Luca 22:1-71
22 Rü marü ningaica ga Judéugüarü peta ga Üpetüchiga ga nagu nangõ̱xgüãxü̃ ga põũ ga ngearü puxẽẽruü̃ã́xü̃.
2 Rü ga paigüarü ãẽ̱xgacügü rü ngúexẽẽruü̃gü ga Muĩséarü mugüwa ngu̱xẽẽtaegüxü̃ rü naxca̱x nadaugü ga nhuxãcü duü̃xü̃güechita Ngechuchuxü̃ na jama̱xgüxü̃, jerü duü̃xü̃güxü̃ namuü̃ẽ.
3 Rü jexguma ga Chataná rü Juda ga Icariótigu nangaxi. Rü nüma ga Juda rü jema 12 ga Ngechuchuarü ngúexü̃gü ga imugüxü̃tanüxü̃chire̱x nixĩ.
4 Rü nüma ga Juda rü ínajadau natanüwa ga paigüarü ãẽ̱xgacügü rü tupauca ga taxü̃neãrü purichíagüarü ãẽ̱xgacügü. Rü namaã nüxü̃ nixu ga nhuxãcü na natauxchaxü̃ ga Ngechuchuxü̃ na jajauxgüxü̃ca̱x.
5 Rü nümagü ga jema ãẽ̱xgacügü rü nataãẽgü. Rü dĩẽru Judana ngĩxü̃ naxuaxü̃gü.
6 Rü Juda rü: —Ngü̃ —nhanagürü ga jexguma. Rü inanaxügü ga naxca̱x na nadauxü̃ ga nhuxãcü duü̃xü̃güechita Ngechuchuxü̃ na jajauxgüxü̃ ga ãẽ̱xgacügü.
Üpetüchigaarü õnawa nachibü ga Cori
7 Rü nawa nangu ga jema petaarü ngunexü̃ ga nagu nangõ̱xgüãxü̃ ga põũ ga ngearü puxẽẽruü̃ã́xü̃. Rü jema nixĩ ga ngunexü̃ ga nagu carneruxacü jama̱xgüxü̃ naxca̱x ga Üpetüchigaarü peta.
8 Rü Ngechuchu nanamu ga Pedru rü Juã́ũ, rü nhanagürü nüxü̃: —¡Pejamexẽẽ̱x i tórü õna i Üpetüchigaca̱x! —nhanagürü.
9 Rü nümagü Ngechuchuxü̃ nangãxü̃gü, rü nhanagürügü: —¿Ngextá nixĩ i cunaxwa̱xexü̃ na tanamexẽẽxü̃? —nhanagürügü.
10 Rü Ngechuchu nanangãxü̃, rü nhanagürü: —Ngẽxguma Jerucharéü̃wa pengugügu rü ngẽxma tá nüxü̃ pejangau i wüxi ja jatü i wüxi i tü̃xü̃ i dexámaã ããcuxcü ngĩxü̃ ingexü̃. ¡Rü nawe perüxĩ nhu̱xmatáta napatawa pengugü!
11 —¡Rü jima ĩpata ja nagu jaxücune ja jima jatü, rü jima ĩãrü joramaã nüxü̃ peixu rü nhapegügü nüxü̃:
“Torü ngúexẽẽruü̃ rü nüxü̃ nacuáxchaü̃ na ngẽxü̃rüüxü̃ jiĩxü̃ i ngẽma ucapu i norü ngúexü̃gümaã tá nawa nachibüxü̃ i Üpetüchigaarü õnaca̱x”, nhapegügü nüxü̃!
12 —Rü tá pexü̃ nüxü̃ nadauxẽẽ i wüxi i ucapu i taxü̃ i marü mexẽẽxü̃ i norü dauxü̃chiü̃wa ngẽxmaxü̃. ¡Rü ngẽmawa tá penamexẽẽ i ngẽma õna i Üpetüchigaca̱x ixĩxü̃! —nhanagürü nüxü̃.
13 Rü jéma naxĩ ga nümagü rü nüxü̃ inajangaugü ga guxü̃ma jema Ngechuchu namaã nüxü̃ ixuxü̃rüü̃. Rü jéma nanamexẽẽgü ga õna ga Üpetüchigaca̱x ixĩxü̃.
