Luca 19:1-48
19 Rü Jericúwa nangu ga Ngechuchu, rü guma ĩãnegu naxücu na nawa naxüpetüxü̃ca̱x.
2 Rü jéma najexma ga wüxi ga jatü ga dĩẽruã̱xü̃chixü̃ ga Zaquéugu ãẽ́gaxü̃. Rü nüma nixĩ ga naẽru ga jema jatügü ga Romaãrü ãẽ̱xgacüca̱x dĩẽru ngĩxü̃ ideetanüxü̃.
3 Rü jema Zaquéu rü poraãcü nüxü̃́ nangúchaü̃ ga Ngechuchuxü̃ na nadauxü̃ na nüxü̃ nacuáxü̃ca̱x. Notürü taxuacüma nüxü̃ nadau, jerü namuxũchi ga duü̃xü̃gü, rü nhu̱xmachi nanuxchanexü̃chi ga nümax.
4 Rü jemaca̱x Ngechuchupe̱xegu najangu, rü namacüwawa wüxi ga naĩgu naxĩnagü na Ngechuchuxü̃ nadauxü̃ca̱x ga jexguma jéma naxüpetügu.
5 Rü jexguma jéma naxüpetügu ga Ngechuchu, rü dauxü̃ nadau natüü̃wa ga guma naĩ. Rü nhanagürü nüxü̃: —Pa Zaquéux, ¡paxa írüxĩ i ngẽ́ma! Erü cupatawa tá changu i nhu̱xma —nhanagürü.
6 Rü paxa ínarüxĩ ga Zaquéu, rü taãẽãcüma Ngechuchuxü̃ najaxu.
7 Rü jexguma jemaxü̃ nadaugügu ga duü̃xü̃gü, rü guxü̃ma inanaxügüe ga Ngechuchuchiga na jadexagüxü̃. Rü nhanagürügü: —¿Nhuxãcü i nüma rü wüxi i duü̃xü̃ i pecaduã́xü̃patawa nangu? —nhanagürügü.
8 Rü jexguma ga Zaquéu rü inachi rü nhanagürü Ngechuchuxü̃: —Dücax, Pa Corix, chama rü ngearü dĩẽruã̱xgüxü̃na tá chanaxã i ngãxü̃gu i guxü̃ma i chorü ngẽmaxü̃gü. Rü ngẽxguma chi texé tüxü̃ chawomüxẽẽãcüma tüxü̃́ changĩ̱xgu, rü ãgümücüe̱xpü̱xcüna tá tüxü̃́ ngĩxü̃ chataeguxẽẽ i ngẽma tümaãrü dĩẽru —nhanagürü.
9 Rü Ngechuchu rü nhanagürü nüxü̃: —Rü nhama i ngunexü̃gu cupatawa nangu i maxü̃ i taguma gúxü̃, erü cuma rü ta rü Abrã́ũrüü̃ cujaxõ.
10 —Rü chama i Tupana Nane na duü̃xü̃xü̃ chiĩxü̃, rü nhama i naãnewa chaxũ na naxca̱x chajadauxü̃ca̱x i ngẽma duü̃xü̃gü i ijarütauxexü̃ na chanamaxẽxẽẽxü̃ca̱x —nhanagürü.
Cua̱xruü̃ ga dĩẽrugu ixuxü̃
11 Rü joxni jema Ngechuchuarü ore inaxĩnüẽjane ga duü̃xü̃gü, rü Ngechuchu rü wüxi ga to ga ore ga cua̱xruü̃xü̃ namaã nixu, jerü marü Jerucharéü̃xü̃ ningaica, rü duü̃xü̃gü nagu rüxĩnüẽgu rü paxa tá ínangu ga Tupana na norü ãẽ̱xgacü jiĩxü̃ca̱x.
12 Rü jexguma ga Ngechuchu rü nügüchiga nidexa rü nhanagürü nüxü̃: —Najexma ga wüxi ga jatü ga taxü̃ ga cori ixĩcü ga najaxucü ga ore na nachiü̃ãneãrü ãẽ̱xgacüxü̃tawa naxũxü̃ca̱x ga jaxü̃wa na jema ãẽ̱xgacü nüxü̃ unetaxü̃ca̱x na guma nawa ne naxũxü̃ne ga ĩãneãrü ãẽ̱xgacü jiĩxü̃ca̱x.
