rü wena norü duü̃xü̃xü̃ namu na jema duü̃xü̃gü ga marü nüxna naxugüxü̃maã nüxü̃ na janaxuxü̃ca̱x ga marü na namemarexü̃ ga norü õna, rü paxa jéma na naxĩxü̃ca̱x.
18 —Notürü guxü̃ma ga jema nüxna naxugüxü̃, rü inanaxügü ga nügü na ínaxuegüxü̃. Rü jema nüxĩra nüxna naxu rü nhanagürü:
“Ngexwacaxtama naxca̱x chataxe i wüxi i naãne. Rü paxa tá íchajadau. ¡Rü namaã nüxü̃ ixu i cori rü taxucürüwama ngẽ́ma chaxũ!” nhanagürü.
19 —Rü ga jema to rü nhanagürü:
“10 i wocagü i puracüruü̃ca̱x chataxe, rü tá ngẽmaxü̃ chajaxü. ¡Rü namaxã nüxü̃ ixu i cori rü taxucürüwama ngẽ́ma chaxũ!” nhanagürü.
20 —Rü ga to rü nhanagürü:
“Ngexwacaxtama chaxãma̱x rü ngẽmaca̱x taxucürüwama ngẽ́ma chaxũ”, nhanagürü.
21 —Rü jexguma nataegugu ga jema coriarü duü̃xü̃, rü norü corimaã nüxü̃ nixu ga guxü̃ma ga jema ore. Rü jexguma ga norü cori rü nanu, rü nhanagürü nüxü̃ ga norü duü̃xü̃:
“¡Paxa ngẽ́ma ĩãnemaü̃güwa rü ĩãnemaü̃ãcügüwa naxũ, rü nuã nagagü i ngẽma duü̃xü̃gü i ngearü dĩẽruã̱xgüxü̃, rü ngẽma duü̃xü̃gü i taxucürüwama puracüexü̃, rü ngẽma ichixeparagüxü̃, rü ngẽma ingexetügüxü̃!” nhanagürü.
22 —Rü jixcamaxü̃ra ga jema norü cori namaã nüxü̃ ixuxü̃ naxü̱xguwena rü jema norü duü̃xü̃ nhanagürü nüxü̃:
“Pa Corix, marü chanaxü i ngẽma chamaã nüxü̃ cuixuxü̃rüü̃, notürü naxãchicaaneãmatama i nuã cupatawa”, nhanagürü.
23 —Rü jexguma ga norü cori rü nhanagürü nüxü̃:
“¡Paxa ngẽ́ma dauxchitamaü̃ i taxü̃güwa rü dauxchitamaü̃ i íraxü̃güwa naxũ, rü nuã nagagü i togü i duü̃xü̃gü na nuxã chapatagu nachocuxü̃ca̱x, rü ngẽmaãcü na naxããcuxü̃ca̱x ja daa chapata!
24 Erü pemaã nüxü̃ chixu rü taxuü̃ma ga jema nüxĩra nüxna chaxuxü̃ rü nuã chorü õnawa tá nachibüe”, nhanagürü.
Tama natauxcha na Cristuwe rüxũxü̃
25 Rü muxũchixü̃ma ga duü̃xü̃gü Ngechuchuwe narüxĩ. Rü nadauegu ga Ngechuchu, rü nhanagürü nüxü̃:
26 —Rü ngẽxguma texé chawe rüxũxchaü̃gu, rü tanaxwa̱xe i choxü̃ tangechaü̃ tümanatüarü jexera, rü tümaẽãrü jexera, rü tümama̱xãrü jexera, rü tümaxãcügüarü jexera, rü tümaẽneẽgüarü jexera, rü tümaẽja̱xgüarü jexera, rü tümaãrü maxü̃ãrü jexera rü ta. Rü ngẽxguma tama ngẽmaãcü choxü̃ tangechaü̃gu rü taxucürüwama aixcuma chorü ngúexü̃ tixĩ.
27 —Rü jíxema tama naxwa̱xexẽ na chaugagu ngúxü̃ tingeãcüma chawe tarüxũxü̃, rü taxucürüwama chorü ngúexü̃ tixĩ.
28 —Rü ngẽxguma chi wüxie i petanüwa rü wüxi ja ĩpata ja taxü̃ne taxüxchaü̃gu, ¿rü tama e̱xna i noxri i tanangugüxiraxü̃ na nhuxre i dĩẽru tá nagu ngĩxü̃ ítatáxü̃? Rü ngẽmawa nüxü̃ tacua̱x rü marü tüxü̃́ ijangu i ngẽma tümaãrü dĩẽru i tüxü̃́ ngẽxmacü na tajanguxẽẽxü̃ca̱x ja jima ĩ.
29 —Erü ngẽxguma chi tama meã tanangugügu i tümaãrü dĩẽru na nhuxregu tá naxãtanüxü̃ ja jima ĩ, rü norü caxtaxica chi itapugügu rü jixcüra rü taxucürüwa chi tanagu̱xẽẽgu i ngẽma puracü, rü guxü̃ma i duü̃xü̃gü i nüxü̃ daugüxü̃ i ngẽma tümaãrü puracü rü tá tüxü̃ nacugüe.
30 —Rü nhanagürügü tá:
“Ngẽma jatü inanaxügü na naxüpataxü̃, notürü taxucürüwama najanguxẽẽ”, nhanagürügü tá.
31 —Rü ngẽxguma wüxi i nachiü̃ãneãrü ãẽ̱xgacü rü to i nachiü̃ãneãrü ãẽ̱xgacümaã nügü nadaixchaü̃gu, ¿rü tama e̱xna i noxri inangugüãxü̃ rü ngoxi 10,000 i churaragü rü jangu na nügü nadaixü̃ca̱x namaã i norü uwanü i 20,000 i churaragü nüxü̃́ ngẽxmaxü̃?
32 —Rü ngẽxguma nangugüãgu na tama janguxü̃ i norü churaragü rü, ¿taux e̱xna i ngẽxguma jaxü̃wa nangẽxmagutama i norü uwanü, rü naxü̃tawa namugüãxü̃ i norü orearü ngeruü̃gü, rü namaã nüxü̃ na janaxugüexü̃ca̱x na nügümaã nangüxmüẽxü̃?
33 —Rü ngẽxgumarüü̃ tá ta nixĩ i pemax, erü ngẽxguma ngexerüxǘxe i petanüwa tama ngẽ́ma tanawogügu i guxü̃ma i tüxü̃́ ngẽxmaxü̃ na chawe tarüxũxü̃ca̱x, rü taxucürüwama aixcuma chorü ngúexü̃ tixĩ.
Ngẽxguma nangeacagu ja jucüra rü taxuwama name
34 —Pema rü nhama jucürarüü̃ peixĩgü i nhama i naãnewa, erü jima jucüra rü õna na namexẽẽxü̃rüü̃ rü pema rü nhama i naãnecü̱̃ã̱x i duü̃xü̃gütanüwa rü norü mexẽẽruü̃ peixĩgü. Name ja jucüra. Notürü ngẽxguma chi nangeacagu, ¿rü nhuxãcü tá wenaxãrü naxããca?
35 —Rü taxuwama name. Rü woo waixü̃müãrü waxmüãnexẽẽruü̃ca̱x rü tama name. Rü ítanata̱xmare. Rü jíxema aixcuma ãchi̱xẽ́xẽ, ¡rü name nixĩ i nagu tarüxĩnüẽ i nhaã ore! —nhanagürü.