14 Rü jexguma nawa nanguxgu ga ngora ga na nachibüexü̃, rü mechawa narüto ga Ngechuchu namaã ga norü ngúexü̃gü.
15 Rü jexguma ga Ngechuchu rü nhanagürü: —Nhuxãcü poraãcü choxü̃́ nangúchaü̃ na pemaã chachibüxü̃ i nhaã Üpetüchigaarü õnawa naxü̃pa na chajuxü̃.
16 —Notürü pemaã nüxü̃ chixu rü tãũxü̃táma wenaxãrü Üpetüchigaarü õnawa chachibü, nhu̱xmatáta chawa jangu i ngẽma Tupana naxwa̱xexü̃ —nhanagürü.
17 Rü jexguma nanajaxu ga wüxi ga copu ga wĩũmaã ããcuxü̃. Rü Tupanana moxẽ naxãxĩra, rü nhu̱xmachi nhanagürü nüxü̃ ga norü ngúexü̃gü: —¡Pejaxaxü ja daa wĩũ, rü pegümaã peṉg̱au!
18 —Erü pemaã nüxü̃ chixu rü tagutáma wena chajaxaxü ja wĩũ nhu̱xmatáta nawa nangu na pecaduarü ütanüca̱x chajuxü̃ na aixcuma pemaã inacuáxü̃ca̱x ja Tupana —nhanagürü.
19 Rü nanajaxu ta ga põũ, rü Tupanana moxẽ naxca̱x naxã. Rü nhu̱xmachi inanabücu, rü norü ngúexü̃güna nanaxã. Rü nhanagürü nüxü̃: —Nhaã põũ rü chaxune i pexca̱x juxü̃chiga nixĩ. ¡Rü nhaãwena rü nhaãcü tá penaxü na choxna pecua̱xãchiexü̃ca̱x! —nhanagürü.
20 Rü marü chibüwena rü to ga copu ga wĩũmaã ããcuxü̃ norü ngúexü̃güna naxã, rü nhanagürü: —Daa wĩũ rü Tupanaãrü uneta i ngexwacaxü̃xü̃ãrü cua̱xruü̃ nixĩ. Rü chaugü ja pexca̱x ibacüwa Tupana pexü̃ nüxü̃ nadauxẽẽ na aixcuma jiĩxü̃ i ngẽma norü uneta.
21 —Notürü ngẽma jatü i chauechita ãẽ̱xgacügüna choxü̃ muxchaü̃xü̃, rü nuã mechawa tamaã narüto i nhu̱xmax.
22 —Rü chama i Tupana Nane na duü̃xü̃xü̃ chiĩxü̃, rü Chaunatü ixunetaxü̃rüü̃ tá chaju. Notürü wüxi i ngechaü̃xü̃chi tá nixĩ naxca̱x i ngẽma jatü i ãẽ̱xgacügüna choxü̃ muxü̃.
23 Rü jexguma ga norü ngúexü̃gü rü inanaxügüe ga nügüna na nacagüexü̃, rü nhanagürügü: —¿Texé tá tixĩ ja jíxema naẽchita ãẽ̱xgacügüna namuxẽ? —nhanagürügü.
Norü ngúexü̃gü rü nügümaã niporagatanücüü nachiga na texé tá tiĩxü̃ ja natanüwa guxããrü jexera ixĩxẽ
24 Rü jexguma ga jema ngúexü̃gü rü nügümaã niporagatanücüü nachiga na texé tá tiĩxü̃ ja natanüwa guxããrü jexera ixĩxẽ.
25 Notürü ga Ngechuchu rü nhanagürü nüxü̃: —Nhama i naãnewa rü guxü̃ i nachiü̃ãnegüarü ãẽ̱xgacügü, rü poraãcü norü duü̃xü̃güxü̃ namugü. Rü nhu̱xmachi nügü jaxugügu rü norü duü̃xü̃güarü daruü̃ i mexü̃gü nixĩgü.
