Luca 16:1-31
16 Rü nhanagürü ta ga Ngechuchu norü ngúexü̃güxü̃: —Najexma ga wüxi ga cori ga muãrü jemaxü̃ã̱xü̃chixü̃. Rü nüxü̃́ najexma ga wüxi ga norü duü̃xü̃ ga norü jemaxü̃ãrü daruü̃. Notürü togü ga duü̃xü̃gü rü norü corimaã nüxü̃ nixugü na jema norü duü̃xü̃ rü chixri norü jemaxü̃na na nadauxü̃.
2 —Rü jexguma ga jema cori rü jema norü duü̃xü̃ca̱x naca, rü nhanagürü nüxü̃:
“Dücax, cuchigaxü̃ chamaã nixugügü i duü̃xü̃gü. ¿Rü ṯacü nixĩ i ngẽma? ¡Rü chamaã nüxü̃ ixu rü nhuxãcü nixĩ i curü puracü, erü marü tãũxü̃táma chorü ngẽmaxü̃ãrü daruü̃xü̃ cuxü̃ chixĩxẽẽ!” nhanagürü nüxü̃.
3 —Rü jexguma ga jema coriarü duü̃xü̃ rü nagu narüxĩnü, rü nügüãẽwa nhanagürü:
“¿Ṯacü tá chaxü i nhu̱xmax, erü chorü cori rü marü choxü̃ ínata̱xüchi i ngẽma chorü puracüwa? Tama chapora na naãnewa chapuracüxü̃ca̱x, rü chaxãne na dĩẽruca̱x na íchac̱axü̃ nüxna i togü.
4 —Rü marü nüxü̃ chacua̱x na ṯacü tá na chaxüxü̃ na choxü̃́ nangẽxmaxü̃ca̱x na texé tümapatawa choxü̃ jaxuxü̃ i ngẽxguma changearü puracüã̱xgu”, nhanagürü.
5 —Rü jexguma nügüxü̃tawa naxca̱x naca ga wüxichigü ga jema duü̃xü̃gü ga norü coriaxü̃́ jangetanügüxü̃. Rü jema nüxĩra jéma naxü̃tawa nguxü̃na naca, rü nhanagürü:
“¿Nhuxre i nüxü̃́ cungetanüxü̃ i chorü cori?” nhanagürü.
6 —Rü nüma nanangãxü̃, rü nhanagürü:
“Nüxü̃́ chanangetanü i 100 i data i chixü̃”, nhanagürü. Rü jema coriarü duü̃xü̃ rü nhanagürü nüxü̃:
“Nhaã nixĩ i popera i curü ngetanü nawa ngóxü̃. ¡Rü paxa írüto rü to i popera naxü, rü 50 i dataguxicatama naxü i curü ngetanü!” nhanagürü.
7 —Rü jemawena rü jema to ga duü̃xü̃ ga norü coriaxü̃́ nangetanüxü̃na naca, rü nhanagürü:
“¿Cuma rü nhuxre jiĩxü̃ i nüxü̃́ cungetanüxü̃ i chorü cori?” nhanagürü. Rü nüma rü nanangãxü̃, rü nhanagürü:
“Nüxü̃́ chanangetanü i 100 i chacu i trigu”, nhanagürü. Rü jema coriarü duü̃xü̃ rü nhanagürü nüxü̃:
“Nhaã nixĩ i popera i curü ngetanü nawa ngóxü̃. ¡Rü paxa írüto rü to i popera naxü rü 80 i chacuguxicatama naxü i curü ngetanü!” nhanagürü.
8 —Rü norü cori rü nüxü̃ nicua̱xüü̃ãma ga jema norü duü̃xü̃ ga chixexü̃, jerü nüxü̃ nadau ga nhuxãcü na naxããẽxü̃chixü̃. Rü pemaã nüxü̃ chixu rü nhama i naãnecü̱̃ã̱x i duü̃xü̃gü, rü ngẽma Tupanaãxü̃́ jaxõgüxü̃ i duü̃xü̃güarü jexera paxa naxca̱x nadaugü na nhuxãcü nüxü̃ natúxü̃ i duü̃xü̃gü.
9 —Rü pemaã nüxü̃ chixu rü ngẽma nhama i naãne i chixexü̃wa pexü̃́ ngẽxmaxü̃ rü name nixĩ i ngẽmamaã nüxü̃́ penangúchaü̃xẽẽ i duü̃xü̃gü na Tupanaxü̃tawa nangugüxü̃. Rü ngẽmaãcü i ngẽxguma nagu̱xgu i ngẽma nhama i naãnewa pexü̃́ ngẽxmaxü̃ rü peju̱xgu, rü tá pexü̃́ nangẽxma ja Penatü ja pexü̃ jaxucü i dauxü̃guxü̃ i naãnewa.
10 —Jíxema meã namaã icuáxe ega woo noxretama tümame̱xẽwa ngẽxmagu, rü ngẽxguma muxü̃ma tümame̱xẽwa ngẽxmagu rü tá ta meã namaã itacua̱x. Notürü jíxema chixri namaã icuáxe ega noxretama tümame̱xẽwa ngẽxmagu, rü ngẽxguma muxü̃ma tümame̱xẽwa ngẽxmagu rü ngẽxgumarüü̃ tá ta chixri namaã itacua̱x.