13 —Rü jexguma taũta inaxũãchigu, rü naxca̱x nangema ga 10 ga norü duü̃xü̃gü. Rü wüxichigüna ngĩxü̃ naxã ga wüxitachinü ga tatanücü ga dĩẽru. Rü nhanagürü nüxü̃:
“¡Ngĩmaã pepuracüe rü ngĩxü̃ peimuxẽẽ i nhaã dĩẽru nhu̱xmatáta chataegu!” nhanagürü.
14 —Notürü jema ĩãnecü̱̃ã̱x ga duü̃xü̃gü rü nachi naxaie ga guma cori. Rü jemaca̱x nawenaãma najamugü ga nhuxre ga orearü ngeruü̃gü na nachiü̃ãneãrü ãẽ̱xgacümaã nüxü̃ janaxugüxü̃ca̱x na tama nanaxwa̱xegüxü̃ na norü ãẽ̱xgacüxü̃ na jiĩxü̃ca̱x ga guma cori.
15 —Notürü nachiü̃ãneãrü ãẽ̱xgacü rü najangucuchixẽẽãma ga guma cori. Rü nhu̱xmachi ga guma cori rü norü ĩãneca̱x nataegu na jéma ãẽ̱xgacü na jiĩxü̃ca̱x. Rü jexguma ínanguxgu rü naxca̱x nangema ga jema 10 ga norü duü̃xü̃gü ga dĩẽru nüxna ngĩxü̃ naxãxü̃, jerü nüxü̃ nacuáxchaü̃ ga nhuxrechigü ngĩxü̃ na jamuxẽẽxü̃ ga norü dĩẽru ga wüxichigü ga jema norü duü̃xü̃gü.
16 —Rü jema nüxĩra dĩẽru nüxna ngĩxü̃ naxãxü̃ rü norü corixü̃tawa nangu, rü nhanagürü:
“Pa Corix, curü dĩẽru rü 10 e̱xpü̱xcüna ngĩxü̃ chimuxẽẽ”, nhanagürü.
17 —Rü guma Cori ga jexwaca ãẽ̱xgacüxü̃ ingucuchicü rü nanangãxü̃, rü nhanagürü:
“Wüxi i mexü̃ i chorü duü̃xü̃ cuixĩ. Maneca meãma namaã cupuracü i ngẽma íraxü̃ i dĩẽru i cuxna chaxãxü̃. Rü nhu̱xma rü 10 ja ĩãnegüarü ãẽ̱xgacüxü̃ tá cuxü̃ chixĩxẽẽ”, nhanagürü.
18 —Rü jéma nangu ga to ga norü duü̃xü̃, rü nhanagürü:
“Pa Corix, curü dĩẽru rü wüxime̱ẽ̱xpü̱xcüna ngĩxü̃ chimuxẽẽ”, nhanagürü.
19 —Rü norü cori nanangãxü̃ rü nhanagürü nüxü̃:
“Cuma rü wüxime̱ẽ̱xpü̱x ja ĩãnegüarü ãẽ̱xgacüxü̃ tá cuxü̃ chixĩxẽẽ”, nhanagürü.
20 —Rü jéma nangu ga to ga norü duü̃xü̃ rü nhanagürü nüxü̃:
“Pa Corix, nhaã ijixĩ i curü dĩẽru. Rü wüxi ja dechugu ngĩxü̃ chanuque, rü ngẽmaãcü ngĩmaã changuxü̃.
21 —Jerü cuxca̱x chamuü̃, erü wüxi i jatü i aüxü̃ cuixĩ. Rü cunajauxtanü i ngẽma tama cuxrü ixĩxü̃, rü cunajaxu i nanetüarü o i ngextá tama cuma ícutoexü̃wa”.
22 —Rü jexguma ga guma ãẽ̱xgacü rü nhanagürü nüxü̃:
“Wüxi i chorü duü̃xü̃ i chixexü̃ cuixĩ i cumax. Rü curü oretama nixĩ i cuxü̃ ixuxü̃ na cuchixexü̃. Marü nüxü̃ cucua̱xchire̱x ga na chaxaüxü̃, rü chanajautanüxü̃ i ngẽma tama choxrü ixĩxü̃, rü chanajaxuxü̃ i nanetüarü o i tama chama ichatoxü̃.
