Luca 18:1-43
18 Rü Ngechuchu rü wüxi ga to ga cua̱xruü̃xü̃ namaã nixu na jemawa nangúexẽẽãxü̃ca̱x na nhuxãcü nanaxwa̱xexü̃ na taguma nüxü̃ nachaueãcüma guxü̃guma najumuxẽgüxü̃.
2 Rü nhanagürü nüxü̃ ga norü ngúexü̃gü: —Wüxi ga ĩãnewa najexma ga wüxi ga ãẽ̱xgacü ga tama Tupanaxü̃ ngechaü̃xü̃ rü taxúexü̃ma cuáxchaü̃xü̃.
3 —Rü guma ĩãnewatama ijexma ga wüxi ga nge ga jutecü. Rü guxü̃guma jema ãẽ̱xgacüxü̃tawa ixũẽcha na ngĩxü̃ nangü̃xẽẽxü̃ca̱x, rü na ngĩrü uwanüna ngĩxü̃ ínapoxü̃xü̃ca̱x.
4 —Rü muẽ̱xpü̱xcüna jéma ixũũxü̃, notürü jema ãẽ̱xgacü rü tama ngĩxü̃ narüngü̃xẽẽchaü̃. Notürü düxwa nagu narüxĩnü ga jema ãẽ̱xgacü rü naãẽwa nhanagürü:
“Chama rü tama Tupanaxü̃ changechaü̃, rü taxúexü̃ma chacuáxchaü̃.
5 —Notürü ngẽma choxü̃ na nachixeweechaxü̃ca̱x i nhaã nge, rü noxtacüma tá ngĩxü̃ charüngü̃xẽẽ na tama jeü̃cürü choxü̃ nachixeweechaxü̃ca̱x”, nhanagürü.
6 Rü Cori ga Ngechuchu rü nhanagürü: —Jema nixĩ ga norü ore ga jema ãẽ̱xgacü ga chixexü̃.
7 —¿Taux e̱xna i Tupana rü paxa tüxü̃ nangü̃xẽẽxü̃ ja jíxema duü̃xẽ ja tüxü̃ jadexechixe i ngẽxguma chütacü rü ngunecü rü norü ngü̃xẽẽca̱x nüxna tacaxgu i tümaãrü jumuxẽwa?
8 —Rü pemaã nüxü̃ chixu rü Tupana rü paxatáma tüxü̃ narüngü̃xẽẽ. Notürü ngẽxguma wenaxãrü núma chaxũxgu i chama i Tupana Nane na duü̃xü̃xü̃ chiĩxü̃, ¿rü nhuxre i duü̃xü̃gü i aixcuma jaxõgüxü̃xü̃ tá ichajangau i nhama i naãnewa? —nhanagürü ga Ngechuchu.
Cua̱xruü̃ ga Parichéugu ixuxü̃ rü dĩẽruarü deruü̃gu ixuxü̃
9 Rü Ngechuchu rü to ga ore ga cua̱xruü̃xü̃ nixu naxca̱x ga nhuxre ga duü̃xü̃gü ga nügü icua̱xüü̃güxü̃ rü tama togüxü̃ cuáxchaü̃güxü̃.
10 Rü nhanagürü: —Taxre ga jatü rü tupauca ga taxü̃newa najajumuxẽgü. Rü wüxi rü Parichéu nixĩ, rü jema to rü wüxi ga jatü ga Romaãrü ãẽ̱xgacüca̱x dĩẽru ngĩxü̃ dexü̃ nixĩ.
11 —Rü jema Parichéu rü jexma nachi, rü nhaããcü najumuxẽ:
“Pa Tupanax, moxẽ cuxna chaxã erü tama togü i duü̃xü̃gürüü̃ chixĩ. Rü tama togürüü̃ changĩ́ta̱x, rü tama ngẽmarüü̃ taxü̃ i chixexü̃ chaxü rü e̱xna wüxi i nge i ãtecümaã ichape. Rü bai i nhaã jatü i Romaãrü ãẽ̱xgacüca̱x dĩẽru ngĩxü̃ dexü̃rüü̃ chixĩ.
