Luca 21:1-38
21 Rü jexguma tupauca ga taxü̃newa najexmagu ga Ngechuchu, rü jéma nüxü̃ nadau ga nhuxãcü duü̃xü̃gü ga idĩẽruã́xü̃ Tupanana ngĩxü̃ na naxãgüxü̃ ga norü dĩẽru ga tupaucaarü dĩẽruchiü̃wa.
2 Rü ngĩxü̃ nadau ta ga wüxi ga ngecü ga jutecü ga ngearü dĩẽruã̱xcü ga tupaucaarü dĩẽruchiü̃gu taxretachinü ga íraxü̃chicü ga dĩẽru ngĩxü̃ ixücuchicü.
3 Rü nhanagürü ga Ngechuchu: —Aixcuma pemaã nüxü̃ chixu rü nhaã ngecü i jutecü i ngearü dĩẽruã̱xcü rü guxü̃ i togü i dĩẽru ngĩxü̃ ixãgüxü̃ãrü jexera ngĩxü̃ ixã.
4 —Jerü guxü̃ma ga togü rü ngĩxü̃ inaxã ga jema nüxü̃́ íjaxügücü. Notürü ngĩma ngĩxü̃́ natauxjane ngĩxü̃ ixã ga gu̱xcüma ga ngĩxü̃́ jexma̱xcü ga ngĩrü õnatanü —nhanagürü.
Ngechuchu nanaxunagü na tupauca ja taxü̃negu tá napogüexü̃
5 Rü nhuxre ga norü ngúexü̃gü rü nidexagü nachiga ga tupauca ga taxü̃ne ga nhuxãcü na namexẽchixü̃ ga naxtapü̱x ga nutanaxca̱xgü, rü na namexẽchixü̃ ga guxü̃ma ga guma tupaucaarü jemaxü̃gü ga duü̃xü̃gü nüxna ãmarexü̃. Rü jexguma ga Ngechuchu rü nhanagürü:
6 —Wüxi i ngunexü̃ rü guxü̃netama ja daa tupauca ja nüxü̃ pedauxü̃ne, rü tá nagu napogüe. Rü naxtapü̱xarü nutagü rü taxucütáma nügüétü naxüxüra, rü bai ja wüxi —nhanagürü.
Cua̱xruü̃gü i tá nüxü̃ idauxü̃ naxü̃pa na nagúxü̃ i naãne
7 Rü jexguma ga norü ngúexü̃gü rü Ngechuchuna nacagü, rü nhanagürügü: —Pa Ngúexẽẽruü̃x, ¿nhuxgu tá nixĩ i nangupetüxü̃ i ngẽma nüxü̃ cuixuxü̃? ¿Rü ṯacüwa tá nüxü̃ tacua̱x na nangupetüchaü̃xü̃ i ngẽma? —nhanagürügü.
8 Rü Ngechuchu rü nhanagürü: —¡Pexuãẽgü tá na taxuü̃ma pexü̃ womüxẽẽxü̃ca̱x! Erü muxũchixü̃ tá chagu nügü nicu̱xgü rü tá ínangugü rü nhanagürügü tá:
“Chama nixĩ i Cristu, rü paxa tá nagu̱x i naãne”, nhanagürügü tá pexü̃. ¡Notürü tãũxü̃táma nüxü̃́ pejaxõgü!
9 —Rü ngẽxguma tá nüxü̃ pexĩnüẽgu na nügü naḏaixü̃ i wüxi i nachiü̃ãne to i nachiü̃ãnemaã, rü e̱xna nüxü̃ pexĩnüẽgu na wüxi i nachiü̃ãnewatama rü duü̃xü̃gü rü norü ãẽ̱xgacümaã nügü naḏaixü̃, ¡rü tãũxü̃táma peḇaixãchiãẽgü! Erü ngẽmaãcü tá nangupetü i noxrix. Notürü tãũxü̃táma naãneãrü gu̱x nixĩ i ngẽma.
10 —Erü wüxi i ãẽ̱xgacüarü churaragü rü to i ãẽ̱xgacüarü churaragümaã tá nügü nadai. Rü wüxi i nachiü̃ãne rü to i nachiü̃ãnemaã tá nügü nadai.
11 —Rü nümaxü̃ i nachiü̃ãnegüwa rü poraãcü tá naxĩã̱xãchiane, rü poraãcü tá nangu̱x i taija, rü tá nataxüchi i ḏaaweane. Rü duü̃xü̃gü tá nüxü̃ nadaugü i dauxü̃wa i ṯacü i namaã naḇaixãchiexü̃, rü taxü̃ i cua̱xruü̃gü.