23 —¿Notürü tü̱xcüü̃ tama bancugu choxü̃́ ngĩmaã cunguxü̃ i chorü dĩẽru na ngẽ́ma choxü̃́ ngĩxü̃ jamuxẽẽgüxü̃ca̱x, rü ngẽmaãcü mucü ngĩxü̃ na chajaxuxü̃ca̱x i ngẽxguma íchanguxgu?” nhanagürü.
24 —Rü jexguma ga ãẽ̱xgacü rü jema jexmagüxü̃maã nüxü̃ nixu, rü nhanagürü:
“¡Nüxna ngĩxü̃ pejaxu i ngẽma dĩẽru, rü ngẽma 10 i dĩẽru nüxü̃́ ngẽxmaxü̃na ngĩxü̃ pexã!” nhanagürü.
25 —Rü nümagü rü nanangãxü̃gü, rü nhanagürügü:
“Notürü, Pa Corix, nüma rü marü nüxü̃́ ingẽxma i 10 i dĩẽru”, nhanagürügü.
26 —Rü guma ãẽ̱xgacü nanangãxü̃, rü nhanagürü:
“Pemaã nüxü̃ chixu rü texé ja chauga ĩnüxẽ rü jexera tá tüxna chanaxã. Notürü texé ja tama chauga ĩnüxẽ rü tá tüxna chanajaxu i woo ngẽma íraxü̃ i tüxü̃́ ngẽxmaxü̃.
27 —Rü jema chorü uwanügü ga tama naxwa̱xegüxü̃ ga norü ãẽ̱xgacüxü̃ na chiĩxü̃, ¡rü nuã penagagü, rü nuã chape̱xegu pejaḏai!” nhanagürü.
Ngechuchu rü Jerucharéü̃gu naxücu
28 Rü jema ore ga cua̱xruü̃xü̃ jaxuxguwena ga Ngechuchu, rü inixũchigü ga Jerucharéü̃wa na naxũxü̃.
29 Rü jexguma marü nawa nangugüchaü̃gu ga guma ĩãnegü ga Bechagué rü Betániã ga Oriwéranecüarü Ma̱xpǘneãrü ngaicamana jexmagüne, rü Ngechuchu nanamu ga taxre ga norü ngúexü̃gü.
30 Rü nhanagürü nüxü̃: —¡Gua ĩãnexãcüwa pexĩ! Rü ngẽxma tá nüxü̃ pejangau i wüxi i cowaru i ngexwaca jaxü̃ i ngẽxma ngaxü̃xü̃ i taguma texé natagu aunagüxü̃. ¡Rü pejawẽxü̃, rü nuã penaga!
31 —Rü ngẽxguma texé pexna c̱axgu na ṯacüca̱x pejawẽxü̃xü̃ i ngẽma cowaru, ¡rü tümamaã nüxü̃ peixu rü nhapegügü:
“Torü Cori nanaxwa̱xe”, nhapegügü tüxü̃!
32 Rü jéma naxĩ ga jema taxre ga norü ngúexü̃gü. Rü jexma nüxü̃ najangau ga jema cowaru ga Ngechuchu namaã nüxü̃ ixuxü̃rüü̃.
33 Rü jexguma jawẽxü̃güãgu ga jema cowaru, rü norü joragü rü jema ngúexü̃güna nacagüe, rü nhanagürügü: —¿Tü̱xcüü̃ pejawẽxü̃ i ngẽma cowaru? —nhanagürügü.
34 Rü nümagü nanangãxü̃gü, rü nhanagürügü: —Torü Cori nanaxwa̱xe —nhanagürügü.
35 Rü Ngechuchuxü̃tawa nanagagü ga jema cowaru. Rü jema norü ngúexü̃gü rü norü dejuxü̃chirumaã nanatütagü. Rü nhu̱xmachi Ngechuchuxü̃ natagu naxaunagüxẽẽgü.
36 Rü duü̃xü̃gü rü Ngechuchupe̱xewa norü dejuxü̃chirumaã najac̱ẖamagü ga nama.
37 Rü jexguma inaxügüãgu na ínaxĩgüxü̃ nawa ga jema nama ga Oriwéranecüarü Ma̱xpǘnewa ijarüdaexü̃, rü guxü̃ma ga jema duü̃xü̃gü ga jaxõgüxü̃ ga nawe rüxĩxü̃ rü inanaxügü ga taãẽãcüma aita na naxüexü̃ rü tagaãcü Tupanaxü̃ na jacua̱xüü̃güxü̃ naxca̱x ga guxü̃ma ga jema cua̱xruü̃gü ga taxü̃ ga nüxü̃ nadaugüxü̃ ga Tupanaãrü poramaã naxüxü̃ ga Ngechuchu.