26 —¡Notürü pema rü tãũxü̃táma ngẽxgumarüü̃ peixĩgü! Rü ngẽxguma texé naxwa̱xegu na guxããrü jexera tiĩxü̃ i petanüwa, rü name nixĩ na tügü ítarüxíraxü̃ i guxü̃ma i tümamücügütanüwa. Rü texé naxwa̱xegu na peeru tiĩxü̃ i petanüwa, rü name nixĩ i noxri rü guxããrü ngü̃xẽẽruü̃ tixĩ.
27 —Rü nhama i naãnewa rü corigü rü mechawa narütogü na nachibüexü̃ca̱x, rü norü duü̃xü̃gü nixĩ i ngẽma naxca̱x õna ixüxü̃ rü nüxü̃ rüngü̃xẽẽxü̃. Notürü tatanüwa rü tama ngẽmaãcü nixĩ, erü chama i perü cori na chiĩxü̃ rü perü ngü̃xẽẽruü̃ chixĩ.
28 —Rü pemagü nixĩ ga guxü̃guma chauxü̃tawa pejexmagüxü̃ ga jexguma ngúxü̃ chingexgu.
29 —Rü ngẽmaca̱x i chama rü ãẽ̱xgacügüxü̃ pexü̃ chixĩgüxẽẽ jema chaunatü ãẽ̱xgacüxü̃ choxü̃ ingucuchixẽẽxü̃rüü̃.
30 —Rü ngẽmaãcü ãẽ̱xgacü íchixĩxü̃wa rü chamaã tá pechibüe rü tá pexaxegü. Rü ãẽ̱xgacüchicawa tá perütogü na norü maxü̃ca̱x nüxna pecagüxü̃ i guxü̃ma i Judéugü —nhanagürü.
Ngechuchu nüxü̃ nixu na Pedru tá nügü icúxü̃ na norü ngúexü̃ jiĩxü̃
31 Rü Pedruxü̃ nhanagürü ta ga Cori ga Ngechuchu: —Pa Pedrux, Chataná rü pexca̱x ínaca na chixexü̃maã poraãcü pexü̃ naxüxü̃ca̱x.
32 —Notürü chama rü Chaunatüxü̃ cuxca̱x chaca̱a̱xü̃ na taguma nüxü̃ curüxoxü̃ca̱x na cujaxõxü̃. Rü ngẽmaca̱x i cumax, Pa Pedru, rü ngẽxguma chauxca̱x cutaeguxgu, rü chanaxwa̱xe i nüxü̃ curüngü̃xẽẽ i cumücügü na nümagü rü jaxõgüechaãxü̃ca̱x —nhanagürü.
33 Rü nhanagürü ga Pedru: —Pa Corix, chama rü marü íchamemare na wüxigu cumaã na chapocuxü̃ rü e̱xna wüxigu cumaã na chajuxü̃ —nhanagürü.
34 Notürü Ngechuchu rü nhanagürü nüxü̃: —Pa Pedrux, cumaã nüxü̃ chixu rü nhamatama i chütaxü̃gu naxü̃pa na ota ic̱axü̃, rü cuma rü tamaẽ̱xpü̱xcüna tá nüxü̃ cuixu na tama choxü̃ cucuáxü̃ —nhanagürü.
Marü ningaica ga na guxchaxü̃gü nüxü̃ üpetüxü̃
35 Rü jexguma ga Ngechuchu rü norü ngúexü̃güna naca, rü nhanagürü: —Jexguma pexü̃ chimugügu ngearü chacuã̱xgüxemaã rü ngearü dĩẽruã̱xgüxemaã rü ngearü chapatuã̱xgüxemaã, ¿rü ṯacü pexü̃́ taxuxü̃ ga jexguma? —nhanagürü. Rü nümagü nanangãxü̃gü rü nhanagürügü: —Taxuü̃ma —nhanagürügü.
36 Rü jexguma norü ngúexü̃güxü̃ nhanagürü ga Ngechuchu: —Notürü nhu̱xma rü texé ja petanüwa ja chacuã́xẽ rü tanaxwa̱xe na ítajangexü̃ i tümaãrü chacu rü tümaãrü dĩẽruchixü̃ rü ta. Rü ngẽxguma texé ngearü taraã̱xgu rü tanaxwa̱xe i namaã tataxe i tümaãrü dejuxü̃chiru na tümaãrü poxü̃ruü̃ i taraca̱x tataxexü̃ca̱x.