12 —Notürü naxü̃pa i guxü̃ma i ngẽma rü duü̃xü̃gü tá pexü̃ ínajauxü̃, rü tá pewe ningẽxü̃tanü. Rü ngutaque̱xepataü̃güwa tá pexü̃ nagagü na ngẽ́ma pexna nacagüxü̃ca̱x, rü tá pexü̃ napocue. Rü nachiü̃ãnegüarü ãẽ̱xgacügüpe̱xewa tá pexü̃ nagagü, naxca̱x na chorü duü̃xü̃gü peixĩgüxü̃.
13 —Rü ngẽmaãcü tá pexü̃́ natauxcha na ãẽ̱xgacügümaã nüxü̃ peixuxü̃ i chauchiga.
14 —Rü ngẽxguma tá ngẽ́ma pexü̃ nagagügu, ¡rü tãṹ i pexoegaãẽgüxü̃ naxca̱x na ṯacümaã tá penangãxü̃xü̃ na pegüétüwa pechogüxü̃ca̱x!
15 —Erü chama tá pexü̃ charüngü̃xẽẽ na nüxü̃ pecuáxü̃ca̱x na ṯacümaã penangãxü̃xü̃ i perü uwanügü. Rü nümagü rü tãũxü̃táma nüxü̃ nacua̱xgü na ṯacümaã pexü̃ nangãxü̃güxü̃ i ngẽxguma.
16 —Notürü pema rü woo penatügü, rü peegü, rü peeneẽgü, rü peeja̱xgü, rü petanüxü̃gü, rü pemücügü rü tá napeechitaegü na purichíagüxü̃tawa pexü̃ íjaxuaxü̃güxü̃. Rü purichíagü rü tá pexü̃ nadai i nhuxre i pemax.
17 —Rü guxü̃ i naãnewa rü duü̃xü̃gü tá pechi naxaie, erü choxü̃́ pejaxõgü rü chorü duü̃xü̃gü peixĩgü.
18 —Notürü woo ṯacü pexü̃ üpetügu rü Tupaname̱xẽwa tá pengẽxmagü, rü nüma tá pexü̃ ínapoxü̃ rü bai i wüxi i pejae tá inajarütaxu.
19 —Rü ngẽxguma aixcuma pejaxõgüamagu rü tama choxü̃ ípeta̱xgu, rü tá penajauxgü i maxü̃ i taguma gúxü̃.
20 —Rü ngẽxguma nüxü̃ peda̱xgu na perü uwanügüarü churaragü Jerucharéü̃xü̃ íchomaẽguãchixü̃, rü ngẽmawa tá nüxü̃ pecua̱x na paxa tá nagu napogüexü̃ ja jima ĩãne.
21 —Rü jíxema Judéaanewa ngẽxmagüxe rü name nixĩ i ma̱xpǘneãnewa tabuxmü. Rü jíxema Jerucharéü̃wa ngẽxmagüxe rü tanaxwa̱xe na paxa ítachoxü̃xü̃. Rü jíxema tümaãnewa ngẽxmagüxe rü tama name na ĩãneca̱x tawoeguxü̃.
22 —Erü ngẽma ngunexü̃gügu tá ínangu i Tupanaãrü pocu. Rü ngẽmaãcü tá najanguxẽẽ i guxü̃ma i ngẽma norü ore i ümatüxü̃wa nüxü̃ jaxuxü̃.
23 —Rü ngẽma ngunexü̃gügu rü tá poraãcü tüxü̃́ naguxcha ja jíxema ngexegü ja iixãũcharaü̃güxe rü jíxema imaĩxãcügüxe. Erü tá nangẽxma i taxü̃ i ngúxü̃, rü Tupana rü poraãcü tá nanapocue i ngẽma duü̃xü̃gü.
24 —Rü nhuxre, rü tá norü uwanügü taramaã nanadai. Rü togü, rü tá ínanajauxü̃ na to i nachiü̃ãnewa nagagüãxü̃ca̱x. Rü nhu̱xmachi i ngẽma norü uwanügü rü tá nagu napogüe ja jima ĩãne ja Jerucharéü̃. Rü ngẽmaãcü tá nangupetü nhu̱xmatáta nawa nangu na Tupana ínamuxü̃xü̃ i ngẽma norü uwanügü.