11 —Rü ngẽxguma tama meã namaã ipecua̱xgu i ngẽma pexme̱xwa ngẽxmaxü̃ i nhama i naãne i chixexü̃wa, ¿rü texé tá pexme̱xgu tanaxü i ngẽma aixcuma mexü̃ i Tupanaãrü ixĩxü̃?
12 —Rü ngẽxguma tama meã namaã ipecua̱xgu i ngẽma Tupana pexna ãxü̃ i nhama i naãnewa, ¿rü nhuxãcü tá pexna nanaxã i pechica i dauxü̃guxü̃ i naãnewa?
13 —Taxucürüwama i wüxi i duü̃xü̃ rü nataxrearü coriã̱x. Erü wüxi i norü corichi rü tá naxai, rü ngẽma to rü tá nüxü̃ nangechaü̃. Rü e̱xna wüxica̱x rü tá meã napuracü rü ngẽma to rü tá nüxü̃ naxo. Rü pema rü taxucürüwama Tupanaca̱x pemaxẽ ega perü dĩẽruguxicatama perüxĩnüẽgu —nhanagürü ga Ngechuchu.
14 Notürü ga jema Parichéugü rü poraãcü norü dĩẽruguama narüxĩnüẽ. Rü jemaca̱x Ngechuchuxü̃ nacugüe ga jexguma nüxü̃ naxĩnüẽgu ga guxü̃ma ga jema ore.
15 Rü jexguma ga Ngechuchu rü nhanagürü nüxü̃: —Pema nixĩ i duü̃xü̃güpe̱xewa meã pemaxẽnetaxü̃, notürü Tupana pexü̃ nacua̱x na ṯacügu perüxĩnüẽxü̃. Rü woo duü̃xü̃gü pexü̃ nicua̱xüü̃gü naxca̱x i ngẽma pexüxü̃, notürü Tupana rü naãẽwa nangu̱x i ngẽma —nhanagürü ga Ngechuchu.
Tupanaãrü mugü ga Muĩsé ümatüxü̃ rü nhuxãcü ãẽ̱xgacü na jiĩxü̃ ja Tupanachiga
16 Rü jexguma ga Ngechuchu rü nhanagürü: —Noxri najexma ga Tupanaãrü mugü ga Muĩsé duü̃xü̃güxü̃ ngu̱xẽẽxü̃, rü jema ngu̱xẽẽtae ga nuxcümaü̃güxü̃ ga Tupanaãrü orearü uruü̃gü duü̃xü̃güxü̃ namaã ngu̱xẽẽxü̃. Notürü jexguma Juã́ũ ga baiü̃xẽẽruü̃ ínguxguwena, rü marü duü̃xü̃gümaã nüxü̃ chixuchiga i Tupanaãrü ore i mexü̃ i nhuxãcü ãẽ̱xgacü na jiĩxü̃. Rü nhu̱xma rü guxü̃ma i ngẽma duü̃xü̃gü rü poraãcü nügü naporaexẽẽ na jachocuxü̃ca̱x i ngẽ́ma Tupana ãẽ̱xgacü íixĩxü̃wa.
17 —Naxü̃pa na janguxü̃ i Tupanaãrü mugü rü woo wüxi i mu i íramarexü̃ jixĩgu, rü naguxchaxü̃chi na ijanaxoxü̃ i ngẽma nüxü̃ jaxuxü̃. Notürü aixcuma narütauxchamaẽ nixĩ na ijanaxoxü̃ i nhama i naãne rü guxü̃ma i ngẽma dauxü̃wa nüxü̃ idauxü̃.
Ngechuchu namaã nangúexẽẽtae na tama namexü̃ na texé tümamaxü̃ ítáxü̃
18 —Ngẽxguma wüxi ja jatü ítáma̱xgu rü naĩ i ngemaã naxãma̱xgu rü Tupanape̱xewa rü pecadu naxü. Rü texé ja jíxema ngĩmaã ãmaxẽ i wüxi i nge i ngĩte ngĩxü̃ íta̱xcü, rü Tupanape̱xewa rü tüma rü ta pecadu taxü.
Jatü ga muãrü dĩẽruã̱xü̃chixü̃chiga rü Lázaruchiga
19 —Najexma ga wüxi ga jatü ga muãrü dĩẽruã̱xü̃chixü̃ ga guxü̃guma mexẽchixü̃ ga naxchirugu icu̱xü̃. Rü guxü̃ ga ngunexü̃gu rü mexẽchixü̃ ga peta naxü.
20 —Rü najexma ta ga wüxi ga jatü ga ngearü dĩẽruã́cü ga Lázarugu ãẽ́gacü. Rü narüxoxone, rü guxü̃guma jema dĩẽruã̱xü̃chixü̃pataa̱xwa nhaxtüanewa najarütooxü̃.