37 —Erü pemaã nüxü̃ chixu rü chauchiga nixĩ i ngẽma Tupanaãrü ore i ümatüxü̃ i nhaxü̃:“Wüxi i máẽtaxü̃rüü̃ tá nanapocugü rü tá najama̱xgü”,
nhaxü̃. Erü guxü̃ma i ngẽma chauchiga ümatüxü̃ i Tupanaãrü ore i ümatüxü̃wa rü aixcuma ngẽmaãcü tá ningu —nhanagürü.
38 Rü jexguma ga norü ngúexü̃gü rü nhanagürügü: —Pa Corix, nuã nangẽxma i taxre i tara —nhanagürügü. Rü nüma ga Ngechuchu rü nanangãxü̃ rü nhanagürü: —Marü ningu i ngẽma —nhanagürü.
Ngechuchu rü Jechemaníwa najajumuxẽ
39 Rü jexguma ga Ngechuchu rü ínaxũxũ ga guma ĩãnewa. Rü Oriwéranecüarü Ma̱xpǘnewa naxũ, jerü woetama nacüma nixĩ ga jéma na naxũũxü̃xü̃. Rü norü ngúexü̃gü rü ta nawe narüxĩ.
40 Rü jexguma jema nachicawa nanguxgu, rü norü ngúexü̃güxü̃ nhanagürü: —¡Tupanana naxca̱x pec̱a na pexü̃ nangü̃xẽẽxü̃ca̱x na tama Chatanáãrü ügagu chixexü̃gu pej̱ixü̃ca̱x! —nhanagürü.
41 Rü jexguma ga Ngechuchu rü jéamaxü̃ra 50 ga metruwa norü ngúexü̃güna naxũ. Rü jexma nacaxã́pü̱xü rü najumuxẽ.
42 Rü nhanagürü: —Pa Chaunatüx, ngẽxguma cuma cunaxwa̱xegu, ¡rü nüxna choxü̃ ínanguxuchixẽẽ i nhaã ngúxü̃ i tá choxü̃ üpetüxü̃! Notürü chanaxwa̱xe i cunaxü i curü ngúchaü̃ rü tama i choxrü —nhanagürü.
43 Rü jexguma wüxi ga dauxü̃cü̱̃ã̱x ga Tupanaãrü orearü ngeruü̃ rü naxca̱x nango̱x, rü nanaporaxẽẽ.
44 Rü poraãcü nanaxi̱xãchiãẽ ga Ngechuchu, rü jemaca̱x jexeraãcü najumuxẽ. Rü jema na naxi̱xãchiãẽxü̃maã poraãcü nanaxaijaãchi. Rü guma norü aijacümaã nichuruxü̃ne. Rü nhama nagü waixü̃müãnewa ichuruxü̃rüü̃ nixĩ ga norü aijacü.
45 Rü jema ínajumuxẽxü̃wa rü inachi ga Ngechuchu, rü norü ngúexü̃gütanüwa naxũ. Rü nüxü̃ inajangau ga na ínapeexü̃ jerü norü ngechaü̃maã düxwa najaxtae.
46 Rü jexguma ga Ngechuchu rü nhanagürü nüxü̃: —¿Tü̱xcüü̃ ípepee? ¡Íperüdagü rü Tupanana naxca̱x pec̱a na pexü̃ nangü̃xẽẽxü̃ca̱x na tama Chatanáãrü ügagu chixexü̃gu pej̱ixü̃ca̱x! —nhanagürü.
Ngechuchuxü̃ nijauxgü
47 Rü jexguma íjadexajane ga Ngechuchu, rü jéma nangugü ga muxü̃ma ga duü̃xü̃gü. Rü Juda ga Ngechuchuarü ngúexü̃chire̱x ixĩxü̃ nixĩ ga naxũpe̱xexü̃. Rü Ngechuchuca̱x nixũ na nüxü̃ nawãĩxãcüma nüxü̃ namoxẽxü̃ca̱x.