12 —Chama rü guxcü ja jüxügu rü taxree̱xpü̱xcüna chaxaure rü tama chachibü na cugu charüxĩnüxü̃ca̱x. Rü chorü dĩẽruwa rü guxü̃guma meã cuxna chanaxã i ngẽma cuxna üxü̃”, nhanagürü.
13 —Notürü ga guma jatü ga Romaãrü ãẽ̱xgacüca̱x dĩẽru ngĩxü̃ decü, rü jaxü̃gu narüxã̱ũ̱x. Rü namuü̃ ga dauxü̃ na nadawenüxü̃, rü jema norü ngechaü̃maã nügüremügu najajauxãchi, rü nhanagürü:
“Pa Tupanax, ¡Cuxü̃́ changechaü̃tümüü̃! Erü wüxi i pecaduã́xü̃ chixĩ”, nhanagürü ga guma jatü.
14 —Rü ngẽmaca̱x pemaã nüxü̃ chixu rü guma jatü ga Romaãrü ãẽ̱xgacüca̱x dĩẽru ngĩxü̃ decü rü jexguma napataca̱x nataegugu rü Tupanape̱xewa rü mecü nixĩ. Notürü jema Parichéu rü Tupana rü tama namaã nataãẽ. Erü texé ja tügü írütaxe rü Tupana tá tüxü̃ naxãnexẽẽ. Notürü texé ja tügü írüxíraxe rü Tupana rü tá tüxü̃ nicua̱xüü̃ —nhanagürü ga Ngechuchu.
Ngechuchu rü meã buã̱xgüxü̃ najaxu
15 Rü jéma Ngechuchuxü̃tawa tüxü̃ tagagü ta ga buã̱xgü na tüxü̃ jangõgüchigüxü̃ca̱x. Notürü jexguma norü ngúexü̃gü jemaxü̃ dauxgügu rü tüxü̃ ningagü ga guxema tümaxãcüegü Ngechuchuxü̃tawa tüxü̃ gagüxe.
16 Notürü Ngechuchu rü nügüxü̃tawa tümaca̱x naca ga guxema buã̱xta rü nhanagürü norü ngúexü̃güxü̃: —Chanaxwa̱xe i chauxü̃tawa naxĩ i buxü̃gü. ¡Rü tãṹ i nüxna penachu̱xuxü̃! Erü Tupana ãẽ̱xgacü íixĩxü̃wa rü tümaca̱x nixĩ ja jíxema nhaã buxü̃gürüü̃ ixĩgüxe.
17 —Aixcuma pemaã nüxü̃ chixu rü texé ja tama wüxi i buxü̃rüü̃ Tupanaxü̃ jaxúxe na tümaãrü ãẽ̱xgacü na jiĩxü̃ca̱x, rü tagutáma nagu taxücu i Tupana ãẽ̱xgacü íixĩxü̃wa —nhanagürü ga Ngechuchu.
Wüxi ga jatü ga dĩẽruã̱xü̃chicü Ngechuchumaã nidexa
18 Rü wüxi ga jema Judéugüarü ãẽ̱xgacü rü Ngechuchuna naca rü nhanagürü: —Pa Ngúexẽẽruü̃ ja Mecüx, ¿ṯacü tá chaxüxü̃ na chanajaxuxü̃ca̱x i maxü̃ i taguma gúxü̃? —nhanagürü.
19 Rü Ngechuchu nanangãxü̃ rü nhanagürü nüxü̃: —¿Tü̱xcüü̃ “Mecü” nhacurügü choxü̃? Erü Tupanaxĩcatama nixĩ ja mecü ixĩcü, rü nataxuma i to i mecü ixĩxü̃.