21 —Rü guma Lázaru rü nanangṍxchaü̃ ga jema õnatüchi ga jema jatü ga dĩẽruã̱xü̃chixü̃ãrü mechawa rüjiiixü̃. Rü naxca̱x naxĩ ga airugü, rü nanawearü o̱xriã̱xgü.
22 —Rü wüxi ga ngunexü̃ naju ga guma ngearü dĩẽruã́cü, rü dauxü̃cü̱̃ã̱x ga Tupanaãrü orearü ngeruü̃gü rü dauxü̃guxü̃ ga naãnewa nanagagü na wüxiwa Abrã́ũmaã najexmaxü̃ca̱x. Rü naju ta ga jema jatü ga dĩẽruã̱xü̃chixü̃, rü inajata̱xgü ga duü̃xü̃gü.
23 —Rü ngẽma nachica i Tupana ṉg̱oxogüxü̃ nagu pocuxü̃wa naxũ ga jema jatü ga dĩẽruã̱xü̃chixü̃ rü jéma poraãcü ngúxü̃ ninge. Rü dauxü̃ nadau, rü jaxü̃gu Abrã́ũxü̃ nadau na Lázarumaã wüxiwa najexmaxü̃ ga dauxü̃guxü̃ ga naãnewa.
24 —Rü jexguma ga jema jatü ga dĩẽruã̱xü̃chichiréxü̃ rü aita naxü rü nhanagürü:
“Pa O̱xi Pa Abrã́ũx, ¡cuxü̃́ changechaü̃tümüü̃, rü nuã namu ja Lázaru na dexámaã nügü jawaixpe̱xeme̱xẽãcüma choxü̃ janawaixpe̱xearü conüã́xü̃ca̱x! Erü poraãcü choxü̃́ nangu̱x i nuã üxüwa”, nhanagürü.
25 —Notürü Abrã́ũ rü nhanagürü nüxü̃:
“Pa Chaunex, ¡nüxna nacua̱xãchi na taxuü̃ma cuxü̃́ taxuxü̃ ga jexguma cumaxü̃gu! Notürü Lázaru rü poraãcü chixexü̃ nüxü̃ naxüpetü. Rü ngẽmaca̱x i nhu̱xma rü nuã mexü̃wa nangẽxma, rü cuma rü ngẽ́ma pocuchicawa ngúxü̃ cuinge.
26 —Rü nhu̱xmachi nangẽxma i wüxi i taxüchixü̃ i ngatexü̃ i tórü ngãxü̃wa üxü̃. Rü ngẽmaca̱x ega númacü̱̃ã̱x ngẽ́ma ĩxchaü̃gu, rü taxucürüwama ngẽ́ma naxĩ. Rü woo ngẽ́macü̱̃ã̱x núma ĩxchaü̃gu rü taxucürüwama núma naxĩ”, nhanagürü.
27 —Rü jexguma ga jema jatü ga dĩẽruã̱xü̃chichiréxü̃ rü nhanagürü:
“Cuxü̃ chaca̱a̱xü̃, Pa O̱xi, Pa Abrã́ũx, na chaunatüpatawa cunamuxü̃ca̱x ja Lázaru.
28 —Erü ngẽ́ma nangẽxmagü ja wüxime̱ẽ̱xpü̱x ja chaueneẽgü. Rü chanaxwa̱xe na namaã nüxü̃ na janaxuxü̃ca̱x na tama nuã nhaã pocuchica i poraãcü choxü̃́ ínangúxü̃wa naxĩxü̃ca̱x”, nhanagürü.
29 —Notürü ga Abrã́ũ rü nhanagürü nüxü̃:
“Cueneẽgü nüxü̃́ nangẽxma i Tupanaãrü mugü ga Muĩsé ümatüxü̃ rü jema ore ga nuxcümaxü̃güxü̃ ga Tupanaãrü orearü uruü̃gü ümatüxü̃. Rü name nixĩ i ngẽma orega na naxĩnüẽxü̃”, nhanagürü.
30 —Rü jexguma ga jema jatü ga dĩẽruã̱xü̃chichiréxü̃ rü Abrã́ũxü̃ nangãxü̃, rü nhanagürü:
“Ngẽmáãcü, Pa O̱xi, Pa Abrã́ũx, notürü ngẽxguma chi wüxi i duü̃xü̃ i juchiréxü̃ ngẽ́ma ũxgu rü namaã nüxü̃ janaxuxgu, rü chi nüxü̃ narüxoe i nacüma i chixexü̃”, nhanagürü.
31 —Notürü Abrã́ũ, rü nhanagürü nüxü̃:
“Ngẽxguma tama naga naxĩnüẽgu ga jema ore ga Muĩsé ümatüxü̃ rü jema ore ga nuxcümaü̃güxü̃ ga Tupanaãrü orearü uruü̃gü ümatüxü̃, rü woo chi wüxi i marü juwa írüdaxü̃ i duü̃xü̃ ngẽ́ma ũxgu, rü namaã nüxü̃ janaxuxgu i ore, rü tau chima nüxü̃́ najaxõgü”, nhanagürü.