48 Rü Ngechuchu rü nhanagürü: —Pa Judax, ¿tü̱xcüü̃ wüxi i wãxĩmaã cuchauechitae? —nhanagürü.
49 Rü jema togü ga Ngechuchuarü ngúexü̃gü ga naxü̃tawa jexmagüxü̃, rü jexguma nüxü̃ nadaugügu ga jema ngupetüxü̃ rü nhanagürügü nüxü̃: —Pa Corix, ¿cunaxwa̱xexü̃ na taramaã tanaḏaixü̃? —nhanagürügü.
50 Rü wüxi ga Ngechuchuarü ngúexü̃ rü paigüarü ãẽ̱xgacüarü duü̃xü̃xü̃ nanapi̱xẽẽ, rü ínanadae ga norü tügünechinü.
51 Notürü Ngechuchu rü nhanagürü: —¡Ngexrüma na pegü namaã peḏaixü̃! —nhanagürü. Rü jexguma ga Ngechuchu rü jema jatü ga ídaechinüxü̃xü̃ ningõgü, rü nanamexẽẽ.
52 Rü Ngechuchu namaã nidexa ga jema ãẽ̱xgacügü ga norü jauxwa jéma ĩxü̃. Rü jema ãẽ̱xgacügütanüwa najexmagü ga paigüarü ãẽ̱xgacügü, rü tupauca ga taxü̃neãrü purichíagüarü ãẽ̱xgacügü, rü Judéugüarü ãẽ̱xgacügü ga jaguã̱xgü. Rü Ngechuchu rü nhanagürü nüxü̃: —¿Tü̱xcüü̃ taragü rü naĩxmena̱xãgümaã chauxca̱x nuã pexĩ nhama wüxi i ngĩ́ta̱xáxü̃ chiĩxü̃rüü̃?
53 —Rü guxü̃ ga ngunexü̃gu ga jexguma petanüwa chajexmagu ga tupauca ga taxü̃newa, rü tama choxü̃ pejauxgü. Notürü marü nawa nangu na pexü̃́ natauxchaxü̃ na choxü̃ pejauxgüxü̃, erü nhama nixĩ i ngora na naporaxü̃ i Chataná —nhanagürü.
Pedru inajacu̱x na Ngechuchuxü̃ nacuáxü̃
54 Rü Ngechuchuxü̃ nijauxgü, rü paigüarü ãẽ̱xgacüpatawa nanagagü. Rü Pedru rü nawe narüxũ, notürü jaxü̃guma nüxü̃́ nixũchigü.
55 Rü jéma paigüarü ãẽ̱xgacüpataa̱xtüarü ngãxü̃wa, rü purichíagü nanaxügü ga wüxi ga üxü. Rü nüxü̃ ínachomaẽguãchi. Rü Pedru rü ta jéma natanüwa narüto.
56 Rü jexguma jéma üxücutüwa nato̱xgu ga Pedru, rü wüxi ga ngecü ga ãẽ̱xgacüarü duü̃xü̃ nüxü̃ idau. Rü meãma nüxü̃ idawenü, rü ngĩgürügü: —Nhaã jatü rü Ngechuchutanüxü̃ nixĩ —ngĩgürügü.
57 Notürü Pedru rü tama nüxü̃ nacuáxchaü̃ ga jema ore, rü nhanagürü: —Pa Ngecüx, chama rü tama nüxü̃ chacua̱x ja jima Ngechuchu —nhanagürü.
58 Notürü jixcamaxü̃ra rü to ga duü̃xü̃ Pedruxü̃ nadau, rü nhanagürü nüxü̃: —Cuma rü ta Ngechuchutanüxü̃ cuixĩ —nhanagürü. Notürü Pedru nanangãxü̃ rü nhanagürü: —Tama nixĩ, Pa Jatüx. Tama natanüxü̃ chixĩ —nhanagürü.