20 —Cuma nüxü̃ cucua̱x i Tupanaãrü mugü i nhaxü̃:“¡Tãũxü̃táma naĩ i ngemaã icupe, rü tãũxü̃táma cumáẽta, rü tãũxü̃táma cungĩ́ta̱a̱x, rü tãũxü̃táma doraxü̃ cuixu i togüchiga, rü tümaga naxĩnü ja cunatü rü cue!”
nhaxü̃.
21 Rü jexguma ga guma jatü rü nhanagürü Ngechuchuxü̃: —Woetama chorü bucüma meãma chajanguxẽẽ i guxü̃ma i ngẽma mugü i nüxü̃ cuixuxü̃ —nhanagürü.
22 Rü jemaxü̃ naxĩnügu ga Ngechuchu rü nhanagürü: —Wüxixicatama cuxü̃́ nataxu, rü ngẽma nixĩ na namaã cutaxexü̃ i guxü̃ma i curü ngẽmaxü̃gü rü togü i ngearü dĩẽruã̱xgüxü̃na na cunaxãxü̃ i curü natanü, rü ngẽxguma rü tá cuxü̃́ nangẽxma i cuchica i dauxü̃guxü̃ i naãnewa. Rü nhu̱xmachi marü name i chawe curüxũ —nhanagürü.
23 Notürü jemaxü̃ naxĩnügu ga guma jatü rü poraãcü inajarümaãchi, jerü namuãrü dĩẽruã̱xü̃chi.
24 Rü jexguma Ngechuchu nüxü̃ da̱xgu ga nhuxãcü na nangechaü̃xü̃, rü nhanagürü nüxü̃ ga norü ngúexü̃gü: —Naguxchaxü̃chi tá nixĩ na Tupana ãẽ̱xgacü íixĩxü̃wa na jachocuxü̃ i ngẽma dĩẽruã̱xü̃chigüxü̃.
25 —Rü dücax, wüxi i cameru rü taxucürüwama wüxi ja ucumaxẽtüwa naxüpetü. Rü ngẽxgumarüü̃ ta nixĩ i wüxi i duü̃xü̃ i dĩẽruã̱xü̃chixü̃ rü taxucürüwama Tupana ãẽ̱xgacü íixĩxü̃wa nixücu [ega norü dĩẽruguama naxĩnügu rü tama jaxõõgu —nhanagürü.]
26 Rü jexguma jemaxü̃ naxĩnüẽgu ga duü̃xü̃gü rü nhanagürügü: —¿E̱xna texé tá ja najaxúxe i maxü̃ i taguma gúxü̃? —nhanagürügü.
27 Rü Ngechuchu nhanagürü nüxü̃: —Duü̃xü̃gü rü taxuacüma nügü namaxẽẽ, notürü Tupanaãxü̃́ rü natauxcha na namaxẽxẽẽãxü̃ —nhanagürü.
28 Rü Pedru nhanagürü Ngechuchuxü̃: —Pa Corix, toma rü jéma tanawogü ga guxü̃ma ga torü jemaxü̃gü na cuwe tarüxĩxü̃ca̱x —nhanagürü.
29 18:29-30 Rü jexguma ga Ngechuchu rü nhanagürü nüxü̃ ga norü ngúexü̃gü: —Aixcuma pemaã nüxü̃ chixu rü texé ja Tupanaca̱x tümapatana, rü e̱xna tümanatüna, rü e̱xna tümaẽna, rü e̱xna tümaẽneẽgüna, rü e̱xna tümaẽja̱xgüna, rü e̱xna tümama̱xna, rü e̱xna tümaxãcügüna ngẽ́ma ixũxẽ na Tupanaãxü̃́ tapuracüxü̃ca̱x, rü nhama i naãnewa tátama poraãcü tanajaxu i tümaãrü natanü. Rü dauxü̃guxü̃ i naãnewa rü tá ta tanajaxu i maxü̃ i taguma gúxü̃ —nhanagürü.