Nhuxãcü tá nixĩ i ngẽxguma nataegugu ja Tupana Nane ja duü̃xü̃xü̃ ixĩcü
25 —Rü üa̱xcü, rü tawemacü, rü woramacurigü, rü tá naxüchicüügü. Rü guxü̃ i nachiü̃ãnegüwa rü duü̃xü̃gü rü tá nanaxi̱xãchiãẽtanü rü tá naḇaixãchiãẽgü namaã na poraãcü naxãũgaãchixü̃ i taxü̃ i taxtüarü juãpegü.
26 —Rü duü̃xü̃gü rü norü muü̃maã tá nijuãchitanü i ngẽxguma nagu naxĩnüẽgu i ngẽma üpetüchaü̃xü̃ i nhama i naãnewa. Erü woo guxü̃ma i ṯacü i dauxü̃wa nüxü̃ idauxü̃ rü tá naxĩã̱xãchitanü rü tá nu ne nanaxĩmare.
27 —Rü ngẽxguma rü guxü̃ i duü̃xü̃gü i nhama i naãnecü̱̃ã̱x rü tá choxü̃ nadaugü i ngẽxguma wüxi i caixanexü̃maã ícharüxĩ̱xgu rü núma chaxũxgu namaã i taxü̃ i chorü pora rü chorü mexü̃.
28 —Rü ngẽxguma inaxügügu na naxüpetüxü̃ i ngẽma pemaã nüxü̃ chixuxü̃, rü name nixĩ na petaãẽgüxü̃ rü meã pedaunagüxü̃, erü paxa tá íchangu na pexü̃ íchanguxü̃xẽẽxü̃ca̱x —nhanagürü.
29 Rü jemawena rü wüxi ga ore ga cua̱xruü̃xü̃ namaã nixu ga Ngechuchu, rü nhanagürü: —¡Dücax penangugü i figuera, rü e̱xna ngẽxü̃rüüxü̃mare i to i naĩgü!
30 —Rü ngẽxguma nüxü̃ peda̱xgu na ngexwaca naxüátüxü̃, rü ngẽmawa nüxü̃ pecua̱x na paxa tá taunecü na jiĩxü̃.
31 —Rü ngẽxgumarüü̃ ta i ngẽxguma nüxü̃ peda̱xgu na nangupetüxü̃ i ngẽma pemaã nüxü̃ chixuxü̃, rü ngẽmawa tá nüxü̃ pecua̱x na jimama jiĩxü̃ ja Tupana na ãẽ̱xgacü jiĩxü̃ca̱x.
32 —Aixcuma pemaã nüxü̃ chixu rü guxü̃ma i ngẽma nüxü̃ chixuxü̃ rü tá ningu naxü̃pa na najuexü̃ i duü̃xü̃gü i nhu̱xma maxẽxü̃.
33 —Dauxü̃guxü̃ i naãne rü nhama i naãne rü tá nagu̱x. Notürü chorü ore rü tagutáma inajarüxo.
34 —¡Pexuãẽgü na tama ṯacü rü chixexü̃gagu düxwa nüxü̃ perüxoexü̃ na pejaxõgüxü̃! Rü ngẽmaca̱x penaxwa̱xe na pegüna pedaugüxü̃ na tama pengãxẽxü̃ rü e̱xna nhama i naãneãrü ngúchaü̃guama na perüxĩnüẽxü̃. Erü ngürüãchi ngẽmagu íperüxĩnüẽjane tá pexü̃ íchajaḇaixgü.
35 —Rü nhama wüxi ja jüta ja ngürüãchi ṯacü ijaxúnerüü̃ tá nixĩ naxca̱x i guxü̃ma i duü̃xü̃gü i nhama i naãnecü̱̃ã̱x i ngẽxguma wenaxãrü núma chaxũxgu.
36 —Rü ngẽmaca̱x name nixĩ i pegü ípemexẽẽgü. ¡Rü guxü̃guma pejumuxẽgü na ngẽmaãcü tama pexü̃ naxüpetüxü̃ca̱x i ngẽma ãũcümaxü̃gü, rü aixcuma pemexü̃ca̱x i ngẽxguma chape̱xewa pengugügu! —nhanagürü ga Ngechuchu.
37 Rü guxü̃ ga ngunexü̃gügu rü tupauca ga taxü̃newa najexma ga Ngechuchu, rü duü̃xü̃güxü̃ nangúexẽẽ. Rü chütacü rü guma Ma̱xpǘne ga Oriwéranecügu ãẽ́ganegu najapeexü̃.
38 Rü guxü̃ma ga duü̃xü̃gü rü pa̱xmamaxü̃chi tupauca ga taxü̃newa nangugüxü̃ na Ngechuchuxü̃ naxĩnüẽxü̃ca̱x.