59 Rü wüxi ga ngora ngupetüguwena rü to ga duü̃xü̃ rü nüxĩ nhanagürüama: —Aixcumaxü̃chi nhaã jatü rü Ngechuchutanüxü̃ nixĩ, erü Gariréaanecü̱̃ã̱x nixĩ —nhanagürü.
60 Rü jexguma ga Pedru rü nhanagürü: —Pa Jatüx, tama nüxü̃ chacua̱x na ṯacüchigaxü̃ cuixuxü̃ —nhanagürü. Rü jexgumatama Pedru íidexajane rü nica ga ota.
61 Rü jexguma ga Cori ga Ngechuchu rü Pedruca̱x nügü ínidau. Rü nüma ga Pedru rü nüxna nacua̱xãchi ga jema ore ga Cori ga Ngechuchu namaã nüxü̃ ixuxü̃ ga nhaxü̃:
“Nhamatama i chütaxü̃gu naxü̃pa na ota ic̱axü̃, rü tamaẽ̱xpü̱xcüna tá nüxü̃ cuixu na tama chorü duü̃xü̃ cuiĩxü̃”, nhaxü̃.
62 Rü jexguma ga Pedru rü ínaxũxũ ga jéma. Rü poraãcüxü̃chi naxaxu.
Ngechuchugu nidauxcüraü̃gü
63 Rü jema jatügü ga Ngechuchuna daugüxü̃, rü nagu nidauxcüraü̃gü, rü nüxna nanac̱uaixcagüxü̃.
64 Rü najadüxétügü, rü nachametügu nidagügü, rü nhanagürügü: —¡Nüxü̃ nacua̱x na texé cuxü̃ na idagüxü̃! —nhanagürügü.
65 Rü muxü̃ma ga to ga ore ga chixexü̃ namaã nixugüe.
Ãẽ̱xgacügü ga tacügüpe̱xewa nanagagü ga Ngechuchu
66 Rü jexguma jangunegu rü nangutaque̱xegü ga Judéugüarü ãẽ̱xgacügü ga jaguã̱xgü, rü paigüarü ãẽ̱xgacügü, rü ngúexẽẽruü̃gü ga Muĩséarü mugüwa ngu̱xẽẽtaegüxü̃. Rü nhu̱xmachi norü purichíagüxü̃ namu na nape̱xewa Ngechuchuxü̃ nagagüxü̃ca̱x. Rü jéma Ngechuchuna nacagü, rü nhanagürügü:
67 —Toma rü nüxü̃ tacuáxchaü̃ rü cuma cuiĩxü̃ i Cristu rü e̱xna tama. ¡Tomaã cugü ixu! —nhanagürügü. Rü Ngechuchu nanangãxü̃ rü nhanagürü: —Ngẽxguma chi pemaã nüxü̃ chixuxgu na chama chiĩxü̃ i Cristu, rü tau chima choxü̃́ pejaxõgü.
68 —Rü ngẽxguma chi pexna chacaxgu na ṯacüca̱x choxna pec̱axü̃, rü tau chima choxü̃ pengãxü̃ga, rü tau chima choxü̃ pinge̱xgü.
69 —Notürü nhu̱xmawena rü chama i Tupana Nane na duü̃xü̃xü̃ chiĩxü̃ rü Chaunatü ja Tupana ja poracüxü̃tawa tá changẽxma —nhanagürü.
70 Rü jexguma guxü̃ma ga jema ãẽ̱xgacügü nüxna nacagü, rü nhanagürügü: —¿E̱xna cuma cuiĩxü̃ i Tupana Nane? —nhanagürügü. Rü Ngechuchu nanangãxü̃, rü nhanagürü: —Ngü̃. Tupana Nane chixĩ ngẽxgumarüü̃ i pematama nüxü̃ peixuxü̃rüü̃ —nhanagürü.
71 Rü jexguma nügümaã nhanagürügü ga jema ãẽ̱xgacügü: —Nhu̱xma rü marü taxuü̃ca̱xma naxca̱x tadau i to i duü̃xü̃gü i nüxü̃ ixuxü̃ i nhaã jatüchiga. Erü jixematama marü naã̱xwatama nüxü̃ taxĩnüẽ i norü ore na nhuxũ nhaxü̃ —nhanagürügü.