38 Rü nhanagürügü: —Namexẽchi ja daa tórü ãẽ̱xgacü ja Tupana núma namucü. ¡Rü petaãẽgü, Pa Dauxü̃cü̱̃ã̱x. Rü nüxü̃ peicua̱xüü̃gü ja Tupana! —nhanagürügü.
39 Rü jéma duü̃xü̃gütanüwa najexmagü ga nhuxre ga Parichéugü. Rü nhanagürügü Ngechuchuxü̃: —Pa Ngúexẽẽruü̃x, ¡Jangagü i ngẽma cuwe rüxĩxü̃ i duü̃xü̃gü na janachianegüxü̃ca̱x! —nhanagürügü.
40 Notürü Ngechuchu nanangãxü̃ rü nhanagürü nüxü̃: —Pemaã nüxü̃ chixu rü ngẽxguma chi ijanangea̱xgügu i nhaã duü̃xü̃gü, rü daa nutagü ja namacüwawa ngẽxmagücü rü chi nüxĩ aita naxüe —nhanagürü.
41 Rü jexguma Jerucharéü̃ãrü ngaicamana nanguxgu ga Ngechuchu, rü guma ĩãnecü̱̃ã̱x ga duü̃xü̃güca̱x naxaxu.
42 Rü nhanagürü: —Pa Jerucharéü̃cü̱̃ã̱xgü, chierü nhama i ngunexü̃gu nüxü̃ pecua̱xgu na texé aixcuma taãẽ pexna ãxü̃. Notürü ngẽma rü pexchawa inicu̱x i nhu̱xma, rü taxuacüma nüxü̃ pecua̱x.
43 —Rü tá guxchaxü̃gü pexü̃ naxüpetü. Rü perü uwanügü tá nanaxü i norü poxü̃chica i norü guxü̃cüwawa ja perü ĩãne. Rü norü churaragü tá pexü̃ ínachoeguãchi, rü guxü̃cüwawa tá pexca̱x ne naxĩ.
44 —Rü tá nagu napogüe ja perü ĩãne, rü tá pexü̃ nadai. Rü taxucütáma ja nuta ngextá nügüxétü nanugüxüra i perü ĩãneãrü poeguxü̃tapüwa. Rü ngẽmaãcü tá pexü̃ naxüpetü, jerü tama nüxü̃ pecua̱xgüchaü̃ ga jexguma Tupana petanügu naxũãnegu —nhanagürü.
Ngechuchu rü tupauca ga taxü̃newa ínanawoxü̃ ga duü̃xü̃gü ga jéma taxegüxü̃
45 Rü Ngechuchu rü tupauca ga taxü̃newa nangu rü jexma naxücu. Rü inanaxügü na ínawoxü̃ãxü̃ ga jema duü̃xü̃gü ga tupauca ga taxü̃newa taxegüxü̃.
46 Rü Ngechuchu rü nhanagürü nüxü̃: —Tupanaãrü ore i ümatüxü̃wa rü nhanagürü:“Chapata rü jumuxẽpataü̃ nixĩ”.
Notürü pema rü ngĩ́ta̱a̱xgüxü̃pataü̃ pejaxĩxẽẽ —nhanagürü.
47 Rü guxü̃ ga ngunexü̃gu rü tupauca ga taxü̃newa najangu̱xẽẽtae ga Ngechuchu. Notürü ga paigüarü ãẽ̱xgacügü, rü ngúexẽẽruü̃gü ga Muĩséarü mugüwa ngu̱xẽẽtaegüxü̃, rü Jerucharéü̃ãrü ãẽ̱xgacügü, rü naxca̱x nadaugü ga nhuxãcü tá na jama̱xgüãxü̃ca̱x.
48 Notürü taxucürüwa ṯacü namaã naxügü, jerü guxü̃ma ga duü̃xü̃gü rü namaã nataãẽgü, rü meã inarüxĩnüẽ ga norü ore.