30 Nüü̃ nadau 18:29
Ngechuchu rü wenaxãrü nanaxunagü ga norü juxchiga
31 Rü Ngechuchu rü noxrüwama naxca̱x naca ga norü ngúexü̃gü, rü nhanagürü nüxü̃: —Nhu̱xma rü Jerucharéü̃wa tá taxĩ na ngẽ́ma janguxü̃ca̱x i guxü̃ma ga jema ore ga nuxcümaxü̃güxü̃ ga Tupanaãrü orearü uruü̃gü ümatüxü̃ ga chauchiga.
32 —Rü Jerucharéü̃cü̱̃ã̱x i duü̃xü̃gü rü tá to i nachiü̃ãnecü̱̃ã̱xna choxü̃ namugü. Rü ngẽma duü̃xü̃gü rü tá chagu nidauxcüraü̃gü, rü tá chamaã naguxchigagü, rü tá chauchametüwa nacuaixgüe.
33 —Rü tá choxü̃ nac̱uaixgü, rü jixcüra rü tá choxü̃ nima̱xgü. Notürü tamaẽ̱xpü̱x i ngunexü̃guwena rü tá wenaxãrü chamaxü̃ —nhanagürü.
34 Notürü jema norü ngúexü̃gü rü tama nüxü̃ nacua̱xgüéga ga na ṯacüchiga jiĩxü̃ ga jema ore ga namaã nüxü̃ jaxuxü̃. Jerü poraãcü nüxü̃́ naguxcha ga aixcuma nüxü̃ na nacua̱xgüxü̃ca̱x.
Ngechuchu nanamexẽẽ ga wüxi ga ngexetücü ga Jericúcü̱̃ã̱x
35 Rü jexguma Ngechuchu ĩãne ga Jericúwa nguxchaü̃gu, rü jéma namacüwawa narüto ga wüxi ga jatü ga ngexetücü ga dĩẽruca̱x jéma iwémécü.
36 Rü jexguma guma ngexetücü nüxü̃ ĩnügu ga muxü̃ma ga duü̃xü̃gü na jéma chopetüxü̃, rü duü̃xü̃güna naca ga ṯacü na ngupetüxü̃.
37 Rü nanangãxü̃gü, rü nhanagürügü: —Ngechuchu ja Nacharétucü̱̃ã̱x nuã naxüpetü —nhanagürügü.
38 Rü jexguma ga guma ngexetücü rü tagaãcü nhanagürü: —Pa Ngechuchux, Pa Dawítanüxü̃x, ¡cuxü̃́ changechaü̃tümüü̃! —nhanagürü.
39 Rü jema duü̃xü̃gü ga Ngechuchupe̱xegu ĩxü̃, rü nanangagü ga na ijanangeáxü̃ca̱x. Notürü guma ngexetücü rü jexeraãcü tagaãcü nhanagürü: —Pa Dawítanüxü̃x, ¡cuxü̃́ changechaü̃tümüü̃! —nhanagürüama.
40 Rü jexma najachiãchi ga Ngechuchu, rü duü̃xü̃güxü̃ namu na naxü̃tawa nagagüãxü̃ca̱x. Rü jexguma marü naxü̃tawa nanguxgu, rü guma ngexetücüna naca ga Ngechuchu, rü nhanagürü:
41 —¿Ṯacü i cunaxwa̱xexü̃ na cumaã chanaxüxü̃? —nhanagürü. Rü guma ngexetücü nanangãxü̃ rü nhanagürü: —Pa Corix, chanaxwa̱xe na choxü̃ cuidauchixẽẽxü̃ —nhanagürü.
42 Rü Ngechuchu nhanagürü nüxü̃ —¡Idauchi! Rü marü cuxca̱x nitaane erü cujaxõ —nhanagürü.
43 Rü jexgumatama nidauchi ga guma ngexetücü, rü Ngechuchuwe narüxũ, rü Tupanaxü̃ nicua̱xüü̃chigü. Rü guxü̃ma ga duü̃xü̃gü ga nüxü̃ daugüxü̃ ga jema ngupetüxü̃ rü Tupanaxü̃ nicua̱xüü̃gü ta.
